ཟླ་3ཚེས་5ཉིན་གྱི་ཞོགས་པར། ཁ་བ་བབས་རྗེས་ཀྱི་པེ་ཅིང་མི་དམངས་ཚོགས་ཁང་ཆེ་མོ་དེ་བས་རྔམ་བརྗིད་ཆེ་ཞིང་མཛེས་སྡུག་ལྡན། རྒྱལ་ཡོངས་མི་དམངས་འཐུས་ཚོགས་སྐབས་བཅུ་བཞི་པའི་ཚོགས་འདུ་ཐེངས་བཞི་པར་ཞུགས་མཁན་རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མི་2700ལྷག་ཙམ་གྱིས་མི་དམངས་ཀྱི་མངགས་བཅོལ་ཟབ་མོ་ཕྲག་ཏུ་ཁུར་ཏེ་དེ་གར་ལྷན་དུ་འཛོམས་ནས་རྒྱལ་དོན་ལ་གྲོས་མོལ་དང་འཕེལ་རྒྱས་སྐོར་གླེང་ནས་བརྗིད་ཆེའི་འཆར་གཞི་མཉམ་དུ་བཀོད་ཡོད།

ད་ལོ་ནི“ལོ་ལྔ་ཚན་བཅོ་ལྔ་པའི”འགོ་ཚུགས་ལོ་ཡིན་པས། ཐེངས་འདིའི་ཚོགས་འདུར་ཀུན་གྱིས་དོ་སྣང་ཆེན་པོ་བྱེད་ཀྱི་ཡོད།

མི་དམངས་ཚོགས་ཁང་ཆེ་མོའི་མི་ཁྲི་ཤོང་བའི་ཚོགས་ཁང་ཆེ་མོའི་རྣམ་པ་བརྗིད་ཉམས་ལྡན་ལ་སྤྲོ་སེམས་འཁོལ་བ་ཞིག་ཡོད་ཅིང་། ཀྲུའུ་ཞིའི་སྡིངས་ཆའི་རྒྱབ་ངོས་ཀྱི་དབུས་སུ་བཀལ་བའི་རྒྱལ་རྟགས་འདི་ཉིད་དམར་མདངས་བཀྲ་བའི་དར་དམར་འོག་འོད་མདངས་རབ་ཏུ་འཚེར།

ཆུ་ཚོད་9པ་ཙམ་ལ། སྤྲོ་སེམས་འཁོལ་བའི་ཐལ་མོའི་རྡེབ་སྒྲའི་ཁྲོད། ཞི་ཅིན་ཕིང་སོགས་ཏང་དང་རྒྱལ་ཁབ་ཀྱི་འགོ་ཁྲིད་པ་ཚོགས་རར་ཕེབས་ནས་ཀྲུའུ་ཞི་སྡིངས་ཆའི་ཐོག་བཞུགས། ཆུ་ཚོད་9པར་ཚོགས་ཆེན་འགོ་ཚུགས་པ་དང་། ཚོགས་ར་ཡོངས་ཀྱི་མི་རྣམས་ཡར་བཞེངས་ནས་སྐད་གསང་མཐོན་པོས་རྒྱལ་གླུ་བླངས་པ་རེད།

ཚོགས་འདུའི་གྲོས་རིམ་གཞིར་བཟུང་། རྒྱལ་སྲིད་སྤྱི་ཁྱབ་ཁང་གི་ཙུང་ལི་ལི་ཆང་གིས་རྒྱལ་སྲིད་སྤྱི་ཁྱབ་ཁང་གི་ཚབ་ཞུས་ནས་ཚོགས་ཆེན་ལ་སྲིད་གཞུང་གི་ལས་དོན་སྙན་སྒྲོན་གནང་བ་རེད།

2025ལོ་ནི་སྤྱིར་བཏང་གཏན་ནས་མིན་པའི་ལོ་ཞིག་རེད། རྒྱལ་ནང་གི་ཐོན་སྐྱེད་རིན་ཐང་བསྡོམས་འབོར་5%འཕར་ནས་ཁྱོན་སྒོར་དུང་ཕྱུར་ཁྲི་140.19ཟིན་པ་དང་། ལག་རྩལ་མཐོ་བའི་བཟོ་སྐྲུན་ལས་རིགས་དང་སྒྲིག་ཆས་བཟོ་སྐྲུན་ལས་རིགས་ཀྱི་འཕར་ཐང་9.4%དང་9.2%སོ་སོར་འཕར་བ། བཟོ་ལས་འཕྲུལ་མི་དང་འདུས་གྲུབ་གློག་ལམ་གྱི་ཐོན་འབོར་28%དང་10.9%སོ་སོར་འཕར་བ། ནུས་རྒྱུ་གསར་པའི་རླངས་འཁོར་ལོ་རེར་ཐོན་འབོར་ཁྲི་1600ལྷག་ཙམ་ཟིན་པ་སོགས་ལྗིད་ཏིག་ཏིག་གི་གྲངས་གཞི་མང་པོ་ལས་འདས་ཟིན་པའི་ལོ་གཅིག་རིང་གི་གྲུབ་འབྲས་མངོན།

“ཀྲུང་གོ་མི་དམངས་ལ་དཀའ་ངལ་དང་ཉེན་ཁ་མཐའ་དག་ལས་རྣམ་པར་རྒྱལ་ཐུབ་པའི་གདེང་ཚོད་དང་། བློ་གྲོས། སྟོབས་ཤུགས་བཅས་ཡོད”ཅེས་པའི་སྲིད་གཞུང་གི་ལས་དོན་སྙན་སྒྲོན་ནང་གི་སྐད་ཆ་འདི་ལས་འཐུས་མི་ཚོར་སྐུལ་མ་ཆེན་པོ་ཐེབས་ཡོད།

ལོ་གཅིག་གི་རིང་། རང་རྒྱལ་གྱི་དཔལ་འབྱོར་གནོན་བཟོད་མདུན་སྐྱོད་ཐུབ་ནས་མཉེན་ཤུགས་ཆེན་པོ་མངོན་ཡོད། ལོ་གཅིག་གི་རིང་། རང་རྒྱལ་གྱི་འཕེལ་རྒྱས་གསར་ཞིང་ལེགས་པའི་ཕྱོགས་སུ་འཕེལ་རྒྱས་ཕྱིན་ནས་དབྱར་མཚོ་རྒྱས་པ་ལྟར་གྱི་གསོན་ཤུགས་རྒྱས་ཡོད།

“ད་ཐེངས་ཀྱི་དཔྱིད་གསར་དུས་ཆེན་རིང་། ཧའེ་ནན་དུ་ཡུལ་སྐོར་ཀྱི་ཚ་རླབས་འཕྱུར་བ་དང་། འཛད་སྤྱོད་རྒྱུན་མཐུད་འཕར་ནས་རང་རྒྱལ་གྱི་དཔལ་འབྱོར་གྱི་མཉེན་ཤུགས་ཆེན་པོ་དང་མི་མངོན་པའི་ནུས་པ་ཆེན་པོ་མངོན་ཡོད”ཅེས་ཧའེ་ནན་སློབ་ཆེན་ནན་ཧའེ་རྒྱ་མཚོའི་ཐོན་ཁུངས་བེད་སྤྱོད་རྒྱལ་ཁབ་གཙོ་གནད་ཚོད་ལྟ་ཁང་གི་ཞིབ་འཇུག་པ་གཞོན་པ་འཐུས་མི་ལིན་ཧོན་གྱིས་གསུངས་པ་དང་། ཁོང་གིས“སྒོ་དབྱེའི་ཁེ་སྤོགས་རྒྱུན་ཆད་མེད་པར་ཐོབ་པ་དང་བསྟུན་ནས་ཧའེ་ནན་འདི་ཉིད་ཀྲུང་གོའི་ཁྲོམ་རའི“སྒོ་མོ”ཞིག་ཡིན་པ་མ་ཟད། དེ་བས་གོ་ལ་ཧྲིལ་པོའི་ཐོན་ཁུངས་བཀོད་སྒྲིག་གི་འཁྲུག་ཆ་དོད་པའི་སྦྲེལ་ཚིགས་ཤིག་ཏུ་འགྱུར་རྒྱུ་རེད”ཅེས་གསུངས་པ་རེད།

“ལོ་ལྔ་ཚན་བཅོ་ལྔ་པའི”འགོ་འཛུགས་ས་གསར་པར་འཐུས་མི་ཚོར་ཡིད་ཆེས་ཀྱིས་ཁེངས་བཞིན་ཡོད།

སྲིད་གཞུང་གི་ལས་དོན་སྙན་སྒྲོན་ནང་གི“གྲོང་གསེབ་ཕྱོགས་ཡོངས་དར་རྒྱས་ལ་སྐུལ་འདེད་ཏན་ཏིག་གཏོང་དགོས”ཞེས་པའི་ནང་དོན་གསན་སྐབས། ཀྲེ་ཅང་ཧྲའོ་ཤིན་གྲོང་ཁྱེར་ཁོ་ཆའོ་ཆུས་ཐང་ཏི་གྲོང་ཚོའི་ཏང་ཀྲི་པུའི་ཧྲུའུ་ཅི་འཐུས་མི་ལིའུ་ཅན་མིང་ལ་དགའ་ཚོར་ཆེན་པོ་བྱུང་ཞིང་། ཁོང་གིས“ང་ཚོས་ཟུར་སྣོན་གྱི་རིན་ཐང་ཆེ་བའི་ཞིང་ལས་དང་། རིག་གནས། ཡུལ་སྐོར་བཅས་ཀྱི་ཐོན་ལས་སྐྱེད་སྲིང་བྱས་ཏེ། ན་གཞོན་དེ་བས་མང་བ་ཕ་ཡུལ་དུ་ཕུགས་བསམ་མངོན་འགྱུར་བྱེད་པར་ལོག་རྒྱུའི་ཡིད་དབང་འགུག་དགོས”ཞེས་གསུངས་པ་རེད།

ཚོགས་འདུའི་གྲོས་རིམ་གཞིར་བཟུང་། ཚོགས་ཆེན་ཐོག་རྒྱལ་དམངས་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་ལོ་ལྔ་ཚན་བཅོ་ལྔ་པའི་འཆར་འགོད་རྩ་གནད་ཀྱི་འཆར་ཟིན་ལ་ཞིབ་བཤེར་གནང་བ་རེད།

“ལོ་ལྔ་ཚན་བཅོ་ལྔ་པའི”འཆར་འགོད་རྩ་གནད་ཀྱི་འཆར་ཟིན་ནང་འཁོད་པའི་དམངས་གཉེར་དཔལ་འབྱོར་འཕེལ་རྒྱས་དང་རྒྱ་སྟོབས་ཆེ་རུ་གཏོང་རྒྱུའི་སྐོར་གྱི་ནང་དོན་གསན་སྐབས། ཏེ་ལི་ཤིས་ཚོགས་པའི་ཏུང་ཧྲི་ཅུས་ཀྱི་ཀྲུའུ་ཞི་འཐུས་མི་ཧུའུ་ཁྲེང་ཀྲུང་ལ་སྐུལ་མ་ཆེན་པོ་ཐེབས་ཤིང་། ཁོང་གིས“སྲིད་ཇུས་ཤུགས་དང་ལྡན་པ་དང་། ཁྲིམས་སྐྱོང་ཞིབ་ཚགས་པ། འཕེལ་རྒྱས་ཀྱི་བར་མཐོངས་ཡོད་པ་བཅས་བྱུང་ཚེ། ང་ཚོ་དམངས་གཉེར་ཁེ་ལས་པའི་སེམས་ནང་དེ་བས་གདེང་ཚོད་ཡོད་པ་དང་། ལས་དོན་སྒྲུབ་སྐབས་ངར་ཤུགས་ལྡན་པ། འཕེལ་རྒྱས་ཀྱི་རེ་བས་ཁེངས་པ་བཅས་ཡོང་གི་འདུག”ཅེས་གསུངས་པ་རེད།

རྒྱལ་ཡོངས་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་མངགས་བཅོལ་ལྟར། རྒྱལ་ཡོངས་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་ཨུ་ཡོན་ཀྲང་གཞོན་པ་ལི་ཧུང་ཀྲུང་གིས་སྐྱེ་ཁམས་ཁོར་ཡུག་གི་ཁྲིམས་གཞུང་འཆར་ཟིན་དང་། མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་བཅའ་ཁྲིམས་འཆར་ཟིན། རྒྱལ་ཁབ་འཕེལ་རྒྱས་འཆར་འགོད་ཀྱི་བཅའ་ཁྲིམས་འཆར་ཟིན་བཅས་སྐོར་ལ་ཁག་སོ་སོར་གསལ་བཤད་གནང་བ་རེད།

“སྐྱེ་ཁམས་ཁོར་ཡུག་གི་ཁྲིམས་གཞུང་བཟོ་བར་དོན་སྙིང་གཏིང་ཟབ་ལྡན་ཡོད”ཅེས་ཀྲུང་གོ་ཚན་རིག་ཁང་ཁྲུང་ཆིང་ལྗང་མདོག་རིག་ནུས་ལག་རྩལ་ཞིབ་འཇུག་ཁང་གི་ཡོན་ཀྲང་གཞོན་པ་འཐུས་མི་ཧྲི་ཧའོ་ཧྥེ་ཡིས་གསུངས་པ་དང་། ཁོང་གིས“སྐྱེ་ཁམས་སྲུང་སྐྱོང་ལམ་ལུགས་དང་བཅའ་ཁྲིམས་རྒྱུན་ཆད་མེད་པར་འཐུས་སྒོ་ཚང་དུ་འགྲོ་བཞིན་ཡོད་པས། ‘ལོ་ལྔ་ཚན་བཅོ་ལྔ་པའི’རིང་ལྗང་མདོག་འཕེལ་རྒྱས་ཀྱི་ལམ་བུར་ཡག་པོ་སྐྱོད་པའི་ང་རང་གི་གདེང་ཚོད་དེ་བས་ཆེ་རུ་ཕྱིན་སོང”ཞེས་གསུངས་པ་རེད།

ཚོགས་ར་ནས་དོན་ཕེབས་པའི་ཧོ་ནན་ཨན་དབྱང་ཐང་དབྱིན་རྫོང་དབྱི་ཀོའུ་གྲོང་རྡལ་གྱི་འཐུས་མི་ཀེ་ཧྲུའུ་ཆིན་ལ་སྐུལ་མ་ཆེན་པོ་ཐེབས་པ་མ་ཟད། འགན་འཁྲི་ལྕི་པོ་ཡིན་པའི་ཚོར་སྣང་ཟབ་མོ་ཡང་བྱུང་ཡོད། ཤང་དབྱང་ཀྲོང་གྲོང་ཚོ་དང་སན་ལི་ཐུན་གྲོང་ཚོ་གཉིས་ཀྱི་ཏང་ཀྲི་པུའི་ཧྲུའུ་ཅི་ཡིན་པའི་ཁོང་གིས་ལོ་འདི་དག་རིང་། ཡུལ་མི་ཚོའི་སྣེ་ཁྲིད་ནས་ཞིང་ལས་སྐྱེ་ཁམས་འཁོར་རྒྱུག་དཔེ་སྟོན་ཁུལ་བསྐྲུན་པ་དང་། གྲོང་ཚོའི་མཉམ་སྡེབ་དཔལ་འབྱོར་འཕེལ་རྒྱས་ཧུར་ཐག་བཏང་བས་གྲོང་ཚོར་འགྱུར་ལྡོག་ཆེན་པོ་བྱུང་ཡོད། “སྲིད་གཞུང་གི་ལས་དོན་སྙན་སྒྲོན་ནང་ཐོན་འབབ་དང་ཐོན་ནུས་དང་། ཐོན་སྐྱེད་དང་སྐྱེ་ཁམས། ཐོན་འཕར་དང་འབབ་འཕར་བཅས་ལ་མཉམ་དུ་དམ་འཛིན་བྱ་རྒྱུ་མཐའ་འཁྱོངས་བྱེད་དགོས་ཞེས་གསུངས་པ་ཚང་མ་ང་ཚོ་ཞིང་པའི་སེམས་ནང་གི་སྐད་ཆ་རེད་འདུག”ཅེས་ཀེ་ཧྲུའུ་ཆིན་གྱིས་གསུངས་པ་དང་། ཁོང་གིས“ངས་སྲིད་ཇུས་བཟང་པོ་ཞིང་ནང་དང་མུ་ཁར་དོན་འཁྱོལ་ཐུབ་པ་བྱས་ཏེ། སྤུས་ཚད་མཐོ་བའི་འཕེལ་རྒྱས་ཡོང་བ་བྱེད་ཀྱི་ཡིན”ཞེས་གསུངས་པ་རེད།