ཉེ་ཆར། གསར་འགོད་པས་རང་སྐྱོང་ལྗོངས་ཞིང་ལས་གྲོང་གསེབ་ཐིང་ནས་ཤེས་རྟོགས་བྱས་པ་ལྟར་ན། ད་ལོ་ནས་བཟུང་། རང་སྐྱོང་ལྗོངས་ཞིང་ལས་གྲོང་གསེབ་ཐིང་གིས་ཞིང་འབྲོག་ལས་ཀྱི་གནོད་འཚེ་སྔོན་འགོག་དང་ཉུང་གཏོང་དང་། དེ་བཞིན་ཐོན་འབབ་བརྟན་པོ་དང་ཡོང་འབབ་འགན་ལེན་གྱི་ལས་དོན་ཁག་ལ་དམ་འཛིན་ཏན་ཏིག་བྱས་ཏེ། སྔོན་འགོག་ཚོད་འཛིན་གྱི་མ་ལག་འཐུས་སྒོ་ཚང་དུ་གཏོང་བ་དང་། ལག་རྩལ་གྱི་ཞབས་ཞུར་ཤུགས་སྣོན་རྒྱག་པ། དངོས་ཟོག་འགན་ལེན་བརྟན་དུ་གཏོང་བ་བཅས་རྒྱུན་ཆད་མེད་པར་བྱས་ཤིང་། ཞིང་འབྲོག་ལས་ཀྱི་ཐོན་སྐྱེད་བདེ་འཇགས་ལ་སྲུང་སྐྱོང་དང་ཞིང་འབྲོག་མང་ཚོགས་ཀྱི་ཡོང་འབབ་བརྟན་པོ་ཡོང་བར་ནུས་ཤུགས་ཡོད་རྒུས་གཞོལ་བས། མིག་སྔར་ལྗོངས་ཡོངས་ཀྱི་ཞིང་འབྲོག་ལས་ཐོན་སྐྱེད་ཀྱི་འཕེལ་ཕྱོགས་སྤྱིའི་ཆ་ནས་བརྟན་པོ་ཡོད་པ་རེད།

ཞིང་ཁ་དང་འབྲོག་རའི་འཐབ་ས་དང་པོར་དམིགས་ཏེ། རང་ལྗོངས་ཀྱིས་རིམ་པ་བཞི་པའི་ཞིང་ལས་ལག་རྩལ་མི་སྣ་6830སྤྱི་འདོམས་བྱས་ནས་གཞི་རིམ་དུ་སྐྱོད་པའི་ཞབས་འདེགས་ཞུས་པ་དང་། འཁྱིལ་ཆུ་ཕྱིར་འབུད་དང་གནོད་འཚེ་ཉུང་གཏོང་དང་། ནད་འབུའི་གནོད་འཚེ་བཅོས་སྐྱོང་། སྲོག་ཆགས་ཀྱི་རིམས་ནད་སྔོན་འགོག་ཚོད་འཛིན་སོགས་ཀྱི་ཐད་ས་ཡུལ་དངོས་སུ་མཛུབ་ཁྲིད་བྱས་ཏེ། གནོད་འཚེ་སྔོན་འགོག་དང་ཐོན་སྐྱེད་སླར་གསོའི་ལག་རྩལ་ཁྱབ་སྤེལ་གྱིས་གཞི་རིམ་གྱི་རང་སྐྱོབ་འཇོན་ཐང་ཆེ་རུ་བཏང་ཡོད། ཉིང་ཁྲི་དང་། ཆབ་མདོ། ལྷོ་ཁ་སོགས་གནོད་འཚེ་ཐོན་མང་བའི་ས་ཁུལ་ལ་དམིགས་ཏེ། ཆུ་ཚོད་24རིང་ལས་རེས་དང་གནོད་འཚེའི་གནས་ཚུལ་ཉིན་རེར་སྙན་སེང་ཞུ་བའི་ལམ་ལུགས་དོན་འཁྱོལ་ནན་པོ་བྱས་ཤིང་། གནོད་འཚེའི་གནས་ཚུལ་རྒྱུན་རྣམ་ཅན་གྱི་བཀོད་གཏོང་དང་གེགས་རྗེས་ཐོན་སྐྱེད་སླར་གསོ་བྱ་རྒྱུར་ཚན་རིག་དང་མཐུན་པའི་མཛུབ་ཁྲིད་བྱས་ནས། གནོད་འཚེའི་གྱོང་གུན་ཆུང་དུ་གཏོང་གང་ཐུབ་བྱས་ཡོད།

དེ་དང་ཆབས་ཅིག རང་ལྗོངས་ཀྱིས་གེགས་འགོག་དངོས་ཟོག་འགན་ལེན་གྱི་རྨང་གཞི་རྒྱུན་མཐུད་བརྟན་དུ་བཏང་ནས། རིགས་ཁག་གི་ཆེད་དོན་མ་དངུལ་བཏང་སྟེ། ཐོན་སྐྱེད་འགོག་རགས་བརྟན་པོ་ཡོང་བར་བྱས་ཤིང་། སྒོར་དུང་ཕྱུར་1.25ནད་འབུའི་གནོད་འཚེ་སྔོན་འགོག་དང་ཚོད་འཛིན་དང་དེ་བཞིན“གཅིག་གཏོར་མང་འཐུས”ཀྱི་ལས་དོན་ཐད་སྤྱད་ནས་སྔོན་འགོག་དང་ཚོད་འཛིན་གྱི་ལས་ཀ་མུའུ་ཁྲི་29.46ལེགས་སྒྲུབ་བྱས་པ་དང་། གཟན་ཆག་གི་ཆེད་དོན་མ་དངུལ་སྒོར་དུང་ཕྱུར་1.22བརྩོན་ལེན་བྱས་ཏེ། གཟན་ཆག་ཏུན་ཁྲི་14.9གསོག་འཇོག་བྱས་པ། མ་དངུལ་སྒོར་དུང་ཕྱུར་1.12བཀོད་སྒྲིག་བྱས་ནས་སྲོག་ཆགས་ཀྱི་རིམས་འགོག་སྨན་ཁབ་ཉོ་སྒྲུབ་བྱས་ཏེ། རྒྱུན་རྣམ་ཅན་གྱི་སྒོ་ནས་རིམས་ནད་ལྟ་ཞིབ་ཚད་ལེན་དང་གྲལ་བཤེར་བྱས་པ་རེད།