ཀློག་པ་པོའི་དོ་ཁུར།

ད་ལོའི་རྒྱལ་ཡོངས་ཀྱི་ཚོགས་འདུ་གཉིས་འཚོག་གྲབས་ཡོད་པ་དང་རྒྱལ་ཡོངས་མི་དམངས་འཐུས་ཚོགས་ཀྱི་ཚོགས་འདུའི་ཐོག“ལོ་ལྔ་ཚན་བཅོ་ལྔ་པའི”འཆར་འགོད་རྩ་གནད་འཆར་ཟིན་ལ་ཞིབ་བཤེར་བྱེད་པའི་གྲོས་རིམ་ལ་ཚང་མས་དོ་ཁུར་ཆེན་པོ་བྱེད་བཞིན་ཡོད། “ལོ་ལྔ་ཚན་བཅོ་ལྔ་པའི”འཆར་འགོད་ནི་མི་ཚང་མ་དང་འབྲེལ་བ་དམ་ཟབ་ཡོད་པས། མི་སེར་གྱི་བསམ་འདུན“ལོ་ལྔ་ཚན་བཅོ་ལྔ་པའི”འཆར་འགོད་ནང་ཇི་ལྟར་འཇུག་དགོས་སམ།

—— མི་དམངས་དྲ་བའི་དྲ་གྲོགས།

དུས་ཡུན་འབྲིང་རིང་གི་འཆར་འགོད་བཟོས་ནས་དཔལ་འབྱོར་དང་སྤྱི་ཚོགས་འཕེལ་རྒྱས་གཏོང་བར་མཛུབ་ཁྲིད་བྱེད་པ་ནི་རང་རེའི་ཏང་གི་རྒྱལ་སྐྱོང་སྲིད་འཛིན་གྱི་བྱེད་ཐབས་གལ་ཆེན་ཞིག་རེད་ལ། ཐབས་ལམ་སྣ་ཚོགས་བརྒྱུད་བསམ་འཆར་འདྲི་བ་དང་བློ་རིག་གཅིག་སྡུད་བྱེད་པའི་བརྒྱུད་རིམ་ཞིག་ཀྱང་རེད།

དཔེར་ན། མིག་སྔར་ཀྲུང་དབྱང་སྤྱི་ཚོགས་ལས་དོན་པུའུ་ཡིས་མི་དམངས་དྲ་བའི“མི་དམངས་ཀྱི་གྲོས་འགོ”བརྒྱུད། “ངས‘ལོ་ལྔ་ཚན་བཅོ་ལྔ་པའི’རིང་གི་སྤྱི་ཚོགས་ལས་དོན་གྱི་ཆེད་དོན་འཆར་འགོད་ལ་ཐབས་འདོན་ཇུས་འབུལ་བྱེད”ཅེས་པའི་གྲོས་འགོ་བསྡུ་བའི་བྱེད་སྒོ་སྤེལ་བཞིན་ཡོད་པ་དང་། ཟླ་3ཚེས་5ཉིན་གྱི་གོང་ཚང་མས་རང་ཉིད་ཀྱིས་དོ་ཁུར་བྱེད་ཁོངས་ལ་དམིགས་ནས་བསམ་འཆར་དང་གྲོས་འགོ་འདོན་ཆོག་གི་ཡོད། “ཐབས་ཤེས་བཟང་པོ”དང་གྲོས་འགོ་ཡག་པོ་དེ་དག་ཞིབ་འཇུག་ནན་ཏན་བྱས་པ་བརྒྱུད་ཆེད་དོན་འཆར་འགོད་ཡག་པོ་བཟོ་བའི་དཔྱད་གཞི་གལ་ཆེན་ཞིག་ཏུ་བརྩི་རྒྱུ་ཡིན་པ་རེད།

“ལོ་ལྔ་ཚན་བཅོ་ལྔ་པའི”འཆར་འགོད་བཟོ་རྒྱུ་དེ་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་ཕྱོགས་གང་ཅིའི་ཐད་དང་འབྲེལ་བ་ཡོད་པ་དང་མི་དམངས་མང་ཚོགས་ཀྱི་ཐོན་སྐྱེད་འཚོ་བ་དང་འབྲེལ་བ་དམ་ཟབ་ཡོད་པས། “ཐབས་ལམ་སྣ་ཚོགས་བརྒྱུད་འཆར་འགོད་བཟོ་བ”ནི་ཐོག་མཐའ་བར་གསུམ་དུ་ཁྱབ་པ་ཞིག་རེད།

དང་ཐོག“ལོ་ལྔ་ཚན་བཅོ་ལྔ་པའི”འཆར་འགོད་ཀྱི་གྲོས་འགོའི་འཆར་ཟིན་ལ་གཟིགས་དང་།

ཏང་ཀྲུང་དབྱང་གིས་དམངས་གཙོ་དར་སྤེལ་དང་བློ་བསྡུས་དགེ་འཚོལ་བྱེད་པ་དེ་ཡིག་ཆའི་འཆར་ཟིན་འགོད་པའི་ལས་དོན་གྱི་བརྒྱུད་རིམ་ཧྲིལ་པོར་ཁྱབ་པར་བྱས་ནས་བརྟག་དཔྱད་ཞིབ་འཇུག་གཏིང་ཟབ་ཀྱིས་ཕྱོགས་ཁག་གི་བསམ་འཆར་རྒྱ་ཁྱབ་ངང་བསྡུ་ལེན་བྱས་ཡོད།

2025ལོའི་ཟླ་དང་པོར། ཏང་ཀྲུང་དབྱང་གིས《ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པའི་ཐོག“ལོ་ལྔ་ཚན་བཅོ་ལྔ་པའི”འཆར་འགོད་ཀྱི་གྲོས་འགོར་ཞིབ་འཇུག་བྱས་ནས་བསམ་འཆར་བསྡུ་ལེན་བྱེད་པའི་སྐོར་གྱི་བརྡ་ཐོ》བཀྲམ་པ་རེད།

ཟླ་2པའི་ཟླ་མཇུག་ཏུ། ཏང་ཀྲུང་དབྱང་གིས་བརྟག་ཞིབ་ཚོགས་ཆུང་6སྒྲིག་འཛུགས་བྱས་ཏེ་ཞིང་ཆེན་དང་། རང་སྐྱོང་ལྗོངས། གྲོང་ཁྱེར་བཅས་12སུ་ཆེད་དོན་བརྟག་ཞིབ་བྱེད་པར་བསྐྱོད་པ་རེད།

ཟླ་4ཚེས་30ཉིན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཧྲང་ཧའེ་རུ་ཞིང་ཆེན་དང་། རང་སྐྱོང་ལྗོངས། གྲོང་ཁྱེར་བཅས་ཁག་གཅིག་གི“ལོ་ལྔ་ཚན་བཅོ་ལྔ་པའི”རིང་གི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་བཞུགས་མོལ་ཚོགས་འདུ་གཙོ་སྐྱོང་གནང་བ་རེད།

ཟླ་5པ་དང་ཟླ་6པར། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་བཀའ་མངགས་ལྟར་ཀྲུང་དབྱང་གི་འགོ་ཁྲིད་བློ་མཐུན་གྱིས་སྔ་རྗེས་སུ་བཞུགས་མོལ་ཚོགས་འདུ་ཐེངས་3གཙོ་སྐྱོང་གནང་ནས་དཔལ་འབྱོར་ལས་རིགས་དང་། ཚན་རྩལ་ལས་རིགས། གཞི་རིམ་གྱི་འཐུས་མི་བཅས་ཀྱི་བསམ་འཆར་གསན་པ་རེད།

2025ལོའི་ཟླ་5ཚེས་20ཉིན་ནས་ཟླ་6ཚེས་20ཉིན་བར། “ལོ་ལྔ་ཚན་བཅོ་ལྔ་པའི”འཆར་འགོད་བཟོ་བའི་ལས་དོན་ཐད་དྲ་རྒྱའི་ཐོག་བསམ་འཆར་བསྡུ་ལེན་གྱི་བྱེད་སྒོ་སྤེལ་ཞིང་། རིམ་རྩིས་བརྒྱབ་ན། དྲ་དམངས་ཀྱི་གྲོས་འཆར་ཁྲི་311.3ལྷག་ཙམ་འབྱོར་ནས་གསེད་བཀྲོལ་དང་ལེགས་སྒྲིག་བྱས་པ་བརྒྱུད་ཕྱོགས་27ཐད་དགེ་མཚན་ལྡན་པ་དང་མཚོན་བྱེད་རང་བཞིན་གྱི་བསམ་འཆར་དང་གྲོས་འགོ་ཁག་1500ལྷག་ཙམ་གྲུབ་ཡོད་པ་རེད།

དེ་ནས་མིག་སྔའི“ལོ་ལྔ་ཚན་བཅོ་ལྔ་པའི”འཆར་འགོད་རྩ་གནད་བཟོ་བར་གཟིགས་དང་།

2025ལོའི་ཟླ་10པར། ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པའི་ཐོག“ལོ་ལྔ་ཚན་བཅོ་ལྔ་པའི”འཆར་འགོད་ཀྱི་གྲོས་འགོར་གྲོས་ཞིབ་བྱས་ནས་གྲོས་འཆམ་བྱུང་སྟེ། རྒྱལ་ཁབ་དང་ས་གནས་ཀྱི“ལོ་ལྔ་ཚན་བཅོ་ལྔ་པའི”འཆར་འགོད་ཀྱི་རྩ་གནད་དང་ཆེད་དོན་འཆར་འགོད་སོགས་བཟོས་ནས་ངེས་གནས་གནད་ལ་འཁེལ་བ་དང་། བར་མཚམས་ཁ་གསལ་བ། ནུས་པ་གསབ་རེས། གཅིག་གྱུར་སྦྲེལ་མཐུད་བཅས་ཀྱི་རྒྱལ་ཁབ་ཀྱི་འཆར་འགོད་མ་ལག་ཅིག་གྲུབ་དགོས་པའི་བླང་བྱ་ཁ་གསལ་བཏོན་ཡོད།

2025ལོའི་ཟླ་10པའི་ཟླ་མཇུག་ནས་ཟླ་11པའི་ཟླ་དཀྱིལ་བར། རྒྱལ་ཁབ་འཕེལ་སྒྱུར་ཨུ་ལྷན་གྱིས་དྲ་ཐོག་ནས“ལོ་ལྔ་ཚན་བཅོ་ལྔ་པའི”འཆར་འགོད་རྩ་གནད་ཀྱི་ཐབས་ཇུས་འདྲི་བའི་བྱེད་སྒོ་སྤེལ་བ་མ་ཟད། བྱེད་ཐབས་མང་པོར་བརྟེན་ནས་ཕྱོགས་ཁག་གི་གྲོས་འཆར་ལའང་ཉན་པ་དང་། དེའི་ཁྲོད་ཚན་ཞིབ་མི་སྣ་དང་། སྟབས་བསྟུན་ལས་ཞུགས་མི་སྣ། ཞིང་པ། དབང་པོ་སྐྱོན་ཅན་སོགས་ཚོགས་སྤྱི་11གི་བསམ་འཆར་དང་གྲོས་འགོ་བསྡུ་རུབ་བྱས་ཡོད་པ་རེད།

2025ལོའི་ཟླ་11པའི་བར། རེས་སྐོར་འདིའི་གྲོས་འགོ་བསྡུ་རུབ་ལས་དོན་ནང་སྤུས་ཚད་མཐོ་བའི་གྲོས་འཆར་ཁྲི་6.6ལྷག་ཙམ་རིགས་དབྱེ་ཕྱོགས་བསྒྲིགས་བྱས་པ་དང་། བཅུ་ཆ་དྲུག་ཙམ་གྱི་ནང་མི་དམངས་མང་ཚོགས་ཉེ་འགྲམ་གྱི་བྱ་བ་ཤ་སྟག་ཡིན་པ་དེ་དག་བུ་ཕྲུག་གི་སློབ་ཞུགས་སྟབས་བདེ་རུ་གཏོང་བ་དང་། སློབ་གྲྭ་ཆེ་མོ་བའི་ལས་ཞུགས་སྤུས་ཚད་མཐོ་རུ་གཏོང་བ། ནུས་ཤོར་རྒན་རྒོན་ལ་ལྟ་སྐྱོང་བྱེད་ཤུགས་ཆེ་རུ་གཏོང་བ་སོགས་ཡིན་པ་རེད།

གླེང་རིན་ཡོད་པ་ཞིག་ནི། ད་ལོའི་རྒྱལ་ཡོངས་ཀྱི་ཚོགས་འདུ་གཉིས་ཐོག་རྒྱལ་ཁབ་ཀྱི་འཕེལ་རྒྱས་འཆར་འགོད་བཅའ་ཁྲིམས་འཆར་ཟིན་ཡང་རྒྱལ་ཡོངས་མི་དམངས་འཐུས་ཚོགས་ཀྱི་ཚོགས་འདུའི་ཐོག་གྲོས་ཞིབ་བྱེད་པར་འབུལ་རྒྱུ་ཡིན་ཞིང་། དེའི་ནང་རྒྱལ་ཁབ་ཀྱི་འཕེལ་རྒྱས་འཆར་འགོད་བཅའ་ཁྲིམས་འཆར་ཟིན་གྱི་རྩོམ་ཞུས་གསུམ་པར་གཏན་འབེབས་ཁ་སྣོན་བྱས་ཏེ། རྒྱལ་ཁབ་ཀྱི་འཕེལ་རྒྱས་འཆར་འགོད་བཟོ་བར“རྩེ་རིམ་ཇུས་འགོད་དང་ཐབས་ཇུས་དམངས་ལ་འདྲི་བ་གཅིག་གྱུར་ཡོང་བ་མཐའ་འཁྱོངས་བྱེད་དགོས” ཁྲིམས་འཛུགས་ལ་བརྟེན་ནས་བྱེད་ཐབས་སྨིན་པ་དེ་དག་བཅའ་ཁྲིམས་ལམ་ལུགས་སུ་གཏན་འཁེལ་བྱས་ཏེ། “འཆར་གཞི་གཅིག་གིས་མཐའ་འཁྱོལ་བར”ལམ་ལུགས་ཀྱི་འདེགས་སྐྱོར་ནུས་ལྡན་བྱེད་རྒྱུ་རེད།