ཤིན་ཧྭ་གསར་འགྱུར་ཁང་པེ་ཅིང་ནས་ཟླ་3ཚེས་3ཉིན་གློག་འཕྲིན་འབྱོར་གསལ། ཚེས་3ཉིན། གསར་འགོད་པས་ཀྲུང་གོ་རྒྱལ་ཁབ་ལྕགས་ལམ་ཚོགས་པ་ཚད་ཡོད་ཀུང་སི་ནས་ཤེས་རྟོགས་བྱས་པར། ཟླ་3ཚེས་2ཉིན་བར། རྒྱལ་ཡོངས་ལྕགས་ལམ་ནས་དཔྱིད་གསར་སྐྱེལ་འདྲེན་རིང་ཁྱོན་འགྲུལ་པ་མི་ཐེངས་དུང་ཕྱུར་4.07སྐྱེལ་འདྲེན་བྱས་ཤིང་། དེའི་ནང་ཟླ་3ཚེས་2ཉིན་རྒྱལ་ཡོངས་ལྕགས་ལམ་ནས་འགྲུལ་པ་མི་ཐེངས་ཁྲི་1320.8སྐྱེལ་འདྲེན་བྱས་ནས་སྐྱེལ་འདྲེན་གྱི་བདེ་འཇགས་བརྟན་ལ་གོ་རིམ་ལྡན་པ་ཞིག་བྱུང་ཡོད། ཟླ་3ཚེས་3ཉིན་རྒྱལ་ཡོངས་ལྕགས་ལམ་ནས་སྔོན་དཔག་བྱས་ན་འགྲུལ་པ་མི་ཐེངས་ཁྲི་1070སྐྱེལ་འདྲེན་བྱ་རྒྱུ་དང་འགྲུལ་སྐྱེལ་མེ་འཁོར་743མང་དུ་གཏོང་རྒྱུ་རེད།

ས་གནས་ཁག་གི་ལྕགས་ལམ་སྡེ་ཚན་གྱིས་དང་པོའི་བཅོ་ལྔའི་དུས་ཆེན་རིང་འགྲུལ་པ་སྐྱེལ་འདྲེན་བྱེད་པའི་ལས་དོན་སྒྲིག་འཛུགས་ཞིབ་ཚགས་བྱས་པ་མ་ཟད། བར་ཐག་འབྲིང་ཐུང་གི་སྐྱེལ་འདྲེན་བྱེད་ཤུགས་མང་དུ་བཏང་བ་དང་མེ་འཁོར་འབབ་ཚུགས་སུ་སྣ་མང་ཕུན་སུམ་ཚོགས་པའི་རིག་གནས་བྱེད་སྒོ་གཉེར་ནས་འགྲུལ་པའི་ཕྱིར་སྐྱོད་ཀྱི་མྱོང་བ་ཟབ་ཏུ་བཏང་ཡོད། རྒྱལ་ཁབ་ལྕགས་ལམ་ཧུའུ་ཧོ་ཧའོ་ཐེ་ཅུས་ཚོགས་པ་ཀུང་སིས་དུས་གཏན་མེ་འཁོར་D1015ཡི་ཐོག“དང་པོའི་བཅོ་ལྔར་ཕྱིར་ལོག་བྱེད། ལམ་བར་དྲོ་སྐྱིད་ཟབ་མོ་སྦྱིན”ཞེས་པའི་བརྗོད་དོན་གཙོ་བོའི་བྱེད་སྒོ་སྤེལ་ནས་འགྲུལ་པར་དང་པོའི་བཅོ་ལྔའི་དུས་ཆེན་གྱི་སྲོལ་རྒྱུན་གོམས་གཤིས་ངོ་སྤྲོད་བྱས་ལ། གབ་ཚིག་འཚོལ་བ་དང་རིག་རྩལ་འཁྲབ་སྟོན་སོགས་ཀྱི་བྱེད་སྒོ་ཡང་སྤེལ་བ་རེད། རྒྱལ་ཁབ་ལྕགས་ལམ་ཀྲེང་ཀྲོའུ་ཅུས་ཚོགས་པ་ཀུང་སི་ཧྲང་ཆིའུ་འབབ་ཚུགས་ཀྱིས“དཔྱིད་གསར་སྐྱེལ་འདྲེན་ལས་དང་པོའི་བཅོ་ལྔའི་དུས་ཆེན་གྱི་སྤྲོ་སྣང་ཚོར་བ་བྱེད”ཅེས་པའི་བརྗོད་དོན་གཙོ་བོའི་བྱེད་སྒོ་སྤེལ་ཏེ་འགྲུལ་པར་གབ་ཚིག་འཚོལ་དུ་བཅུག་པ་དང་། རིན་མེད་ངང་ཐང་ཡོན་དང་སྨོན་ཚིག་གཱ་སྤྲད་པ་རེད། རྒྱལ་ཁབ་ལྕགས་ལམ་ཝུའུ་ཧན་ཅུས་ཚོགས་པ་ཀུང་སིའི་མེ་འཁོར་འབབ་ཚུགས་ཁག་གཅིག་གིས་སློབ་མའི་སྤ་སེ་བཙོངས་སའི་སྐར་ཁུང་བཙུགས་པ་མ་ཟད། སློབ་མའི་ཆེད་སྤྱོད་བདེ་འཇགས་ཞིབ་བཤེར་བྱེད་ས་བཙུགས་ཁར། དང་བླངས་པ་སྒྲིག་འཛུགས་བྱས་ནས་རོགས་པ་མཁོ་བའི་འགྲུལ་པར་རྡོག་ཁྲེས་དབོར་བ་སོགས་དམངས་ཕན་ཞབས་འདེགས་ཞུས་ཡོད། རྒྱལ་ཁབ་ལྕགས་ལམ་ཝུའུ་ལུའུ་མུའུ་ཆི་ཅུས་ཚོགས་པ་ཀུང་སིས་ཝུའུ་ལུའུ་མུའུ་ཆི་ནས་ཧྲང་ཧའེ་རུ་སྐྱོད་མཁན་འགྲུལ་སྐྱེལ་མེ་འཁོར་ཐེངས་Z42ཐོག་འགྲུལ་པར་ཐང་ཡོན་ཚ་པོ་བསྐྱལ་ནས་མཉམ་དུ་དང་པོའི་བཅོ་ལྔའི་དུས་ཆེན་བཏང་བ་རེད།