ཉེ་ཆར། གཞིས་རྩེ་གྲོང་ཁྱེར་རྒྱལ་རྩེ་རྫོང་མི་དམངས་ཁྲིམས་ཁང་གིས་འཛུགས་སྐྲུན་ལས་གྲྭའི་ཆད་དངུལ་དང་འབྲེལ་བའི་དམངས་འཚོའི་རྩོད་གཞི་ཁག་གཅིག་ཐག་གཅོད་ནུས་ལྡན་བྱས་ནས་གྱོད་འབྲེལ་དངུལ་སྒོར་ཁྲི་156.87བདེ་བླག་ངང་དོ་བདག་ལ་སྤྲད་དེ་ཁོང་ཚོའི་ཁྲིམས་མཐུན་ཁེ་དབང་སྲུང་སྐྱོང་ཏན་ཏིག་བྱས་པར་དོ་བདག་གི་ཚད་མཐོའི་གདེང་འཇོག་ཐོབ་ཡོད།

ཤེས་རྟོགས་བྱུང་བར་གཞིགས་ན། ཁག་ཐེངས་དེར་རྩོད་གཞི་རབ་དང་རིམ་པའི་གྱོད་གཞི་ཁྱོན་25ཡོད་པ་དང་གྱོད་འབྲེལ་མ་དངུལ་ནང་མང་ཚོགས་100ལྷག་ཙམ་གྱི་ངལ་ནུས་གླ་ཆ་དང་། འཕྲུལ་ཆས་ཀྱི་བོགས་དངུལ། སྐྱེལ་འདྲེན་གྲོན་དངུལ་སོགས་ལྟེ་བའི་དམངས་འཚོའི་གྲོན་དངུལ་ཚུད་ཡོད་པས། མང་ཚོགས་དང་འབྲེལ་བའི་དཀའ་གནད་ཆེ་བའི་དམངས་འཚོའི་རྩོད་གཞིའི་དཔེ་མཚོན་ཞིག་རེད། སྒྲུབ་འགན་འཁུར་མཁན་ཁྲིམས་དཔོན་གྱིས“གྱོད་ཐག་གཅོད་ཚད་ལ་སྣང་ཆེན་དང་དོན་ངོ་མའི་ཁ་ཆད་ལག་བསྟར་ལ་སྣང་ཆུང་བྱེད་པའི”ཕྱོགས་ལྷུང་གི་བསམ་བློ་མཐའ་གཅིག་ཏུ་དོར་ནས་ངལ་གསོའི་དུས་ཚོད་བློས་གཏོང་གིས་རྙོག་འཛིང་ཆེ་བའི་གྱོད་འབྲེལ་རྩིས་ཐོ་གསེད་བཀྲོལ་བྱེད་པ་དང་། གྱོད་འབྲེལ་ཁེ་ལས་དང་། གྲོང་ཚོ་ཨུ་ལྷན། དོ་བདག་མང་ཚོགས་སོགས་ལ་བཅར་འདྲི་ཐེངས་མང་བྱེད་པ། ངང་རྒྱུད་རིང་པོས་བཅའ་ཁྲིམས་གསལ་འགྲེལ་དང་གནས་ལུགས་གསལ་བཤད་དང་ཕྱོགས་གཉིས་པོའི་འགལ་ཟླ་སེལ་རོགས། མ་དངུལ་ཕྱིར་སློག་བྱེད་པའི་ཇུས་གཞི་ཡག་ཤོས་གྲོས་མོལ་ཡང་ཡང་བྱས་ནས་གཏན་འཁེལ་བྱས་པས་གྱོད་འབྲེལ་ཁེ་ལས་ཀྱིས་ཆད་དངུལ་ཆ་ཚང་དུས་བཀག་ཐོག་གཙང་འཇལ་བྱས་ཏེ་བཙན་ཤེད་ཀྱིས་ལག་བསྟར་བྱེད་དགོས་པའི་གྱོད་གཞི་གཅིག་ཀྱང་བྱུང་མེད།

རྒྱལ་རྩེ་རྫོང་མི་དམངས་ཁྲིམས་ཁང་གི་རིམ་པ་དང་པོའི་ཁྲིམས་དཔོན་པད་མས(ཆུང་བ)དམངས་ཆེད་ཁྲིམས་འཛིན་གྱི་དོན་ལ་བབས་ས་ནི་དྲང་གཞག་གི་ཁྲིམས་གཅོད་ཙམ་མ་ཡིན་པར། མང་ཚོགས་ཀྱི་ཞུ་གཏུག་ལ་རྒྱལ་ཁ་ཐོབ་པའི་ཁེ་དབང་དངོས་འབྲེལ་མངོན་འགྱུར་དང་དོན་ཐོག་ཏུ་འཁྱོལ་བར་དེ་བས་ཐུག་ཡོད་ཅེས་བཤད།