འདི་ནི་སྨྱུང་སྲུང་ཟླ་བའི་ཉིན་བཅུ་པའི་གྲོང་གི་ཧེ་ཨེར་ཨེ་ཅིབ་སྐྱེ་ཁམས་གླིང་གི་འཁོར་ཁང་དུ་བཟོ་པ་ཚོས་དྲོད་སྙོམས་འཕྲུལ་འཁོར་ཐོན་སྐྱེད་བྱེད་བཞིན་པ།

འདི་ནི་ཀྲུང་ཨེའི་སྨྱན་སྦྱོར་གྱི་གསར་འགོད་པས་སྐྱེ་ཁམས་གླིང་གི་ཐོན་རྫས་འགྲེམས་ཁང་ནང་ཐོན་རྫས་ཀྱི་ཐོན་སྐྱེད་གནས་ཚུལ་ཤེས་རྟོགས་བྱེད་བཞིན་པ།

འདི་ནི་འགྲེམས་ཁང་དུ་ལས་དོན་པས་གསར་འགོད་པར་ས་གནས་དེ་གས་ཐོན་སྐྱེད་བྱས་པའི་གོས་འཁྲུའི་འཕྲུལ་འཁོར་ངོ་སྤྲོད་བྱེད་བཞིན་པ།

ཨེ་ཅིབ་ཀྱི་རྒྱལ་ས་ཁེ་རོ་གྲོང་ཁུལ་གྱི་བྱང་ཤར་རྒྱུད་ཀྱི་སྤྱི་ལེ་60ལྷག་ཙམ་གྱི་སར་ཡོད་པའི་སྨྱུང་སྲུང་ཟླ་བའི་ཉིན་བཅུ་པའི་གྲོང་གི་བཟོ་ལས་ཁུལ་དུ་དེང་རབས་ཅན་གྱི་ཧེ་ཨེར་ཨེ་ཅིབ་སྐྱེ་ཁམས་གླིང་མངོན་གསལ་དོད་པོར་སྣང་། ཟླ་8ཚེས་27ཉིན་ཀྲུང་གོ—ཨེ་ཅིབ་སྨྱན་སྦྱོར་གྱི་སྤུས་ཚད་མཐོ་པོས“རྒྱུད་གཅིག་ལམ་གཅིག”མཉམ་སྐྲུན་གྱི་མཉམ་འབྲེལ་བཅར་འདྲི་ཚོགས་པ་སྐྱེ་ཁམས་གླིང་དུ་བསྐྱོད་དེ་རྒྱལ་ཁབ་གཉིས་པོའི་དངོས་སྒྲུབ་མཉམ་ལས་ཀྱི་འཕེལ་རིམ་ཤེས་རྟོགས་བྱས་ཡོད།

ཡངས་ཤིང་རྒྱ་ཆེ་བའི་ཐོན་སྐྱེད་འཁོར་ཁང་ནང་དྲོད་སྙོམས་འཕྲུལ་འཁོར་དང་། གོས་འཁྲུའི་འཕྲུལ་འཁོར། བརྙན་འཕྲིན་བཅས་རིག་ནུས་ཀྱི་ལས་རིམ་གསུམ་རིམ་པ་བཞིན་བསྒྲིགས་ཡོད། ཀྲུང་གོའི་དགེ་རྒན་གྱིས་མཛུབ་ཁྲིད་ཞིབ་ཚགས་བྱས་པ་བརྒྱུད། ས་གནས་དེ་གའི་བཟོ་པས་བྱང་ཆུབ་པོས་འཕྲུལ་ལག་བེད་སྤྱད་དེ་གོ་རིམ་ལྡན་པའི་ངང་ཐོན་སྐྱེད་བྱེད་བཞིན་ཡོད། སྐྱེ་ཁམས་གླིང་དེ་2024ལོའི་ཟླ་5པར་དངོས་སུ་སྒོ་ཕྱེ་ནས་དུས་ཐེངས་དང་པོའི་རྣམ་གྲངས་ཐོན་སྐྱེད་བྱེད་འགོ་ཚུགས་པ་དང་དུས་ཐེངས་གཉིས་པ་འཛུགས་སྐྲུན་གང་མགྱོགས་བྱེད་བཞིན་ཡོད། ཕྱོགས་ཡོངས་ནས་ཐོན་སྐྱེད་བྱེད་འགོ་ཚུགས་རྗེས་སྤྱིའི་ཐོན་ནུས་ཁྲི་150ལས་བརྒལ་ནས་དབུས་ཤར་དང་། ཨ་ཧྥེ་རི་ཁ་བྱང་མ། ཨ་ཧྥེ་རི་ཁའི་ཤར་རྒྱུད་དང་ལྷོ་རྒྱུད་བཅས་ཀྱི་མི་འབོར་དུང་ཕྱུར་20ཙམ་གྱི་ཁྲོམ་རར་ཁྱབ་རྒྱུ་རེད།

“དེ་ནི་ཀྲུང་གོའི་མྱུར་ཚད་རེད། སྐྱེ་ཁམས་གླིང་གིས་ལོ་གཅིག་ལྷག་ཙམ་ནང་བཟོ་གྲྭ་བསྐྲུན་པ་དང་། ཐོན་སྐྱེད་བྱེད་འགོ་ཚུགས་པ། ཕྱིར་གཏོང་བྱས་པ་བཅས་མཆོང་སྐྱོད་ལྟ་བུའི་འཕེལ་རྒྱས་བྱུང་བ་ཤེས་རྟོགས་བྱུང་རྗེས། ཨེ་ཅིབ《དགོང་དྲོའི་ཚགས་པར》གྱི་སྤྱི་ཁྱབ་རྩོམ་སྒྲིག་པ་གཞོན་པ་མུའུ་ཧན་མོ་ཏེས། ཧེ་ཨེར་གྱིས་ཨེ་ཅིབ་ཏུ་རང་ཡུལ་ཅན་གྱི་ཐོན་སྐྱེད་དང་གཉེར་སྐྱོང་ལ་གཞོལ་ནས་འཕེལ་རྒྱས་མྱུར་པོ་བྱུང་བ་དེས་ས་གནས་དེ་གའི་འཛད་སྤྱོད་པར་གདམ་ག་དེ་བས་མང་བ་མཁོ་འདོན་བྱས་པ་མ་ཟད། ཨེ་ཅིབ་ཀྱི་བཟོ་ལས་བཟོ་སྐྲུན་གྱི་ནུས་པ་དེ་བས་ཆེ་རུ་ཕྱིན་ཡོད་ཅེས་བཤད།

ཧེ་ཨེར་ཨེ་ཅིབ་གློག་ཆས་ཚད་ཡོད་ཀུང་སིའི་སྤྱི་ཁྱབ་ཅིང་ལི་དབྱང་ལིན་ཕིང་གིས་ངོ་སྤྲོད་བྱས་པར་གཞིགས་ན། སྐྱེ་ཁམས་གླིང་ལ་བརྟེན་ནས་ཧེ་ཨེར་གྱིས་ཨེ་ཅིབ་ཏུ་ཞིབ་ སྤེལ་དང་། བཟོ་སྐྲུན། ཚོང་གཉེར་བཅས་རང་ས་ཅན་མངོན་འགྱུར་བྱུང་ཡོད། ཧེ་ཨེར་གྱིས་ད་དུང་ནུས་རྒྱུ་གྲོན་ཆུང་དང་ཟད་གྲོན་ཆུང་དུ་གཏོང་བའི་དགོས་མཁོར་དམིགས་ནས་ས་གནས་དེ་གའི་གློག་དྲ་དང་འཚམ་པའི་རླབས་སྒྱུར་དྲོད་སྙོམས་འཕྲུལ་འཁོར་བཏོན་པས་ནུས་རྒྱུ་གྲོན་ཆུང་ཐུབ་ཚད་མཐོ་ཤོས་60%ཟིན་ཡོད། ཐོན་སྐྱེད་བྱེད་འགོ་ཚུགས་ཚུན། གླིང་ཁུལ་གྱིས་དྲོད་སྙོམས་འཕྲུལ་འཁོར་ཆ་ཚང་ཁྲི་20ལྷག་ཙམ་ཐོན་སྐྱེད་བྱས་པ་དེ་དག་ཨེ་ཅིབ་ཀྱི་ཁྲོམ་རའི་བྲིན་ཁ་རྒྱུག་ཚད་ཨང་དང་པོ་ནས་གསུམ་པ་བར་བརྟན་པོར་གནས་ཡོད།

སྐྱེ་ཁམས་གླིང་དེ་ཨེ་ཅིབ་ཀྱི་བཟོ་ལས་རིམ་སྤོར་དང་ཤེས་ལྡན་པ་འཚར་ལོངས་ཀྱི་ལས་སྟེགས་གལ་ཆེན་ཞིག་ཏུ་གྱུར་ཡོད། “ངས་སྐྱེ་ཁམས་གླིང་དེ་ཐོག་མར་བྱེ་ཐང་ཐོག་བསྐྲུན་པ་མཐོང་བྱུང་། ད་ཆ་གླིང་ཁུལ་དུ་ས་གནས་དེ་གའི་ལས་མི་1000ལྷག་ཙམ་ཡོད་པ་དང་རང་ས་ཅན་དུ་འགྱུར་ཚད་90%ལྷག་ཙམ་ཟིན་ཡོད། དེས་ཕུགས་འདུན་ཡོད་པའི་ཨེ་ཅིབ་ཀྱི་གཞོན་ནུ་ཚོར་རང་ཉིད་ཀྱི་རིན་ཐང་མངོན་འགྱུར་བྱེད་པའི་གོ་སྐབས་བསྐྲུན་ཡོད། ངའི་ཆེད་ལས་དང་དོ་དམ་གྱི་འཇོན་ཐང་ཆེ་རུ་ཕྱིན་པ་མ་ཟད། ཡོང་འབབ་ཀྱང་དེ་བསྟུན་གྱིས་འཕར་བྱུང་། ཀྲུང་གོའི་ཁེ་ལས་དང་མཉམ་དུ་འཚར་ལོངས་བྱུང་བར་སྤོབས་པ་ཆེན་པོ་སྐྱེ་གི་འདུག”ཅེས་སྐྱེ་ཁམས་གླིང་བརྙན་འཕྲིན་ཐོན་སྐྱེད་ལས་རིམ་གྱི་ལས་མི་དང་པོ་ཨ་ལ·སུའུ་པུའུ་ཤིས·སའེ་དབྱི་ཏེས་བཤད།

“འདི་གར་སྦྱངས་པ་ཏན་ཏིག་དང་ལས་ཀ་ཧུར་ཐག་བྱས་ཚེ་མི་སྒེར་གྱི་རིན་ཐང་མངོན་འགྱུར་ཐུབ་ཀྱི་རེད། ཀྲུང་གོའི་ཁེ་ལས་ཀྱིས་སྔོན་ཐོན་གྱི་ལག་རྩལ་དང་བྱང་ཆུབ་པའི་དོ་དམ་བྱེད་སྟངས་སྤྱད་དེ་ཨེ་ཅིབ་ཀྱི་བཟོ་ལས་འཕེལ་རྒྱས་ལ་སྟོབས་ཤུགས་སྐྱེས་སུ་ཕུལ་ཡོད”ཅེས་དྲོད་སྙོམས་འཕྲུལ་འཁོར་ཐོན་སྐྱེད་ལས་རིམ་གྱི་ལག་རྩལ་ཆེ་མོ་བ་མུའུ་ཧན་མོ་ཏེ·ཨའེ་མན་གྱིས་བཤད།