འདི་ནི་ཅང་ཤིས་ཞིང་ཆེན་ཧྥུའུ་ཀྲོའུ་གྲོང་ཁྱེར་ནན་ཧྥེང་རྫོང་ཆིན་ཁྲེང་གྲོང་རྡལ་ཧྲུའེ་ནན་གྲོང་ཚོར་གྲོང་ཚོ་དང་། ཞིང་ཁ། འགྲོ་ལམ་བཅས་གཅིག་ལ་གཅིག་རྒྱན་དུ་གྲུབ་པའི་མཛེས་སྡུག་ལྡན་པའི་གྲོང་གསེབ་ཀྱི་རྣམ་པ་ཡིན་པ།

“ལོ་ལྔ་ཚན་བཅུ་བཞི་པའི”རིང་། ཀྲུང་གོའི་ཞིང་ལས་དེང་རབས་ཅན་འཛུགས་སྐྲུན་ལ་སྐུལ་འདེད་ཏན་ཏིག་བཏང་བ་དང་། དབུལ་སྒྲོལ་འགག་སྒྲོལ་གྱི་གྲུབ་འབྲས་མུ་མཐུད་སྲ་བརྟན་དང་རྒྱ་སྐྱེད་བཏང་བ། གྲོང་གསེབ་ཀྱི་ཐོན་ལས་དབྱར་མཚོ་རྒྱས་པ་ལྟར་འཕེལ་རྒྱས་ཕྱིན་པ། གྲོང་གསེབ་ཀྱི་ཐོན་སྐྱེད་དང་འཚོ་བའི་ཆ་རྐྱེན་མུ་མཐུད་ལེགས་སུ་ཕྱིན་པ་བཅས་བྱུང་སྟེ། མི་དམངས་མང་ཚོགས་ཀྱི་ཐོབ་སྣང་དང་། སྐྱིད་སྣང་། བདེ་འཇགས་ཚོར་སྣང་བཅས་རྒྱུན་ཆད་མེད་པར་ཆེ་རུ་ཕྱིན་ཡོད། “ལོ་ལྔ་ཚན་བཅོ་ལྔ་པའི”འགོ་འཛུགས་སྐབས་ཀྲུང་གོའི་ཡངས་ཤིང་རྒྱ་ཆེ་བའི་གྲོང་གསེབ་ཏུ་རེ་བས་ཁེངས་པའི་དཔྱིད་ཀ་སླར་ཡང་འཆར་བཞིན་ཡོད། འདི་ག་ཚགས་པར་གྱི་གསར་འགོད་པའི་བཅར་འདྲི་དང་ལེན་བྱེད་མཁན་རྒྱལ་སྤྱིའི་མི་སྣས། ཉེ་བའི་ལོ་ཤས་རིང་། ཀྲུང་གོའི་གྲོང་གསེབ་རྣམ་པ་ལེགས་ལ་མིག་ལ་མཛེས་པ་དང་མི་སེར་གྱི“དངུལ་ཁུག”དེ་བས་ལྗིད་ཏིག་ཏིག་ཏུ་་སོང་ཡོད། ཀྲུང་གོས་གྲོང་གསེབ་ཕྱོགས་ཡོངས་ནས་དར་རྒྱས་ཡོང་བར་སྐུལ་འདེད་བཏང་བ་དང་། གནས་འཕྲོད་ལས་འཚམ་མཛེས་མཐུན་གསུམ་ལྡན་གྲོང་གསེབ་འཛུགས་སྐྲུན་གྱི་གྲུབ་འབྲས་ཐོབ་པའི་ཉམས་མྱོང་ལས་རྒྱ་ཆེའི་འཕེལ་རྒྱས་འགྲོ་བཞིན་པའི་རྒྱལ་ཁབ་ལ་གཞི་འཛིན་ས་རྩ་ཆེན་མཁོ་འདོན་བྱས་ཡོད་ཅེས་བརྗོད།

གནས་འཕྲོད་ལས་འཚམ་ཡོང་བར་དམིགས་ནས་གྲོང་གསེབ་ཀྱི་འཆར་གཞི་གསར་པ་བཀོད་པ།

ཉེ་བའི་ལོ་ཤས་རིང་། ཀྲུང་གོའི་གྲོང་གསེབ་ཀྱི་འཚོ་སྡོད་ཁོར་ཡུག་མངོན་གསལ་དོད་པོས་ལེགས་སུ་ཕྱིན་པ་དང་ས་གནས་ཁག་གིས་ཡུལ་བབ་དང་བསྟུན་ནས་གྲོང་གསེབ་ཀྱི་ཐོན་ལས་འཕེལ་རྒྱས་དང་། གྲོང་གསེབ་འཛུགས་སྐྲུན། གྲོང་གསེབ་བཅོས་སྐྱོང་བཅས་ལ་སྐུལ་འདེད་བཏང་ཡོད། གྲངས་གཞི་མང་དག་ལས་འགྱུར་ལྡོག་གསལ་པོར་མཚོན་པ་སྟེ། མིག་སྔར། ཀྲུང་གོའི་གྲོང་གསེབ་ཏུ་གཙང་སྦྲ་ལྡན་པའི་གསང་སྤྱོད་ཁྱབ་ཚད་77%ཡས་མས་ཟིན་པ་དང་། གྲོང་གསེབ་ཀྱི་འཚོ་བའི་བཙོག་ཆུ་གཙང་བསིང་བྱེད་ཚད་55%ཟིན་པ། གྲོང་གསེབ་གཞུང་ལམ་གྱི་སྤྱིའི་ལམ་ཐག་སྤྱི་ལེ་ཁྲི་464ལྷག་ཙམ་ཟིན་པ། སྲིད་འཛིན་གྲོང་ཚོར་5Ｇཤར་གཏོང་ཐུབ་ཚད་90%ལྷག་ཙམ་ཟིན་པ། སློབ་གསོ་དང་། སྨན་བཅོས། རྒན་གསོ་སོགས་གཞི་རྩའི་སྤྱི་པའི་ཞབས་ཞུའི་ཆུ་ཚད་རྒྱུན་ཆད་མེད་པར་མཐོ་རུ་ཕྱིན་པ་ལ་སོགས། གྲོང་ཚོ་མཛེས་སྡུག་ལྡན་པ་དང་། མི་སྣ་འཆམ་མཐུན། ཐུན་མོང་འབྱོར་ཕྱུག་བཅས་ཀྱི་གྲོང་གསེབ་ཀྱི་རྣམ་པ་གསར་པ་རིམ་བཞིན་གྲུབ་བཞིན་ཡོད།

ལོ་སི་མི་དམངས་གསར་བརྗེ་ཏང་ཀྲུང་དབྱང་དྲིལ་བསྒྲགས་པུའི་པུའུ་ཀྲང་གཞོན་པ་ཟུར་པ་དབན་སའེ·ཐ་ཝུན་ཡན་ཀྲུང་གོར་ཐེངས་མང་འཚམས་འདྲིར་ཕེབས་མྱོང་ཡོད། “2024ལོའི་ཟླ་9པར་ང་རང་སི་ཁྲོན་ཏེ་དབྱང་གྲོང་ཁྱེར་དང་ཀོང་ཡོན་གྲོང་ཁྱེར་གྱི་གྲོང་ཚོ་དང་གྲོང་རྡལ་དུ་འཚམས་འདྲིར་ཕྱིན་པ་ཡིན། ས་གནས་དེ་གའི་ཡུལ་མིའི་སྡོད་ཁང་མཛེས་ཞིང་སྐྱིད་སྣང་དོད་པ་དང་། འགྲོ་ལམ་ཁོད་སྙོམས་ལ་རྒྱ་ཆེ་བ། དམངས་ཕན་ཞབས་ཞུ་ལྟེ་གནས་དང་། རིག་གནས་ཚོགས་ཁང་། འཕྲོད་བསྟེན་ཁང་སོགས་སྤྱི་པའི་སྒྲིག་བཀོད་ཚང་མ་འཛོམས་པ་དང་། གྲོང་ཚོ་ཨུ་ཡོན་ལྷན་ཁང་ཁག་གཅིག་གིས་ད་དུང་གྲངས་འཛིན་ཅན་གྱི་རིག་ལྡན་གྲོང་གསེབ་ལས་སྟེགས་བཙུགས་ནས་གྲོང་དོན་ཡོངས་བསྒྲགས་དང་། དམངས་ཕན་ལས་སྒྲུབ། ཞིང་ལས་ཐོན་རྫས་ཁྱབ་གདལ་ཕྱིར་ཚོང་སོགས་སྤྱི་པའི་ཞབས་ཞུ་མཁོ་འདོན་བྱེད་ཀྱི་འདུག ཀྲུང་གོས་གྲོང་གསེབ་དེང་རབས་ཅན་གྱི་འཛུགས་སྐྲུན་ལ་སྐུལ་འདེད་བཏང་སྟེ་ཡུན་མིས་སྤུས་ཚད་མཐོ་བའི་ཞབས་ཞུ་ལོངས་སྤྱོད་ཐུབ་པར་བྱས་པས་བདེ་སྡོད་ལས་བརྩོན་མངོན་འགྱུར་བྱུང་ཡོད”ཅེས་ཐ་ཝུན་ཡན་གྱིས་བརྗོད།

ཐོན་ལས་ཀྱིས་མཐུན་རྐྱེན་སྦྱར་ནས་འཕེལ་རྒྱས་ཀྱི་ནང་སྐྱེས་ནུས་པ་འཕེལ་བར་བྱས་པ།

ཐོན་ལས་དར་རྒྱས་ནི་གྲོང་གསེབ་དར་རྒྱས་གཏོང་བའི་འགག་རྩ་ཡིན། ད་ཆ་ཁྱད་ལྡན་གྲོང་གསེབ་ཡུལ་སྐོར་འཕེལ་རྒྱས་གཏོང་རྒྱུ་དེ་ས་གནས་མི་ཉུང་བ་ཞིག་གི་ཡུལ་མིའི་འབབ་འཕར་ཕྱུག་འགྱུར་གྱི་ཐབས་ལམ་གལ་ཆེན་ཞིག་ཏུ་འགྱུར་བཞིན་ཡོད། “ཧྲའན་ཤིས་ཤིས་ཨན་གྲོང་ཁྱེར་ཧུའུ་དབྱི་ཆུས་ཚའེ་ཅ་ཕོའོ་གྲོང་ཚོར་སྐྱོད་སྐབས། སྒྱུ་རྩལ་གྱི་རྣམ་པ་ཁྱད་པར་བ་དེས་ངའི་གྲོང་གསེབ་ཀྱི་སྔར་ཡོད་ཀྱི་བག་ཆགས་ལ་འགྱུར་ལྡོག་ཕྱིན་སོང་། འདིར་ཡུལ་སྐོར་གསར་སྤེལ་དང་། རང་བྱུང་ཐོན་ཁུངས། སྲོལ་རྒྱུན་རིག་གནས། དམངས་ཁྲོད་སྒྱུ་རྩལ་བཅས་མཉམ་འདྲེས་ནུས་ལྡན་བྱས་ནས་ཡུལ་སྐོར་ཉམས་ལེན་དང་ཁྱད་ལྡན་འཛད་སྤྱོད་ཀྱི་ཚ་རླབས་གསར་རྐྱང་འཕྱུར་ཡོད། གྲོང་གསེབ་ཀྱི་རིག་གནས་ཡུལ་སྐོར་ཐོན་ལས་ལས་སྲོལ་རྒྱུན་རྒྱུན་འཛིན་དང་། མིག་སྔའི་འཛུགས་སྐྲུན། འབྱུང་འགྱུར་འཆར་འགོད་བཅས་དོ་སྙོམས་འཕེལ་རྒྱས་མངོན་འགྱུར་བྱུང་ཡོད”ཅེས་ཨེ་ཅིབ་ཁེ་རོའི་ཆུ་ཚོད་24གསར་འགྱུར་དྲ་བའི་གསར་འགོད་པ་སང་ཧུའུ་ལིས་བརྗོད།

ཡུན་ནན་མོང་ལཱ་རྫོང་ཧོ་པན་གྲོང་ཚོར་ཝུ་ཀན་ཏ་པུའུ་སུའོ་ཅ་འཕེལ་རྒྱས་མནའ་འབྲེལ་སྤྱི་པའི་འབྲེལ་བའི་ཀྲོན་ཡོན་ཨའེ་སི་ཐེ·སྨི་ལེ་མུའུ་པེ་ཡིས་ཡུལ་མི་དང་མཉམ་དུ་འགྱིག་འགོག་དང་། སྦྲང་གསོ། དགུན་དུས་སྔོ་ཚལ་འདེབས་འཛུགས་སོགས་ཀྱི་ལག་རྩལ་ཉམས་ལེན་བྱས་པ་རེད། “འདི་གར་ཡུལ་མི་ཚོ་ནི་གཞན་དབང་གི་ཕན་པ་ཐོབ་མཁན་མིན་པར་རང་འགུལ་ངང་ཞུགས་མཁན་ཡིན། མཉམ་ལས་ཁང་གཏོད་པ་དང་དེང་རབས་ཞིང་ལས་འཕེལ་རྒྱས་གཏོང་བ་སོགས་ཚང་མས་ལས་བགོས་མཉམ་སྒྲུབ་དང་ཐུན་མོང་ཐོག་ལས་གཏོད་བྱས་ནས། གྲོང་ཚོའི་དཔལ་འབྱོར་འཕེལ་རྒྱས་ཀྱི་གསོན་ཤུགས་རྒྱས་པར་བྱས་ཡོད། ཚ་ཁུལ་གྱི་ཞིང་ལས་རྟེན་གཞི་འཕེལ་རྒྱས་གཏོང་བ་ནས་གྲོང་གསེབ་ཀྱི་ཡུལ་སྐོར་ལས་སྟེགས་སྐྲུན་པའི་བར། ས་གནས་དེ་གའི་སྲིད་གཞུང་གིས་གནད་སྨིན་ཇུས་བསྟར་དང་གསར་གཏོད་གསར་འབྱེད་བྱས་ནས་ཚང་མའི་ལས་གཏོད་ཀྱི་ཧུར་བརྩོན་རང་བཞིན་སྐུལ་སློང་བྱས་ཏེ་ཕ་ཡུལ་དུ་ལོག་ནས་ལས་གཏོད་བྱེད་པའི་ཁོར་ཡུག་བཟང་པོ་ཞིག་བསྐྲུན་ཡོད”ཅེས་སྨི་ལེ་མུའུ་པེ་ཡིས་བརྗོད།

ཉམས་མྱོང་མཉམ་སྤྱོད་བྱས་ནས་རོགས་ཟླ་ཐུན་མོང་དར་རྒྱས་ཡོང་བར་རམ་འདེགས་བྱས་པ།

ལོ་མང་རིང་ལག་ལེན་འཚོལ་ཞིབ་དང་དུས་ཚོད་ཀྱི་ཞིབ་དཔྱད་བྱས་པ་བརྒྱུད། ཀྲུང་གོའི་དབུལ་པོ་ཉུང་གཏོང་བཅོས་སྐྱོང་གི་རིགས་པའི་གཞུང་ལུགས་ཀྱི་སྒྲོམ་གཞི་རྒྱུན་ཆད་མེད་པར་ཕུན་སུམ་ཚོགས་སུ་ཕྱིན་ཞིང་། བྱ་ཐབས་དང་ཐབས་ལམ་ཡང་མུ་མཐུད་ལེགས་སུ་ཕྱིན་ཡོད། ཀྲུང་གོའི་དབུལ་པོ་དབུལ་ནག་སེལ་བའི་གྲུབ་འབྲས་ཐོབ་པའི་ལག་ལེན་དང་རྩ་ཆེའི་ཉམས་མྱོང་གིས་རྒྱལ་སྤྱིའི་དབུལ་པོ་བཅོས་སྐྱོང་གི་ཀྲུང་གོའི་མ་དཔེ་བཏོད་ནས། རྒྱ་ཆེའི་འཕེལ་རྒྱས་འགྲོ་བཞིན་པའི་རྒྱལ་ཁབ་ཀྱིས་རང་ཉིད་དང་འཚམ་པའི་དབུལ་པོ་ཉུང་གཏོང་གི་འཕེལ་རྒྱས་འགྲོ་ལམ་འདེམས་པར་དཔྱད་གཞི་གལ་ཆེན་མཁོ་འདོན་བྱས་ཡོད།

2025ལོའི་ཟླ་11ཚེས་30ཉིན་ནས་ཟླ་12ཚེས་9ཉིན་བར་ཀྲུང་གོ་ཞིང་ལས་སློབ་ཆེན་དང་ཐེང་ཞུན་ཀུང་སིས་མཉམ་འབྲེལ་ཐོག་གཉེར་བའི“གོ་ལ་ཧྲིལ་པོའི་ལྷོ་ཕྱོགས་གཞོན་ནུའི་གྲོང་གསེབ་དར་རྒྱས་ཀྱི་འཆར་གཞིའི”2025ལོའི་རྣམ་གྲངས་སྦྱོང་བརྡར་པེ་ཅིང་དང་ཡུན་ནན་དུ་བྱས་པ་རེད། ཐན་ཙན་ཉི་ཡའི་མོའོ་ལུའོ་ཀེ་ལུའོ་ཞིང་ཆེན་ནས་ཡོང་བའི་ཕྱུགས་ལས་འཕེལ་རྒྱས་ཀྲོན་ཡོན་ཨ་པུའུ་ཏུའུ་ལ·མ་ཤིན་པོས། ད་ཐེངས་ངས་ཕན་ནུས་ལྡན་པའི་གྲོང་གསེབ་འཕེལ་རྒྱས་གཏོང་བ་ནི་མྱུར་འགྲུབ་ཀྱི་བྱ་བ་ཞིག་གཏན་ནས་མིན་པར་ཡུན་རིང་གི་སྲིད་ཇུས་མཐུན་སྦྱོར་དང་། ལག་རྩལ་ས་གནས་སུ་ཁྱབ་གདལ། ཡུལ་མི་ཧུར་ཐག་ཞུགས་པ་བཅས་བྱེད་དགོས་པའི་ཕྱོགས་བསྡུས་ཀྱི་བརྒྱུད་རིམ་ཞིག་ཡིན་པ་ཤེས་རྟོགས་བྱུང་། “ངས་ཀྲུང་གོ་ནས་སྦྱངས་པ་དག་ལག་ལེན་དུ་འཁྱོལ་བར་བྱས་ནས་ཐན་ཙན་ཉི་ཡའི་གཞོན་ནུ་དང་སྲིད་གཞུང་གི་སྒྲིག་གཞི་དེ་བས་མང་བས་ལག་གདང་སྦྲེལ་ནས་གྲོང་གསེབ་འཛུགས་སྐྲུན་བྱེད་པར་ཐུན་མོང་ཐོག་སྐུལ་འདེད་གཏོང་གི་ཡིན”ཞེས་བརྗོད།