ཉེ་དུས། ཐག་རིང་ལུང་ཁུག་ཏུ་གནས་པའི་སྙེ་མོ་རྫོང་གདོང་དཀར་གྲོང་ཚོའི་ཚོགས་ཆུང་5པར་སྒུལ་བདེའི་འཕྲིན་གཏོང་བརྡ་རྟགས་མེད་པའི་ལོ་རྒྱུས་རྦད་དེ་མཇུག་འགྲིལ་ཡོད། འགྱུར་ལྡོག་དེ་ནི་སྙེ་མོ་ཤང་ཏང་ཨུད་དང་སྲིད་གཞུང་གིས་གཞུང་ལས་ཁང་རི་གྲོང་དུ་སྤོས་པ་དང་ཞབས་ཞུ་མང་ཚོགས་ཀྱི་སྒོ་ཁར་སྐྱེལ་བའི་ཞིབ་ཕྲའི་ལག་ལེན་ལས་བྱུང་བ་ཞིག་རེད།

སྙེ་མོ་ཤང་གི་ཁོངས་གཏོགས་སུ་སྲིད་འཛིན་གྲོང་ཚོ་7ཡོད་པ་དང་ཐག་རིང་ཤོས་ཀྱི་གདོང་དཀར་གྲོང་ཚོའི་ཚོགས་ཆུང་5པ་ནི་ཤང་སྲིད་གཞུང་དང་བར་ཐག་སྤྱི་ལེ་40ལྷག་ཙམ་གྱི་སར་ཡོད་ཅིང་། གྲོང་ཚོ་དེའི་རི་ལམ་ཀྱག་ཀྱོག་ཡིན་པའི་ཁར་གངས་ཆར་འབབ་པའི་གནམ་གཤིས་བསྟན་སྐབས་འགྲོ་སྐྱོད་དེ་བས་ཁག་པོ་ཡོད། ས་ཐག་རིང་ལ་ལུང་ཁུག་ཡིན་པ་དང་རྨང་གཞིའི་སྒྲིག་བཀོད་བལྟོས་བཅས་ཀྱིས་ཞན་པའི་དབང་གིས་དེ་གར་དུས་ཡུན་རིང་པོར་ལག་ཐོགས་ཁ་པར་གྱི་བརྡ་རྟགས་མེད་པས་མང་ཚོགས་ཀྱི་ཐོན་སྐྱེད་དང་འཚོ་བ་ཧ་ཅང་སྟབས་བདེ་མེད།

མང་ཚོགས་ཀྱིས་སེམས་ཁྲལ་བྱེད་ས་ནི་གཞི་རིམ་ལས་དོན་གྱི་ཁ་ཕྱོགས་ས་གཙོ་བོ་རེད། ད་ལོ་ནས་བཟུང་། སྙེ་མོ་ཤང་ཏང་ཨུད་དང་སྲིད་གཞུང་གིས་འཐབ་ཕྱོགས་དང་པོར་གཞུང་ལས་བསྒྲུབས་ནས་དམངས་ཀྱི་སེམས་ཁྲལ་སེལ་བའི་ལས་དོན་སྤེལ་ཡོད། ཤང་ཏང་ཨུད་ཚན་ཁག་གི་ཁོངས་མི་དང་ལས་སྒོའི་རྐང་འཛིན་པས་ལམ་ཆས་བསྡོགས་ཏེ་གྲོང་ཚོ་དང་ཚོགས་ཆུང་ཁག་ཏུ་བཅར་འདྲི་དང་ས་ཆ་དངོས་སུ་བརྟག་ཞིབ་བྱེད་པར་བསྐྱོད།

ཆུ་གླིང་གྲོང་ཚོར་བརྟག་ཞིབ་ཚོགས་ཆུང་ལོ་79ལ་སླེབས་པའི་བགྲེས་སོང་མེ་ཏོག་གི་ཁྱིམ་དུ་སྐྱོད་སྐབས། བགྲེས་སོང་གི་ཞབས་ཐང་པོ་མེད་པར་བརྟེན་ཉིན་ལྟར་ཆུ་ལེན་སྐབས་སྐར་མ་20ཙམ་ཐུར་དུ་འགྲོ་དགོས་ཀྱི་ཡོད་པ་ཤེས། “དགུན་ཁ་ཤར་རིམ་བཞིན་ལམ་དུ་འདྲེད་བརྡར་ཤོར་ནས་ཐེངས་མང་པོ་འགྱེལ་མྱོང་ཡོད”ཅེས་མེ་ཏོག་གིས་བརྗོད་སྐབས་བརྟག་ཞིབ་ཚོགས་ཆུང་གིས་གནས་ཚུལ་དེ་རིགས་འཕྲལ་མར་ཟིན་ཐོར་བཀོད་པ་མ་ཟད་སེམས་ལ་དེ་བས་ངེས་ཡོད།

སྙེ་མོ་རྫོང་ཨུད་དང་རྫོང་སྲིད་གཞུང་གི་རྒྱབ་སྐྱོར་འོག་རྣམ་གྲངས་ཀྱི་མ་དངུལ་སྒོར་ཁྲི་200ལྷག་ཙམ་དོན་འཁྱོལ་བྱས་པ་རེད། ཨར་ལས་བྱེད་རིང་སྙེ་མོ་ཤང་གིས་ཆེད་མི་ས་ཚིགས་སུ་མངགས་ནས་རྒྱུ་ཆ་སྐྱེལ་འདྲེན་དང་གློག་ཤུགས་སྦྲེལ་མཐུད་སོགས་ཀྱི་དཀའ་གནད་མཐུན་སྦྱོར་ཐག་གཅོད་བྱེད་དུ་བཅུག སྦྲེལ་ཚུགས་ཀྱི་ལས་གྲྭ་གཙོ་བོ་ལས་མཇུག་འགྲིལ་བའི་ཉིན་མོར་གྲོང་མི་ཚོས་རང་འགུལ་ངང་ཇ་སྲུབས་མ་དང་སྦྲང་དཀར་རྩམ་པ་ཁྱེར་ནས་ལས་ཡུལ་དུ་ཨར་ལས་མི་སྣར་འཚམས་འདྲི་ཞུ་བར་སླེབས།

ཆུ་གླིང་གྲོང་ཚོའི་འཐུང་ཆུའི་ལས་གྲྭར་ཡང་དཀའ་གནད་ཡོད་དེ། ལག་རྩལ་མི་སྣས་ས་ཡུལ་དངོས་སུ་རྩད་ཞིབ་ཐིག་ལེན་བྱས་རྗེས་ཤེས་རྟོགས་བྱུང་བར། ཆུ་འགོ་ནི་གྲོང་ཚོའི་རྒྱབ་ཀྱི་སྤྱི་ལེ་3གྱི་རྫ་ཆུ་ཡིན་པ་དང་། ས་དབྱིབས་མཐོ་དམན་ཁྱད་པར་ཆེ་ལ། གྲམ་རྡོའི་གསེབ་ནས་ཆུ་འདྲེན་ལྕགས་མདོང་འདིང་དགོས་ཀྱི་ཡོད། ཤང་གིས་ཕྱོགས་གཅིག་ནས་ཆུ་བེད་རིགས་གཅིག་མཁས་ཅན་གདན་དྲངས་ཏེ་ལམ་ཐིག་ལེགས་སུ་བཏང་བ་དང་། ཕྱོགས་གཞན་ཞིག་ནས་ཏང་ཡོན་འཕྲལ་སྒྲུབ་རུ་ཁག་སྒྲིག་འཛུགས་བྱས་ཏེ་ཨར་ལས་ལ་གཞོགས་འདེགས་བྱས་ཤིང་། ཉིན་40ལྷག་རིང་འབད་འཐབ་བྱས་པ་བརྒྱུད། དྭངས་ཁྲུམ་ཁྲུམ་གྱི་རི་ཆུ་གྲོང་ཚོའི་དུད་ཁྱིམ་ཚང་མར་འདྲེན་ཐུབ་ཡོད།

ཆུ་གླིང་གྲོང་ཚོར་ཆུ་འདྲེན་ཐུབ་རྗེས། ཤང་གིས་གྲོང་མིའི་ཚོགས་ཆུང་ལ་འཐུང་ཆུའི་སྒྲིག་བཀོད་བདག་སྐྱོང་ལམ་ལུགས་འཛུགས་རོགས་བྱས་ནས་བདག་སྐྱོང་འགན་འཁུར་བ་གཏན་འཁེལ་དང་། དུས་བཀག་ལྟར་སྐོར་གཡེང་དང་ཞིབ་བཤེར་བྱེད་ཀྱི་ཡོད།

བསྡོམས་རྩིས་བརྒྱབ་པར་གཞིགས་ན། ད་ལོ་ཚུན་དུ། སྙེ་མོ་ཤང་གིས་འཐབ་ས་དང་པོར་གཞུང་ལས་བསྒྲུབས་པ་བརྒྱུད་རྣམ་གྲངས་མ་དངུལ་སྒོར་ཁྲི་350ལྷག་ཙམ་བརྩོན་ལེན་བྱས་ནས། མང་ཚོགས་ཀྱི་འཕྲལ་མཁོ་དང་། དཀའ་ངལ། སེམས་ཁྲལ། རེ་སྒུག་བཅས་ཀྱི་གནད་དོན་21ཐག་གཅོད་བྱས་པས་མང་ཚོགས་བློ་ཡིད་ཚིམ་ཚད་98.6%ཟིན་ཡོད། རི་གྲོང་གི“སྐོར་སྐྱོད་གཞུང་ལས་ཁང”དེས་མང་ཚོགས་ལ་ལྷག་བསམ་རྣམ་དག་གི་ཞབས་འདེགས་ཞུ་བཞིན་ཡོད།