ཟླ་བརྒྱད་པར། སྤྱི་ཚོགས་ཡོངས་སུ་གློག་སྤྱོད་ཚད་དུང་ཕྱུར་ཁྲི་ལས་བརྒལ་ཏེ། ཆུ་ཚོད་ཆན་ཝ་དུང་ཕྱུར་10332ཟིན་པ་དེ་དུས་མཚུངས་ལས་1.7%འཕར་བ་དང་། གློག་སྤྱོད་ཐེག་ཚད་ལོ་རྒྱུས་ཀྱི་ཟིན་ཐོ་གསར་པ་བཏོད་ནས། ཆན་ཝ་དུང་ཕྱུར་15.6ཟིན་པ་དེ་ལོ་གོང་མའི་ཐེག་ཚད་ཆེ་ཤོས་དང་བསྡུར་ན་ཆན་ཝ་ཁྲི་4969མཐོ་བ་ཡོད་ཅིང་། ལོ་གོང་མའི་ཐེག་ཚད་ཆེ་ཤོས་ལས་ཁྱོན་ཉིན་7བརྒལ་ཡོད་པ་རེད།

ཐོན་ལས་སོ་སོའི་གློག་སྤྱོད་ཚད་ལ་བལྟས་ཚེ། ཐོན་ལས་དང་པོར་གློག་སྤྱོད་ཚད་ཆུ་ཚོད་ཆན་ཝ་དུང་ཕྱུར་169ཟིན་པ་དེ་དུས་མཚུངས་ལས་2.7%འཕར་བ་དང་། ཐོན་ལས་གཉིས་པར་གློག་སྤྱོད་ཚད་ཆུ་ཚོད་ཆན་ཝ་དུང་ཕྱུར་6124ཟིན་པ་དེ་དུས་མཚུངས་ལས་2.4%འཕར་ཡོད། དེའི་ནང་བཟོ་ལས་ཀྱི་གློག་སྤྱོད་ཚད་ཆུ་ཚོད་ཆན་ཝ་དུང་ཕྱུར་6065ཟིན་པ་དེ་དུས་མཚུངས་ལས་2.7%འཕར་བ་དང་། ལག་རྩལ་མཐོ་བ་དང་དེ་བཞིན་སྒྲིག་ཆས་བཟོ་སྐྲུན་ལས་རིགས་ཀྱི་གློག་སྤྱོད་ཚད་འཕར་མགྱོགས་པའི་རྣམ་པ་རྒྱུན་འཁྱོངས་ཐུབ་ནས་ཆུ་ཚོད་ཆན་ཝ་དུང་ཕྱུར་1222ཟིན་པ་དེ་དུས་མཚུངས་ལས་7.2%འཕར་ཡོད། རྩིས་འཁོར་འཕྲིན་གཏོང་སྒྲིག་ཆས(7.5%)དང་། རླངས་འཁོར་བཟོ་གྲྭ(7.6% དེའི་ནང་ནུས་གསར་རླངས་འཁོར་ཧྲིལ་པོ་22.2%) སྤྱི་སྤྱོད་སྒྲིག་ཆས་བཟོ་སྐྲུན་ལས་རིགས(7.6%) ཆེད་སྤྱོད་སྒྲིག་ཆས་བཟོ་སྐྲུན་ལས་རིགས(8.2%) གློག་ཤུགས་འཕྲུལ་ཆས(12.3%)བཅས་ཀྱི་གློག་སྤྱོད་ཚད་འཕར་མགྱོགས་པོ་ཡོད། ཐོན་ལས་གསུམ་པར་གློག་སྤྱོད་ཚད་ཆུ་ཚོད་ཆན་ཝ་དུང་ཕྱུར་2155ཟིན་པ་དེ་དུས་མཚུངས་ལས་5.1%འཕར་ཡོད། དེའི་ནང་གློག་གསོག་གློག་བརྗེའི་ཞབས་ཞུའི་ལས་རིགས་དང་དྲ་སྦྲེལ་གྲངས་གཞིའི་ཞབས་ཞུའི་གློག་སྤྱོད་ཚད་ཤུགས་ཆེན་འཕར་ཏེ། ཆུ་ཚོད་ཆན་ཝ་དུང་ཕྱུར་172དང་དུང་ཕྱུར་102ཟིན་ནས་འཕར་ཚད་51.2%དང་37.9%སོ་སོར་ཟིན་ཡོད་པ་རེད།