ཤིན་ཧྭ་གསར་འགྱུར་ཁང་པེ་ཅིང་ནས་ཟླ་9ཚེས་26ཉིན་གློག་འཕྲིན་འབྱོར་གསལ། ཟླ་9ཚེས་25ཉིན། གོ་ལ་ཧྲིལ་པོའི་འཕེལ་རྒྱས་གྲོས་འགོ་བཏོན་ནས་ལོ་5འཁོར་བའི་མཐོ་རིམ་གྱི་སྐད་ཆ་ཤོད་རེས་ཚོགས་འདུ་ཉིའུ་གཡོད་ཀྱི་མཉམ་འབྲེལ་རྒྱལ་ཚོགས་སྤྱི་ཁྱབ་པུའུ་རུ་འཚོགས་ཤིང་། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་སྐད་ཆ་ཤོད་རེས་ཚོགས་འདུར་རྟེན་འབྲེལ་འཕྲིན་ཡིག་སྤྲིངས་གནང་བ་རེད།

ཞི་ཅིན་ཕིང་གིས་གསུངས་དོན། འཕེལ་རྒྱས་ནི་མིའི་རིགས་སྤྱི་ཚོགས་ཀྱི་འགྱུར་མེད་བརྗོད་དོན་གཙོ་བོ་དེ་རེད་ལ་མི་དམངས་ཀྱི་བདེ་སྐྱིད་མངོན་འགྱུར་ཡོང་བའི་འགག་རྩའང་རེད། ལོ5ཡི་གོང་། ངས་མཉམ་འབྲེལ་རྒྱལ་ཚོགས་ཀྱི་ཚོགས་ཆེན་ཐོག་གོ་ལ་ཧྲིལ་པོའི་འཕེལ་རྒྱས་ཀྱི་གྲོས་འགོ་བཏོན་པ་དེ་ནི་རྒྱལ་སྤྱིའི་འཕེལ་རྒྱས་མཉམ་ལས་ལ་སྐུལ་འདེད་གཏོང་བ་དང་གོ་ལ་ཧྲིལ་པོའི་འཕེལ་རྒྱས་ཀྱི་བྱ་གཞག་སླར་གསོ་ཡོང་བར་བྱས་ནས། མཉམ་འབྲེལ་རྒྱལ་ཚོགས་ཀྱི་2030ལོའི་རྒྱུན་མཐུད་ཆོག་པའི་འཕེལ་རྒྱས་ཀྱི་གྲོས་རིམ་མགྱོགས་མྱུར་དོན་འཁྱོལ་ཡོང་བར་རམ་འདེགས་བྱེད་པའི་ཆེད་དུ་ཡིན།

ཞི་ཅིན་ཕིང་གིས་ནན་བཤད་གནང་དོན། ལོ་ལྔའི་རིང་། ཕྱོགས་ཁག་གི་ཐུན་མོང་འབད་བརྩོན་འོག གོ་ལ་ཧྲིལ་པོའི་འཕེལ་རྒྱས་ཀྱི་གྲོས་འགོ་རྒྱ་ཁྱབ་ངང་ལག་ལེན་བསྟར་བ་དང་། གྲོས་འགོའི་མཉམ་ལས་ཀྱི་རྣམ་གྲངས་དེ་རྒྱལ་ཁབ་120ལྷག་ཙམ་དུ་རྩ་བ་ཚུགས་པ་དང་ཕན་འབྲས་དངོས་ཐོན་ནས། འཕེལ་རྒྱས་ལ་མཉམ་དུ་སྐུལ་འདེད་གཏོང་བ་དང་མཉམ་ལས་གཉིས་ཕན་གྱི་ལེའུ་གསར་པ་རྩོམ་བཞིན་ཡོད།

ཞི་ཅིན་ཕིང་གིས་གསུངས་དོན། མིག་སྔར། འཛམ་གླིང་དུ་ལོ་བརྒྱའི་འགྱུར་ལྡོག་འགྲོ་མགྱོགས་སུ་ཕྱིན་པས། རྒྱལ་ཁབ་ཁག་གི་མི་དམངས་ཀྱིས་འཕེལ་རྒྱས་མངོན་འགྱུར་ཡོང་བའི་འདུན་པ་དེ་བས་ཆེ་རུ་འགྲོ་བཞིན་ཡོད། འཕེལ་རྒྱས་འགྲོ་བཞིན་པའི་རྒྱལ་ཁབ་ཆེ་ཤོས་དང་གོ་ལ་ཧྲིལ་པོའི་ལྷོ་ཕྱོགས་རྒྱལ་ཁབ་ཀྱི་ཁོངས་མི་ཞིག་ཡིན་པའི་ཀྲུང་གོས་ཕྱོགས་ཁག་དང་མཉམ་དུ་མི་དམངས་ལྟེ་བར་འཛིན་པའི་འཕེལ་རྒྱས་ཀྱི་འདུ་ཤེས་མཐའ་འཁྱོངས་ཀྱིས་གོ་ལ་ཧྲིལ་པོའི་འཕེལ་རྒྱས་ཀྱི་གྲོས་འགོ་གཏིང་ཟབ་དང་ཏན་ཏིག་ཕྱོགས་སུ་མཉམ་དུ་སྐུལ་འདེད་བཏང་སྟེ། རྒྱུན་མཐུད་ཆོག་པའི་འཕེལ་རྒྱས་དམིགས་ཚད་ཀྱི་རེ་འདོད་བཟང་པོ་དེ་མྱོང་ཚོར་ཐུབ་པའི་དངོས་ཡོད་ཀྱི་རྣམ་པ་ཞིག་ཏུ་བསྒྱུར་ནས་མིའི་རིགས་ཀྱི་ལས་དབང་གཅིག་མཐུན་ཚོགས་པ་གཏོད་པར་སྐུལ་འདེད་གཏོང་ཆེད་ལེགས་སྐྱེས་གསར་པ་དེ་བས་ཆེ་བ་འབུལ་འདོད་ཡོད།