ཉེ་ཆར། མཉམ་འབྲེལ་རྒྱལ་ཚོགས་འབྲུ་རིགས་དང་ཞིང་ལས་རྩ་འཛུགས་ཉ་ལས་ཨུ་ཡོན་ལྷན་ཁང་གི་ཚོགས་འདུ་སྐབས་37པ་དབྱི་ཐ་ལིའི་རོ་མར་འཚོགས་ཤིང་། ཀྲུང་གོ་དང་ཕྱི་རྒྱལ་གྱི་ཚོགས་ཞུགས་མི་སྣ་མང་པོ་ཞིག་གིས་ཆུའི་ཐོན་རྫས་ཀྱི་དགོས་མཁོ་རྒྱུན་མཐུད་ཆེ་རུ་འགྲོ་བ་དང་ཐོན་ཁུངས་ཁོར་ཡུག་གི་ཚོད་འཛིན་ལས་བྱུང་བའི་འགྲན་སློང་གི་མདུན་དུ་ཆུའི་ཐོན་རྫས་གསོ་སྤེལ་དང་། སྒྲིག་སྲོལ་ལག་བསྟར། སྐྱེ་ཁམས་སྲུང་སྐྱོང་སོགས་ཁྱབ་ཁོངས་ཀྱི་ཀྲུང་གོའི་ལག་ལེན་ལ་དོ་ཁུར་རྒྱ་ཁྱབ་ཐོབ་ཅིང་། གོ་ལ་ཧྲིལ་པོའི་ཉ་ལས་རྒྱུན་མཐུད་ཆོག་པའི་འཕེལ་རྒྱས་ལ་བསམ་ཕྱོགས་བཏོན་པ་དང་མཉམ་ལས་ཀྱི་བར་མཐོངས་གསར་པ་བཏོད་ཡོད་པ་རེད།

ཚོགས་འདུའི་རིང་ཀྲུང་གོ་དང་མཉམ་འབྲེལ་རྒྱལ་ཚོགས་འབྲུ་རིགས་དང་ཞིང་ལས་རྩ་འཛུགས་ཀྱིས“ཆུའི་ཐོན་རྫས་གསོ་སྤེལ་བྱེད་སྟངས་གསར་དུ་གཏོད་པར་སྐུལ་འདེད་བཏང་ནས་ལྗང་མདོག་དང་རྒྱུན་མཐུད་ཆོག་པའི་འཕེལ་རྒྱས་ལ་མཉམ་དུ་སྐུལ་འདེད་གཏོང་བའི”ཟུར་ཚོགས་ཐུན་མོང་ཐོག་འཚོགས་ཤིང་། ཚོགས་འདུའི་ཐོག་ཀྲུང་གོ་ཕྱོགས་ཀྱིས་2025ལོར་ཀྲུང་གོའི་ཆུའི་ཐོན་རྫས་གསོ་སྤེལ་ཐོན་འབོར་ཏུན་ཁྲི་6326ཟིན་པ་དེས་ཆུའི་ཐོན་རྫས་ཀྱི་སྤྱིའི་ཐོན་འབོར་གྱི་83%བཟུང་ཡོད། ཉེ་བའི་ལོ་ཤས་རིང་། ཀྲུང་གོས་ཆུའི་ཐོན་རྫས་གྱི་སོན་ལས་འདེབས་འཛུགས་ལས་རིགས་དར་རྒྱས་དང་གསོ་སྤེལ་ཚན་རྩལ་གྱི་འགག་སྒྲོལ་ལ་སྐུལ་འདེད་བཏང་ནས་འབྲས་ཞིང་དུ་ཆུ་འབྲས་འདེབས་པ་དང་སྦྲགས་ཉ་རིགས་གསོ་སྤེལ་དང་། བཟོ་གྲྭ་ཅན་གྱི་འཁོར་རྒྱུག་ཆུའི་གསོ་སྤེལ། མཚོ་གཏིང་གི་ཉ་རིགས་གསོ་སྤེལ་སོགས་བྱེད་སྟངས་གསར་པ་འཕེལ་རྒྱས་བཏང་བ་དང་འབྲེལ། རྒྱུན་མཐུད་ཆོག་པའི་བླང་བྱ་གསར་པ་གསར་དུ་བཟོ་བཅོས་བརྒྱབ་པའི《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ཉ་ལས་བཅའ་ཁྲིམས》ནང་བཅུག་པའི་སྐོར་ངོ་སྤྲོད་བྱས་པ་རེད།

ཨེ་ཤེ་ཡ་དང་ཞི་བདེ་རྒྱ་མཚོ་ཆེན་པོ་ཁུལ་གྱི་ཆུའི་ཐོན་རྫས་གསོ་སྤེལ་ལྟེ་གནས་ཀྱི་སྤྱི་ཁྱབ་ལས་འཛིན་ཨའེ་ཏེ་ཧྭ་ཏུའོ·ལའེ་ཡ་ནུའོ་ཡིས། ཀྲུང་གོས་ཆུའི་ཐོན་རྫས་གསོ་སྤེལ་བྱེད་སྟངས་གསར་གཏོད་ཤུགས་ཆེན་བྱེད་བཞིན་ཡོད་པས། ཨེ་ཤེ་ཡ་དང་ཞི་བདེ་རྒྱ་མཚོ་ཆེན་པོ་ཁུལ་གྱི་རྒྱལ་ཁབ་མང་པོ་ཞིག་གིས་སློབ་སྦྱོང་བྱེད་ཆོག ཀྲུང་གོས་མི་ཐབས་རིག་ནུས་དང་། རིག་ལྡན་གསོ་སྤེལ། མཚོ་གཏིང་ཉ་རིགས་གསོ་སྤེལ་སོགས་ཁྱབ་ཁོངས་སུ་བསགས་པའི་ཉམས་མྱོང་ལག་རྩལ་རྒྱལ་སྤྱིའི་མཉམ་ལས་བརྒྱུད་རྒྱལ་ཁབ་དེ་བས་མང་བར་ཆུའི་ཐོན་རྫས་གསོ་སྤེལ་གྱི་ནུས་པ་ཆེ་རུ་གཏོང་རོགས་བྱེད་ཐུབ་ཀྱི་ཡོད་ཅེས་བཤད།

ད་ལོ་ནི་མཉམ་འབྲེལ་རྒྱལ་ཚོགས་འབྲུ་རིགས་དང་ཞིང་ལས་རྩ་འཛུགས་ཀྱི《གྲུ་ཁའི་རྒྱལ་ཁབ་ཀྱི་བྱ་ཐབས་གྲོས་མཐུན》ལ་ནུས་པ་ཐོན་ནས་ལོ་བཅུ་འཁོར་བའི་ལོ་རེད། གྲོས་མཐུན་དེ་འཇོག་པའི་དམིགས་ཡུལ་ནི་གྲུ་ཁའི་རྒྱལ་ཁབ་ཀྱི་བྱེད་ཐབས་ལ་བརྟེན་ནས། ཁྲིམས་འགལ་དང་། སྙན་སེང་མི་ཞུ་བ། རྩིས་སྤྲོད་དོ་དམ་མི་བྱེད་པ་བཅས་ཀྱིས་སྒོ་ནས་ཉ་རིགས་འཛིན་པའི་བྱེད་སྤྱོད་སྔོན་འགོག་དང་། བཀག་འགོག མེད་པ་བཟོ་བ་བཅས་བྱ་རྒྱུ་དེ་རེད། ཀྲུང་གོ་ནི་2025ལོའི་ཟླ་4པར་གྲོས་མཐུན་དེའི་ནང་དངོས་སུ་ཞུགས་པ་རེད། ཀྲུང་གོ་ཕྱོགས་ཀྱིས། གྲོས་མཐུན་དེའི་ནང་ཞུགས་ཚུན། གྲུ་ཁའི་ཞུགས་འཐུས་ཆ་རྐྱེན་ལ་ནན་པོར་གཞིགས་ནས་ཁག་དང་པོའི་དམིགས་འཛུགས་གྲུ་ཁ་23ཡོངས་བསྒྲགས་བྱས་པ་དང་། གྲུ་གཟིངས་ཞིབ་བཤེར་བྱེད་པའི་ལས་དོན་ཚད་ལྡན་དུ་བཏང་བ། ཁ་ཆད་ལག་བསྟར་གྱི་ཆ་འཕྲིན་ལས་སྟེགས་བཙུགས་པ་མ་ཟད། ཁ་ཆད་ལག་བསྟར་གྱི་གསོ་སྦྱོང་དང་ནུས་པ་འཛུགས་སྐྱོང་ལ་ཤུགས་སྣོན་བརྒྱབ་ཡོད་ཅེས་ངོ་སྤྲོད་བྱས་པ་རེད།

ཀྲུང་གོའི་ཆུ་སྐྱེས་སྐྱེ་ཁམས་སྲུང་སྐྱོང་ལག་ལེན་སྐོར་ཡང་ཐེངས་འདིའི་གྲོས་ཚོགས་ཀྱི་སྤེལ་རེས་ནང་དོན་གྱི་གྲས་ཤིག་རེད། འབྲི་ཆུ་འབབ་རྒྱུད་དུ་ཆུ་སྐྱེས་སྲོག་ཆགས་རིགས་4300ལྷག་ཙམ་ཡོད་པ་དང་། 2021ལོ་ནས་བཟུང་ཀྲུང་གོས་འབྲི་ཆུ་འབབ་རྒྱུད་ཀྱི་གཙོ་གནད་ཆུ་ཁོངས་སུ་ལོ་བཅུའི་རིང་ཉ་རྒྱ་སྡོམ་པ་ཕྱོགས་ཡོངས་ནས་ལག་བསྟར་བྱས་པ་དེ་ཞིང་ཆེན་རིམ་པའི་སྲིད་འཛིན་ཁུལ་15དང་འབྲེལ་བ་ཡོད་པ་མ་ཟད། ཉ་འཛིན་མཚམས་འཇོག་མཁན་ཉ་པ་ཁྲི་23.1ལ་ཐོན་སྐྱེད་ཁ་སྒྱུར་གྱི་ལས་ཞུགས་དང་། ལས་རིགས་གསོ་སྦྱོང་། སྤྱི་ཚོགས་འགན་སྲུང་སོགས་བཀོད་སྒྲིག་འགན་ལེན་གྱི་ལས་དོན་སྤེལ་ཡོད་པ་རེད།

འབྲི་ཆུར་ལོ་བཅུའི་རིང་ཉ་རྒྱ་སྡོམ་པའི་བརྗོད་དོན་གཙོ་བོའི་འགྲེམས་སྟོན་བྱ་ཡུལ་དུ་ཀྲུང་གོའི་སྐུ་ཚབ་ཚོགས་པས། ཉ་རྒྱ་བསྡམས་ཚུན་གྱི་ཁྲིམས་འཛིན་ལྟ་སྐུལ་དོ་དམ་དང་། ཉ་པ་བཀོད་སྒྲིག་འགན་ལེན། ཆུ་སྐྱེས་སྐྱེ་དངོས་སྣ་མང་རང་བཞིན་སྲུང་སྐྱོང་སོགས་ཐད་ཀྱི་ལག་ལེན་དང་ཕན་འབྲས་གཅིག་སྡུད་ཐོག་ངོ་སྤྲོད་བྱས་པ་རེད།

མིག་སྔར་ཨིར་ལན་ཁོ་ཁེ་སློབ་ཆེན་དུ་ཉ་ལས་དང་ཆུའི་ཐོན་རྫས་གསོ་སྤེལ་དོ་དམ་སློབ་སྦྱོང་བྱེད་བཞིན་པའི་སི་ར་ལ་ཨོང་ནས་ཡིན་པའི་པེན་ཅེ་མིང·པོ་ཁ་ལིས། འཁོར་རྒྱུག་ཆུའི་གསོ་སྤེལ་དང་མི་ཐབས་རིག་ནུས་ལྟ་ཞིབ་ཚད་ལེན་སོགས་ཀྱི་ཁྱབ་ཁོངས་སུ་ཀྲུང་གོར་ཉམས་མྱོང་ཕུན་སུམ་ཚོགས་པོ་ཡོད། འབྲེལ་ཡོད་ལག་རྩལ་དེ་རྒྱལ་ཁབ་མི་འདྲ་བའི་དོན་དངོས་ཀྱི་ཆ་རྐྱེན་ལ་གཞིགས་ནས་རང་ས་ཅན་དུ་སྐུལ་འདེད་གཏོང་བ་དང་གསོ་སྦྱོང་སྤེལ་རེས་ལ་ཤུགས་སྣོན་བརྒྱབ་ཚེ། འཕེལ་རྒྱས་འགྲོ་བཞིན་པའི་རྒྱལ་ཁབ་དེ་བས་མང་བས་ཆུའི་ཐོན་རྫས་གསོ་སྤེལ་གྱི་ཆུ་ཚད་མཐོ་རུ་གཏོང་བར་ཕན་ཐོགས་ཡོད་པའི་ངོས་འཛིན་བྱེད་ཀྱི་ཡོད་པ་རེད།