རྒྱལ་ཁབ་ནུས་རྒྱུ་ཅུས་ཀྱིས་ཁྱབ་བསྒྲགས་བྱས་པའི་གྲངས་གཞི་ལས་མངོན་པར། 2025ལོའི་ལོ་མཇུག་བར། རང་རྒྱལ་གྱི་བསྐྱར་སྐྱེ་ཐུབ་པའི་ནུས་རྒྱུའི་གློག་འདོན་ཚད་ཆན་ཝ་དུང་ཕྱུར་23.4ཟིན་ཡོད། “ལོ་ལྔ་ཚན་བཅུ་བཞི་པའི”རིང་། རང་རྒྱལ་གྱིས་གོ་ལ་ཧྲིལ་པོའི་ཆེ་ཤོས་དང་འཕེལ་རྒྱས་མགྱོགས་ཤོས་ཀྱི་བསྐྱར་སྐྱེ་ཐུབ་པའི་ནུས་རྒྱུའི་མ་ལག་བསྐྲུན་པས། བསྐྱར་སྐྱེ་ཐུབ་པའི་ནུས་རྒྱུའི་གློག་འདོན་ཚད་ཀྱི་བསྡུར་ཚད་40%ནས་60%ཡས་མས་འཕར་ཡོད་པ་རེད།

སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས“ནུས་རྒྱུའི་བདེ་འཇགས་སྤྱི་ཚོགས་འཕེལ་རྒྱས་ཀྱི་སྤྱི་ཡོངས་དང་འབྲེལ་བ་ཡོད” “ང་ཚོས་བབ་བསྟུན་ལས་སྒྲུབ་དང་བབ་བསྟུན་འཕྲལ་སྒྲུབ་བྱས་ཏེ། རང་རྒྱལ་གྱི་ནུས་རྒྱུ་གསར་པའི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་དེ་བས་ཤུགས་ཆེན་གཏོང་དགོས”ཞེས་གསུངས་ཡོད་པ་རེད།

2025ལོར། ཕྱོགས་གསུམ་གྱི་ཐད་ནས་སྔར་བྱུང་མྱོང་མེད་པའི་འཕེལ་རྒྱས་ཀྱི་མྱུར་ཚད་དང་ཤུགས་ཚད་མངོན་པ་སྟེ།

རླུང་གློག་དང་འོད་ཤུགས་ཀྱི་གློག་འདོན་ཚད་མེ་ཤུགས་ཀྱི་གློག་འདོན་ཚད་ལས་ལོ་རྒྱུས་རང་བཞིན་གྱིས་བརྒལ་ཞིང་། 2020ལོའི་ཆན་ཝ་དུང་ཕྱུར་5.3ནས་2025ལོའི་ཆན་ཝ་དུང་ཕྱུར་18.4བར་མང་དུ་ཕྱིན་ནས། དུང་ཕྱུར་རིམ་པའི་སྐས་རིམ་13བསྟུད་མར་བརྒལ་ཡོད་པ་རེད།

ནུས་གསོག་གསར་པའི་གློག་འདོན་ཚད་ཆན་ཝ་དུང་ཕྱུར་1གི་འགག་སྒོ་ལས་ལོ་རྒྱུས་རང་བཞིན་གྱིས་བརྒལ་ཏེ་གོ་ལ་ཧྲིལ་པོའི་བསྡུར་ཚད་40%ལྷག་ཙམ་ཟིན་པ་དང་། “གློག་གསོག་འབོ་ཆེ་གྲས”ཀྱིས་རླུང་འོད་གློག་འདོན་དེ་བས་བརྟན་དུ་བཏང་ཡོད་པ་རེད།

བསྐྱར་སྐྱེ་ཐུབ་པའི་ནུས་རྒྱུའི་ལྗང་གློག་ལག་ཁྱེར་གྱི་ལོ་ཧྲིལ་པོའི་ཉོ་ཚོང་གཞི་ཁྱོན་ལོ་རྒྱུས་ཐོག་གི་ཉོ་ཚོང་བསྡོམས་འབོར་ལས་བརྒལ་ནས། ལྗང་མདོག་ནུས་རྒྱུའི་འཛད་སྤྱོད་ཀྱིས་ལམ་སྲོལ་གང་མགྱོགས་འཛུགས་པར་སྐུལ་མ་ཐེབས་ཡོད་པ་རེད།

འགྱུར་ལྡོག་དེ་དག་བྱུང་དོན་ནི་ནུས་རྒྱུ་མཁོ་སྤྲོད་ཀྱི་སྒྲིག་གཞི་རྒྱུན་ཆད་མེད་པར་ལེགས་སུ་ཕྱིན་པས་རེད། “ལོ་ལྔ་ཚན་བཅུ་བཞི་པའི”རིང་། རང་རྒྱལ་གྱི་ནུས་རྒྱུ་གསར་པར་མཆོང་སྐྱོད་ལྟ་བུའི་འཕེལ་རྒྱས་བྱུང་ཡོད། “བྱེ་ཐང་དང་། གྲམ་ཐང་། ཐང་རྒོད”བཅས་ཀྱི་རླུང་གློག་དང་འོད་ཤུགས་རྟེན་གཞི་ཆེ་གྲས་དག་གཡུལ་ས་གསར་པ་གྱུར་ཞིང་། གསར་དུ་སྒྲིག་སྦྱོར་བྱས་པའི་འཕྲུལ་འཁོར་ནས་གློག་འདོན་ཚད་ཆན་ཝ་དུང་ཕྱུར་1.3ཟིན་པ་དང་། ཆེས་མཐོ་གནོན་གློག་གཏོང་ལས་གྲྭ་དང་ཟུང་འབྲེལ་གྱིས་ལྗང་གློག་ཐག་རིང་ནས་འདྲེན་པར་རམ་འདེགས་བྱས་ཡོད། མིག་སྔར། རང་རྒྱལ་གྱི་སྤྱི་ཚོགས་ཡོངས་ཀྱི་གློག་སྤྱོད་ཚད་ཁྲོད་ལྗང་གློག་བཅུ་ཆ་བཞི་ཙམ་ཟིན་ཞིང་། གློག་ཏུའུ་10རེ་བེད་སྤྱོད་བྱས་པའི་ནང་ཏུའུ་4ཙམ་ལྗང་གློག་ཡིན་པ་རེད།

གོ་ལ་ཧྲིལ་པོའི་ཆེ་ཤོས་དང་འཕེལ་རྒྱས་མགྱོགས་ཤོས་ཀྱི་བསྐྱར་སྐྱེ་ཐུབ་པའི་ནུས་རྒྱུའི་མ་ལག་བསྐྲུན་ཏེ། གོ་ལ་ཧྲིལ་པོའི་ཆེ་ཤོས་དང་འཐུས་སྒོ་ཚང་ཤོས་ཀྱི་ནུས་རྒྱུ་གསར་པའི་ཐོན་ལས་འཁོར་འབྲེལ་ཆགས་པས། རང་རྒྱལ་གྱིས་ཀྱང་གོ་ལ་ཧྲིལ་པོའི་ཐཱན་ཉུང་ཕྱོགས་སྒྱུར་ཆེད་ལེགས་སྐྱེལ་གལ་ཆེན་ཕུལ་ཡོད། “ལོ་ལྔ་ཚན་བཅུ་བཞི་པའི”རིང་། རང་རྒྱལ་གྱིས་ཕྱིར་གཏོང་བྱས་པའི་རླུང་གློག་དང་འོད་ཤུགས་ཐོན་རྫས་ཀྱིས་རིམ་རྩིས་བརྒྱབ་ན་རྒྱལ་ཁབ་གཞན་གྱི་ཐཱན་འབུད་ཚད་ཏུན་དུང་ཕྱུར་41ཙམ་ཉུང་དུ་བཏང་ཡོད་པ་རེད།