གསར་འགོད་པར་ཀྲུང་གོ་འཕྲུལ་ཆས་བཟོ་ལས་མཉམ་འབྲེལ་ལྷན་ཚོགས་ནས་ཤེས་རྟོགས་བྱུང་བར། ཟླ་དང་པོ་ནས་བདུན་པའི་བར་འཕྲུལ་ཆས་བཟོ་ལས་དང་འབྲེལ་བ་ཆེ་བའི་ལས་རིགས་ཆེ་གྲས་ལྔའི་འཕར་ཐང་དུས་མཚུངས་ལས་འཕར་བའི་རྣམ་པ་རྒྱུན་འཁྱོངས་ཐུབ་ཡོད། དེའི་ནང་སྤྱི་སྤྱོད་སྒྲིག་ཆས་བཟོ་སྐྲུན་ལས་རིགས་དུས་མཚུངས་ལས་7.9%འཕར་བ་དང་། ཆེད་སྤྱོད་སྒྲིག་ཆས་བཟོ་སྐྲུན་ལས་རིགས་དུས་མཚུངས་ལས་8.8%འཕར་བ། རླངས་འཁོར་བཟོ་སྐྲུན་ལས་རིགས་དུས་མཚུངས་ལས་7.2%འཕར་བ། གློག་ཤུགས་འཕྲུལ་ཆས་དང་ཡོ་བྱད་བཟོ་སྐྲུན་ལས་རིགས་དུས་མཚུངས་ལས་6.5%འཕར་བ། དཔྱད་ཆས་བཟོ་སྐྲུན་ལས་རིགས་དུས་མཚུངས་ལས་9.4%འཕར་བ་བཅས་རེད།

འཕྲུལ་ཆས་བཟོ་ལས་ཀྱི་མཚོན་བྱེད་རང་བཞིན་གྱི་ཐོན་རྫས་ཁྲོད། ཟླ་དང་པོ་ནས་བདུན་པའི་བར་བཟོ་ལས་འཕྲུལ་མིའི་ཐོན་འབོར་རིམ་རྩིས་བརྒྱབ་ན་ཁྲི་63.5ཟིན་པ་དེ་དུས་མཚུངས་ལས་28.5%འཕར་བ་དང་། གློག་གཏོང་འཕྲུལ་འཁོར་གྱི་ཐོན་འབོར་རིམ་རྩིས་བརྒྱབ་ན་ཆན་ཝ་ཁྲི་20897ཟིན་པ་དེ་དུས་མཚུངས་ལས་2.8%འཕར་ཡོད།