འཐུས་མི་ཁྲེན་ཡན་གྱིས་གསུངས་དོན།
འགྲིམ་འགྲུལ་གྱི་འཐབ་ས་དང་པོར་བསྐྱོད་ནས་དམངས་ཀྱི་གནས་ཚུལ་ཤེས་རྟོགས་བྱེད་དགོས།
ཉིང་ཞ་ཀུའུ་ཡོན་གྲོང་ཁྱེར་ཡོན་ཀྲོའུ་ཆུས་དབྱང་ལང་གྲོང་ཚོའི་ལམ་དུ་སྐྱོད་སྐབས། རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མི་ཉིང་ཞ་འགྲིམ་འགྲུལ་མ་འཇོག་ཚོགས་པ་ཚད་ཡོད་ཀུང་སིའི་གཉེར་སྐྱོང་བདག་སྐྱོང་པུའི་གཙོ་འགན་འཁུར་མཁན་ཁྲེན་ཡན་གྱིས་ཟིན་བྲིས་རྒྱག་ཞོར་དུ་གྲོང་མི་ཚོ་དང་ཅི་འཕྲོས་མོལ་འཕྲོས་བྱས། “ཞིང་རྨོའི་འཕྲུལ་ལམ་གྱི་ཞེང་ཚད་འདང་གི་འདུག་གམ། གྲོང་ཚོའི་ལམ་གྱི་བདག་སྐྱོང་མ་དངུལ་གང་ནས་ཡོང་གི་ཡོད” སྐད་ཆ་ཤོད་རིང་ཁོང་གིས་ལམ་ངོས་ལ་ལག་པ་རེག་ཙམ་བྱས་ནས་འགྲོ་ལམ་སྒྲིག་བཀོད་བདག་སྐྱོང་བྱས་ཚུལ་གསལ་རྟོགས་བྱས།
ཁྲེན་ཡན་གྱིས་འགྲིམ་འགྲུལ་སྐྱེལ་འདྲེན་དེ་མང་ཚོགས་ཀྱི་ཐོན་སྐྱེད་དང་འཚོ་བའི་ཕྱོགས་གང་ས་ཅི་ཐད་དང་འབྲེལ་བ་ཆེན་པོ་ཡོད་པ་ཤེས་ཀྱི་ཡོད། གྲོང་ཁྱེར་གྱི་སྤྱི་སྤྱོད་རླངས་འཁོར་གྱི་གཉེར་སྐྱོང་གནས་ཚུལ་དང་། གྲོང་གསེབ་ཀྱི་གཞུང་ལམ་ཤར་གཏོང་གནས་ཚུལ། ཟོག་འདྲེན་ཁ་ལོ་བའི་ལས་རིགས་ཀྱི་དཀའ་ངལ་སོགས་ཚང་མ་ཁོང་གིས་དོ་ཁུར་བྱེད་པའི་གཙོ་གནད་ཡིན་པ་རེད།
“གཤམ་སྐྱོད་ནི་དམངས་ཀྱི་གནས་ཚུལ་ཤེས་རྟོགས་བྱེད་སྟངས་ནུས་ལྡན་ཞིག་རེད། འཐབ་ས་དང་པོར་བསྐྱོད་ཚེ་གཞི་ནས་གཞི་རིམ་གྱི་གནས་ཚུལ་ངོ་མ་ཤེས་ཐུབ”ཅེས་ཁྲེན་ཡན་གྱིས་བཤད། ཁོང་རྟག་ཏུ་དུས་གཏན་རླངས་འཁོར་ལ་བསྡད་དེ་ཉིང་ཞ་ཡི་ཆུས་དང་རྫོང་ཁག་གི་གྲོང་ཁྱེར་དང་གྲོང་གསེབ་ཏུ་བསྐྱོད་ནས་ས་གནས་དེ་གའི་མང་ཚོགས་དང་ཅི་འཕྲོས་མོལ་འཕྲོས་བྱེད་ཀྱི་ཡོད།
སྤྱི་སྤྱོད་རླངས་འཁོར་ནི་གྲོང་ཁྱེར་གྱི“སྐོར་སྐྱོད་སྐར་ཁུང”ཡིན་ལ་དམངས་ཀྱི་གནས་ཚུལ་བསྡུ་རུབ་བྱེད་པའི“སྒུལ་བདེའི་ལས་སྟེགས”ཤིག་ཀྱང་རེད། དབྱིན་ཁྲོན་དུ་ལས་ཀ་བྱེད་པ་དང་འཚོ་བ་སྐྱེལ་རིང་། ཁྲེན་ཡན་གྱིས་འགྲུལ་པ་ཚོ་དང་སྤེལ་རེས་བྱས་ནས་སྤྱི་སྤྱོད་རླངས་འཁོར་གྱི་ཐེངས་གྲངས་དང་། ས་ཚིགས་བཀོད་སྒྲིག གཉེར་སྐྱོང་དུས་ཚོད་བཅས་ཐད་ཀྱི་ཚང་མའི་བསམ་འཆར་དང་གྲོས་འགོ་བསྡུ་ལེན་བྱེད་ཀྱི་ཡོད། མང་ཚོགས་ཀྱིས་གོང་ཞུ་བྱས་པའི་སྤྱི་སྤྱོད་རླངས་འཁོར་གྱི་ལམ་ཐིག་ཁག་གཅིག་བཀོད་སྒྲིག་དང་འབབ་ཚུགས་ཁག་གཅིག་གི་བར་ཐག་ལུགས་མཐུན་མེད་པ་སོགས་ཀྱི་གནད་དོན་ལ་དམིགས་ནས། ཁོང་གིས་ས་གནས་ས་ཐོག་ཏུ་བརྟག་ཞིབ་ཐེངས་མང་བྱས་ནས་གྲོང་ཁྱེར་གྱི་འགྲུལ་རྒྱུན་གྱི་ཁྱད་ཆོས་དང་ཟུང་འབྲེལ་བྱས་ཏེ་གཙོ་གནད་ལམ་ཐིག་གི་དུས་གཏན་རླངས་འཁོར་གྱི་དུས་ཚོད་རིང་དུ་གཏོང་བ་དང་སྤྱི་སྤྱོད་རླངས་འཁོར་གྱི་ལམ་ཐིག་ལེགས་སུ་གཏོང་བ་སོགས་ཀྱི་ཞིབ་ཕྲའི་གྲོས་འགོ་ལེགས་སྒྲིག་བྱས་པ་རེད། མ་ཟད་ཁྲེན་ཡན་གྱིས་རང་འགུལ་ངང་སྤྱི་སྤྱོད་རླངས་འཁོར་ཀུང་སི་དང་འབྲེལ་མཐུད་བྱས་ནས་འབྲེལ་ཡོད་ཇུས་གཞིའི་ཞིབ་བསྡུར་ནང་ཞུགས་པ་རེད།
ས་གནས་ཁག་གི་ཁུལ་ཆུང་རྙིང་པ་དང་གྲོང་གསེབ་དང་དེ་བཞིན་མྱུར་བགྲོད་གཞུང་ལམ་ཞབས་ཞུའི་ཁུལ་བཅས་སུ་འདྲི་རྟོགས་བྱེད་སྐབས། ཁྲེན་ཡན་གྱིས་ཉིང་ཞའི་ནུས་རྒྱུ་གསར་པའི་རླངས་འཁོར་གྱི་གློག་གསོག་རྨང་གཞིའི་སྒྲིག་བཀོད་འཛུགས་སྐྲུན་བལྟོས་བཅས་ཀྱིས་རྗེས་ལུས་ཐེབས་པ་ཤེས་རྟོགས་བྱུང་། འཁོར་བདག་མང་པོ་ཞིག་གིས་ཁོང་ལ་གློག་གསོག་སྒྲིག་ཆས་མི་འདང་བས་ཕྱིར་སྐྱོད་ཀྱི་སྟབས་བདེར་ཤུགས་རྐྱེན་ཆེན་པོ་ཐེབས་ཀྱི་འདུག་ཅེས་བཤད། འདྲི་རྟོགས་རྒྱ་ཁྱབ་དང་བསམ་གཞིག་ཡང་ཡང་བྱས་པ་བརྒྱུད། ཁྲེན་ཡན་གྱིས་ནུས་རྒྱུ་གསར་པའི་རླངས་འཁོར་གྱི་གློག་གསོག་གནས་ཚུལ་ལེགས་སུ་གཏོང་རྒྱུའི་སྐོར་གྱི་གྲོས་འགོ་བཏོན་པའི་ནང་གློག་གསོག་སྒྲིག་ཆས་མང་དུ་གཏོང་བའི་ཁྱབ་ཁོངས་དང་འཆར་འགོད་ཇུས་འགོད་དང་དེ་བཞིན་མ་དངུལ་སྔོན་རྩིས་སོགས་ཕྱོགས་མང་པོ་ཚུད་ཡོད། ཆུང་དུས་ནས་གྲོང་གསེབ་ཏུ་འཚར་ལོངས་བྱུང་བའི་ཁྲེན་ཡན་གྱིས་གྲོང་གསེབ་ཕྱོགས་ཡོངས་ནས་དར་རྒྱས་གཏོང་བའི་འགྲིམ་འགྲུལ་སྐྱེལ་འདྲེན་གྱི་ནུས་པ་གལ་ཆེན་གསལ་པོར་ཤེས་ཀྱི་ཡོད། “ད་ཆ་ཉིང་ཞ་ཡིས་ཞིང་པ་མང་ཚོགས་ཀྱི་བདེ་སྐྱིད་ལྡན་པའི་ཕྱིར་སྐྱོད་དང་། ཟོག་འགྲེམས་སྡེབ་སྐྱེལ། སྦྲག་སྲིད་བསྐུར་སྐྱེལ་བཅས‘མཐའ་མའི་འགག་གནད’གསུམ་གྱི་དཀའ་གནད་སྤྱི་འདོམས་ཐག་གཅོད་བྱས་ནས་ཞིང་ལས་ཐོན་རྫས་གྲོང་ཁྱེར་དུ་དབོར་བ་དང་བཟོ་ལས་ཐོན་རྫས་གྲོང་གསེབ་ཏུ་དབོར་བའི་ཕྱོགས་གཉིས་ཀྱི་སྐོར་སྐྱོད་ཐོགས་པ་མེད་པ་བྱུང་ཡོད” ཁྲེན་ཡན་གྱིས་གྲོང་གསེབ་ཀྱི་གཞུང་ལམ་ཡག་པོ་བསྐྲུན་པ་དང་བེད་སྤྱོད་ཡག་པོ་གཏོང་དགོས་ལ། བདག་སྐྱོང་ཡག་པོ་དང་གཉེར་སྐྱོང་ཡག་པོ་དེ་བས་ཀྱང་བྱེད་དགོས་ཞེས་གསུངས་པ་རེད།
འབྲེལ་ཡོད་གསར་འགྱུར།