ད་ཐེངས་ནི་གཞིས་རྩེ་གྲོང་ཁྱེར་མེ་གསོད་རོགས་སྐྱོབ་ཉིང་ལག་རུ་ཁག་གི་མེ་གསོད་རུ་མི་པད་མ་བྱང་ཆུབ་གནོད་འཚེ་ཕོག་པའི་ལྟེ་བའི་ཁུལ་དུ་སྐྱོད་ཐེངས་གཉིས་པ་རེད།

ཟླ་8ཚེས་28ཉིན་གྱི་ཐོ་རེངས་ཆུ་ཚོད་3པ་ཙམ་ལ། པད་མ་བྱང་ཆུབ་དང་འཐབ་གྲོགས་ཚོ་སྨག་རུམ་ཁྲོད་རྒྱལ་ལམ་216མྱུར་བཟོ་བྱ་ཡུལ་ནས་བྲག་རིའི་ཕྱོགས་སུ་བསྐྱོད།

“ས་ཡུལ་དངོས་སུ་འབྱོར་རྗེས་ངལ་ཡང་གསོ་ཁོམ་མེད་པར་ཐད་ཀར་འཚོལ་སྐྱོབ་བྱེད་འགོ་ཚུགས་པ་ཡིན”ཞེས་པད་མ་བྱང་ཆུབ་ཀྱིས་བཤད་པ་དང་། ཁོང་གིས། དགོང་མོ་རོགས་སྐྱོབ་མི་སྣས་མི་མེད་གནམ་གྲུར་བརྟེན་ནས་ཉལ་ཆས་དང་། བཟའ་བཅའ། ཆུ་བཅས་བསྐྱལ་བྱུང་། ང་དང་འཐབ་གྲོགས་ཚོས་བྲག་ཁུང་ཞིག་བཙལ་ནས་ངལ་གསོ་བརྒྱབ་པ་ཡིན་ཞེས་བཤད།

ད་ཐེངས་དེ་སྔ་དང་མི་འདྲ་ཞིང་། འགྲོ་ལམ་བཤངས་ཐུབ་པས་རླངས་འཁོར་ཐད་ཀར་མདུན་ཕྱོགས་སུ་གཏོང་ཐུབ་པ་དང་། སྒྲིག་ཆས་དང་མཁོ་སྤྲོད་དངོས་ཟོག་ཚང་མ་བསྐྱལ་ཐུབ་ཡོད།

གནོད་འཚེ་ཕོག་ཁུལ་དུ་བསྐྱོད་པའི་དཀའ་ངལ་ཆུང་དུ་ཕྱིན་ཡང་ལས་འགན་སྔར་བཞིན་ལྕི་པོ་ཡོད། “འཚོལ་སྐྱོབ་བྱེད་སྐབས་ཞིབ་ཚགས་པོ་བྱེད་དགོས”ཞེས་པད་མ་བྱང་ཆུབ་ཀྱིས་བཤད། ས་ཡུལ་དངོས་སུ་འཚོལ་སྐྱོབ་མི་སྣ་ལ་ལས་འདམ་ནང་པུས་མོ་བཙུགས་ཏེ་ལག་པས་འདམ་རྫབ་སྔོག་པ་དང་། རྫི་ཁྱིས་དྲི་མ་སྣོམ་བཞིན་ཕར་རྒྱུག་ཚུར་རྒྱུག་བྱེད་ཅིང་། སྐབས་འགར་འགྲོ་མཚམས་བཞག་ནས་ཕྱོགས་གཅིག་ཏུ་དྲི་མ་ཡང་ཡང་སྣོམ་པ་མཐོང་བྱུང་།

ས་རུབ་ལ་ཉེ་ཡང་གནོད་འཚེ་ཕོག་པའི་ལྟེ་བའི་ཁུལ་དུ་ད་དུང་དཔུང་སྡེས་འཚོལ་སྐྱོབ་བྱེད་བཞིན་འདུག “དཀའ་ངལ་ལ་མ་བལྟོས་པར་འཚོལ་སྐྱོབ་ལས་དོན་ཡག་པོ་སྒྲུབ་ཀྱི་ཡིན། ཚང་མས་ང་ཚོས་གནས་ཚུལ་གསར་ཤོས་འཁྱེར་ཡོང་རྒྱུར་སྒུག་བཞིན་ཡོད”ཅེས་པད་མ་བྱང་ཆུབ་ཀྱིས་བཤད།