ཟླ་3ཚེས་3ཉིན་གྱི་ཆུ་ཚོད་10དང་སྐར་མ་40ལ་Ｇ380མེ་འཁོར་པེ་ཅིང་དུ་འབྱོར། རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མི་དང་ཧྲན་ཤིས་ཞིང་ཆེན་ལིན་ཧྥེན་གྲོང་ཁྱེར་ཤང་ཧྥེན་རྫོང་གནའ་གྲོང་གྲོང་རྡལ་ཀོན་གྲོང་ཚོའི་ཏང་ཀྲི་པུའི་ཧྲུའུ་ཅི་ཝང་ཅིན་ཀང་མེ་འཁོར་ནས་བབས་ཏེ་སྟོད་གོས་ཀྱི་ཁུག་མའི་ནང་བླུགས་པའི་ས་སེར་པོ་དེར་འཕུར་ཙམ་གནང་།

ཧྲན་ཤིས་ཞིང་ཆེན་གྱི་ས་གཞི་ཆེན་པོ་ནས་རྒྱལ་ས་པེ་ཅིང་བར་ས་སེར་པོ་དེར་དྲོད་ཁང་ཆེ་མོའི་ནང་གི་དགུན་ཁའི་ཆི་པི་ཁའི་བྲོ་བ་དང་རིག་ལྡན་ཞིང་ནང་གི་བཞའ་ཚན་འདུས་ཡོད་ལ། ཡུལ་མི་ཚོའི་སེམས་གཏམ་དང་རེ་སྒུག་གསར་པའང་འདུས་ཡོད་པ་རེད།

“ས་ནི་རྩ་བ་ཡིན་པས། ཡུལ་མིར་འཚོ་བ་ཡག་པོ་ཞིག་སྐྱེལ་རྒྱུ་བྱུང་བ་ཚང་མ་ས་དེའི་དྲིན་རེད” ས་གཞིར་གུས་སྐྲག་ཆེན་པོ་གནང་བཞིན་པའི་ཝང་ཅིན་ཀང་གི་འགན་སྒྲུབ་ལམ་བུ་ཚང་མ་ས་དང་ཁ་འབྲལ་ཐབས་མེད།

པེ་ཅིང་དུ་རྒྱལ་ཡོངས་ཚོགས་འདུ་གཉིས་ལ་ཞུགས་པར་མ་ཕེབས་གོང་། ཁོང་གི་སེམས་པ་སྔར་བཞིན་ས་གཞི་ཆེན་པོ་དེར་ཆགས་ཡོད་པ་རེད།

ཁོང་གིས“དེ་ནི་ཀོན་གྲོང་ཚོའི་ས་ཡིན་ལ་ཀྲུང་གོའི་སའང་རེད”ཅེས་དང་། ས་འདི་འཁྱེར་ན་གཏམ་བཤད་བྱེད་སྐབས་སེམས་རྣལ་ལ་ཕབ་ཐུབ་པ་དང་འགན་འཁྲི་སྒྲུབ་པར་ཡང་གདེང་ཚོད་ཆེན་པོ་འདུག་ཅེས་གསུངས།

ས་འདིས་ཀོན་གྲོང་ཚོ་དེ་ཉིད་རྗེས་ལུས་ཟབ་ཟོབ་ནས་རིག་ལྡན་གྱི་མ་དཔེར་གྱུར་པའི་བདེན་དཔང་ཐུབ་ཀྱི་ཡོད།

དེ་སྔ་གྲོང་ཚོར་ཆུ་དང་གློག་ཆད་པ་དེ་ནི་རྒྱུན་མཐོང་གི་གནས་ཚུལ་རེད། ད་ཆ་ས་ཆ་ཕན་སྒྱུར་བྱས་ཏེ་མུའུ་སྟོང་གི་ཞིང་ས་གཤིན་པོ་ཡུག་འབྲེལ་དུ་ཆགས་པ་དང་། མི་མེད་གནམ་གྲུས་སོན་སྟོར་བ་དང་ཞིང་ཆུ་གནད་སྨིན་གཏོང་བའི་ལག་རྩལ་གང་དགོས་སྤྱོད་ཐུབ་ཡོད། “དེ་སྔ་གནམ་ཆུ་སྒུག་དགོས་པའི་ས་སེར་པོ་དག་ཚན་རྩལ་གྱི་མཐུན་རྐྱེན་ལས་སྐྱེ་སྟོབས་གསར་པ་འཕེལ་ནས། མི་གཉིས་གསུམ་གྱིས་མུའུ་སྟོང་གི་ས་ཞིང་ལ་གཡོག་བྱེད་ཡག་པོ་ཐུབ་ཀྱི་ཡོད”

མཐའ་འཁོར་གྱི་གྲོང་ཚོ་གང་སར་ཕེབས་པ་བརྒྱུད། ཝང་ཅིན་ཀང་གིས་ཐུན་མོང་གི་གནད་དོན་ཞིག་མཁྱེན་རྟོགས་ཐུབ་པ་སྟེ། ལམ་ཞེང་ཆེ་རུ་དང་ཁང་པ་གསར་པ་བརྒྱབ་རུང་མི་གནས་མི་ཐུབ་པའི་རྩ་བ་ནི“ཐོན་ལས་ཀྱི་རྨང་གཞི་ཞན་པས་རེད” ཁོང་གི་ཟིན་བྲིས་ཐོག གྲོང་གསེབ་དར་རྒྱས་གཏོང་བར་ངེས་པར་དུ་ཐོན་ལས་སྔོན་ལ་འཇོག་པ་དང་། ཚན་རྩལ་གྱིས་མཐུན་རྐྱེན་སྦྱོར་བ། རིག་གནས་ཀྱིས་བླ་སྲོག་སྐྲུན་རྒྱུ་བཅས་གཅིག་ཀྱང་ཆད་མི་རུང་ཞེས་འཁོད་ཡོད།

ད་ལོའི་ཚོགས་འདུ་གཉིས་རིང་། ཁོང་གི་རྡོག་ཁྲེས་ནང་བརྟག་ཞིབ་ཟིན་བྲིས་གཅིག་མང་དུ་ཕྱིན་ཡོད་ཅིང་། དེའི་ནང་འཁོད་པ་ནི་ཧྥེན་གྲོང་གི་གནའ་བོའི་སྐྲུན་དངོས་དག་གི་སྐོར་རེད། ལོ་ངོ་800ལྷག་ཙམ་གྱི་ལོ་རྒྱུས་ལྡན་པའི་འགྱུར་རྡོ་གསོན་པོ་དེར་ཕྱོགས་མང་པོས་དོ་དམ་བྱེད་པ་དང་། ཤེས་ལྡན་པ་ཁ་ཐང་བ། ཐོག་ཁ་ནས་ཆུ་འཛག་པ། གྱང་གས་པ་བཅས་ཀྱི་གནས་ཚུལ་འཕྲད་ཡོད།

ཁོང་གི་བསམ་ཕྱོགས་ཧ་ཅང་ཁ་གསལ་ཡོད་ཅིང་། ཐའོ་དགོན་པའི་གནའ་ཤུལ་དང་། ཧྥེན་གྲོང་གི་གནའ་གྲོང་། ཀོན་གྲོང་ཚོའི་ཞིམ་ཟས་བཅས་རིག་གནས་དང་ཡུལ་སྐོར་གྱི་འཁོར་འབྲེལ་ཤར་གཏོང་ཐུབ་པ་ལས། མི་སེར་གྱི་ལྟོ་ཕོར་དང་རིག་གནས་ཀྱི་རྩ་བ་བརྟན་པོ་སྲུང་ཐུབ་པ་བྱུང་ཡོད།

ཕྱོགས་གཞན་ཞིག་ནས་གྲོང་གསེབ་ཀྱི་ཐོན་ལས་ཀྱི་ཞན་ཆ་གསབ་ཅིང་། ཁོང་གིས་རིག་ལྡན་ཞིང་ལས་དང་། གྲང་ཕྲེང་ཟོག་འགྲུལ། སྤུས་རྟགས་ཚོང་གཉེར་བཅས་ལ་རྒྱབ་སྐྱོར་བྱེད་ཤུགས་ཆེ་རུ་བཏང་ནས། ཞིང་དུད་ཆུང་ངུ་དང་ཁྲོམ་ར་ཆེན་པོ་འབྲེལ་མཐུད་ཐུབ་པར་བྱེད་པའི་གྲོས་འགོ་བཏོན་གནང་བ་རེད།

ཁོང་ལས་གནས་བཞེས་སྐབས་དམ་བཅས་པའི་དོན་དག་ཁག་གསུམ་ཡོད་དེ། གཞུང་ལམ་ཤར་གཏོང་དང་། འཐུང་ཆུ་གཙང་མ། ཡོང་འབབ་གསོག་པ་བཅས་ཡིན་ཞིང་། དེ་དག་ཚང་མ་ཁོང་གིས་ལེགས་སྒྲུབ་གནང་ཟིན་ཡོད། “མི་སེར་གྱི་དངུལ་ཁུག་ལྗིད་ཏིག་ཏིག་ཆགས་པ་དང་། གྲོང་ཚོ་མཛེས་སྡུག་ལྡན་པ། མཐེ་བོང་སྒྲེང་མཁན་ཡོད་པ། གཤེ་གཤེ་གཏོང་མཁན་ཉུང་བ། དགོད་སྒྲ་མང་བ་བཅས་ནི་སྲིད་དོན་ལས་རྗེས་རེད”

ཁུག་མའི་ནང་གི་ས་དེ་ལྗིད་ཏིག་ཏིག་ཅིག་ཡོད།

ཚོགས་འདུ་གཉིས་ལ་འཁྱེར་བའི་ས་དེར། དཔྱིད་དུས་སུ་མྱུ་གུ་ལྷུག་པོར་འབུད་ངེས་རེད།