དཔྱིད་གསར་དུས་ཆེན་བཏང་མ་ཐག ཧོ་ནན་ཞིང་ཆེན་ཤིན་དབྱང་གྲོང་ཁྱེར་ཧྲི་ཧོ་ཆུས་ཏུང་ཅཱ་ཧོ་གྲོང་རྡལ་ཡུན་ཝུའུ་གྲོང་ཚོའི་ཇ་ཤིང་ལྡུམ་རར་རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མི་དང་། ཤིན་དབྱང་ཞིང་ནགས་སློབ་གླིང་གི་དགེ་རྒན་ཆེ་མོ་བ། ཏཱ་པེ་རི་བོའི་ཚོད་ལྟ་ཁང་གི་ཀྲུའུ་རེན་གཞོན་པ་ཀུའོ་ཀུའེ་དབྱིས་ཇ་ཤིང་ལྡུམ་རའི་རྣང་མར་བསྡད་དེ་ཞིང་ཁ་འདེབས་རན་མིན་ལ་གཟིགས་ཞིབ་ཞིབ་ཕྲ་གནང་བ་རེད།

ཇ་རིག་པའི་སློབ་ཁྲིད་ཚན་ཞིབ་ཀྱི་ཕྱག་ལས་ལ་གཞོལ་ནས་ལོ་ངོ་40ལྷག་ཙམ་སོང་བའི་ཀུའོ་ཀུའེ་དབྱིས་ཀྱི་སློབ་ཁང་ནི་སློབ་གྲྭ་ཆེ་མོའི་འཆད་སྟེགས་ཙམ་མིན་པར་ཤིན་དབྱང་གི་ཆུས་དང་རྫོང་ཁག་10ཡི་ཇ་ཐོན་སའི་གྲོང་གསེབ་གཙོ་བོ་དང་རྒྱལ་ཡོངས་ཀྱི་ཇ་ལོ་ཐོན་ཁུལ་དག་ཡིན་ཞིང་། ཁོང་གིས་དེ་གའི་གང་སར་ཕེབས་མྱོང་ཡོད།

རྒྱལ་ཡོངས་མི་དམངས་འཐུས་མི་ཚོགས་ཆེན་གྱི་འཐུས་མིར་བདམས་རྗེས། ཀུའོ་ཀུའེ་དབྱིས་ཀྱི་ཇའི་རིག་གནས་ཞིབ་འཇུག་དང་། སྲུང་སྐྱོང་། རྒྱུན་འཛིན། དར་སྤེལ་བཅས་ཀྱི་འགན་འཁྲི་སྔར་བས་མང་དུ་སོང་ཡོད། ན་ནིང་ཁོང་གིས་ཇའི(རིག་གནས)ནི་ཀྲུང་ཧྭའི་ཤེས་དཔལ་གྱི་མཚོན་རྟགས་མ་ལག་གི་གྲུབ་ཆའི་ནང་འཇུག་རྒྱུའི་གྲོས་འགོ་བཏོན་གནང་བར་འབྲེལ་ཡོད་སྡེ་ཚན་གྱིས་ལན་ཧུར་ཐག་བཏབ་ཡོད་པ་རེད།

བརྟག་ཞིབ་གནང་རིང་། ཀུའོ་ཀུའེ་དབྱིས་ཀྱིས་ད་དུང་ཞིང་ལས་རིག་ཚན་དང་འབྲེལ་བ་ཡོད་པའི་མཐོ་སློབ་སློབ་མ་ཁ་ཐང་བ་དང་ཞིང་ལས་དང་འབྲེལ་བ་ཡོད་པའི་སློབ་ཐོན་སློབ་མ་བསྡུ་མི་ཐུབ་པ་གང་ཞིག གཞི་རིམ་དུའང་གཏོང་དཀའ་བ་དང་། ཞིང་ལས་ཆེད་ལས་ཤེས་ལྡན་པ་གསོ་སྐྱོང་བྱེད་པ་དང་གཞི་རིམ་གྱི་དངོས་ཡོད་དགོས་མཁོའི་དབར་འབྲེལ་བ་ཆད་པ་ལ་སོགས་ཀྱི་གནས་ཚུལ་ཡོད་པ་མཁྱེན་རྟོགས་བྱུང་བ་རེད། ན་ནིང་ཁོང་གིས་རྒྱལ་ཡོངས་ཀྱི་མཐོ་སློབ་ཞིང་ལས་དང་འབྲེལ་བ་ཡོད་པའི་མཐོ་སློབ་ལ་ཕྱོགས་ནས་གྲོང་གསེབ་དར་རྒྱས་ཀྱི་ཤེས་ལྡན་པའི་འགྲོ་ཕྱོགས་གཏན་འཁེལ་གྱི་གསོ་སྐྱོང་གྲོས་འགོ་བཏོན་གནང་བ་རེད།

2026ལོར་ཀྲུང་དབྱང་གི་ཡིག་ཆ་ཨང་དང་པོའི་ནང་། ཞིང་ལས་དང་འབྲེལ་བ་ཡོད་པའི་མཐོ་སློབ་ཀྱི་སློབ་གསོའི་སློབ་ཁྲིད་སྒྱུར་བཅོས་གཏིང་ཟབ་བྱས་ཏེ། དགོས་མཁོ་སྟོན་ཕྱོགས་སུ་བྱས་ནས་ཞིང་ལས་ཀྱི་རིག་ཚན་གསར་པ་འཛུགས་སྐྱོང་མགྱོགས་སུ་གཏོང་བ་དང་། ཞིང་ལས་དང་འབྲེལ་བ་ཡོད་པའི་ཆེད་ལས་ཤེས་ལྡན་པ་འགྲོ་ཕྱོགས་གཏན་འཁེལ་གྱི་གསོ་སྐྱོང་ལ་སྐུལ་འདེད་གཏོང་དགོས་ལུགས་ཁ་གསལ་བཏོན་ཡོད། དེ་ལས་ཀུའོ་ཀུའེ་དབྱིས་ཚུད་པའི་འཐུས་མིའམ་ཨུ་ཡོན་དང“ཞིང་གསུམ” ལས་དོན་པ་མང་པོས་འབོད་སྐུལ་བྱེད་བཞིན་པ་མཚོན་ཡོད།