ཧྲང་ཧའེ་མཱ་ཏང་ལམ་གྱི་སྲང་ལམ་306ཏུ། སོ་ཕག་དམར་པོ་ལས་བརྩེགས་པའི་ཧྲི་ཁུ་མོན་ཐོག་ཁང་དེ་ཤིན་ཏུ་བརྗིད་ཉམས་ཆེ། 1926ལོ་ནས་1932ལོ་བར་ཏཱ་ཧན་མི་སེར་རྒྱལ་ཁབ་ཀྱི་གནས་སྐབས་སྲིད་གཞུང་གི་གཞུང་དོན་སྒྲུབ་ཡུལ་ཡིན་པའི་ངོས་ནས། ཐོག་ཁང་དེས་གནས་སྐབས་སྲིད་གཞུང་ཀྲུང་གོར་གནས་རིང་གི་ལོ་རྒྱུས་ལ་དཔང་པོ་བྱས་པ་མ་ཟད། དེའི་ནང་ཀྲུང་གོ་དང་ཧན་གོ་རྒྱལ་ཁབ་གཉིས་ཀྱི་མི་དམངས་ཀྱིས་དཔུང་པ་མཉམ་གཤིབ་སྒོ་ནས་རི་པིན་དམག་རྒྱལ་རིང་ལུགས་ལ་འགོག་རྒོལ་བྱས་པའི་དྲན་ཤེས་ཀྱང་འདུས་ཡོད།

ཐོག་ཁང་ནང་དུ་འཛུལ་རྗེས་འདས་ཟིན་པའི་ལོ་རྒྱུས་དག་ཚོར་ཤེས་བྱེད་ཐུབ། སྐབས་དེ་དུས་ཀྱི་དཀའ་ཚེགས་ཆེ་བའི་ལོ་ཟླའི་ནང་། ཀྲུང་གོའི་མི་སེར་དཀྱུས་མས་དངོས་དངོས་རྗེན་རྗེན་གྱི་རྒྱུ་དངོས་ཀྱི་རོགས་རམ་དང་རྒྱབ་ཕྱོགས་ཀྱི་འགེབས་སྲུང་བྱས་པ་ལ་བརྟེན་ནས་ཧན་གོའི་བློ་མཐུན་ལ་རྒྱབ་སྐྱོར་བྱས་ཤིང་། དེ་ནི་དངོས་འབྲེལ་དཀའ་ངལ་ཁྲོད་ནས་བརྩེ་སེམས་དངོས་མཚོན་ཞེས་པ་དེ་རང་རེད། ཏཱ་ཧན་མི་སེར་རྒྱལ་ཁབ་ཀྱི་གནས་སྐབས་སྲིད་གཞུང་ཧྲང་ཧའེ་ནས་ཕྱིར་འཐེན་བྱེད་སྐབས། ཀྲུང་གོའི་ཁྱིམ་མཚེས་ཀུའུ་ཧྲོའུ་ཤིས་དང་ལིའུ་ལུང་ཧྲེང་བཟའ་ཚོ་གཉིས་ཀྱིས་སྐྱེས་ཆེན་དམ་པར་འགེབས་སྲུང་བྱེད་རོགས་བྱས་པ་མ་ཟད། རས་དམར་པོའི་ནང་བསྒྲིལ་བའི་རྡཱ་ཡང་400རི་འགོག་མ་དངུལ་ལ་སྤྲད། ཅིན་ཅིའུ་ཡི་བུ་ཅིན་ཤིན་གྱིས་ཕྱིར་དྲན་བྱས་པར་གཞིགས་ན། སྐབས་དེ་དུས་ཧྲང་ཧའེ་རུ་རྡཱ་ཡང་3གྱིས་མི་སེར་དཀྱུས་མ་ཞིག་གི་ཟླ་བ་གཅིག་གི་འཚོ་བའི་ཁ་འཕྱིད་ཐུབ། རི་པིན་དགྲ་ནག་གིས་རྡཱ་ཡང་ཁྲི་60རྔན་བསྒྲགས་བྱས་ཏེ་ཅིན་ཅིའུ་འཛིན་བཟུང་བྱ་རྩིས་བྱས་ཀྱང་། ཀྲུང་གོའི་དམངས་ཚོགས་ལ་གཡོ་འགུལ་སྤུ་ཙམ་ཡང་མ་ཐེབས་པར་ཁོང་མཐའ་གཅིག་ཏུ་སྲུང་སྐྱེལ་བྱས་ཡོད།

མཛའ་བརྩེ་འདི་ནི་ལས་དབང་གཅིག་མཐུན་རྨང་གཞིར་བྱས་པའི་མཉམ་ཤི་མཉམ་གསོན་ཞིག་ཡིན་ལ། དྲང་གཞག་བདེན་སྐྱོང་ལ་བློ་བརྟན་འགྱུར་མེད་ངང་སྲུང་སྐྱོང་བྱས་པ་ཞིག་དེ་བས་ཀྱང་ཡིན། ཧྲང་ཧའེ་ཧྲི་ཁུ་མོན་ཐོག་ཁང་ནས་ཁྲུང་ཆིང་གི་ཅཱ་ལིང་གཙང་འགྲམ་བར། ཀྲུང་གོ་མི་དམངས་ཀྱིས་ཏཱ་ཧན་མི་སེར་རྒྱལ་ཁབ་ཀྱི་གནས་སྐབས་སྲིད་གཞུང་ལ་ཐབས་ཤེས་སྣ་ཚོགས་ཀྱི་རྒྱབ་སྐྱོར་དང་རོགས་སྐྱོར་བྱས་པ་དང་། ཧན་གོ་སླར་གསོ་དམག་གིས་ཀྲུང་གོའི་དམག་དཔུང་དང་དཔུང་པ་མཉམ་གཤིབ་ཀྱིས་རི་འགོག་དམག་འཐབ་བྱས་ཏེ། འཛམ་གླིང་གི་ཧྥ་ཤི་སིར་ངོ་རྒོལ་བྱེད་པའི་དམག་འཁྲུག་ལ་རྒྱལ་ཁ་ཐོབ་ཆེད་ལེགས་སྐྱེས་ཕུལ་ཡོད།

ལོ་རྒྱུས་ཀྱི་ཉེན་ཟོན་ཅོང་བརྡ་ཡུན་ནས་ཡུན་དུ་གྲགས། དུས་སྐབས་ཤིག་རིང་། རི་པིན་སྲིད་གཞུང་གིས“སླར་ཡང་དམག་དོན་ཅན་དུ་འགྱུར་བར”སྐུལ་འདེད་མགྱོགས་མྱུར་བཏང་ཞིང་། རྒྱུན་ཆད་མེད་པར“ཞི་བདེའི་རྩ་ཁྲིམས”ཀྱི་གཅུན་སྡོམ་ལས་སྒྲོལ་རྩིས་བྱས་ནས། ས་ཁུལ་གྱི་ཞི་བདེ་བརྟན་ལྷིང་ལ་འཇིགས་སྐུལ་ཆེན་པོ་འཕོགས་ཀྱི་ཡོད། རི་པིན་དམག་རྒྱལ་རིང་ལུགས་རོ་ལངས་རྒྱག་པའི་གནས་ཚུལ་འོག ཏཱ་ཧན་མི་སེར་རྒྱལ་ཁབ་ཀྱི་གནས་སྐབས་སྲིད་གཞུང་གི་གནས་ས་རྙིང་པ་དེར་འདུས་པའི་ཐུན་མོང་གི་དྲན་ཤེས་དེ་ནི་ཕྱིར་དྲན་བྱེད་རིན་ཡོད་པའི་ལོ་རྒྱུས་ཙམ་མ་ཡིན་པར། མིག་སྔ་དང་འབྱུང་འགྱུར་ལ་དྲན་སྐུལ་ཟབ་མོ་བྱས་པ་ཞིག་ཡིན།

ཧྲི་ཁུ་མོན་གྱི་གནས་ས་རྙིང་པས་སྐད་ཆ་ཤོད་མ་ཐུབ་ཀྱང་། དེས་ཐོག་མཐའ་བར་གསུམ་དུ་དྲང་གཞག་གི་འབོད་སྒྲ་སྒྲོག་བཞིན་ཡོད། ལོ་རྒྱུས་གནའ་ཤུལ་དེ་ལ་ལྟ་སྲུང་ཡག་པོ་བྱེད་པ་ནི་ཐོབ་པར་དཀའ་བའི་ཞི་བདེར་སྲུང་སྐྱོང་བྱེད་པ་ཞིག་ཡིན། དྲན་ཤེས་དེ་བློ་ལ་བརྟན་པོར་ངེས་པར་བྱེད་པ་ནི་འདས་ཟིན་པའི་ལོ་རྒྱུས་མི་བརྗེད་པར་བྱེད་པ་ཙམ་མ་ཡིན་པར། འཛམ་གླིང་གི་དྲང་གཞག་དང་དྲང་བདེན་ཆེད་འགྱུར་མེད་ཀྱི་རྡོ་རིང་ཞིག་བསླངས་པ་དེ་བས་ཀྱང་ཡིན།