ཉེ་བའི་ལོ་ཤས་རིང་། ལྷོ་ཁ་གྲོང་ཁྱེར་ཟངས་རི་རྫོང་རོང་ཤང་མངགས་གཏོང་ཁང་གིས་ལམ་སྲོལ་གསར་གཏོད་དང་། ཚན་རྩལ་གྱིས་མཐུན་རྐྱེན་སྦྱོར་བ། སྣ་མང་མཉམ་བཅོས་བཅས་ཀྱི་གཞི་རིམ་ལེགས་བཅོས་ཀྱི་ཐབས་ལམ་གསར་པ་འཚོལ་ཞིབ་ཧུར་ཐག་བྱས་ཏེ། བདེ་འཇགས་བརྟན་ལྷིང་གི་འབྱུང་རྩ་ཤེས་རྟོགས་བྱས་ནས། གཞི་རིམ་བཅོས་སྐྱོང་གི“མཐའ་སྣེའི”གསོན་ཤུགས་འཕེལ་བར་བྱས་ཡོད།

གཞི་རིམ་བཅོས་སྐྱོང་མང་ཚོགས་ཀྱི་སེམས་ལ་བབས་པར་བྱས་པ།

རོང་ཤང་མངགས་གཏོང་ཁང་གིས“རང་འགུལ་ཉེན་དོན་དང་སྔོན་འགོག་ཉེན་དོན”ཁྱབ་གདལ་ཧུར་ཐག་བཏང་སྟེ། མངགས་གཏོང་ཁང་གི་ལས་དོན“གཞན་དབང་ཐག་གཅོད”ནས“རང་འགུལ་ཐེ་ཇུས”བར་ཕྱོགས་སྒྱུར་དང“དོ་དམ་རགས་ལས”ནས“བཅོས་སྐྱོང་ཞིབ་ཚགས”བར་རིམ་སྤོར་བྱས་པ་རེད།

དེ་དང་དུས་མཚུངས། གཞི་རིམ་ཉེན་དོན་དེ་བས་གནད་སྨིན་དང་ནུས་ཆེ་ཡོང་ཆེད། རོང་ཤང་མངགས་གཏོང་ཁང་གིས“རྨང་གཞི་བརྟན་གཏོང་དང་། ཐབས་ཤེས་ལེགས་གཏོང་། གྲལ་བཤེར་ལ་ཤུགས་སྣོན། གསོན་ཤུགས་འཕེལ་བ”བཅས་ཕྱོགས་བཞི་ནས་ཤུགས་བརྒྱབ་སྟེ། ས་ཁོངས་ཀྱི་དོན་དངོས་དང་མཐུན་པའི་ལས་དོན་སྤེལ་ཐབས་འཚོལ་ཞིབ་བྱས་ཡོད། མང་ཚོགས་ཀྱི་རེ་ཞུ་ནན་ཏན་ཉན་པ་དང་སེམས་རྩ་འཁོལ་པོས་དངོས་ཡོད་དཀའ་ངལ་ཐག་གཅོད་བྱས་པས། “ལས་དོན་ཡག་པོ་སྒྲུབ་པའི”གཞི་རྩའི་བླང་བྱ་གྲུབ་པ་མ་ཟད། “སེམས་ཐག་ཉེ་རུ་གཏོང་བའི”རྩ་བའི་དམིགས་ཚད་དེ་བས་མངོན་འགྱུར་ཐུབ་སྟེ། མང་ཚོགས་ཀྱིས་ཉེན་དོན་ཞབས་ཞུར་བཅངས་པའི་མོས་སེམས་རྒྱུན་མཐུད་ཆེ་རུ་བཏང་ནས། རང་འགུལ་ངང་ལས་དོན་ལ་གཞོགས་འདེགས་དང་བདེ་འཇགས་འཛུགས་སྐྲུན་ནང་ཞུགས་པའི་ཧུར་སེམས་ཀྱང་མངོན་གསལ་དོད་པོས་ཆེ་རུ་ཕྱིན་ཡོད།

གཞི་རིམ་བཅོས་སྐྱོང་ལ་ནུས་པ་ཆེན་པོ་བཏོན་པ།

ཁོངས་གཏོགས་ཁུལ་རྒྱ་ཁྱོན་ཆེ་བ་དང་། གྲོང་ཚོ་ཁ་ཐོར་དུ་གནས་པ། གཙོ་གནད་ལས་གྲྭའི་རྣམ་གྲངས་མང་བ་བཅས་ཀྱི་ཁྱད་ཆོས་ལ་དམིགས་ནས། རོང་ཤང་མངགས་གཏོང་ཁང་གིས་རྒྱུན་གཏན་གྱི་ལས་ཀ་བྱེད་སྟངས་དེ“སྐོར་ཞིབ་བྱེད་རིང་གནས་ཚུལ་ཐག་གཅོད་ཐུབ་པ”བྱེད་ཀྱི་ཡོད། ཚན་རིག་དང་མཐུན་པའི་ངང་སྐོར་ཞིབ་དྲ་མིག་དབྱེ་འབྱེད་ཀྱིས་རྐང་ཐང་སྐོར་ཞིབ་དང་འཁོར་གཏོང་སྐོར་ཞིབ་བྱ་རྒྱུ་ཟུང་འབྲེལ་དང་ཉིན་མོར་སྐོར་ཞིབ་དང་མཚན་མོའི་སྐོར་ཞིབ་ཟུང་འབྲེལ་གྱི་བྱེད་ཐབས་སྤྱད་དེ་སློབ་གྲྭ་དང་། སྨན་ཁང་། སྣུམ་སྣོན་ས་ཚིགས། ཨར་ལས་བྱ་ཡུལ་སོགས་གཙོ་གནད་ཁུལ་དུ་སྐོར་ཞིབ་བྱེད་ཚད་མང་དུ་བཏང་ནས་ཕྱོགས་ཡོངས་ལ་ཁྱབ་པར་བྱས་ཡོད།

དེ་ཙམ་མ་ཟད། རོང་ཤང་མངགས་གཏོང་ཁང་གིས་དེང་རབས་ཚན་རྩལ་གང་ལེགས་སྤྱད་དེ་སྲོལ་རྒྱུན་གྱི་ཉེན་དོན་ལ་མཐུན་རྐྱེན་སྦྱར་ཡོད། ད་ལོ་རོང་ཤང་དུ་འཛུགས་སྐྲུན་རྣམ་གྲངས་མང་དུ་ཕྱིན་ནས་རླངས་འཁོར་ཕར་འགྲོ་ཚུར་འོང་བྱེད་མཁན་ཡང་མང་དུ་ཕྱིན་སྟབས་མངགས་གཏོང་ཁང་གིས་བརྙན་ལམ་ལྟ་སྐུལ་ཚོད་འཛིན་ཡོ་ཆས་སྤྱད་དེ་སྐོར་ཞིབ་བྱེད་སྐབས་ཧྭ་ཤིན་ཨར་འདམ་བཟོ་གྲྭའི་ལམ་དུམ་འགག་པའི་གནས་ཚུལ་ཤེས་རྟོགས་བྱུང་འཕྲལ་ཉེན་རྟོག་པ་སྔ་སྣུར་དུ་ལམ་གཤོང་བར་བཏང་སྟེ་ལམ་འགག་ཡུན་རིང་བ་དང་འགག་རྒྱ་ཆེ་བའི་རྣམ་པ་མ་ཐོན་སྔོན་འགོག་ཐུབ་ཡོད།

གཞི་རིམ་བཅོས་སྐྱོང་གི་མཐའ་སྣེ་ཤར་གཏོང་བྱས་པ།

ཁྱིམ་བདག་དང་ཆུང་རྒྱུགས་གཏོང་མཁན་སློབ་མས་ཐོ་འགོད་སྲིད་ཇུས་དང་། བརྒྱུད་རིམ། དུས་བཀག་བཅས་ཀྱི་དྲི་བ་སྣ་ཚོགས་འདྲི་སྐབས་མི་དམངས་ཉེན་རྟོག་པ་དང་ལས་རོགས་ཉེན་རྟོག་པས་ཐོག་མཐའ་བར་གསུམ་དུ་ངང་རྒྱུད་རིང་པོས་དྲི་བ་ཡོད་ན་ལན་འདེབས་པ་དང་དོགས་གཞི་ཡོད་ན་དེ་སེལ་གྱི་ཡོད། “དཔྱད་གཞི་ཚང་འདུག བློ་བདེ་པོས་ཡིག་རྒྱུགས་གཏོང་ཞིག”ཅེས་པའི་སྐད་ཆ་དེས་སེམས་ཁྲལ་བྱེད་བཞིན་པའི་ཁྱིམ་བདག་རྣམས་བློ་བདེ་པོ་བྱུང་ཡོད་ལ། དངངས་སྐྲག་བྱེད་བཞིན་པའི་ཡིག་རྒྱུགས་གཏོང་མཁན་སློབ་མ་རྣམས་ཀྱང་སེམས་ལྷོད་ལ་བབས་པས། ཁྱིམ་བདག་དང་ཡིག་རྒྱུགས་གཏོང་མཁན་སློབ་མ་མི་ཉུང་བ་ཞིག་གིས“བློ་མཐུན་ཉེན་རྟོག་པས་སྔོན་ཚུད་ནས་བསམ་བློ་བཏང་སྟེ་ང་ཚོར་དཀའ་གནད་མང་པོ་སེལ་རོགས་བྱས་པས་ང་ཚོ་བློ་བདེ་པོ་འདུག”ཅེས་བསྔགས་བརྗོད་མགྲིན་གཅིག་ཏུ་བྱས། འདི་ནི་རོང་ཤང་མངགས་གཏོང་ཁང་གི“ཉེན་རྟོག་པ་དང་དྲ་མིག་མཉམ་འདྲེས”ཀྱི་ལམ་སྲོལ་གྱིས་མྱུར་དུ་འཕྲལ་སྡོམ་བྱས་པའི་བསྡུས་རིས་ཤིག་རེད།

གསར་འགོད་པར་ཤེས་རྟོགས་བྱུང་བར། རོང་ཤང་མངགས་གཏོང་ཁང་གིས་ཁོངས་གཏོགས་ཁུལ་དེ་ཉིད་ཚན་རིག་དང་མཐུན་པའི་སྒོ་ནས་དྲ་མིག་9ལ་དབྱེ་སྟེ་སྡེ་ཁུལ་གྱི་མི་དམངས་ཉེན་རྟོག་པ་དྲ་མིག་དུ་བསྐྱོད་པར་སྐུལ་འདེད་བཏང་བ་མ་ཟད། དྲ་མིག་པ་དང་། དུད་སྦྲེལ་ཐེམ་དཔོན། བདེ་འཇགས་བཅོས་སྐྱོང་བ་སོགས་སྤྱི་ཚོགས་ཀྱི་སྟོབས་ཤུགས་སྣ་ཚོགས“ཉེན་རྟོག་པ+N”མ་ལག་ནང་བཅུག་སྟེ། ཆ་འཕྲིན་བསྡུ་རུབ་དང་། ཁུངས་སྣེ་གོང་ཞུ། སྟབས་བདེའི་རྩོད་གཞི་དང་འགལ་ཟླ་འདུམ་འགྲིག་ཐག་གཅོད། བདེ་འཇགས་དྲིལ་བསྒྲགས་སོགས་ཀྱི་འགན་འཁྲི་ཁ་གསལ་བཟོས་ཏེ་དྲ་ཐོག་ནས“ཆུ་ཚོད་24སྒོ་མི་རྒྱག་པའི”སྤྲིན་སྣེའི་ཉེན་དོན་ཁང་བཏོད་དེ་དྲ་ཕྱིར“དཔུང་རྟགས་དམར་པོ་བཏག་མཁན་གྱི་སྐོར་ཞིབ་རུ་ཁག”སོགས་མཉམ་འགོག་མཉམ་བཅོས་ཀྱི་དཔུང་ཁག་བཙུགས་ནས“ཉེན་དམངས་མཉམ་འགུལ་དང་ཁུར་མཉམ་ལེན་དང་དོན་སྤྱི་སྒྲུབ”ཀྱི་བཅོས་སྐྱོང་མཉམ་ཤུགས་ཤིག་ཆགས་པར་བྱས་ཡོད།

རོང་ཤང་མངགས་གཏོང་ཁང་གིས་སྡེ་ཁུལ་ཉེན་དོན་གྱི་ལེགས་ཆ་སྤྱད་དེ་སྡེ་ཁུལ་གྱི་དྲ་མིག་ཚན་པར་བྱས་ནས་སྐོར་ཞིབ་ཁུལ་བཙུགས་པ་དང་སྤྱི་ཚོགས་ཀྱི་ཐོན་ཁུངས་མཉམ་འདྲེས་གཏིང་ཟབ་བྱས་ཏེ་མཉམ་འགོག་མཉམ་བཅོས་ཀྱི་གསོན་ཤུགས་འཕེལ་བར་བྱས་ཡོད། སློབ་གྲྭ་དང་སྨན་ཁང་སོགས་ཚན་པའི་ནང་ཁུལ་གྱི་སྲུང་སྐྱོབ་སྟོབས་ཤུགས་ལ་བརྟེན་ནས“འཕྲལ་སྡོམ་རྐྱང་ཚན་ཆུང་ཤོས”རྒྱ་ཁྱབ་ངང་བཙུགས་པ་དང་། མང་ཚོགས་ཚོས་སྤྱི་བདེ་ལས་ཁུངས་ལ་གཞོགས་འདེགས་ཧུར་ཐག་བྱས་ནས་དུས་འགོའི་ཐེ་ཇུས་དང་ཐག་གཅོད་བྱས་ནས་ཐོལ་བྱུང་དོན་རྐྱེན་འཕྲད་སྐབས“སྐར་མ་1ནང་རང་སྐྱོབ་དང་། སྐར་མ་3ནང་རོགས་རེས། སྐར་མ་5ཡི་ནང་ཆེད་ལས་སྟོབས་ཤུགས་དེ་གར་འབྱོར་ནས་ཐག་གཅོད་ཐུབ་པའི”འགན་ལེན་བྱས་ཏེ“ལམ་སེང་ཐོན་ཐུབ་པ་དང་། རང་སར་ཐག་གཅོད། རིམ་པ་བཞིན་རོགས་སྐྱོར། ཁུལ་ཡོངས་མཉམ་འགུལ”བཅས་དངོས་འབྲེལ་ཡོང་བར་བྱས་ཡོད།