ཤིན་ཧྭ་གསར་འགྱུར་ཁང་པེ་ཅིང་ནས་ཟླ་3ཚེས་2ཉིན་གློག་འཕྲིན་འབྱོར་གསལ། ཟླ་3ཚེས་2ཉིན་རྒྱལ་ཡོངས་བུད་མེད་མཉམ་འབྲེལ་ལྷན་ཚོགས་ཀྱིས“གསུམ་བརྒྱད”རྒྱལ་སྤྱིའི་བུད་མེད་དུས་ཆེན་ལ་དྲན་གསོ་དང་གཟེངས་བསྟོད་བྱེད་པའི་ཚོགས་ཆེན་པེ་ཅིང་དུ་འཚོགས་ཤིང་། རྒྱལ་དོན་ཨུ་ཡོན་དང་རྒྱལ་ཡོངས་བུད་མེད་མཉམ་འབྲེལ་ལྷན་ཚོགས་ཀྱི་ཀྲུའུ་ཞི་ཁྲེན་དབྱེ་ཆིན་ཚོགས་ཆེན་ལ་ཞུགས་ནས་གསུང་བཤད་གནང་སྟེ། རྒྱལ་ཡོངས་མི་རིགས་ཁག་དང་ལས་རིགས་ཁག་གི་བུད་མེད་དང་རྒྱ་ཆེའི་བུད་མེད་ལས་དོན་པར་དུས་ཆེན་གྱི་འཚམས་འདྲི་ཞུས་པ་དང་འབྲེལ། གཟེངས་བསྟོད་ཐོབ་པའི་སྔོན་ཐོན་མཉམ་སྡེབ་དང་མི་སྒེར་ལ་སྤྲོ་སེམས་འཁོལ་བའི་རྟེན་འབྲེལ་ཡང་ཞུས་པ་རེད།

ཁྲེན་དབྱི་ཆིན་གྱིས་གསུངས་དོན། ད་ལོ་ནི་ཀྲུང་གོ་གུང་ཁྲན་ཏང་དབུ་བརྙེས་ནས་ལོ་ངོ་105འཁོར་བའི་ལོ་ཞིག་དང་། “ལོ་ལྔ་ཚན་བཅོ་ལྔ་པའི”འཆར་འགོད་འགོ་འཛུགས་ཀྱི་ལོ་ཞིག་ཡིན་ལ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་གོ་ལ་ཧྲིལ་པོའི་བུད་མེད་དབུ་ཚོགས་ཐོག་གནང་བའི་གཙོ་དོན་གསུང་བཤད་ཀྱི་དགོངས་དོན་ཕྱོགས་ཡོངས་ནས་ལག་བསྟར་དོན་འཁྱོལ་བྱེད་པའི་ལོ་དང་པོ་དེའང་ཡིན། རྒྱ་ཆེའི་བུད་མེད་ཚོས་རྒྱུན་སྲིང་ལྷོད་མེད་ངང་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་དགོངས་པས་བློ་སྒྲིལ་སེམས་སྐྱེད་བྱེད་པ་དང་། བློ་བརྟན་འགྱུར་མེད་ངང་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་བུད་མེད་འཕེལ་རྒྱས་ཀྱི་ལམ་བུར་སྐྱོད་པ། ཏང་གི་རྗེས་སུ་འབྲངས་ནས་འབད་འབུངས་བདུན་སྐྱོད་ཀྱིས་ཐོག་མའི་བསམ་འདུན་ནམ་ཡང་བརྟན་འཁྱོངས་བཅས་བྱེད་དགོས། དཔའ་ངར་ཆེན་པོས་འགན་འཁྲི་ལྕི་པོ་ཁུར་ནས་སྤུས་ཚད་མཐོ་བའི་འཕེལ་རྒྱས་ཀྱི་བརྗོད་དོན་གཙོ་བོར་དམ་པོར་དམིགས་པ་དང་། བུད་མེད་ཀྱིས་བྱས་རྗེས་འཇོག་པའི་རིམ་སྤེལ་བྱ་སྤྱོད་ནང་ཧུར་ཐག་ཞུགས་ནས“ལོ་ལྔ་ཚན་བཅོ་ལྔ་པར”བྱས་རྗེས་འཇོག་རིང་དངོས་སྒྲུབ་དོན་འཁྱོལ་ཐུབ་པར་བྱེད་དགོས། སྲོལ་གསར་དར་སྤེལ་བཏང་ནས་ཁྱིམ་ཚང་གི་ཤེས་དཔལ་འཛུགས་སྐྱོང་ཁྲོད་ནུས་པ་མངོན་གསལ་དོད་པོ་ཐོན་པར་བྱས་ཏེ། ཀྲུང་གོའི་ལུགས་ཀྱི་དེང་རབས་ཅན་གྱི་ཁྱིམ་ཚང་གི་རྨང་གཞི་བརྟན་དུ་གཏོང་དགོས། སྤེལ་རེས་དང་ཕན་ཚུན་དཔྱད་གཞིར་འཛིན་ནས་གོ་ལ་ཧྲིལ་པོའི་བཅོས་སྐྱོང་ནང་ཧུར་ཐག་ཞུགས་ཏེ་དབུ་ཚོགས་ཀྱི་ཕན་འབྲས་རྒྱུན་མཐུད་ཆེ་རུ་བཏང་ནས་གོ་ལ་ཧྲིལ་པོའི་བུད་མེད་ཀྱི་བྱ་གཞག་དང་མིའི་རིགས་ཀྱི་ཤེས་དཔལ་ཡར་ཐོན་ཡོང་བར་ཀྲུང་གོའི་བློ་གྲོས་ལེགས་སྐྱེས་འབུལ་དགོས་པའི་ཐུགས་རེ་གནང་བ་རེད།

ཚོགས་ཆེན་ཐོག་རྒྱལ་ཡོངས་ཀྱི་གསུམ་བརྒྱད་དར་དམར་བའི་དཔེ་དམག་9དང་། རྒྱལ་ཡོངས་ཀྱི་གསུམ་བརྒྱད་དར་དམར་བ་598 རྒྱལ་ཡོངས་གསུམ་བརྒྱད་དར་དམར་གྱི་མཉམ་སྡེབ་400 རྒྱལ་ཡོངས་བུད་མེད་ཀྱི་ཤེས་དཔལ་ལས་གནས་600བཅས་ལ་གཟེངས་བསྟོད་བྱས་པ་རེད།