ཐེ་ལན་དབུས་རྒྱུད་ཀྱི་ཧྭ་ཧྥུའུ་ལི་ཧྥུའུ་ཡི་འབྲས་ཞིང་སྔོ་ཐིང་ཐིང་ལ་གསེར་མདོག་གི་ཉི་འོད་དལ་གྱིས་འཕྲོས་པ་དང་། དེའི་འགྲམ་ནས་བཏིང་བའི་ལྕགས་ལམ་གཡུ་འབྲུག་བཞིན་ཀྱག་ཀྱོག་ངང་ཐག་རིང་དུ་བསྲིངས་ཡོད།

འགྲུལ་པ་བསྐྱལ་མ་ཐག་ཡིན་པའི་ཧྭ་ཧྥུའུ་ལི་མེ་འཁོར་འབབ་ཚུགས་ཀྱི་ཀྲེང་ཀྲང་ཞིས་ཐི་ཡིས“ཧྭ་ཧྥུའུ་ལི་ལྕགས་ལམ་ཤར་གཏོང་ཐུབ་རྗེས། མེ་འཁོར་བརྗེ་པོ་རྒྱག་པར་ད་ནས་སྒུག་དགོས་མེད། བྱང་ཕྱོགས་ནས་འོང་བའི་མེ་འཁོར་དུས་ཚོད་ཏག་ཏག་ལ་འབྱོར་པས་འགྲུལ་པ་རྣམས་ཕྱིར་བསྐྱོད་པར་སྔར་བས་སྟབས་བདེ་རུ་སོང་ཡོད”ཅེས་གསར་འགོད་པར་བཤད་བྱུང་།

ཞིས་ཐིའི་རྒྱབ་ངོས་ནི་གསར་དུ་བརྒྱབ་མ་ཐག་པའི་ཐོག་སོ་གསུམ་ལྡན་གྱི་ཁང་པ་ཞིག་རེད། ཧྭ་ཧྥུའུ་ལིའི་འདབས་ཀྱི་རིམ་པ་དང་པོའི་མེ་འཁོར་འབབ་ཚུགས་དེར་ཉིན་ལྟར་མེ་འཁོར་14འོང་བ་དང་། འགྲུལ་པ་བརྒྱ་ཆ་དགུ་བཅུ་ཡན་ས་གནས་དེ་གའི་གྲོང་མི་རེད། ཐག་མི་རིང་བའི་སར་གནས་པའི་གྲོང་ཁུལ་རྙིང་པར་འདུ་འཛི་ཆེ་བའི་མེ་འཁོར་འབབ་ཚུགས་རྙིང་པ་ཞིག་ཡོད་པ་དེ་སྔར་རྒྱུན་བདེ་སྤྱོད་གཏོང་བཞིན་ཡོད། “མེ་འཁོར་འབབ་ཚུགས་རྙིང་པ་དེ་ནཱ་ལའེ་རྒྱལ་ཚང་དང་རྩེ་གསུམ་མཆོད་རྟེན་སོགས་ཀྱི་ལོ་རྒྱུས་རྗེས་ཤུལ་དང་ཐག་ཉེ་པོར་གནས་པས། ལོ་བཅུ་གྲངས་རིང་རྒྱས་སྐྲུན་བྱས་མེད་སྟབས་ས་གནས་ཀྱི་འགྲིམ་འགྲུལ་འཕེལ་རྒྱས་འགྲོ་བར་ཤུགས་རྐྱེན་ཐེབས་ཀྱི་ཡོད། ཀྲུང་གོའི་ཁེ་ལས་ཀྱི་རོགས་རམ་ལ་བརྟེན་ནས། ལོ་70ཙམ་རིང་ང་ཚོ་དཀའ་ངལ་གནས་སུ་གྱར་བའི་གནད་དོན་ད་གཟོད་གཞི་ནས་ཐག་གཅོད་ཐུབ་སོང”ཞེས་ཞིས་ཐི་ཡིས་བཤད་པ་དང་། ཁོང་གིས་སླད་ཕྱིན་འབབ་ཚུགས་གསར་པས་ཆ་སྙོམས་ཉིན་རེར་མེ་འཁོར་28བར་མང་དུ་འགྲོ་རྒྱུ་རེད་ཅེས་བཤད།

ཐེ་ལན་གྱི་ཉིས་གཤིབ་ལྕགས་ལམ་གྱི་ཆ་ཤས་ཤིག་ཡིན་པའི་ཧྭ་ཧྥུའུ་ལི་ལྕགས་ལམ་རྣམ་གྲངས་ལ་ཁྱོན་རིང་ཚད་སྤྱི་ལེ་116ཙམ་ཟིན་ནས། ད་བར་ཐེ་ལན་གྱི་གཞི་ཁྱོན་ཆེ་ཤོས་ཀྱི་གྲོང་འབྲེལ་ལྕགས་ལམ་འགྲིམ་འགྲུལ་གྱི་ལས་གྲྭ་ཞིག་རེད། དེའི་ནང་ཀྲུང་གོའི་ཁེ་ལས་ཀྱིས་སྐྲུན་འགན་འཁུར་བའི་ལམ་དུམ་སྤྱི་ལེ་28ནི་ཀྲུང་གོ་གློག་ཤུགས་འཛུགས་སྐྲུན་ཆུ་གློག་ཅུས་བཞི་པས་འཛུགས་སྐྲུན་བྱ་རྒྱུ་དང་། དེའི་ནང་ལམ་ཐིག་ཧྲིལ་པོའི་དཀའ་ཚེགས་ཆེ་ཤོས་ཀྱི་སྤྱི་ལེ་19ཟིན་པའི་མཐོ་སྒྲོམ་དུམ་བུ་སྟེ། ལོ་འཁོར་མོར་ཆུ་ལོག་འབུད་ས་འཁེལ་བའི་འབྲས་ཞིང་འདེབས་ཁུལ་ལས་གཡོལ་ཆེད་མཐོ་ཚད་སྨི་20ནས་24བར་ཟིན་པའི་ཟམ་གདན་བསྐྲུན་རྒྱུ་ཚུད་ཡོད། ན་ནིང་ཟླ་བཅུ་གཉིས་པར། མྱུར་ཚད་ཆུ་ཚོད་རེར་སྤྱི་ལེ་160ཟིན་པའི་ལམ་ཐིག་གསར་པ་ཞིག་ཇུས་འགོད་བྱས་ནས་མེ་འཁོར་ཤར་གཏོང་ཐུབ་ཡོད།

སློབ་ཆེན་སློབ་མ་སུང་དབང་ཟླ་བ་མི་རེ་ངོ་རེར་ཕེང་ཧྲི་ལུའོ་ནས་མེ་འཁོར་ལ་བསྡད་དེ་པང་ཁོག་ཏུ་འགྲོ་གི་ཡོད། སུང་དབང་གིས“འགྲོ་ཐེངས་རེར་སྤ་སེར་ཐེ་ལན་སྒོར་མོ་150ཡིན་པ་དེ་འགྲུལ་སྐྱེལ་རླངས་འཁོར་ཆེ་གྲས་ཀྱི་རིན་གོང་གི་གསུམ་ཆ་གཅིག་ལས་ཟིན་གྱི་མེད། ད་དུང་མེ་འཁོར་གྱི་མྱུར་ཚད་མགྱོགས་ལ། སྒེའུ་ཁུང་ནས་ཡུལ་ལྗོངས་ལ་ལྟ་བཞིན་དུ་འགྲུལ་པ་དང་ཅི་འཕྲོས་མོལ་འཕྲོས་ཐོག་ཁྱིམ་དུ་འབྱོར་གྱི་འདུག”ཅེས་བཤད། ཉེ་འགྲམ་དུ་སྡོད་པའི་ཕྱི་རྒྱལ་གྱི་ཁྲེས་ཁུར་ཡུལ་སྐོར་བ་ཞིག་གིས་ས་བཀྲ་བཏོན་ནས་ཆིང་མའེ་ལ་འགྲོ་རྩིས་བྱེད་དུས་ཡུལ་སྐོར་བ་མི་ཉུང་བས་ད་རེས་ཀྱི་མེ་འཁོར་ལམ་ཐིག་གསར་པ་དེ་བདམས་ནས་མྱོང་ཚོར་གཞན་ཞིག་ཡོང་ཐབས་བྱེད་ཚུལ་བཤད།

ཐེ་ལན་གྱི《ཐེ་ལེ་ཚགས་པར》ཐོག་རྩོམ་ཡིག་བཀོད་པའི་ནང་། སྤྱི་ལེ་19ཙམ་ཟིན་པའི་མཐོ་སྒྲོམ་ལམ་དུམ་དེ་ནི་ཐེ་ལན་གྱི་ཆེས་རིང་ཤོས་ཀྱི་མཐོ་སྒྲོམ་ལྕགས་ལམ་གྱི་ལམ་ཐིག་ཅིག་ཡིན་པ་དེས་ཧྭ་ཧྥུའུ་ལི་ལྕགས་ལམ་གྱིས་འགྲུལ་པ་སྐྱེལ་འདྲེན་གྱི་མྱུར་ཚད་མགྱོགས་སུ་ཕྱིན་ཏེ། དེ་བས་སྟབས་བདེ་དང་དེ་བས་བདེ་འཇགས་ཆེ་རུ་སོང་སྟེ་དཔལ་འབྱོར་གྱི་ཕན་འབྲས་མངོན་གསལ་དོད་པོ་བྱུང་ནས་དབུས་རྒྱུད་དང་བྱང་རྒྱུད་ས་ཁུལ་གྱི་དཔལ་འབྱོར་འཕེལ་རྒྱས་དང་ཡུལ་སྐོར་ལས་རིགས་འཕེལ་རྒྱས་འགྲོ་བར་སྒུལ་ཤུགས་ཆེན་པོ་བསྣན་ཚུལ་འཁོད་ཡོད།

ཧྭ་ཧྥུའུ་ལི་ནས་པེ་ལན་པོ་བར་གྱི་གན་རྒྱའི་དུམ་བུ་དང་པོའི་རྣམ་གྲངས་ཀྱི་འགན་འཁུར་བ་དབན་ཏེ་ཅིན་གྱིས། 2018ལོ་ནས་ཨར་སྐྲུན་བྱས་ཚུན་ཀྲུང་གོ་ཕྱོགས་ཀྱི་ལག་རྩལ་ཚོགས་པས་དྲོད་ཚད་མཐོ་བ་དང་བཞའ་ཚན་ཆེ་ཞིང་ས་གཤིས་ཀྱི་གྲུབ་ཚུལ་རྙོག་འཛིང་ཆེ་བ་སོགས་ཀྱི་འགྲན་སློང་མང་པོ་ཁྱད་དུ་བསད་དེ་ལམ་གཞིའི་ལས་གྲྭ་དང་། ཟམ་ཆེན་རྒྱག་པ། ཞེང་ཚད་ཆེ་བའི་རྒྱུན་མཐུད་ཟམ་པ་ཨར་སྐྲུན་སོགས་ཀྱི་མཚམས་ཚིགས་གལ་ཆེན་སྤུས་ཚད་མཐོ་པོས་ལེགས་སྒྲུབ་བྱས་ནས་མེ་འཁོར་དུས་བཀག་བཞིན་ལས་གཉེར་ཐུབ་རྒྱུར་འགན་ལེན་ནུས་ལྡན་བྱས་ཡོད་ཅེས་བཤད།

མེ་འཁོར་གྱི་དུང་བརྡ་སླར་ཡང་གྲགས་པ་དང་བསྟུན་ནས་ཕར་འགྲོ་ཚུར་འོང་བྱེད་མཁན་འགྲུལ་པ་མེ་འཁོར་ལ་འཛེག་པ་དང་། ས་གནས་ཀྱི་ཞིང་ལས་ཐོན་རྫས་ཀྱང་གྲོང་ཁྱེར་ཆེ་ཁག་ཏུ་དབོར་འགོ་ཚུགས། འབྲས་ཞིང་དང་གནའ་ཤུལ་བརྒྱུད་པའི་ལྕགས་ལམ་དེས་ཡུལ་དུས་ཀྱི་ཧེ་བག་ཐུང་དུ་སོང་ཡོད་ལ། དེ་བས་ལས་ཕྱོད་ཆེ་ཞིང་ལྗང་མདོག་གི་ཟོག་འགྲེམས་བགྲོད་ལམ་ཞིག་ཆགས་ཐུབ་ནས་ཐེ་ལན་གྱི་དབུས་རྒྱུད་དཔལ་འབྱོར་བར་ཁྱམས་འཕེལ་རྒྱས་ཡོང་བར་སྐུལ་འདེད་གཏོང་བཞིན་ཡོད།