ཚེས་3ཉིན་གྱི་སྔ་དྲོར། གསར་འགོད་པར་རང་སྐྱོང་ལྗོངས་མི་དམངས་འཐུས་ཚོགས་འཐུས་མིའི་གྲོས་འགོ་སྒྲུབ་སྤྲོད་ཚོགས་འདུ་ནས་ཤེས་རྟོགས་བྱུང་བར། རང་སྐྱོང་ལྗོངས་མི་དམངས་འཐུས་ཚོགས་སྐབས་བཅུ་གཉིས་པའི་ཚོགས་འདུ་ཐེངས་བཞི་པར་འཐུས་མིའི་གྲོས་འགོ་ཁྱོན་ཁག་424དང་གྲོས་ཞིབ་གཏམ་བཤད་གནང་སྐབས་བཏོན་པའི་བསམ་འཆར་ཁག་335འབྱོར་ཡོད་པ་རེད།

ཤེས་རྟོགས་བྱུང་བར་གཞིགས་ན། འཐུས་མིའི་གྲོས་འགོའི་ནང་བཏོན་པའི་ནང་དོན་ནས་བལྟས་ན། “དོན་ཆེན་བཞིར”དམིཌ་པ་དང“འཛུགས་གཏོད་བཞིར”ཤུཌ་བརྒྱབ་ནས“ལོ་ལྔ་ཚན་བཅོ་ལྔ་པའི”འགོ་ཡག་པོ་འཛུགས་པར་སྐུལ་འདེད་ཧུར་ཐག་བཏང་བ་སྟེ། བརྟན་ལྷིང་ལ་དམ་པོར་དམིགས་ནས་གྲོས་འགོ་བཏོན་ཞིང་། གཞི་རིམ་བཅོས་སྐྱོང་ལ་ཤུགས་སྣོན་རྒྱག་པ་དང་། སྤྱི་ཚོགས་ཞི་མཐུན་བརྟན་ལྷིང་སྲུང་སྐྱོང་བྱེད་པ། དམངས་གཙོའི་ཁྲིམས་སྐྱོང་འཛུགས་སྐྱོང་སོགས་ལ་དམ་པོར་དམིགས་ནས་གྲོས་འགོ་ཁག་44བཏོན་པ་དེས་གྲོས་འགོའི་བསྡོམས་འབོར་གྱི་10.4%བཟུང་ཡོད། འཕེལ་རྒྱས་ལ་དམ་པོར་དམིགས་ནས་གྲོས་འགོ་བཏོན་ཞིང་། ཐོན་སྐྱེད་ནུས་ཤུཌ་གསར་མ་འཕེལ་རྒྱས་གཏོང་བ་དང་། མ་དངུལ་གཏོང་ཤུགས་ཆེ་རུ་གཏོང་བ། དམངས་འཚོ་ལེགས་གཏོང་དང་རྨང་གཞི་བརྟན་དུ་གཏོང་བ། སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བ་སོགས་ཀྱི་ཐད་ལ་དམ་པོར་དམིགས་ནས་གྲོས་འགོ་ཁག་315བཏོན་པ་དེས་གྲོས་འགོའི་བསྡོམས་འབོར་གྱི་74.3%བཟུང་ཡོད། སྐྱེ་ཁམས་ལ་དམ་པོར་དམིགས་ནས་གྲོས་འགོ་བཏོན་ཞིང་། རྒྱལ་ཁབ་ཀྱི་སྐྱེ་ཁམས་བདེ་འཇགས་སྲུང་བཅད་བརྟན་དུ་གཏོང་བ་དང་། རྒྱལ་ཁབ་ཀྱི་སྐྱེ་ཁམས་ཤེས་དཔལ་གྱི་མཐོ་ས་འཛུགས་གཏོད་བྱེད་པར་དམ་པོར་དམིགས་ནས་གྲོས་འགོ་ཁག་36བཏོན་པ་དེས་གྲོས་འགོའི་བསྡོམས་འབོར་གྱི་8.5%བཟུང་ཡོད། མཐའ་སྟོབས་ལ་དམ་པོར་དམིགས་ནས་གྲོས་འགོ་བཏོན་ཞིང་། མཐའ་མཚམས་ས་ཁུལ་གྱི་འཕེལ་རྒྱས་ལ་སྐུལ་འདེད་གཏོང་བ་དང་། མཐའ་སྟོབས་མཐའ་བརྟན་མཐའ་དར་བཅས་ལ་དམ་པོར་དམིགས་ནས་གྲོས་འགོ་ཁག་29བཏོན་པ་དེས་གྲོས་འགོའི་བསྡོམས་འབོར་གྱི་6.8%བཟུང་ཡོད་པ་རེད།

ལས་རིགས་ཀྱི་ངོས་ནས་བལྟས་ན། སྲིད་ཁྲིམས་རིགས་ཁག་44དང་། ནོར་སྲིད་འཆར་གཞིའི་རིགས་ཁག་94 ཞིང་འབྲོག་ནགས་ཆུའི་རིགས་ཁག་49 བཟོ་ལས་འགྲིམ་འགྲུལ་རིགས་ཁག་98 ཚན་སློབ་རིག་འཕྲོད་ཐད་ཀྱི་རིགས་ཁག་75 ངལ་རྩོལ་མི་དོན་རིགས་ཁག་64བཅས་ཡོད་པ་རེད།

ཤེས་རྟོགས་བྱུང་བར་གཞིགས་ན། རང་སྐྱོང་ལྗོངས་མི་དམངས་འཐུས་ཚོགས་སྐབས་བཅུ་གཉིས་པའི་ཚོགས་འདུ་ཐེངས་བཞི་པའི་འཐུས་མིའི་གྲོས་འགོར་གཤམ་གསལ་གྱི་ཁྱད་ཆོས་ལྡན་པ་སྟེ། ཆབ་སྲིད་ཀྱི་ཚུགས་གནས་མཐོ་ཞིང་། འཐུས་མི་ཚོས་བོད་ཀྱི་དོན་དངོས་ལ་གཞི་ཚུགས་ནས“ཏང་ཨུད་དང་སྲིད་གཞུང་གིས་སྒྲུབ་འདོད་པ”དང“མི་དམངས་མང་ཚོགས་ཀྱིས་རེ་སྒུག་བྱེད་པ”ཟུང་འབྲེལ་དམ་ཟབ་བྱས་ཏེ། བོད་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ལ་རམ་འདེགས་བྱས་ཡོད། འབྲེལ་བ་ཡོད་པའི་ཁྱབ་ཁོངས་རྒྱ་ཆེ་ཞིང་། འཐུས་མིའི་གྲོས་འགོའི་ནང“དོན་ཆེན་བཞིར”དམིགས་པ་དང“འཛུགས་གཏོད་བཞིར”ཤུགས་བརྒྱབ་སྟེ་རང་ལྗོངས་ཀྱི་ལས་རིགས་ཁག་གི་ཕྱོགས་གང་ས་ཅི་ཐད་དང་འབྲེལ་བ་ཡོད་ལ། ལྷག་པར་དུ་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་ཐད་ནས་ནུས་རྒྱུ་གཙང་མ་དང་ཁྱད་ལྡན་ཐོན་ལས་སྤུས་ཚད་མཐོ་པོས་འཕེལ་རྒྱས་གཏོང་བ་དང་། གྲངས་འཛིན་དཔལ་འབྱོར་འཕེལ་རྒྱས་གཏོང་བ། རིག་གནས་དང་ཡུལ་སྐོར་མཉམ་འདྲེས་འཕེལ་རྒྱས་གཏོང་བ། ཚན་རྩལ་དང་སློབ་གསོ་སྤུས་ཚད་མཐོ་པོས་འཕེལ་རྒྱས་གཏོང་བ། རྨང་གཞིའི་སྒྲིག་བཀོད་དང་དམངས་འཚོ་ལེགས་སུ་གཏོང་བ་བཅས་ཀྱི་གྲོས་འགོ་བཏོན་ནས། རང་ལྗོངས་ཀྱི་ས་གནས་ཁག་གི་འཕེལ་རྒྱས་ཀྱི་དོན་དངོས་དང་མི་དམངས་མང་ཚོགས་ཀྱི་བསམ་བློ་གཏོང་ས་དང་རེ་སྒུག་བྱེད་ས་གང་ལེགས་མཚོན་པ་དང་། འཐུས་མི་ཚོས་རང་ལྗོངས་ཀྱི་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ལ་བཅངས་པའི་རེ་སྒུག་གསར་པ་ཡང་མངོན་ཡོད། གྲོས་འགྲོའི་སྤུས་ཚད་མཐོ་ཞིང་། ལོ་སྔོན་མ་དང་བསྡུར་ན་ད་ལོའི་འཐུས་མིའི་གྲོས་འགོའི་ལས་དོན་ལ་ཚད་བརྒལ་གསར་པ་བྱུང་ཡོད་པ་རེད།

“གོམ་སྟབས་རྗེས་མར། ང་ཚོས་འཐུས་མིའི་གྲོས་འགོ་སྒྲུབ་གཉེར་དང་། སྒྲུབ་སྐུལ། གདེང་འཇོག་སོགས་ཀྱི་ལས་དོན་ལ་སྐུལ་འདེད་ཏན་ཏིག་གཏོང་བ་དང་འཐུས་མིའི་གྲོས་འགོ་སྒྲུབ་གཉེར་གྱི་སྤུས་ནུས་ཆེ་རུ་རྒྱུན་ཆད་མེད་པར་བཏང་སྟེ། ‘ལོ་ལྔ་ཚན་བཅོ་ལྔ་པའི’འགོ་ཡག་པོ་འཛུགས་པ་དང་སྤྱི་ཚོགས་རིང་ལུགས་དེང་རབས་ཅན་གྱི་བོད་ལྗོངས་གསར་པ་འཛུགས་སྐྲུན་བྱེད་པར་འཐུས་མིའི་སྟོབས་ཤུགས་ལེགས་སྐྱེས་སུ་འབུལ་གྱི་ཡིན”ཞེས་རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ལྷན་འཐུས་མིའི་ལས་དོན་ཨུ་ཡོན་ལྷན་ཁང་གི་ཀྲུའུ་རེན་ཝང་ཏེ་ཝུན་གྱིས་གསུངས་པ་རེད།