ཐོག་མར་ས་མཐོར་སླེབས་དུས་ཆ་རྒྱུས་གང་ཡང་མེད་པ་ཞིག་ནས་ཞིང་འབྲོག་ལས་ཁྱབ་ཁོངས་ཀྱི་ལས་སྒོའི་རྐང་འཛིན་པའི་བར། ནག་ཆུ་གྲོང་ཁྱེར་སྲིད་གྲོས་ཀྱི་ཨུ་ཡོན་དང་གྲོང་ཁྱེར་ཞིང་ལས་གྲོང་གསེབ་ཅུས་ཀྱི་རིམ་པ་དང་པོའི་ཀྲུའུ་རེན་ཁོའོ་ཡོན་ཧྥུའུ་ཤིང་མིང་གིས་བྱང་རྩྭ་ཐང་དུ་ལས་ཀ་བྱས་ནས་བགྲང་བྱ་བཅུ་ལྷག་ཙམ་འགྲོ་གི་ཡོད་པས། ནག་ཆུ་སྔ་ས་ནས་ཁོང་གི་ཕ་ཡུལ་གཉིས་པར་གྱུར་ཡོད།

གཞི་རིམ་གྱི་འཐབ་ས་དང་པོར་གཞི་ཚུགས་ནས་དངོས་སྒྲུབ་འགན་སྒྲུབ་ཡག་པོ་བྱེད་པ་ནི་ཧྥུའུ་ཤིང་མིང་གིས་ལོ་མང་རིང་རྒྱུན་འཁྱོངས་བྱེད་པའི་དད་སེམས་རེད། ཉེ་བའི་ལོ་བཅུའི་རིང་། ཁོང་གིས་ལས་གནས་བརྟན་སྲུང་དང་ཡག་ཐོག་ཡག་བརྩེགས་ཡོང་བ་བྱས་ཏེ། སྔ་རྗེས་སུ་ནག་ཆུ་གྲོང་ཁྱེར་ཞིང་ལས་གྲོང་གསེབ་ཅུས་གནོད་འཚེ་སྔོན་འགོག་དང་ཉུང་གཏོང་གཞུང་ལས་ཁང་དང་། ཕྱུགས་ནད་ཚན་ཁག ཞིང་ལས་གཞུང་ལས་ཁང་གི་དྲུང་ཡིག་ཚན་ཁག་སོགས་ཀྱི་ཚན་ཁག་མང་པོར་ལས་འགན་ཁུར་མྱོང་བས་གྲོང་ཁྱེར་ཡོངས་ཀྱི་ཞིང་འབྲོག་ལས་ཀྱི་གཙོ་གནད་ལས་དོན་ཁག་ལ་རྒྱུས་མངའ་ཟབ་མོ་ལོན་ཡོད། དེ་དང་ཆབས་ཅིག་ཁོང་གིས་འབྲི་རུ་རྫོང་བན་དཀར་ཤང་བྱང་མདའ་གྲོང་ཚོ་དང་ལྷ་རི་རྫོང་མཚོ་སྟོད་ཤང་རྫ་ལོ་ནག་པོ་གྲོང་ཚོར་བཅའ་སྡོད་ཧྲུའུ་ཅི་དང་པོའི་འགན་སྔ་རྗེས་སུ་ཁུར་ནས་གཞི་རིམ་གྱི་འཐབ་ས་དང་པོར་ལས་ཀ་བྱེད་རིང་ལས་སྒོའི་འཇོན་ཐང་ཆེ་རུ་ཕྱིན་པ་མ་ཟད། མང་ཚོགས་ཀྱི་ལས་ཀའི་ཉམས་མྱོང་ཕུན་སུམ་ཚོགས་པོའང་བསགས་ཡོད། 2018ལོར་སྒྲིག་གཞི་སྒྱུར་བཅོས་དང་སྐབས་འཁེལ་བས་མི་སྣ་དཀོན་པ་དང་ལས་འགན་ལྕི་བའི་སྐབས་སུ་ཧྥུའུ་ཤིང་མིང་གིས་དཀའ་ངལ་ལ་མ་འཛེམས་པར་རང་འགུལ་ངང་ནག་ཆུ་གྲོང་ཨུད་གྲོང་གསེབ་ལས་དོན་གཞུང་ལས་ཁང་དང་འབབ་འཕར་གཞུང་ལས་ཁང་གི་ལས་འགན་གཙོ་བོ་ཁུར་ཡོད། ཉིན་རེར་དཀའ་སྤྱད་འབད་འབུངས་དང་ལས་གནས་བརྟན་སྲུང་ཧུར་ཐག་བྱས་ཏེ། ནག་ཆུ་གྲོང་ཁྱེར་གྱི་ཞིང་འབྲོག་པའི་འབབ་འཕར་སོགས་གཙོ་གནད་ལས་དོན་བརྟན་ལ་གོ་རིམ་ལྡན་པའི་ངང་སྤེལ་བར་ནུས་ཤུགས་ཡོད་རྒུས་སྐུལ་འདེད་བཏང་ནས་ལས་དོན་ཁག་རྒྱུན་དང་མཚམས་མི་ཆད་པའི་འགན་ལེན་བྱས་པ་རེད།

“སྐབས་དེ་དུས་ལས་ཀ་མང་བ་དང་མི་དཀོན་པས་ང་ཚོའི་ལས་དོན་མི་སྣ་ཡོངས་ཀྱིས་རྟག་ཏུ་ལས་དུས་འཕར་མ་དང་མཚན་འཁྱོངས་བྱེད་དགོས་པ་དང་། ཐ་ན་ཁ་ལག་ཀྱང་ཟ་ཁོམ་མེད། འོན་ཀྱང་མང་ཚོགས་ཀྱི་འབབ་འཕར་དང་ཐོན་ལས་འཕེལ་རྒྱས་དེ་དམངས་འཚོའི་དོན་ཆེན་དང་འབྲེལ་བ་ཡོད་པས། འཐུས་ཤོར་གཏན་ནས་གཏོང་མི་རུང”ཞེས་འདས་ཟིན་པའི་གནས་ཚུལ་ལ་ཕྱིར་དྲན་བྱེད་བཞིན་ཧྥུའུ་ཤིང་མིང་གིས་མྱོང་ཚོར་ཟབ་མོས་བརྗོད། དཀའ་སྤྱད་དངོས་སྒྲུབ་བྱས་ན་གྲུབ་འབྲས་མི་ཐོབ་ག་ལ་སྲིད། ནག་ཆུ་གྲོང་ཁྱེར་ཞིང་ལས་གྲོང་གསེབ་ཅུས་ཀྱི་ལས་རོགས་ཡོངས་ཀྱི་འབད་བརྩོན་དང་ནུས་ཤུགས་ཡོད་རྒུས་སྐུལ་འདེད་བཏང་བ་བརྒྱུད། 2022ལོར་ནག་ཆུ་གྲོང་ཁྱེར་ལ་ལྗོངས་ཡོངས་ཀྱི་འབབ་འཕར་སྔོན་ཐོན་གྱི་ས་ཁུལ་དང་གྲོང་ཁྱེར་གྱི་ཨང་གསུམ་པ་ཐོབ་པ་དང་བྱ་དགའི་དངུལ་སྒོར་ཁྲི་1500ཐོབ་ནས་ནག་ཆུ་གྲོང་ཁྱེར་གྱི་ཞིང་འབྲོག་ལས་སྤུས་འབྲས་ལེགས་གཉེར་དང་ཞིང་འབྲོག་པར་འབབ་འཕར་བརྟན་པོ་ཡོང་བར་སྒུལ་ནུས་ཆེན་པོ་བསྣན་ཡོད།

ཞིང་ལས་དང་གྲོང་གསེབ་ལས་རིགས་ཀྱི་སྲིད་གྲོས་ཨུ་ཡོན་ཡིན་པའི་ཧྥུའུ་ཤིང་མིང་གིས་རང་ངོས་ཀྱི་ཆེད་ལས་ལེགས་ཆར་གཞི་ཚུགས་ནས་ས་མཐོའི་ཞིང་འབྲོག་ལས་འཕེལ་རྒྱས་ལ་རྩེ་གཅིག་ཏུ་གཞོལ་བ་དང་། “འབྲོག་ལས་སྟོབས་ཆེན་གྲོང་ཁྱེར”འཛུགས་སྐྲུན་གྱི་དམིགས་ཚད་ལ་དམ་པོར་དམིགས་པ། འཐབ་ས་དང་པོར་གཞི་ཚུགས་ནས་བརྟག་ཞིབ་བྱེད་པ། ཨུ་ཡོན་གྱི་འགན་འཁྲི་ཧུར་ཐག་སྒྲུབ་པ། རང་འགུལ་ངང་ཐབས་དང་ཇུས་འདོན་པ་བཅས་བྱས་ཡོད།

ད་ཆ། ནག་ཆུར་རྒྱལ་ཁབ་རིམ་པའི་ཞིང་འབྲོག་ལས་དེང་རབས་ཐོན་ལས་གླིང་1བསྐྲུན་ཟིན་པ་དང་། རང་སྐྱོང་ལྗོངས་རིམ་པའི་སྣེ་འདྲེན་ཁེ་ལས་3དང་གྲོང་ཁྱེར་རིམ་པའི་སྣེ་འདྲེན་ཁེ་ལས་19སྐྱེད་སྲིང་དང་སྟོབས་ཆེར་བཏང་ཡོད། ཞིང་འབྲོག་ལས་ཀྱི་གཉེར་སྐྱོང་བྱེད་པོ་གསར་པ་རྒྱུན་མཐུད་འཕེལ་རྒྱས་དང་སྟོབས་ཆེར་ཕྱིན་ནས་རིམ་པ་མང་བ་དང་། ཁྱོན་ཡོངས་ལ་ཁྱབ་པ། ཚད་ལྡན་ཅན་བཅས་ཀྱི་དེང་རབས་ཞིང་འབྲོག་ལས་གཉེར་སྐྱོང་མ་ལག་བསྐྲུན་ཏེ་གྲོང་གསེབ་ཀྱི་ཐོན་ལས་དར་རྒྱས་དང་ཞིང་འབྲོག་པར་རྒྱུན་མཐུད་འབབ་འཕར་ཡོང་བར་རྨང་གཞི་བརྟན་པོ་འདིང་བཞིན་ཡོད།

འབྱུང་འགྱུར་སྐོར་གླེང་སྐབས་ཁོང་གིས“གོམ་སྟབས་རྗེས་མར་ངས་མུ་མཐུད་ལས་གནས་དང་ཐོག་མའི་བསམ་འདུན་བརྟན་སྲུང་དང་ཨུ་ཡོན་གྱི་འགན་འཁྲི་ཁུར་ནས་ཞིང་འབྲོག་ལས་སྐྱེ་ལྡན་ཅན་འཕེལ་རྒྱས་ཀྱི་འགྲན་ལམ་དུ་མུ་མཐུད་ཡག་པོ་བསྐྱོད་དེ། རྒྱུན་རྣམ་ཅན་གྱི་ཐོག་ནས་གཞི་རིམ་དུ་བརྟག་ཞིབ་གཏིང་ཟབ་བྱེད་པ་དང་། གནད་སྨིན་གྱི་ཐབས་དང་ཇུས་འདོན་པ། རང་འགུལ་ངང་རང་འགན་ཐེག་པ་ཁུར་ལེན་བཅས་བྱས་ནས་ས་མཐོའི་ཁྱད་ལྡན་ཞིང་འབྲོག་ལས་ཀྱི་ཁེ་སྤོགས་ཀྱིས་ཞིང་འབྲོག་པ་དེ་བས་མང་བར་ཕན་པ་ཐོབ་པ་བྱེད་ཀྱི་ཡིན”ཞེས་བརྗོད།