རྒྱལ་སྲིད་སྤྱི་ཁྱབ་ཁང་གསར་འགྱུར་གཞུང་ལས་ཁང་གིས་ཟླ་6ཚེས་24ཉིན་གསར་འགྱུར་ཡོངས་བསྒྲགས་ཚོགས་འདུ་འཚོགས་ཤིང་། 《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་བཅའ་ཁྲིམས》དང་རང་རྒྱལ་གྱི་མི་རིགས་ལས་དོན་གྱི་འབྲེལ་ཡོད་གནས་ཚུལ་ངོ་སྤྲོད་བྱས་པ་མ་ཟད་གསར་འགོད་པའི་དྲི་བར་ལན་བཏབ་ཡོད།

ཕྱི་རྒྱལ་གྱི་སྨྱན་སྦྱོར་འགའ་ཤས་ཀྱིས་བོད་ལྗོངས་ཀྱི་ཞག་སྡོད་སློབ་གྲྭར“བཙན་ཐབས་ཀྱིས་གཅིག་འདྲར་སྒྱུར་བ”དང་། “བཙན་ཤེད་ཀྱིས་ཞག་སྡོད་བྱེད་དུ་འཇུག་པ” “འགྲོ་བ་མིའི་ཐོབ་ཐང་ལ་བཙན་གནོད་བྱེད་པ”བཅས་ཟེར་གྱི་ཡོད་པས། སློབ་གསོའི་རོགས་སྐྱོར་བྱེད་ཐབས་དང“བཙན་ཐབས་ཀྱིས་གཅིག་འདྲར་སྒྱུར་བ”ཟེར་བའི་གཏམ་བརྗོད་དེ་རིགས་ལ་དཔྱད་གླེང་གང་འདྲ་ཞིག་སྤེལ་རྒྱུ་ཡིན། ཀྲུང་གོས་བོད་ལྗོངས་སུ་ཞག་སྡོད་སློབ་གྲྭ་བཙུགས་པའི་རྒྱུ་མཚན་གང་ཡིན་པ་དང་དེར་ཕན་འབྲས་གང་འདྲ་ཐོན་ཡོད། མི་རིགས་མཐུན་སྒྲིལ་ཡར་ཐོན་སྐུལ་སྤེལ་བཅའ་ཁྲིམས་ཀྱིས་མི་རིགས་ཁག་གི་མང་ཚོགས་ཚོའི་སློབ་གསོ་མྱོང་བའི་ཁེ་དབང་ལ་འགན་སྲུང་གང་འདྲ་བྱེད་ཀྱི་ཡོད་དམ་ཞེས་ཀྲུང་གོའི་བོད་ལྗོངས་དྲ་བའི་གསར་འགོད་པས་དྲི་བ་བཏོན་པར།

ཀྲུང་དབྱང་འཐབ་ཕྱོགས་གཅིག་གྱུར་པུའི་པུའུ་ཀྲང་གཞོན་པ་ཏོན་དབྱི་ཅུན་གྱིས། གོང་དུ་གསར་འགོད་པ་ཁོང་གིས་གླེང་བའི་ཕྱི་རྒྱལ་སྨྱན་སྦྱོར་གྱིས་སྤེལ་བའི་གསར་འགྱུར་དེ་དག་ནི་དོན་དངོས་གནས་ཚུལ་དང་ཡོངས་སུ་མི་མཐུན་པ་ཞིག་རེད་ཅེས་ལན་བཏབ་པ་རེད།

ཏོན་དབྱི་ཅུན་གྱིས་ངོ་སྤྲོད་བྱས་དོན། གཅིག་ནས། ཞག་སྡོད་ལམ་ལུགས་ལས་ཀྲུང་གོས་མི་རིགས་འདྲ་མཉམ་དང་སློབ་གསོ་འདྲ་མཉམ་གྱི་འདུ་ཤེས་རྒྱུན་འཁྱོངས་བྱེད་པ་ཏག་ཏག་མངོན་ཡོད། ཀྲུང་གོའི་འོས་འགན་སློབ་གསོའི་བཅའ་ཁྲིམས་ནང་། རྫོང་རིམ་པའི་མི་དམངས་སྲིད་གཞུང་གིས་དགོས་མཁོར་བསྟུན་ནས་ཞག་སྡོད་ལམ་ལུགས་ཀྱི་སློབ་གྲྭ་བཙུགས་ཆོག་པ་དང་། ཁྲིམས་ལུགས་དོན་ཚན་དེའི་ནང་ད་དུང་ཞག་སྡོད་ལམ་ལུགས་ཀྱི་སློབ་གྲྭ་འཛུགས་པའི་དམིགས་ཡུལ་ནི། སྡོད་གནས་ཁ་ཐོར་ཡིན་པའི་སློབ་ལོ་ལོན་པའི་བྱིས་པ་དང་ན་ཆུང་སློབ་གྲྭར་ཞུགས་ནས་འོས་འགན་སློབ་གསོ་དང་ལེན་བྱེད་པར་འགན་སྲུང་བྱ་ཆེད་ཡིན་པ་ནན་བཤད་བྱས་ཡོད། དེ་ནི་ཀྲུང་གོ་སྲིད་གཞུང་གིས་ཞིབ་ཕྲའི་རྒྱལ་བབ་ལ་གཞིགས་ཏེ། མི་རིགས་རང་ག་བར་བཏོན་པའི་དམིགས་བསལ་གྱི་ལམ་ལུགས་ཤིག་མིན་པར། རང་རྒྱལ་གྱི་མི་རིགས་ཁག་ཚང་མས་འདྲ་མཉམ་སློབ་གསོའི་དབང་ཆ་ལོངས་སུ་སྤྱོད་པར་འགན་ལེན་བྱ་ཆེད་བཏོན་པའི་སྲིད་ཇུས་ཤིག་ཡིན།

གཉིས་ནས། ཀྲུང་གོའི་ཞག་སྡོད་ལམ་ལུགས་ནི་སློབ་གྲྭས་སློབ་མར་སྡོད་གནས་དང་ཟ་མ་སོགས་ཀྱི་འགན་ལེན་ཞབས་ཞུ་མཁོ་འདོན་བྱེད་པ་ལས་སྒོ་བཀག་རྣམ་པའི་སློབ་གྲྭ་མིན་ལ། དམག་དོན་ཅན་གྱི་དོ་དམ་དེ་བས་ཀྱང་མིན། སློབ་མ་ཞག་སྡོད་བྱེད་མིན་ནི་སློབ་མ་རང་ཉིད་དང་ཁྱིམ་བདག་གིས་རང་ཉིད་ཀྱི་ཁྱིམ་ཚང་དང་སློབ་གསོའི་དགོས་མཁོར་གཞིགས་ནས་རང་མོས་ཀྱིས་གདམ་ག་བྱེད་ཆོག་གི་ཡོད། དོན་དངོས་ཐོག་ཞག་སྡོད་སློབ་མའི་གྲངས་འབོར་ཡང་གཏན་འཁེལ་བྱས་པ་ཞིག་མིན་པས། མི་སྒེར་གྱི་དགོས་མཁོར་གཞིགས་ནས་གདམ་ག་བྱེད་ཆོག སློབ་མ་ལ་ལ་ཞག་སྡོད་ནས་འགྲོ་སྦྱོང་བྱེད་པར་བསྒྱུར་བ་དང་། སློབ་མ་ལ་ལ་འགྲོ་སྦྱོང་ནས་ཞག་སྡོད་བྱེད་པར་བསྒྱུར་བ་ནི་རྦད་དེ་སློབ་མ་དང་ཁྱིམ་བདག་རང་ཉིད་ཀྱི་གདམ་གར་རག་ལུས་ཡོད། ཞག་སྡོད་སློབ་མ་རྣམས་གཟའ་མཇུག་དང་། དུས་ཆེན་དང་གུང་གསེང་། དགུན་གསེང་དང་དབྱར་གསེང་བཅས་ཚང་མར་ཁྱིམ་དུ་ལོག་ཆོག་པ་དང་། ཁྱིམ་བདག་གིས་ཀྱང་དུས་དང་རྣམ་པ་ཀུན་ཏུ་སློབ་གྲྭར་རང་གི་ཕྲུ་གུར་བལྟ་རུ་ཡོང་ཆོག་པ་མ་ཟད། དགོས་མཁོ་ལྟར་དུས་དང་རྣམ་པ་ཀུན་ཏུ་ཕྲུ་གུ་ཁྱིམ་དུ་བསུས་ཆོག

གསུམ་ནས། སྲིད་ཇུས་ལག་བསྟར་བྱས་པའི་ཕན་འབྲས་ནས་བལྟས་ན། བོད་ལྗོངས་ཀྱི་ཞིང་འབྲོག་མང་ཚོགས་ཀྱིས་བུ་ཕྲུག་ཞག་སྡོད་ལམ་ལུགས་ཀྱི་སློབ་གྲྭར་སྐྱེལ་འདོད་ཧ་ཅང་ཆེན་པོ་བྱེད་ཀྱི་ཡོད། ཚང་མས་ཤེས་གསལ་ལྟར། བོད་རང་སྐྱོང་ལྗོངས་ཀྱི་ས་ཁོངས་རྒྱ་ཆེ་ལ་སྡོད་གནས་ཧ་ཅང་ཁ་ཐོར་ཡིན་པས། ཞིང་འབྲོག་མང་ཚོགས་ཀྱིས་བུ་ཕྲུག་སློབ་གྲྭར་སྐྱེལ་བའི་མ་གནས་ཧ་ཅང་མཐོ་བ་དང་ཁྱིམ་བདག་གིས་ཕྲུ་གུ་སློབ་གྲྭར་བསུ་སྐྱེལ་བྱེད་པའི་ཁུར་པོ་ཧ་ཅང་ལྗིད་པོ་ཡོད། ས་མཐོའི་མི་རིགས་ཁག་གི་བྱིས་པར་སྤུས་ཚད་མཐོ་བའི་སློབ་གསོ་འདྲ་མཉམ་ངང་ལོངས་སྤྱོད་བྱེད་པའི་དབང་ཆར་འགན་སྲུང་བྱེད་པ་དང་མང་ཚོགས་ཀྱི་འདོད་བློ་དང་བསྟུན་ཆེད། སྲིད་གཞུང་གིས་ཞིང་འབྲོག་ཁུལ་ཁག་གཅིག་ཏུ་ཞག་སྡོད་ལམ་ལུགས་ལག་ལེན་བསྟར་ནས་སློབ་མར་བདེ་འཇགས་དང་སྟབས་བདེའི་ཆ་རྐྱེན་དེ་བས་ལེགས་པ་བསྐྲུན་ཏེ། ཁྱིམ་བདག་དང་སློབ་མའི་དགོས་མཁོ་སྐོང་བཞིན་ཡོད།