ཉེ་ཆར། བོད་རང་སྐྱོང་ལྗོངས་ཀྱི་ཀློག་པ་པོའི་མཐུན་ཚོགས་འཛུགས་པའི་ཚོགས་ཆེན་དང་ཚོགས་མིའི་ཚོགས་ཆེན་སྐབས་དང་པོ་ལྷ་སར་འཚོགས་པ་དེ་ཐོག་ནས་བོད་རང་སྐྱོང་ལྗོངས་ཀྱི་ཀློག་པ་པོའི་མཐུན་ཚོགས་དངོས་སུ་བཙུཌ་པ་མཚོན་གྱི་ཡོད།

བོད་རང་སྐྱོང་ལྗོངས་ཀྱི་ཀློག་པ་པོའི་མཐུན་ཚོགས་ནི་དེ་སྔའི་2018ལོའི་ཟླ་4པར་བཙུགས་པའི་ཧྥན་ཏེང་དཔེ་ཀློག་ལྷ་སའི་དཔེ་ཀློག་འདུ་ཚོགས་ཡིན་ཞིང་། དཔེ་ཀློག་འདུ་ཚོགས་བཙུགས་པ་ནས་བཟུང་ས་མཐོར་གཞི་ཚུགས་ཏེ་དཔེ་ཀློག་ལ་དགའ་ཞེན་ཆེ་བའི་དམངས་ཁྲོད་ཀྱི་སྟོབས་ཤུགས་གཅིག་ཏུ་བསྒྲིལ་ནས་བརྗོད་དོན་གཙོ་བོའི་དཔེ་ཀློག་དང་རིག་གནས་སྤེལ་རེས་ཀྱི་བྱེད་སྒོ་སྣ་ཚོགས་རྒྱུན་མཐུད་སྤེལ་ཏེ་མི་30ལྷག་ཙམ་ཡོད་པའི་ས་གནས་དེ་གའི་དཔུང་ཁག་ཅིག་སྐྱེད་སྲིང་བྱས་ཤིང་། དཔུང་ཁག་དེའི་དཔེ་ཀློག་ལ་དགའ་པོ་ཡོད་མཁན་རྣམས་སློབ་གསོ་དང་། སྨན་བཅོས། ཡུལ་སྐོར། ཁེ་ལས་སོགས་ཁྱབ་ཁོངས་ནས་ཡིན་པ་རེད།

བསྡོམས་རྩིས་བརྒྱབ་པར་གཞིགས་ན། ལོ་8རིང་མཐུན་ཚོགས་དེས་དམངས་ཡོངས་ཀྱི་སྤྱི་ཕན་དཔེ་ཀློག་ཁྱབ་གདལ་གཏོང་རྒྱུ་ཐོག་མཐའ་བར་གསུམ་དུ་མཐའ་འཁྱོངས་བྱས་ཤིང་། རིམ་རྩིས་བརྒྱབ་ན་དྲ་ཕྱིའི་དཔེ་ཀློག་བྱེད་སྒོ་ཐེངས་300ལྷག་ཙམ་སྤེལ་བ་དང་ཐེངས་གཅིག་ལ་ཆ་སྙོམས་མི་ཐེངས་40ལྷག་ཙམ་ཞུགས་ཡོད་པ་རེད། ནང་དོན་དེ་བོད་ཀྱི་ལོ་རྒྱུས་དང་། རྩོམ་རིག སྒྱུ་རྩལ། མི་རིགས་རིག་གནས་སོགས་ཁྱབ་ཁོངས་མང་པོར་ཁྱབ་ནས་འཐུས་སྒོ་ཚང་བའི་བྱེད་སྒོའི་ཇུས་འགོད་དང་གཉེར་སྐྱོང་ཉམས་མྱོང་བསགས་ཡོད།

བོད་རང་སྐྱོང་ལྗོངས་ཀྱི་ཀློག་པ་པོའི་མཐུན་ཚོགས་བཙུགས་པ་ལས་རང་ལྗོངས་སུ་རང་སྐྱོང་ལྗོངས་རིམ་པའི་དཔེ་ཀློག་རིགས་ཀྱི་སྤྱི་ཚོགས་རྩ་འཛུགས་ཐོག་མ་དེ་ཐོན་པ་མ་ཟད། དེ་ནི《དམངས་ཡོངས་ཀྱི་དཔེ་ཀློག་སྐུལ་སྤེལ་སྲོལ་ཡིག》ལག་བསྟར་དོན་འཁྱོལ་དང་སྤྱི་ཚོགས་ཀྱི་སྟོབས་ཤུགས་དམངས་ཡོངས་ཀྱི་དཔེ་ཀློག་ནང་ཞུགས་རྒྱུར་ཁྲིད་སྟོན་བྱེད་པའི་ཞིབ་ཕྲའི་བྱ་ཐབས་ཤིག་ཀྱང་རེད།