ཚེས་5ཉིན་གྱི་ཕྱི་དྲོར། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི་དང་། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་ཨུད་ཀྱི་ཀྲུའུ་ཞི་ཞི་ཅིན་ཕིང་ཁོང་གནས་སའི་རྒྱལ་ཡོངས་མི་དམངས་འཐུས་ཚོགས་སྐབས་བཅུ་བཞི་པའི་ཚོགས་འདུ་ཐེངས་བཞི་པའི་ཅང་སུའུ་ཡི་འཐུས་མི་ཚོགས་པའི་གྲོས་ཞིབ་ལ་ཞུགས་སྐབས། “ལོ་ལྔ་ཚན་བཅོ་ལྔ་པའི”དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་དམིགས་ཚད་ལས་འགན་ལེགས་སྒྲུབ་བྱེད་པར་དེ་བས་རྙོག་འཛིང་ཆེ་བའི་ཁོར་ཡུག་ལ་ཁ་གཏད་གཅོག་པ་དང་གདིང་རྩའི་གནད་དོན་དེ་བས་མང་བ་ཐག་གཅོད་བྱེད་དགོས་ཞེས་ནན་བཤད་གནང་བ་རེད།

ཅང་སུའུ་ཡི་འཐུས་མི་ཚོགས་པའི་གྲོས་ཞིབ་བྱ་ཡུལ་དུ་སྤྲོ་སེམས་འཁོལ་ལ་རྣམ་པ་འཁྲུག་པོ་ཡོད་པ་རེད།

ཚང་མའི་གཏམ་བཤད་གསན་རྗེས། ཞི་ཅིན་ཕིང་གིས་གསུང་བཤད་གནང་ནས། སྲིད་གཞུང་གི་ལས་དོན་སྙན་སྒྲོན་ལ་མོས་མཐུན་གནང་བ་མ་ཟད། ཅང་སུའུ་ཡི་དོན་དངོས་དང་ཟུང་འབྲེལ་བྱས་ནས“ལོ་ལྔ་ཚན་བཅོ་ལྔ་པའི”དཔལ་འབྱོར་དང་སྤྱི་ཚོགས་འཕེལ་རྒྱས་ལ་དམ་འཛིན་ཡག་པོ་བྱེད་དགོས་པར་བླང་བྱའང་གསལ་པོ་བཏོན་གནང་བ་རེད།

ཞི་ཅིན་ཕིང་གིས་གསུངས་དོན། ཐོན་སྐྱེད་ནུས་ཤུགས་གསར་མ་འཕེལ་རྒྱས་གཏོང་བ་དེ་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བ་དང་དཔལ་འབྱོར་གྱི་འགྲན་རྩོད་ནུས་པ་ཆེ་རུ་གཏོང་བར་གལ་འགངས་ཤིན་ཏུ་ཆེ། ཅང་སུའུ་ལ་དེའི་ཐད་ཀྱི་རྨང་གཞི་ལེགས་ཙམ་ཡོད་པས་མདུན་གྲལ་དུ་ཧུར་ཐག་སྐྱོད་དགོས། སློབ་གསོ་དང་། ཚན་རྩལ། ཤེས་ལྡན་པ་བཅས་གཞི་གཅིག་འཕེལ་རྒྱས་ལ་སྐུལ་འདེད་གཏོང་བ་དང་། ཐོག་མའི་གསར་གཏོད་དང་འགག་རྩའི་ལྟེ་བའི་ལག་རྩལ་གྱི་འགག་སྒྲོལ་ལ་ཤུགས་སྣོན་རྒྱག་པ་དང་ཚན་རྩལ་གྱི་མཐོ་ས་མགྱོགས་མྱུར་བཟུང་བའི་ཐད་ཚད་བརྒལ་གསར་པ་ཡོང་བར་བརྩོན་པ། གསར་གཏོད་ཀྱི་འཁོར་འབྲེལ་དང་། ཐོན་ལས་ཀྱི་འཁོར་འབྲེལ། མ་དངུལ་གྱི་འཁོར་འབྲེལ། ཤེས་ལྡན་པའི་འཁོར་འབྲེལ་བཅས་མཉམ་འདྲེས་གཏིང་ཟབ་ལ་སྐུལ་འདེད་གཏོང་བ་དང་ཚན་རྩལ་གྲུབ་འབྲས་ཕན་ཆེའི་སྒོ་ནས་གཞན་སྒྱུར་བཀོལ་སྤྱོད་ལ་སྐུལ་འདེད་གཏོང་བའི་ཐད་ཐབས་ལམ་གསར་པ་འཚོལ་བ། སྲོལ་རྒྱུན་གྱི་ཐོན་ལས་ལེགས་སུ་གཏོང་བ་དང་། གསར་དར་ཐོན་ལས་སྐྱེད་སྲིང་དང་རྒྱ་སྟོབས་ཆེ་རུ་གཏོང་བ། མ་འོངས་ཐོན་ལས་སྔ་སྣུར་དུ་བཀོད་སྒྲིག་བྱེད་པ་བཅས་ལ་རྣམ་པ་གསར་པ་གཏོད་པ། སྒྱུར་བཅོས་སྔར་བས་ཟབ་གཏོང་དང་ཐོན་སྐྱེད་ནུས་ཤུགས་གསར་མའི་འཕེལ་རྒྱས་ལ་ཚོད་འཛིན་ཐེབས་པའི་སྒྲིག་སྲོལ་ལམ་སྲོལ་གྱི་འགོག་རྐྱེན་སེལ་བ་བཅས་ལ་གྲུབ་འབྲས་གསར་པ་ཐོན་པ་བཅས་བྱེད་དགོས།

ཞི་ཅིན་ཕིང་གིས་ནན་བཤད་གནང་དོན། དཔལ་འབྱོར་ཞིང་ཆེན་ཆེན་པོའི་འཕེལ་རྒྱས་ཀྱི་གཞི་སྒྲོམ་བརྟན་ལ་ཕྱི་ཕྱོགས་ཀྱི་རྡབ་རྡེག་འགོག་པའི་ནུས་པ་ཆེན་པོ་ལྡན་ཚེ། གཞི་ནས་རྒྱལ་ཡོངས་ཀྱི་དཔལ་འབྱོར་བརྟན་པོ་ཡོང་བར་འདེགས་སྐྱོར་བྱེད་ཐུབ། ཅང་སུའུ་ཡིས་དཔལ་འབྱོར་གྱི་མཉེན་གཤིས་ཆེ་རུ་གཏོང་བར་རྒྱུན་མཐུད་ཤུགས་སྣོན་རྒྱག་དགོས་ཤིང་། ནང་སྟོབས་ཞུན་བརྡར་ཡག་པོ་དང་རང་སྟོབས་ཆེ་རུ་བཏང་སྟེ་རྒྱལ་ཡོངས་ཀྱི་གཅིག་གྱུར་ཁྲོམ་ར་ཆེན་པོར་ཕྱོགས་ཡོངས་ནས་འདྲེས་པར་བྱས་ནས་རྒྱལ་ནང་གི་རྒྱུན་འཁོར་ཆེན་པོ་ཤར་གཏོང་ཐུབ་པར་རམ་འདེགས་བྱེད་དགོས། ཆུ་ཚད་མཐོ་བའི་ཕྱི་ཕྱོགས་སྒོ་དབྱེ་རྒྱ་ཆེར་བཏང་ནས་གོ་ལ་ཧྲིལ་པོའི་ཁྲོམ་ར་གསར་འབྱེད་རྒྱ་ཁྱབ་བྱས་ཏེ་རྒྱལ་སྤྱིའི་རྒྱུན་འཁོར་དང་སྦྲེལ་མཐུད་དེ་བས་ལེགས་པ་བྱེད་དགོས། མཐའ་ཚད་ཀྱི་བསམ་བློ་བཅངས་ནས་ཉེན་ཁ་སྣ་ཚོགས་སྔོན་འགོག་བྱེད་དགོས།

ཞི་ཅིན་ཕིང་གིས་གསུངས་དོན། ཀྲུང་གོའི་ལུགས་ཀྱི་དེང་རབས་ཅན་ནི་མི་དམངས་ཡོངས་ཐུན་མོང་འབྱོར་ཕྱུག་ཡོང་བའི་དེང་རབས་ཅན་ཞིག་རེད། ཅང་སུའུ་ཡིས་དུས་བབ་གསར་པའི་འོག་མཛེས་སྡུག་ལྡན་པའི་འཚོ་བར་བཅངས་པའི་མི་དམངས་མང་ཚོགས་ཀྱི་རེ་སྒུག་གསར་པ་དང་དམངས་འཚོའི་ལས་དོན་གྱི་ཁྱད་ཆོས་གསར་པ་ཁོང་དུ་ཡང་དག་ཆུད་པར་བྱས་ཏེ་སྤུས་ཚད་མཐོ་བའི་ལས་ཞུགས་གང་ལེགས་ཇི་ལྟར་ཐུབ་པ་དང་། གྲོང་ཁྱེར་དང་གྲོང་གསེབ་ཀྱི་གྲོང་མིའི་ཡོང་འབབ་མང་དུ་ཇི་ལྟར་གཏོང་བ། གཞི་རྩའི་སྤྱི་པའི་ཞབས་ཞུ་དང་སྤྱི་ཚོགས་འགན་སྲུང་གི་ཆུ་ཚད་སྔར་བས་མཐོ་རུ་ཇི་ལྟར་གཏོང་བ་སོགས་ཀྱི་ཞིབ་འཇུག་བྱ་གཞིར་རང་འགུལ་གྱིས་ལན་ཧུར་ཐག་བཏབ་སྟེ་མི་དམངས་ཡོངས་ཐུན་མོང་འབྱོར་ཕྱུག་ཡོང་བར་སྐུལ་འདེད་གཏོང་བའི་ཐབས་ལམ་ནུས་ལྡན་འཚོལ་དགོས།

ཞི་ཅིན་ཕིང་གིས་ནན་བཤད་གནང་དོན། ཏང་ལ་དོ་དམ་དང་ཏང་བཅོས་སྐྱོང་ལ་ཕན་འབྲས་ཇི་ཙམ་ཆེ་ན། དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་འགན་སྲུང་ལ་དེ་ཙམ་གྱིས་ནུས་ཤུགས་ལྡན། ཡང་དག་པའི་སྲིད་དོན་ལས་རྗེས་ལྟ་བ་འཛུགས་པ་དང་ལག་བསྟར་གྱི་སློབ་སྦྱོང་སློབ་གསོ་སྒྲིག་འཛུགས་ནན་ཏན་བྱས་ནས་རྒྱ་ཆེའི་ཏང་ཡོན་ལས་བྱེད་པས“སྤྱི་དོན་དུ་ཏང་འཛུགས་པ་དང་། དམངས་ལ་བདེ་སྐྱིད་བསྐྲུན་པ། ཚན་རིག་དང་མཐུན་པའི་ཐབས་ཇུས་འགོད་པ། དངོས་འཛིན་དངོས་སྒྲུབ”བཅས་ཀྱི་སྤྱིའི་བླང་བྱ་དོན་འཁྱོལ་བྱེད་པར་ཁྲིད་སྟོན་བྱས་ནས་ལག་ལེན་དང་། མི་དམངས། ལོ་རྒྱུས་བཅས་ཀྱི་ཞིབ་དཔྱད་ཐེག་ཐུབ་པའི་གྲུབ་འབྲས་དངོས་གཏོད་དགོས། ཏང་གཤིས་དང་། ཏང་སྲོལ། ཏང་གི་སྒྲིག་ཁྲིམས་བཅས་ལ་མཉམ་དུ་དམ་འཛིན་དང་སྤྱོད་བཟང་སྒྲིག་ནན་དང་རུལ་སུངས་ལ་ངོ་རྒོལ་བྱེད་པ་ཕན་ཚུན་སྦྲེལ་མཐུད་བྱས་ཏེ་ཕྱོགས་ཡོངས་ནས་ཏང་ནན་པོས་སྐྱོང་བའི་ཕན་འབྲས་དངོས་ལ་བརྟེན་ནས་དམངས་ཀྱི་ཡིད་ཆེས་ཐོབ་པར་བྱས་ཏེ་བྱ་གཞག་འཕེལ་རྒྱས་ལ་སྐུལ་འདེད་གཏོང་བའི་སྟོབས་ཤུགས་ཆེན་པོ་གཅིག་ཏུ་སྒྲིལ་དགོས།