ནག་ཆུ་གྲོང་ཁྱེར་དམིགས་བསལ་སློབ་གསོའི་སློབ་གྲྭར་དགེ་རྒན་ཐུབ་བསྟན་སྐལ་བཟང་ནི་ནན་ཤོས་ཡིན་པ་མི་ཤེས་མཁན་གཅིག་ཀྱང་མེད།

“རྒན་ལགས་ཀྱིས་རྟག་ཏུ་ང་ཚོར་ཡོན་ཏན་མང་ཙམ་སྦྱོང་དགོས་པའི་བསླབ་བྱ་གནང་གི་ཡོད”ཅེས་བསོད་ནམས་རྒྱལ་མཚན་གྱིས་སྐད་འཕྲིན་གྱི་དཔེ་ཀློག་ཚོགས་པའི་ཁ་འབྱེད་བཞིན་བཤད། ཚོགས་པ་དེ་ནི་ཐུབ་བསྟན་སྐལ་བཟང་གིས་བཙུགས་པ་ཞིག་ཡིན་ཞིང་། སློབ་མ་ཚོས་ཉིན་ལྟར་ལག་བརྡའི་སློབ་སྦྱོང་དང་དཔེ་ཀློག་གི་མྱོང་ཚོར་ཚོགས་པའི་ནང་བསྐུར་དགོས་ཀྱི་ཡོད།

ད་ཆ་ཕྲུ་གུ་ཚོར་རྒྱུན་འཁྱོངས་ནས་དཔེ་ཀློག་བྱེད་དུ་འཇུག་མཁན་གྱི་དགེ་རྒན་ཁོང་2014ལོར་སློབ་མཐར་ཕྱིན་རྗེས་ནག་ཆུ་གྲོང་ཁྱེར་དམིགས་བསལ་སློབ་གསོའི་སློབ་གྲྭར་ལས་ཞུགས་བྱས་པ་དང་། དང་ཐོག་མར་རང་ཉིད་ལ་དམིགས་བསལ་སློབ་གསོའི་ཉམས་མྱོང་མེད་རྐྱེན་སེམས་ཁྲལ་ཆེན་པོ་བྱུང་ཞིང་། སོ་སོས་སྦྱངས་པའི་ལག་བརྡ་བྱང་ཆུབ་པོ་མེད་པ་དེས་སློབ་མ་ཚོ་དང་འབྲེལ་བ་བྱེད་སྐབས་དངངས་སྐྲག་ཆེན་པོ་ལངས་མྱོང་ཡོད།

ཕྱིས་སུ། ཁོང་གིས་དམིགས་བསལ་སློབ་གསོའི་དགེ་རྒན་ཞིག་ཡིན་ན། ངེས་པར་དུ་ལག་བརྡ་ཤེས་དགོས་ལ་ཆེད་ལས་ཀྱང་སྦྱོང་དགོས་པ་དང་། དེ་བས་ཡང་ཡང་བསམ་གཞིག་བྱེད་དགོས་པ་ཞིག་ནི་རང་གིས་ཕྲུ་གུ་ཚོའི་ཆེད་དུ་གང་ཞིག་སྒྲུབ་ཐུབ་མིན་དེ་རེད།

ལུས་རྩལ་གྱི་རྐྱེན་པས་ཁོང་དང་ཕྲུ་གུ་ཚོ་དངོས་སུ་འདྲིས་པོ་ཆགས།

ཐེངས་ཤིག་སློབ་ཚན་ཚོགས་སྐབས། ཐུབ་བསྟན་སྐལ་བཟང་གིས་2004ལོའི་ཨ་ཐེན་སིའི་ཨོ་རྩལ་འགྲན་ཚོགས་ཐོག་ལིའུ་ཞང་གིས་སྨི་110ཡི་བགམ་རྒྱུག་འགྲན་བསྡུར་གྱི་ཨང་དང་པོ་བླངས་པའི་བརྙན་ཐུང་དེ་བསྟན། ལིའུ་ཞང་གིས་མདུན་མཆོང་ངང་བཀག་ཤིང་བརྒལ་ནས་མཐའ་སྣེར་སླེབས་པའི་བརྙན་ཐུང་ལ་ལྟ་བཞིན་སློབ་ཁང་དུ་གྲོས་བསྡུར་གྱི་ཚ་རླབས་འཕྱུར།

ཁོང་ཉིད་འཆད་སྟེགས་ཀྱི་མདུན་དུ་ལངས་སྐབས། འོད་མདངས་འཕྱུར་བའི་མིག་ཟུང་རེ་རེ་ལས། དཔེ་དེབ་ནས་སློབ་མི་ཐུབ་པའི་ཡོན་ཏན་འགའ་ཤས་ལུས་རྩལ་ཐང་ནས་སློབ་ཆོག་པ་གཞི་ནས་རྟོགས།

དེ་ནས་བཟུང་ལུས་རྩལ་ཐང་ནི་ཕྲུ་གུ་ཚོའི་སློབ་ཁང་གཉིས་པར་གྱུར།

ལུས་རྩལ་སློབ་ཚན་ཡག་པོ་འཁྲིད་ཆེད། ཐུབ་བསྟན་སྐལ་བཟང་གི་ཉལ་ཁྲིའི་ཟུར་ལྕོག་ཐོག་དབང་པོ་སྐྱོན་ཅན་གྱི་ལུས་རྩལ་དང་། དྲག་སྐྱེད་སྦྱོང་བརྡར། དམིགས་བསལ་སློབ་གསོའི་སེམས་ཁམས་སོགས་ཀྱི་ཆེད་ལས་དེབ་མང་པོ་ཞིག་བརྩིགས་ཡོད།

བསོད་ནམས་རྒྱལ་མཚན་ནི“ལུས་རྩལ་ཡན་ལག་རུ་ཆུང”གི་གྲས་ཤིག་རེད། ཁོ་པའི་མིག་ཤེད་ཞན་པས་ཉིན་མོར་ཡང་ལམ་གསལ་པོ་མཐོང་གི་མེད། ཡིན་ནའང་ཐུབ་བསྟན་སྐལ་བཟང་གིས་བསོད་ནམས་རྒྱལ་མཚན་གྱི་རྐང་པ་ཧ་ཅང་རིང་ཞིང་ཤུགས་དང་ལྡན་པ་མཐོང་ནས་ཁོ་པར་རྒྱང་རྒྱུག་གློད་ན་མདུན་ལམ་ཡོད་པ་ཤེས།

ཉིན་མོ་འོད་འཚེར་ཆེ་བས་ལམ་གསལ་པོ་མ་མཐོང་སྟབས། ཐུབ་བསྟན་སྐལ་བཟང་གིས་ཁོ་པར་མིག་ཤེལ་ནག་པོ་སྒྲིག་པར་འཁྲིད་པ་དང་། སྦྱོང་བརྡར་འཆར་གཞི་ཀློག་ཁག་པས་སྒྲ་ཕབ་སྨྱུ་གུ་ཉོས་ཏེ་སྐད་ཆ་རེ་རེ་བཞིན་ཕབ་འཇུག་བྱས་ནས་ཁོ་པར་ཉན་དུ་འཇུག་གི་ཡོད།

སྨི་400ཡི་རྒྱུག་ལམ་དུ་བསྐོར་བ་ཡང་ཡང་བརྒྱབ་རྗེས་བསོད་ནམས་རྒྱལ་མཚན་གྱི་མྱུར་ཚད་མགྱོགས་སུ་དང་སྙུགས་ཤེད་ཆེ་རུ་སོང་ཡོད།

ད་ལོའི་ཟླ་5པར། 2026ལོའི་རྒྱལ་ཡོངས་དབང་སྐྱོན་མཆོང་རྒྱུག་འཕེན་གསུམ་གྱི་ལེགས་སྐྱེས་འགྲན་བསྡུར(ཧྲང་རའོ)དང་མིང་ཀུའུ་ཝུའུ་ཨེ་ཤེ་ཡའི་དབང་སྐྱོན་ལུས་རྩལ་འགྲན་ཚོགས་ཀྱི་འདེམས་སྒྲུག་འགྲན་བསྡུར་ཐོག བསོད་ནམས་རྒྱལ་མཚན་གྱིས་སྐྱེས་པའི་T20རིམ་པའི་སྨི་1500ཡི་མཐར་བསྡུར་ནང་གསེར་གྱི་རྟགས་མ་བླངས་པ་འདི་ནི་བོད་ཀྱིས་རྒྱལ་ཡོངས་དབང་སྐྱོན་མཆོང་རྒྱུག་འཕེན་གསུམ་འགྲན་བསྡུར་ཐོག་བླངས་པའི་གསེར་གྱི་རྟགས་མ་དང་པོ་དེ་ཡིན་པ་རེད།

རྡོ་རྗེ་མཚོ་མོ་ནི་ནག་ཆུ་གྲོང་ཁྱེར་གསེར་རྙེད་ཆུས་ན་དམར་ཆེ་ཤང་དུ་སྐྱེས་ཤིང་། ལོ་8ལ་སླེབས་སྐབས་བརྡབ་སྐྱོན་ཤོར་ནས་ཞ་འཁུམས་ཆགས་ཏེ་བྲང་ཁོག་མན་ཆད་འགུལ་མི་ཐུབ་པས་དུས་ཡུན་རིང་པོ་མལ་སར་ལུས་ཡོད།

2019ལོའི་དབྱར་ཁར། ནག་ཆུ་གྲོང་ཁྱེར་དམིགས་བསལ་སློབ་གསོའི་སློབ་གྲྭས་དབང་སྐྱོན་ཚབས་ལྕིའི་བྱིས་པར་དམིགས་ནས་ཁྱིམ་དུ་སློབ་ཚན་འཁྲིད་པར་སྐྱོད་སྐབས་ཐུབ་བསྟན་སྐལ་བཟང་ལ་ལོ་15ལ་སླེབས་པའི་རྡོ་རྗེ་མཚོ་མོ་ཐེངས་དང་པོ་ཐུག

ཁོང་གིས་རྡོ་རྗེ་མཚོ་མོར་གྲོང་ཁྱེར་གྱི་ཇ་ཁང་ཞིག་དུ་དངུལ་བསྡུ་བའི་ལས་ཀ་ཞིག་བཙལ། 2024ལོའི་ལོ་མཇུག་ཏུ། རྡོ་རྗེ་མཚོ་མོས་ནད་གཞི་བཅོས་ཆེད་གཡར་བའི་བུ་ལོན་སྒོར་ཁྲི་3འཇལ་ཐུབ་ཡོད། ཐུབ་བསྟན་སྐལ་བཟང་ཇ་ཁང་དུ་འགྲོ་རིམ་བཞིན་རྡོ་རྗེ་མཚོ་མོ་ཇ་ཁང་དུ་ལས་ཀ་བྱས་ན་དངོས་གནས་ཕངས་པོ་རེད་ཨང་སྙམ་གྱི་ཡོད།

དེ་ནས་ཐུབ་བསྟན་སྐལ་བཟང་གིས་ཡུལ་དེ་རང་དུ་རྩ་བ་ཚུགས་པའི་ཆེད་ལས་དྲག་སྐྱེད་དཔུང་ཁག་ཅིག་བཙུགས་ཏེ་ཕྲུ་གུ་ཚོ་ཁྱིམ་གྱི་སྒོ་རྩ་ནས་དྲག་སྐྱེད་སྦྱོང་བརྡར་ཐུབ་རྒྱུའི་བསམ་ཚུལ་ཞིག་བྱུང་བ་རེད།

ཁོང་གིས་དམངས་ཁྲོད་ཀྱི་སྤྱི་ཕན་དྲག་སྐྱེད་རུ་ཆུང་ཞིག་བཙུགས་ཏེ་རང་དངུལ་བཏང་ནས་ཡུལ་དེ་རང་གི་སློབ་ཆེན་སློབ་མ་དང་དབང་པོ་སྐྱོན་ཅན་གྱི་ནང་མི་བསྡོམས་མི་8ལ་གསོ་སྦྱོང་བྱས། 2025ལོའི་ཟླ་8པར། དབང་སྐྱོན་མཉམ་འབྲེལ་ལྷན་ཚོགས་དང་འཕྲོད་བསྟེན་བདེ་ཐང་སྡེ་ཚན་གྱི་སྐུལ་འདེད་འོག རུ་ཆུང་དེ་ཉིད་ཡུལ་དེ་གའི་སྨན་རྩིས་ཁང་གི་དྲག་སྐྱེད་ཚན་ཁག་ཏུ་ཟླ་སྒྲིལ་བཏང་རྗེས་ནག་ཆུ་རང་ལ་དབང་བའི་ཆེད་ལས་ཀྱི་དྲག་སྐྱེད་སྦྱོང་བརྡར་བྱ་ཡུལ་ཞིག་བྱུང་བ་རེད།

ཆེད་ལས་དྲག་སྐྱེད་སྦྱོང་བརྡར་ཟླ་ཤས་བྱས་རྗེས། རྡོ་རྗེ་མཚོ་མོའི་རྐང་པར་ཤེད་ཤུགས་སླེབས་ནས་རིམ་གྱིས་དྲག་སྐྱེད་བྱུང་ཞིང་། ཐུབ་བསྟན་སྐལ་བཟང་ལའང་རྡོ་རྗེ་མཚོ་མོ་རྐུབ་སྟེགས་འཁོར་ལོ་ཅན་གྱི་ལུས་རྩལ་པར་གསོ་སྐྱོང་བྱ་རྒྱུའི་བསམ་བློ་འཁོར།

2026ལོའི་ལོ་འགོར། ཐུབ་བསྟན་སྐལ་བཟང་གིས་རང་ཉིད་ཀྱི་གླ་ཆ་སྒོར་8000ལྷག་ཙམ་བཏང་ནས་རྡོ་རྗེ་མཚོ་མོར་གློག་སྒུལ་རྐུབ་སྟེགས་འཁོར་ལོ་ཅན་ཞིག་ཉོས་ཤིང་། ཁོ་མོས་རྐུབ་སྟེགས་འཁོར་ལོ་ཅན་གྱི་ཁ་ལོ་གཟབ་གཟབ་ངང་སྒྱུར་ཏེ་མདུན་དུ་འགྲོ་སྐབས་རྒྱབ་ལོགས་ནས“རྡོ་རྗེ་མཚོ་མོ། གང་འདོད་ལྟར་རྒྱུག་ཅིག”ཅེས་དང་སྦྲགས་ཏེ་དགེ་རྒན་གྱི་སྤྲོ་སེམས་འཁོལ་བའི་སྐུལ་ལྕག་གི་སྒྲ་གྲགས།

ལོ་ཤས་སོང་རིང་། ཐུབ་བསྟན་སྐལ་བཟང་གི་སྨ་ར་སྟུག་ཏུ་སོང་ཞིང་སྐྲ་ཉུང་དུ་སོང་བ་དང་ལུས་པོ་རྒྱགས་སུ་ཕྱིན་ནས་རྒན་བཟོ་དོད་དུ་སོང་ཡོད། ཁོང་ལ་རྒྱུས་མངའ་ཡོད་མཁན་ཚང་མས་དེ་ནི་རྟག་ཏུ་དཀའ་ཐུབ་མང་པོ་བཟོད་དགོས་པའི་རྐྱེན་གྱིས་ཡིན་པ་ཤེས་ཀྱི་ཡོད།

2024ལོར་བོད་རང་སྐྱོང་ལྗོངས་དབང་སྐྱོན་ལུས་རྩལ་མཐུན་ཚོགས་བཙུགས་རྗེས་ཁོང་དེ་བས་ལས་བྲེལ་ཆེ་རུ་སོང་། ཁ་པར་ནས་ཁྱིམ་བདག་གི་དོགས་འཆར་དང་། ཕྲུ་གུའི་རེ་བ། འགྲན་བསྡུར་་འབྲེལ་གཏུག་མཐུན་སྦྱོར། སྤྱི་ཕན་གྲ་སྒྲིག་སོགས་ཆ་འཕྲིན་མང་པོ་འབྱོར་ཏེ་ཆུ་ཚོད་24དུས་ངེས་མེད་ལ་ཁོང་འཚོལ་མཁན་ཡོད།

“མཐུན་ཚོགས་འཛུགས་དོན་ནི་སྟོབས་ཤུགས་དེ་བས་མང་བ་བསྡུ་རུབ་བྱས་ནས་ལས་དོན་འདི་མདུན་ལམ་དེ་བས་ཆེ་རུ་གཏོང་ཆེད་རེད”ཅེས་ཐུབ་བསྟན་སྐལ་བཟང་གིས་བཤད།

འདི་ནི་ཐུབ་བསྟན་སྐལ་བཟང་གིས་འཛུགས་རོགས་བྱས་པའི་བོད་ཀྱི་དབང་པོ་སྐྱོན་ཅན་གྱི་སྤྱི་ཚོགས་ལུས་རྩལ་རྩ་འཛུགས་ཐོག་མ་དེ་ཡིན་ཞིང་། དེ་སྔོན་ཁ་ཐོར་དུ་གནས་པའི་དབང་པོ་སྐྱོན་ཅན་གྱི་ལུས་རྩལ་ལག་ལེན་ལ་དུས་དེ་ནས་བཟུང་ལྗོངས་ཡོངས་རང་བཞིན་གྱི་སྤྱི་ཚོགས་རྩ་འཛུགས་ཀྱི་འཐབ་ས་ཡོད་པར་གྱུར།

དབང་སྐྱོན་ལུས་རྩལ་ལ་ཉིན་རེ་མ་འདས་པར་མཐོང་ཆེ་རུ་ཕྱིན་ཞིང་། རང་སྐྱོང་ལྗོངས་དང་ས་ཁུལ་དང་གྲོང་ཁྱེར་མང་པོས་སྤྱི་པའི་ལུས་རྩལ་ཐང་དུ་དབང་སྐྱོན་ལུས་རྩལ་འགྲན་ཚོགས་གཉེར་བ་ལས་འགྲན་དོན་གྱི་མ་ལག་མེད་པ་ནས་ཡོད་པའི་བར་འཕེལ་རྒྱས་བྱུང་ཡོད། མཐུན་ཚོགས་ཀྱི་ལུས་རྩལ་པ་རྩེ་གྲ་ཁག་གཅིག་ལེའོ་ཉིང་དུ་རིམ་པ་དེ་བས་མཐོ་བའི་གཅིག་སྡུད་གསོ་སྦྱོང་གི་འདེམས་སྒྲུག་ནང་ཞུགས་པས་བོད་ཀྱི་དབང་སྐྱོན་ལུས་རྩལ་པར་འཛམ་གླིང་གི་དབང་སྐྱོན་ཨོ་རྩལ་འགྲན་ཚོགས་ལ་ཞུགས་པའི་གོ་སྐབས་ཐོབ་ཡོད།

ཞོགས་པའི་ཆུ་ཚོད་དྲུག་དང་ཕྱེད་ཀ་ཙམ་ལ་སྐད་འཕྲིན་ཚོགས་པ་ནས་ཕྲུ་གུ་ཚོས་ཞོགས་སྦྱོང་འགོ་ཚུགས་པའི་སྒྲ་གྲགས། ཁོང་གིས་མལ་སའི་ནང་ནས“ཡག་པོ་འདུག མུ་མཐུད་ཤུགས་རྒྱོབ”ཅེས་བྲིས་ནས་བསྐུར་རྗེས་མལ་ལས་ལངས།

ཉིན་གསར་པ་འགོ་ཚུགས་པ་དང་ཐུབ་བསྟན་སྐལ་བཟང་གིས་མུ་མཐུད་དབང་སྐྱོན་ལུས་རྩལ་ལས་ལ་བྲེལ་འགོ་བརྩམས།