2025ལོར། ལྗོངས་ཡོངས་ཀྱི་གོང་འོག་ཚང་མས་སྤྱི་ཡོངས་ཀྱི་རྒྱལ་ཁབ་བདེ་འཇགས་ལྟ་བ་བརྟན་པོ་བཙུགས་ཏེ་ཐོག་མཐའ་བར་གསུམ་དུ་བརྟན་ལྷིང་སྲུང་སྐྱོང་བྱེད་པ་དེ་ཆབ་སྲིད་ཀྱི་ལས་འགན་ཨང་དང་པོར་བརྩིས་ནས། སྤྱི་ཚོགས་བཅོས་སྐྱོང་མ་ལག་དང་བཅོས་སྐྱོང་ནུས་པ་དེང་རབས་ཅན་གྱི་ཆུ་ཚད་རྒྱུན་ཆད་མེད་པར་ཆེ་རུ་བཏང་སྟེ་ཆུ་ཚད་དེ་བས་མཐོ་བའི་དུས་བདེའི་བོད་ལྗོངས་དང་། ཁྲིམས་སྐྱོང་བོད་ལྗོངས། ཡུན་རིང་བདེ་འཁོད་བཅས་ཀྱི་རྨང་གཞི་སྔར་བས་བརྟན་དུ་བཏང་བས། མི་རིགས་ཁག་གི་མང་ཚོགས་ཀྱི་བདེ་འཇགས་ཚོར་སྣང་དང་བློ་ཡིད་ཚིམ་ཚད་99%ཡན་རྒྱུན་འཁྱོངས་ཐུབ་ཡོད།

རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མི་དང་ལྷ་ས་གྲོང་ཁྱེར་གྱི་ཧྲི་ཀྲང་ཝང་ཆང་གིས་གསར་འགོད་པར“འདས་ཟིན་པའི་ལོ་གཅིག་རིང་ལྷ་ས་གྲོང་ཁྱེར་གྱིས་ཁྲིམས་སྐྱོང་ཅན་གྱི་འདུ་ཤེས་དང་། ཚན་རིག་ཅན་གྱི་ལམ་སྲོལ། རྒྱུན་རྣམ་ཅན་གྱི་བྱེད་ཐབས་བཅས་ལ་བརྟེན་ནས་ནུས་ཤུགས་ཡོད་རྒུས་ཉེན་ཁ་སྔོན་འགོག་དང་། བདེ་འཇགས་འགན་ལེན། བརྟན་ལྷིང་སྲུང་སྐྱོང་། འཕེལ་རྒྱས་ལ་སྐུལ་འདེད་བཅས་བཏང་བས་གྲོང་ཁྱེར་ཡོངས་འཕེལ་རྒྱས་ཡག་ཤོས་དང་། འགྱུར་ལྡོག་ཆེ་ཤོས། མི་རིགས་ཁག་གི་མང་ཚོགས་ལ་ཕན་པ་ཐོབ་མང་ཤོས་བཅས་ཀྱི་ལོ་རྒྱུས་ཀྱི་དུས་སྐབས་སུ་སླེབས་ཏེ་བྱ་གཞག་ཁག་ལ་ཕྱོགས་ཡོངས་ནས་ཡར་ཐོན་བྱུང་བ་དང་ལོ་རྒྱུས་རང་བཞིན་གྱི་གྲུབ་འབྲས་ཐོབ་ཡོད། ལྷ་ས་གྲོང་ཁྱེར་ལོ་7བསྟུད་མར་རྒྱལ་ཡོངས་ཀྱི་སྐྱིད་སྣང་ཆེ་ཤོས་ཀྱི་གྲོང་ཁྱེར་གྱི་མིང་ཐོར་ཚུད་ཡོད”ཅེས་གསུངས་པ་རེད།

ཝང་ཆང་གིས་གཞི་རིམ་བཅོས་སྐྱོང་གི་རྨང་གཞི་བརྟན་དུ་གཏོང་བའི་ཐད། ལྷ་ས་གྲོང་ཁྱེར་གྱིས་ཐོག་མཐའ་བར་གསུམ་དུ་གཞི་རིམ་ལ་དམ་འཛིན་དང་རྨང་གཞི་བརྟན་པོ་འདིང་རྒྱུ་དེ་བརྟན་ལྷིང་དང་གྲོང་ཁྱེར་བདེ་འཇགས་ཀྱི་རྩ་བ་བརྟན་ཚུགས་ཀྱི་བྱ་ཐབས་སུ་བརྩིས་ནས། “ལྷ་སའི་ཡིག་འབུལ་ཞུ་བཅར་གྱི་ཐད་གཏོང་རླངས་འཁོར”ཐོག་མར་བཏོད་དེ་གཞི་རིམ་བཅོས་སྐྱོང་གི་ཕན་ནུས་ཆེ་རུ་ཤུགས་ཆེན་གཏོང་བ་དང་སྤྱི་ཚོགས་བརྟན་ལྷིང་གི་ཉེན་ཁ་སེལ་བའི་འཐབ་ཇུས་ལ་མཐུན་སྦྱོར་སྐུལ་འདེད་བཏང་བས་འགལ་བ་དང་རྩོད་གཞི་95%གཞི་རིམ་དུ་ཐག་གཅོད་ཐུབ་པ་མ་ཟད། རྒྱལ་ཡོངས་ཀྱི་སྤྱི་ཚོགས་བདེ་འཇགས་སྔོན་འགོག་ཚོད་འཛིན་མ་ལག་འཛུགས་སྐྱོང་གི་དཔེ་སྟོན་གྲོང་ཁྱེར་འཛུགས་བཏོད་ལམ་ལྷོངས་བྱུང་ཡོད། མི་རིགས་མཐུན་སྒྲིལ་གྱི་མཉམ་ཤུགས་གཅིག་སྒྲིལ་བྱེད་པའི་ཐད། རྒྱལ་ཡོངས་ཀྱི་རང་སྐྱོང་ལྗོངས་ཀྱི་ལྟེ་བའི་གྲོང་ཁྱེར་5རུ་མི་རིགས་མཐུན་སྒྲིལ་ཡར་ཐོན་གྱི་སྲོལ་ཡིག་སྔོན་ལ་ཁྱབ་བསྒྲགས་བྱས་པའམ“བཅུ་སྤེལ”བྱེད་སྒོ་གཏིང་ཟབ་སྤེལ་བ་དང་། མཐུན་སྒྲིལ་སྤྱི་གླིང་སོགས་མི་རིགས་མཐུན་སྒྲིལ་གྱི་གནས་རྟགས་གསར་པ་ཁག་གཅིག་ཞིབ་ཚགས་བསྐྲུན་ནས། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་མི་སེམས་སུ་གཏིང་ཟབ་ཟུག་རྒྱུར་སྐུལ་འདེད་ནུས་ལྡན་བཏང་ཡོད། ཆོས་ལུགས་འཆམ་མཐུན་དང་ཞི་དུལ་ལ་སྐུལ་འདེད་གཏོང་བའི་ཐད“འདུ་ཤེས་གསུམ”གྱི་སློབ་གསོ་གཏིང་ཟབ་དང་རྒྱ་ཆེར་གཏོང་བ་དང་། དྲིལ་བསྒྲགས་སློབ་གསོ་ཐེངས་1050སྤེལ་བ། ཁྲིམས་ལྟར་ཆོས་ལུགས་ལས་དོན་ལ་དོ་དམ་བྱ་རྒྱུ་སྔར་བས་ཚད་ལྡན་ནུས་ལྡན་དང་། ཆོས་ལུགས་ཞི་དུལ། དགོན་སྡེ་ཞི་མཐུན་བཅས་ཀྱི་རྣམ་པ་བཟང་པོ་སྔར་བས་སྲ་བརྟན་དུ་བཏང་ཡོད་ཅེས་གསུངས་པ་རེད།

བརྟན་ལྷིང་ནི་འཕེལ་རྒྱས་ཀྱི་སྔོན་འགྲོའི་ཆ་རྐྱེན་ཡིན་པ་དང་འདུམ་འགྲིག་ནི་བརྟན་ལྷིང་གི་འགོག་སྲུང་འཛིང་རགས་དང་པོ་དེ་ཡིན། ཉེ་བའི་ལོ་ཤས་རིང་། ལྗོངས་ཡོངས་ཀྱིས་དུས་རབས་གསར་པའི“ཧྥུང་ཆའོ་ཉམས་མྱོང”མཐའ་འཁྱོངས་དང་འཕེལ་རྒྱས་བཏང་ནས་གྲོང་ཁྱེར་དང་གྲོང་གསེབ་ལ་ཁྱབ་པའི་འདུམ་འགྲིག་མ་ལག་བཙུགས་པ་དང་། མི་དམངས་འདུམ་འགྲིག་རྩ་འཛུགས་7077དང་ཆེད་ལས་དང་གཅིག་ལྕོགས་འདུམ་འགྲིག་པ་ཁྲི་4.2ལྷག་ཙམ་གཞི་རིམ་དུ་གཞིས་ཚུགས་པ། འགལ་བ་དང་རྩོད་གཞི་འདུམ་འགྲིག་ཐུབ་ཚད་96%ཡན་རྒྱུན་འཁྱོངས་ཐུབ་པ། “ཧྥུང་ཆའོ་རྣམ་པའི་ལས་ཀ་བྱེད་སྟངས”ཁག་གཅིག་ས་མཐོར་ལག་བསྟར་བྱས་ནས་ཕན་འབྲས་ཐོན་ཏེ། འགལ་བ་དང་རྩོད་གཞི་གཞི་རིམ་དུ་སེལ་བ་དང་འགལ་བ་དང་རྩོད་གཞི་ཐོན་མ་ཐག་ནས་སེལ་ཐུབ་པ་དངོས་འབྲེལ་བྱུང་ཡོད།

གཞི་རིམ་གྱི་ཁྲིམས་དཔོན་པད་མ་གཡུ་སྒྲོན་གྱིས“བདག་ཉིད་ཁྲིམས་གཏུག”གི་འདུ་ཤེས་ཐོག་མཐའ་བར་གསུམ་དུ་མཐའ་འཁྱོངས་བྱས་ཏེ་ཁྱིམ་གྱི་སྒོ་རྩར་འདུམ་འགྲིག་བྱེད་པ་དང་། མང་ཚོགས་ཀྱིས་གོ་བདེ་བའི་སྐད་ཆ་བཤད་ནས་རྩོད་གཞི་སེལ་བ། ཁྲིམས་སྐྱོང་གི་བསམ་གཞིག་ལ་བརྟེན་ནས་དྲང་གཞག་དྲང་བདེན་སྲུང་སྐྱོང་བཅས་བྱས་ཏེ། གྱོད་གཞི་འདུམ་འགྲིག་བྱེད་རིང་མི་རིགས་ཁག་གི་མང་ཚོགས་ཚོར་དྲོ་སྐྱིད་དང་དྲང་བདེན་ཚོར་ཐུབ་པར་བྱས་ཡོད།

ད་ལོའི་ཟླ་གཉིས་པར། གནའ་བོའི་ཕོ་བྲང་རྟེན་མཛོད་ཁང་གིས་ས་སྐྱ་དགོན་གྱི་ལོ་རྒྱུས་རིག་གནས་དང་སྒྱུ་རྩལ་འགྲེམས་སྟོན་བྱས་པ་དེ་ནི་ས་སྐྱ་དགོན་གྱི་རིག་དངོས་ཕྱིར་བཏོན་ཐེངས་དང་པོ་རེད།

“ས་སྐྱ་དགོན་གྱི་ལོ་རྒྱུས་རིག་གནས་དང་སྒྱུ་རྩལ་ནི་ཐོག་མཐའ་བར་གསུམ་དུ་མེས་རྒྱལ་ཁྱིམ་ཚང་ཆེ་མོ་དང་གཅིག་ལ་གཅིག་བརྟེན་དང་ཁ་འབྲལ་ཐབས་མེད། དེར་བརྟེན་ད་ཐེངས་ཀྱི་འགྲེམས་སྟོན་ནི་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་པའི་གསོན་ཉམས་དོད་པའི་སློབ་ཚན་ཞིག་དེ་བས་རེད”ཅེས་བོད་ནས་ཡིན་པའི་རྒྱལ་ཡོངས་སྲིད་གྲོས་ཀྱི་ཨུ་ཡོན་བློ་གྲོས་རྒྱ་མཚོས་གསུངས།

ཀྲུང་ཧྭ་མི་རིགས་ཀྱི་མོས་སེམས་དང་གཏོགས་སེམས་ཆེ་རུ་གཏོང་བ་ནི་སྤྱི་ཚོགས་བརྟན་ལྷིང་ལ་སྲུང་སྐྱོང་བྱེད་པའི་རྨང་གཞི་དང་བོད་འཕེལ་རྒྱས་འགྲོ་བའི་སྔོན་འགྲོ་རེད། འབྱུང་འགྱུར་སྐོར་གླེང་སྐབས་བློ་གྲོས་རྒྱ་མཚོས་བོད་དང་མེས་རྒྱལ་དབར་གྱི་ལས་དབང་གཅིག་མཐུན་དང་སྐྱིད་སྡུག་མཉམ་མྱོང་གི་ལོ་རྒྱུས་ཀྱི་རྩ་ཆེའི་རྒྱུ་ཆ་དེ་བས་མང་བ་སྔོག་འདོན་ཧུར་ཐག་བྱས་ཏེ། ས་སྐྱ་དགོན་སོགས་ལོ་རྒྱུས་རིག་གནས་ཀྱི་གཞི་རྟེན་ནང་འདུས་པའི་མི་རིགས་མཐུན་སྒྲིལ་གྱི་གཞི་རྒྱུ་གསལ་འགྲེལ་གཏིང་ཟབ་བྱེད་པ་དང་བོད་ཀྱི་ཕུལ་བྱུང་སྲོལ་རྒྱུན་རིག་གནས་ཀྱི་གསར་གཏོད་རང་བཞིན་གྱི་ཕྱོགས་སྒྱུར་དང་གསར་གཏོད་རང་བཞིན་གྱི་འཕེལ་རྒྱས་ལ་སྔར་བས་སྐུལ་འདེད་བཏང་ནས། རིག་དངོས་དེ་ཉིད་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་པའི“སློབ་གཞི་གསོན་པོར”འགྱུར་བ་བྱེད་ཀྱི་ཡིན་ཞེས་གསུངས་པ་རེད།