ཉེ་ཆར། འགྲིམ་འགྲུལ་སྐྱེལ་འདྲེན་པུའུ་སོགས་སྡེ་ཚན་བཞིས་བཀྲམ་པའི《ཕྱོགས་བསྡུས་སྐྱེལ་འདྲེན་ཞབས་ཞུ་འཕེལ་རྒྱས་ཀྱི“ལོ་ལྔ་ཚན་བཅོ་ལྔ་པའི”འཆར་འགོད》ནང་། 2030ལོར་སླེབས་སྐབས། དེང་རབས་ཅན་གྱི་ཕྱོགས་བསྡུས་སྐྱེལ་འདྲེན་ཞབས་ཞུའི་མ་ལག་གཞི་རྩའི་ཆ་ནས་བསྐྲུན་ཟིན་ཏེ་རིམ་པ་མང་བ་དང་། སྤུས་ཚད་མཐོ་བ། ཉམས་ལེན་ཡག་པ་བཅས་ཀྱི་སྤྱི་དམངས་ཕྱིར་སྐྱོད་ཞབས་ཞུའི་མ་ལག་གཞི་རྩའི་ཆ་ནས་བསྐྲུན་རྒྱུ་དང་། 2035ལོར་སླེབས་སྐབས། དེང་རབས་ཅན་གྱི་ཕྱོགས་བསྡུས་སྐྱེལ་འདྲེན་ཞབས་ཞུའི་མ་ལག་སྔར་བས་འཐུས་སྒོ་ཚང་དུ་བཏང་ནས“རྒྱལ་ཡོངས་ཀྱི་123ཕྱིར་སྐྱོད་འགྲིམ་འགྲུལ་ཁུལ”དང“གོ་ལ་ཧྲིལ་པོའི་123བྲིན་ཁ་རྒྱུག་པའི་ཚོང་ཟོག་གི་ཟོག་འགྲུལ་ཁུལ”སྤྱིར་ན་ཆགས་པར་བྱས་ཏེ“མི་ཚང་མས་ཕྱིར་སྐྱོད་ཀྱི་ཉམས་ལེན་ལོངས་སུ་སྤྱོད་པ་དང་ཟོག་འགྲུལ་སྐྱེལ་འདྲེན་ནུས་ཆེ་དང་ཤར་གཏོང་ཐུབ་རྒྱུར”འདེགས་སྐྱོར་དེ་བས་ལེགས་པ་བྱ་རྒྱུ་རེད།

འཆར་འགོད་གཞིར་བཟུང་། འགྲུལ་པ་མཉམ་སྦྲེལ་སྐྱེལ་འདྲེན་གྱི་ཞབས་ཞུའི་རིམ་པ་སྤོར་མགྱོགས་སུ་གཏོང་བ་དང་། ཕྱོགས་བསྡུས་འགྲིམ་འགྲུལ་ལྟེ་གནས་ཀྱི་ཞབས་ཞུའི་སྤུས་ཚད་དང་ཕན་འབྲས་ཆེ་རུ་གཏོང་བ། སྐྱེལ་འདྲེན་ཞབས་ཞུ་དང་ཡུལ་སྐོར་མཉམ་འདྲེས་འཕེལ་རྒྱས་ལ་སྐུལ་འདེད་གཏོང་བ། འགྲུལ་སྐྱེལ་རླངས་འཁོར་ཆུང་ཕྲན་བོགས་མར་གཏོང་བའི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བ། མཉམ་སྦྲེལ་སྐྱེལ་འདྲེན་སྣ་མང་གི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བ། གྲོང་གསེབ་ཀྱི་འགྲུལ་ཟོག་སྦྲག་གསུམ་མཉམ་འདྲེས་འཕེལ་རྒྱས་ལ་སྐུལ་འདེད་གཏིང་ཟབ་གཏོང་བ་སོགས་ཀྱི་བྱ་ཐབས་བརྒྱུད། ཕྱོགས་བསྡུས་སྐྱེལ་འདྲེན་མཐུན་སྦྱོར་མཉམ་འདྲེས་འཕེལ་རྒྱས་ལ་སྐུལ་འདེད་གཏོང་རྒྱུ་རེད།

འཆར་འགོད་ནང་། ཡུལ་བབ་དང་བསྟུན་ནས་གྲོང་ཁྱེར་གྱི་འགྲིམ་འགྲུལ་འཕེལ་རྒྱས་གཏོང་སྟངས་གཏན་འཁེལ་བྱེད་པ་དང་། རིམ་པ་མང་བའི་གྲོང་ཁྱེར་གྱི་སྤྱི་པའི་འགྲིམ་འགྲུལ་ཞབས་ཞུའི་དྲ་རྒྱ་འཛུགས་པ། གྲོང་ཁྱེར་གྱི་འཁོར་ལམ་འགྲིམ་འགྲུལ་གཉེར་སྐྱོང་ཞབས་ཞུའི་ཆུ་ཚད་མཐོ་རུ་གཏོང་བ། གྲོང་ཁྱེར་གྱི་ཕྱིར་སྐྱོད་ཐོགས་མེད་ལས་ཆོད་ཆེ་རུ་གཏོང་བ། གྲོང་ཁྱེར་གྱི་སྤྱི་པའི་འགྲིམ་འགྲུལ་འཕེལ་རྒྱས་འགན་སྲུང་བྱེད་ཤུགས་ཆེ་རུ་གཏོང་བ། གླ་འཁོར་དང་དྲ་འབོད་གླ་འཁོར་མཐུན་སྦྱོར་འཕེལ་རྒྱས་ལ་སྐུལ་འདེད་གཏོང་བ། རྒན་འཕྲོད་ཅན་གྱི་འགོག་མེད་འགྲིམ་འགྲུལ་ཕྱིར་སྐྱོད་ཞབས་ཞུའི་ཆུ་ཚད་མཐོ་རུ་གཏོང་བ་སོགས་ཀྱི་ཐད་གྲོང་ཁྱེར་གྱི་འགྲིམ་འགྲུལ་ནང་རྒྱས་རྣམ་པའི་འཕེལ་རྒྱས་གཏོང་དགོས་ལུགས་བཏོན་ཡོད།