ཤིན་ཧྭ་གསར་འགྱུར་ཁང་རི་ནེ་ཝ་ནས་གློག་འཕྲིན་འབྱོར་གསལ། མཉམ་འབྲེལ་རྒྱལ་ཚོགས་སུ་རྒྱུན་སྡོད་ཀྲུང་གོའི་རེ་ནེ་ཝ་དོན་གཅོད་ཁྲུའུ་དང་སུའེ་ཙེར་གྱི་རྒྱལ་སྤྱིའི་རྩ་འཛུགས་གཞན་དག་གི་འཐུས་མི་ཅཱ་ཀུའེ་ཏེས་ཚེས་2ཉིན་མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ལས་འཛིན་ལྷན་ཚོགས་ཀྱི་ཚོགས་འདུ་སྐབས་61པའི་ཐོག་གཏམ་བཤད་སྤེལ་ནས། ཕྱོགས་ཁག་ལ་གོ་ལ་ཧྲིལ་པོའི་འགྲོ་བ་མིའི་ཐོབ་ཐང་བཅོས་སྐྱོང་མ་ལག་མཉམ་དུ་སྒྱུར་བཅོས་དང་འཐུས་སྒོ་ཚང་དུ་གཏོང་དགོས་པའི་འབོད་སྐུལ་བྱས་པ་རེད།

ཅཱ་ཀུའེ་ཏེས་བསྟན་དོན། ད་ལོ་ནི་འགྲོ་བ་མིའི་ཐོབ་ཐང་ལས་འཛིན་ལྷན་ཚོགས་བཙུགས་ནས་ལོ་ངོ་20འཁོར་བའི་ལོ་ཡིན་ལ། 《འཕེལ་རྒྱས་ཀྱི་ཁེ་དབང་བསྒྲགས་གཏམ》ལ་གྲོས་འཆམ་བྱུང་ནས་ལོ་ངོ་40འཁོར་བའི་ལོ་ཡང་ཡིན། ཡིན་ན་ཡང་ཕྱོགས་རྐྱང་རིང་ལུགས་དང་། སྲུང་སྐྱོང་རིང་ལུགས། བཙན་དབང་རིང་ལུགས་བཅས་ཀྱི་འཕེལ་ཕྱོགས་ལས་ལྡོག་ནས་ཕྱོགས་མང་རིང་ལུགས་ལ་འགོག་རྐྱེན་དང་རྒྱལ་སྤྱིའི་འགྲོ་བ་མིའི་ཐོབ་ཐང་གི་བྱ་གཞག་ལ་འགྲན་སློང་དྲག་པོ་འཕྲད་ཡོད། མིག་སྔར་དབུས་ཤར་ས་ཁུལ་གྱི་དུས་བབ་ལ་མི་རྣམས་ཀྱིས་སེམས་ཁྲལ་བྱེད་དགོས་པ་ཞིག་ཡོད་པས། དུས་སྐབས་འདིར་མཉམ་འབྲེལ་རྒྱལ་ཚོགས་སྲོག་ཤིང་དུ་བྱས་པའི་ཕྱོགས་མང་མ་ལག་སྔར་བས་སྲུང་སྐྱོང་བྱས་ནས། མཉམ་འབྲེལ་རྒྱལ་ཚོགས་ཀྱི་ཞི་བདེ་དང་བདེ་འཇགས་དང་། འཕེལ་རྒྱས། འགྲོ་བ་མིའི་ཐོབ་ཐང་བཅས་ཀ་རྟེན་ཆེན་པོ་གསུམ་གྱི་ལས་དོན་ལ་དོ་སྙོམས་ངང་སྐུལ་འདེད་བཏང་སྟེ། གོ་ལ་ཧྲིལ་པོའི་འགྲོ་བ་མིའི་ཐོབ་ཐང་བཅོས་སྐྱོང་མ་ལག་སྒྱུར་བཅོས་དང་འཐུས་སྒོ་ཚང་དུ་གཏོང་རྒྱུ་མཐའ་འཁྱོངས་བྱེད་དགོས།

ཅཱ་ཀུའེ་ཏེས་ནན་བཤད་གནང་དོན། ཀྲུང་གོ་ཕྱོགས་ཀྱིས་གོ་ལ་ཧྲིལ་པོའི་བཅོས་སྐྱོང་གྲོས་འགོར་ཚུད་པའི་འགྲོ་བ་མིའི་ཐོབ་ཐང་གི་ནང་དོན་ལྟར། ཕྱོགས་ཁག་ལ་བདེ་འཇགས་ལ་བརྟེན་ནས་འགྲོ་བ་མིའི་ཐོབ་ཐང་ལ་སྲུང་སྐྱོང་བྱ་རྒྱུ་མཐའ་འཁྱོངས་བྱས་ཏེ། འགྲོ་བ་མིའི་ཐོབ་ཐང་མངོན་འགྱུར་ཡོང་བར་ཞི་འཇགས་ཀྱི་ཁོར་ཡུག་སྐྲུན་པ་དང་། མི་དམངས་ལྟེ་བར་འཛིན་རྒྱུ་མཐའ་འཁྱོངས་བྱས་ནས་འགྲོ་བ་མིའི་ཐོབ་ཐང་སྣ་ཚོགས་དོ་སྙོམས་ངང་འཕེལ་རྒྱས་གཏོང་བ། འདྲ་མཉམ་ལ་བརྟེན་ནས་འགྲོ་བ་མིའི་ཐོབ་ཐང་ལ་སྐུལ་འདེད་གཏོང་རྒྱུ་མཐའ་འཁྱོངས་བྱས་ནས་ཆབ་སྲིད་ཐད་འགྲན་རྒོལ་མི་བྱེད་པ་བཅས་བྱེད་འདོད་ཡོད། ད་ལོ་ནི་ཀྲུང་གོའི“ལོ་ལྔ་ཚན་བཅོ་ལྔ་པའི”འགོ་ཚུགས་ལོ་ཡིན་ལ། རྒྱལ་ཡོངས་ཚོགས་འདུ་གཉིས་ཀྱང་འཚོག་འགོ་ཚུགས་ཡོད། ཀྲུང་གོས་བརྒྱུད་རིམ་ཧྲིལ་པོའི་མི་དམངས་དམངས་གཙོ་རྒྱུན་ཆད་མེད་པར་འཕེལ་རྒྱས་བཏང་ནས་ཀྲུང་གོའི་ལུགས་ཀྱི་དེང་རབས་ཅན་གྱི་གྲུབ་འབྲས་ལས་མི་དམངས་ཡོངས་ལ་ཕན་པ་དེ་བས་མང་པོ་ཐོབ་པར་བྱ་རྒྱུ་དང་ཆབས་ཅིག རྒྱལ་ཁབ་ཁག་དང་མཉམ་དུ་རྒྱལ་སྤྱིའི་འགྲོ་བ་མིའི་ཐོབ་ཐང་གི་བྱ་གཞག་སྐྱོན་བྲལ་ངང་འཕེལ་རྒྱས་འགྲོ་བར་སྐུལ་འདེད་བཏང་ནས་མིའི་རིགས་ཀྱི་ལས་དབང་གཅིག་མཐུན་ཚོགས་པ་མཉམ་དུ་འཛུགས་འདོད་ཡོད།