གསར་འགོད་པར་ཀྲུང་དབྱང་དྲ་འཕྲིན་གཞུང་དོན་ཁང་ནས་ཤེས་རྟོགས་བྱུང་བར། ཉེ་ཆར། ཀྲུང་དབྱང་དྲ་འཕྲིན་གཞུང་དོན་ཁང་དང་། རྒྱལ་ཁབ་འཕེལ་སྒྱུར་ཨུ་ལྷན། བཟོ་ལས་དང་ཆ་འཕྲིན་ཅན་པུའུ། སྐྱེ་ཁམས་ཁོར་ཡུག་པུའུ། སྡོད་ཁང་དང་གྲོང་ཁྱེར་གྲོང་གསེབ་འཛུགས་སྐྲུན་པུའུ། ཞིང་ལས་གྲོང་གསེབ་པུའུ། ཚོང་དོན་པུའུ་བཅས་སྡེ་ཚན་བདུན་གྱིས་མཉམ་འབྲེལ་ཐོག《གྲངས་གཞི་ཅན་དང་ལྗང་མདོག་ཅན་མཐུན་སྦྱོར་ཕྱོགས་སྒྱུར་འཕེལ་རྒྱས་ལ་སྐུལ་འདེད་གཏོང་བའི་ལག་བསྟར་ཇུས་གཞི(2026ལོ་ནས་2030ལོ་བར)》བཀྲམ་ནས“ལོ་ལྔ་ཚན་བཅོ་ལྔ་པའི”རིང་གྲངས་གཞི་ཅན་དང་ལྗང་མདོག་ཅན་གྱི་མཐུན་སྦྱོར་ཕྱོགས་སྒྱུར་འཕེལ་རྒྱས་ལ་སྐུལ་འདེད་གཏོང་བའི(གཤམ་དུ“གཉིས་ཅན་མཐུན་སྦྱོར”ཞེས་བསྡུ་རྒྱུ)བསམ་ཕྱོགས་དམིགས་ཚད་དང་། གཙོ་གནད་ལས་འགན། སྲིད་ཇུས་བྱ་ཐབས་བཅས་ཁ་གསལ་བཏོན་ཡོད།

ཇུས་གཞིའི་ནང་། 2030ལོར་སླེབས་སྐབས་མི་ཐབས་རིག་ནུས་ཀྱི་མ་གནས་དམའ་བ་དང་ལས་ཕྱོད་ཆེ་བའི་ལེགས་ཆ་དེ་བས་མངོན་གསལ་དོད་ཡོང་བ་བྱས་ནས་ལྗང་མདོག་ཐཱན་ཉུང་ལག་རྩལ་གསར་གཏོད་དང་ཐོན་ལས་འཕེལ་རྒྱས་ལ་མཐུན་རྐྱེན་ཆེན་པོ་སྦྱོར་རྒྱུ་དང་། རྩིས་ནུས་སྒྲིག་བཀོད་དང་5Gསྦྲེལ་ཚུགས་སོགས་གསར་དར་ཁྱབ་ཁོངས་སུ་ནུས་རྒྱུ་སྤྱོད་ཚད་ཆེས་ཆེར་འཕར་བ་བྱ་རྒྱུ། རྩིས་ནུས་སྒྲིག་བཀོད་སོགས་གཙོ་གནད་ཁྱབ་ཁོངས་སུ་བསྐྱར་སྐྱེས་རུང་བའི་ནུས་རྒྱུའི་གློག་ཤུགས་འཛད་སྤྱོད་ཆུ་ཚད་དེ་གནས་སའི་ཞིང་ཆེན་གྱི་བསྐྱར་སྐྱེས་རུང་བའི་ནུས་རྒྱུའི་གློག་ཤུགས་འདྲེན་སྤྱོད་ཀྱི་འགན་འཁྲིའི་གནས་ཚད་དུ་སླེབས་པར་སྐུལ་འདེད་གཏོང་བ། ཞིང་ལས་དང་། བཟོ་སྐྲུན་ལས་རིགས། ཚོང་དོན། འཛད་སྤྱོད། གྲོང་ཁྱེར་འཁོར་སྐྱོད་སོགས་གཙོ་གནད་ཁྱབ་ཁོངས་སུ་གྲངས་གཞི་ཅན་དང་ལྗང་མདོག་ཅན་ལ་སྐུལ་འདེད་གཏིང་ཟབ་གཏོང་བ། གྲངས་རིག་ལག་རྩལ་གྱིས་སྐྱེ་ཁམས་ཁོར་ཡུག་བཅོས་སྐྱོང་གི་ནུས་པ་རྒྱུན་མཐུད་ཆེ་རུ་འགྲོ་བར་མཐུན་རྐྱེན་སྦྱོར་བ་བཅས་བྱས་ནས་གཉིས་ཅན་མཐུན་སྦྱོར་འཕེལ་རྒྱས་གཏོང་སྟངས་ཀྱིས་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་ཕྱོགས་ཡོངས་ཀྱི་ལྗང་མདོག་ཕྱོགས་སྒྱུར་དང་སྤུས་ཚད་མཐོ་བའི་འཕེལ་རྒྱས་ལ་འདེགས་སྐྱོར་ནུས་ལྡན་ཐེབས་པ་བྱ་རྒྱུ་ཁ་གསལ་བཏོན་ཡོད།

“ལོ་ལྔ་ཚན་བཅོ་ལྔ་པའི”འཕེལ་རྒྱས་ཀྱི་དམིགས་ཚད་ལ་དམིགས་ནས་ཇུས་གཞིའི་ནང་ཕྱོགས་4ཡི་ཐད་ཀྱི་གཙོ་གནད་ལས་འགན་14བཀོད་སྒྲིག་བྱས་ཡོད། གྲངས་རིག་ལག་རྩལ་དང་ལྗང་མདོག་ལག་རྩལ་མཉམ་འདྲེས་གསར་གཏོད་ལ་སྐུལ་འདེད་གཏོང་བ་དང་ལྗང་མདོག་ནུས་ཆེའི་མི་ཐབས་རིག་ནུས་ལག་རྩལ་འཕེལ་རྒྱས་བཏང་ནས་མི་ཐབས་རིག་ནུས་ཀྱིས་ལྗང་མདོག་ཐཱན་ཉུང་ལག་རྩལ་གསར་གཏོད་ལ་མཐུན་རྐྱེན་སྦྱོར་བར་སྐུལ་འདེད་གཏོང་དགོས། གསར་དར་ཁྱབ་ཁོངས་ཀྱི་ནུས་སྤྱོད་ལས་ཕྱོད་ཆེ་རུ་གཏོང་བ་དང་། རྩིས་ནུས་སྒྲིག་བཀོད་དང་། འཕྲིན་གཏོང་སྦྲེལ་ཚུགས། གྲངས་འཛིན་ཁེ་ལས་བཅས་ལྗང་མདོག་ཐཱན་ཉུང་འཕེལ་རྒྱས་ལ་སྐུལ་འདེད་གཏོང་དགོས།