རི་ནེ་ཝ་ནས་གནས་ཚུལ་སྤེལ་གསལ། མཉམ་འབྲེལ་རྒྱལ་ཚོགས་སུ་རྒྱུན་སྡོད་ཀྲུང་གོའི་རི་ནེ་ཝ་དོན་གཅོད་ཁྲུའུ་དང་སུའེ་ཙེར་གྱི་རྒྱལ་སྤྱིའི་རྩ་འཛུགས་གཞན་དག་གི་འཐུས་མི་ཚོགས་པས་ཟླ་2ཚེས་27ཉིན་སུའེ་ཙེར་རི་ནེ་ཝའི་རྒྱལ་ཁབ་ཕོ་བྲང་དུ་རི་ནེ་ཝའི“གོ་ལ་ཧྲིལ་པོའི་བཅོས་སྐྱོང་གྲོགས་ཚོགས”ཀྱི་འགོ་ཚུགས་ཚོགས་འདུ་འཚོགས་པ་དང་། གྲོགས་ཚོགས་འཛུགས་མཁན་ཁོངས་མིའི་རྒྱལ་ཁབ་42ཚུད་པའི་རྒྱལ་ཁབ་60ཙམ་གྱི་འཐུས་མི་ཚོགས་འདུར་ཞུགས་ཡོད་པ་རེད།

མཉམ་འབྲེལ་རྒྱལ་ཚོགས་སུ་རྒྱུན་སྡོད་ཀྲུང་གོའི་རི་ནེ་ཝ་དོན་གཅོད་ཁྲུའུ་དང་སུའེ་ཙེར་གྱི་རྒྱལ་སྤྱིའི་རྩ་འཛུགས་གཞན་དག་གི་འཐུས་མི་ཅ་ཀུའེ་ཏེ་ཡིས། མིག་སྔའི་རྒྱལ་སྤྱིའི་དུས་བབ་རྙོག་འཛིང་ཆེ་བས། ཀྲུང་གོ་ཕྱོགས་ཀྱིས་གོ་ལ་ཧྲིལ་པོའི་བཅོས་སྐྱོང་གི་གྲོས་འགོ་བཏོན་ནས་བདག་དབང་འདྲ་མཉམ་ལག་བསྟར་དང་། རྒྱལ་སྤྱིའི་ཁྲིམས་སྐྱོང་ལ་བརྩི་སྲུང་ཞུ་བ། ཕྱོགས་མང་རིང་ལུགས་ལག་ལེན་བསྟར་བ། མི་རྩ་བར་འཛིན་རྒྱུ་དར་སྤེལ་གཏོང་བ། བྱ་སྤྱོད་ཀྱི་སྟོན་ཕྱོགས་ལ་མཐོང་ཆེན་བྱེད་པ་བཅས་ཀྱི་ལྟེ་བའི་འདུ་ཤེས་ཆེན་པོ་ལྔ་ནན་བཤད་བྱས་ཏེ“གོ་ལ་ཧྲིལ་པོའི་བཅོས་སྐྱོང་མ་ལག་གང་འདྲ་ཞིག་འཛུགས་པ་དང་གོ་ལ་ཧྲིལ་པོའི་བཅོས་སྐྱོང་སྒྱུར་བཅོས་འཐུས་ཚང་ཇི་ལྟར་གཏོང་དགོས་པའི”དུས་རབས་ཀྱི་བརྗོད་གཞིར་ཀྲུང་གོའི་ཇུས་གཞི་གསལ་སྟོན་བྱས་ཡོད། གྲོས་འགོ་དེ་མཉམ་འབྲེལ་རྒྱལ་ཚོགས་ཀྱི་རྩ་འཛིན་གྱི་དམིགས་ཡུལ་དང་རྩ་དོན་ཐོག་རྩ་བ་ཚུགས་པ་ཞིག་ཡིན་པ་དེ་ནི་གོ་ལ་ཧྲིལ་པོའི་འགྲན་སློང་ལ་ཁ་གཏད་གཅོག་པ་དང་ཕྱོགས་མང་རིང་ལུགས་སྲུང་སྐྱོང་བྱེད་པའི་བྱེད་ཐབས་གལ་ཆེན་ཞིག་རེད། རི་ནེ་ཝར་མཉམ་འབྲེལ་རྒྱལ་ཚོགས་ཀྱི་སྒྲིག་གཞི་དང་ཆེད་ལས་རྩ་འཛུགས་མང་པོ་འདུས་པ་དེ་ནི་གོ་ལ་ཧྲིལ་པོའི་བཅོས་སྐྱོང་གི་ལྟེ་གནས་གལ་ཆེན་ཞིག་རེད། ཀྲུང་གོ་ཕྱོགས་ཀྱིས་དེ་གོ་སྐབས་ཤིག་ཏུ་བརྩིས་ནས་ཕྱོགས་ཁག་དང་མཉམ་དུ་གོ་ལ་ཧྲིལ་པོའི་བཅོས་སྐྱོང་སྒྱུར་བཅོས་འཐུས་ཚང་གཏོང་བའི་ཐབས་ལམ་འཚོལ་ཞིབ་བྱས་ཏེ་དེ་བས་དྲང་གཞག་ལུགས་མཐུན་གྱི་གོ་ལ་ཧྲིལ་པོའི་བཅོས་སྐྱོང་མ་ལག་འཛུགས་པར་སྐུལ་འདེད་གཏོང་ཆེད་ལེགས་སྐྱེས་འབུལ་འདོད་ཡོད་ཅེས་བརྗོད་པ་རེད།

ཁུ་པ་དང་། ཧ་སག་སི་ཐན། ཕ་ཁི་སི་ཐན། ཕ་ལེ་སི་ཐན། ཝེ་ནེ་ཙུའེ་ལ། ཙན་པི་ཡ་བཅས་ཀྱི་འཐུས་མིའི་གྲོགས་ཚོགས་ཀྱི་ཁོངས་མིས་གཏམ་བཤད་སྤེལ་ཞིང་། ཕྱོགས་ཁག་གིས་གོ་ལ་ཧྲིལ་པོའི་བཅོས་སྐྱོང་གྲོས་འགོར་ཚད་མཐོའི་ཁས་ལེན་དང་རྒྱབ་སྐྱོར་བྱེད་པ་དང་། ཀྲུང་གོ་ཕྱོགས་ཀྱིས་གོ་ལ་ཧྲིལ་པོའི་བཅོས་སྐྱོང་ཁྲོད་ཀྱི་སྣེ་ཁྲིད་ནུས་པར་བསྔགས་བརྗོད་བྱེད་པ། གྲོགས་ཚོགས་ཀྱིས་རི་ནེ་ཝའི་ལས་སྟེགས་སུ་འབྲེལ་གཏུག་མཐུན་སྦྱོར་ལ་ཤུགས་སྣོན་རྒྱག་པ་དང་། གླེང་མོལ་དང་མཉམ་ལས་ལ་སྐུལ་འདེད་བཏང་སྟེ་སྒྱུར་བཅོས་འཐུས་ཚང་གཏོང་བར་སྐུལ་མ་བཏང་པའི་གོ་ལ་ཧྲིལ་པོའི་བཅོས་སྐྱོང་གི་མཉམ་ཤུགས་ཤིག་ཆགས་པའི་རེ་སྒུག་བྱེད་ཀྱི་ཡོད།