བོད་ནས་ཡིན་པའི་རྒྱལ་ཡོངས་སྲིད་གྲོས་ཀྱི་ཨུ་ཡོན་སྒྲོལ་དཀར།
“ཐད་གཏོང་ཁང”དུ་འགན་འཁྲི་ཧུར་ཐག་སྒྲུབ་པ།
ལག་ཐོགས་ཁ་པར་གཅིག་དང་། ཤོག་བུ་སྒམ་གཅིག Ａ4ཤོག་བུ་ཁ་ཤས་བཅས…… ཆེད་ལས་ཀྱི་སྒྲིག་ཆས་མེད་ལ་འདྲ་ཆགས་པའི་ལས་སྟེགས་ཀྱང་མེད། སྔ་དྲོའི་ཆུ་ཚོད་11ལ། བོད་ནས་ཡིན་པའི་རྒྱལ་ཡོངས་སྲིད་གྲོས་ཀྱི་ཨུ་ཡོན་སྒྲོལ་དཀར་གྱིས་དུས་ཐོག་ཏུ་ཐད་གཏོང་བྱེད་འགོ་བཙུགས།
“ཚང་མ་ཁམས་བཟང་། ངའི་ཐད་གཏོང་ཁང་དུ་ཕེབས་པར་དགའ་བསུ་ཞུ་གི་ཡིན”
སྒྲོལ་དཀར་གྱིས“ཐད་གཏོང་བྱེད་ཐེངས་རེར་ངས་སྔ་སྣུར་དུ་བརྗོད་དོན་གཙོ་བོ་རེ་གྲ་སྒྲིག་བྱེད་ཀྱི་ཡོད། ཡིན་ནའང་ཐད་གཏོང་བྱེད་སྐབས་གནད་དོན་འདྲ་མིན་སྣ་ཚོགས་གླེང་དགོས་ཀྱི་འདུག”ཅེས་བཤད། ཐད་གཏོང་བྱེད་སྐབས་ཁོང་གིས་ན་གཞོན་ཚོས་ལས་ཞུགས་ཐད་ཀྱི་དཀའ་ངལ་གླེང་སྐབས་རང་ཉིད་རྒྱལ་གཉེར་ནགས་རའི་ལས་བཟོ་དཀྱུས་མ་ཞིག་ནས་ཁེ་ལས་ཀྱི་མཐོ་རིམ་དོ་དམ་པ་དང་དེ་ནས་ལས་གཏོད་པར་གྱུར་པའི་བར་གྱི་དཀའ་ཚེགས་ཆེ་བའི་མྱོང་བ་དག་མཉམ་སྤྱོད་བྱེད་ཀྱི་ཡོད། དེ་ནས་ཡང་ཕྲུ་གུར་སེམས་ཁྲལ་བྱེད་བཞིན་པའི་ཁྱིམ་བདག་དང་འཕྲད་སྐབས་ཁོང་གིས་རང་ཉིད་དང་ཕྲུ་གུའི་དབར་གྱི་གཏམ་རྒྱུད་སྐོར་གླེང་གི་ཡོད་པ་རེད།
དེ་ལྟར་ཐད་གཏོང་ཁང་དེ་རིམ་བཞིན་མང་ཚོགས་དང་འབྲེལ་འདྲིས་ཆེ་བའི“འགན་སྒྲུབ་སྐར་ཁུང”ཞིག་ཏུ་གྱུར་ཞིང་། གནས་ལུགས་ཤོད་པ་དང་སློབ་གསོ་གཏོང་བའི་བྱེད་ཐབས་མ་སྤྱད་པར་ཅི་འཕྲོས་མོལ་འཕྲོས་བྱེད་པ་དང་དྲིས་ལན་འདེབས་པར་བརྟེན་ནས་སྲིད་ཇུས་ཀྱི་ཤེས་བྱ་དག་མང་ཚོགས་ཀྱི་སེམས་སུ་རིམ་བཞིན་འཇགས་པར་བྱེད་ཀྱི་ཡོད།
རྒྱལ་ཡོངས་སྲིད་གྲོས་ཨུ་ཡོན་གྱི་འགན་འཁུར་བའི་ལོ་བཞི་ནི་སྒྲོལ་དཀར་གྱིས“འགན་འཁྲི་སྒྲུབ་སྟངས་སྦྱོང་བ”ནས“འགན་སྒྲུབ་གསར་གཏོད་བྱེད་པའི”བར་གྱི་ལོ་བཞི་རེད།
“དང་ཐོག་མང་ཙམ་ཉན་པ་དང་། མང་ཙམ་ལྟ་བ། མང་ཙམ་འགྲོ་བ། མང་ཙམ་འདྲི་བ་བཅས་བྱེད་ཀྱི་ཡོད”ཅེས་སྒྲོལ་དཀར་གྱིས་ཕྱིར་དྲན་བྱེད་བཞིན་དུ་གསུངས།
གཞི་རིམ་དང་མང་ཚོགས་ཀྱི་འགྲམ་དུ་ཕྱིན་ནས་བསམ་ཚུལ་དངོས་ཉན་ཞིང་། གྲོང་གསེབ་དར་རྒྱས་ནས་དམངས་འཚོ་འགན་ལེན་བར་དང་ཚོང་གཉེར་ཁོར་ཡུག་ནས་གཞི་རིམ་བཅོས་སྐྱོང་བར་ཁོང་གིས་མཐོང་ཐོས་མྱོང་གྲུབ་ཚང་མ་རེ་རེ་བཞིན་ཟིན་བྲིས་སུ་བཏབ་ནས་གྲོས་གཞིར་བཀོད་དེ་རྒྱལ་ཡོངས་ཀྱི་ཚོགས་འདུ་གཉིས་ལ་ཞུགས་ཀྱི་ཡོད།
ལོ་བཞིའི་རིང་ཁོང་གིས་བཏོན་པའི་གྲོས་གཞི་ཇེ་མང་དུ་སོང་བ་མ་ཟད། ནང་དོན་ཡང་ཕུན་སུམ་ཚོགས་སུ་ཕྱིན་ཡོད། དམངས་གཉེར་ཁེ་ལས་པ་ཞིག་གི་ངོས་ནས་ཁོང་གིས་དམངས་གཉེར་ཁེ་ལས་ཀྱི་འཕེལ་རྒྱས་ལ་དོ་ཁུར་བྱས་ཏེ་ཚོང་གཉེར་ཁོར་ཡུག་ལེགས་སུ་གཏོང་ཆེད་གཏམ་བཤད་ཧུར་ཐག་སྤེལ་བ་དང་ཆབས་ཅིག ཁོང་གིས་གྲོང་གསེབ་དར་རྒྱས་དང་སློབ་གསོ་འཕེལ་རྒྱས་སོགས་ལའང་དོ་སྣང་བྱེད་ཀྱི་ཡོད་ཅིང་། གང་བྱས་ཚང་མ་གཞི་རིམ་དང་དམངས་འཚོར་དམ་པོར་སྦྲེལ་ཡོད།
གྲོས་གཞི་མི་ཉུང་བ་ཞིག་འབྲེལ་ཡོད་སྡེ་ཚན་ཁག་གིས་སྒྲུབ་གཉེར་ཏན་ཏིག་བྱས་པས་གནད་དོན་ཐག་གཅོད་ལ་སྐུལ་འདེད་ཐུབ་ནས་གྲོས་འགོ་གནད་འཕིགས་འདོན་པ་དང་། ཐབས་ཇུས་བཟང་པོ་འདོན་པ། བྱེད་ཐབས་གནད་འཁེལ་འདོན་པ་བཅས་དངོས་འབྲེལ་ཐུབ་ཡོད།
ཐད་གཏོང་ཁང་དུ་ཅི་འཕྲོས་མོལ་འཕྲོས་བྱེད་པ་ནས་རྒྱལ་ཡོངས་ཚོགས་འདུ་གཉིས་ལ་ཐབས་འདོན་ཇུས་འབུལ་བྱེད་པའི་བར་དང་། དེ་ནས་ཞིང་ནང་དང་མུ་ཁར་རོགས་སྐྱོར་བྱེད་པའི་བར་སྒྲོལ་དཀར་གྱི་འགན་སྒྲུབ་གཏམ་རྒྱུད་ནང་སྐད་གྲགས་ཆེ་བའི་དོན་ཆེན་མེད་ཀྱང་གང་བྱས་ཚང་མ་དོན་ཐོག་ཏུ་འཁྱོལ་ཡོད།
འབྲེལ་ཡོད་གསར་འགྱུར།