མི་ཆོས་རིག་གནས་སྤེལ་རེས་ཀྱིས་ཨ་ཧྥེ་རི་ཁ་དང་ཀྲུང་གོའི་འཕེལ་རྒྱས་མཉམ་ལས་ལ་རྨང་གཞི་བརྟན་པོ་བཏིང་བ།
ད་ལོ་ནི་ཨ་ཧྥེ་རི་ཁ་དང་ཀྲུང་གོའི་དབར་ཕྱི་འབྲེལ་བཙུགས་ནས་ལོ་ངོ་70འཁོར་བའི་ལོ་རེད་ལ། ཕྱོགས་གཉིས་ཀྱིས་ཐུན་མོང་ཐོག་གཏན་འཁེལ་བྱས་པའི“ཀྲུང་གོ་དང་ཨ་ཧྥེ་རི་ཁའི་མི་ཆོས་རིག་གནས་སྤེལ་རེས་ཀྱི་ལོ”ཡང་རེད། ལོ་70ཡི་རིང་། རྨང་གཞིའི་སྒྲིག་བཀོད་འཛུགས་སྐྲུན་དང་ཚོང་དོན་འགྲོ་འོང་བརྒྱུད་ནས་ཨ་ཧྥེ་རི་ཁ་དང་ཀྲུང་གོའི་རོགས་ཟླའི་འབྲེལ་བའི་སྲ་ཞིང་བརྟན་པའི་སྒྲོམ་གཞི་བསྐྲུན་ཞིང་། མི་ཆོས་རིག་གནས་སྤེལ་རེས་ཀྱིས་མཉམ་ལས་ལ་མཛའ་གྲོགས་དང་བརྩེ་སེམས་ཟབ་མོ་བསྣན་ཡོད་ལ། མཉེན་གཤིས་དང་ཡིད་ཆེས་ཀྱང་བསྣན་ནས། ཨ་ཧྥེ་རི་ཁ་དང་ཀྲུང་གོའི་འབྲེལ་བ་འཕེལ་རྒྱས་ལ་སྐུལ་འདེད་གཏོང་བའི་སྟོབས་ཤུགས་གལ་ཆེན་ཞིག་ཏུ་གྱུར་ཡོད།
མི་ཆོས་རིག་གནས་སྤེལ་རེས་ཀྱིས་གཞོན་ནུའི་མཛའ་གྲོགས་ཀྱི་རྨང་གཞི་བརྟན་དུ་གཏོང་བ་དང་ཨ་ཧྥེ་རི་ཁ་དང་ཀྲུང་གོའི་འབྲེལ་བའི་བརྟན་བགྲོད་རྒྱང་འཁྱོལ་ལ་སྐུལ་འདེད་གཏོང་རྒྱུར་ཕན་ཐོགས་ཡོད། ཨ་ཧྥེ་རི་ཁ་དང་ཀྲུང་གོའི་མཛའ་གྲོགས་མི་རབས་ནས་མི་རབས་བར་རྒྱུན་འཛིན་དང་མཉམ་ལས་རྒྱུན་མཐུད་ཟབ་ཏུ་གཏོང་བར་གཞོན་ནུ་མི་རབས་ཚོས་རྒྱུན་འཛིན་དང་ཐེག་པ་ཁུར་ལེན་བྱེད་པ་དང་ཁ་འབྲལ་ཐབས་མེད། ཉེ་བའི་ལོ་ཤས་རིང་། ཕྱོགས་གཉིས་པོས་ཨ་ཧྥེ་རི་ཁ་དང་ཀྲུང་གོའི་གཞོན་ནུའི་མཉམ་སྤྲོའི་ཚོགས་འདུ་དང་ཨ་ཧྥེ་རི་ཁ་དང་ཀྲུང་གོའི་རིག་མཛོད་གླེང་སྟེགས་སོགས་གླེང་མོལ་སྟེགས་བུ་བཙུགས་ནས་གཞོན་ནུ་མི་རབས་ཚོར་གང་བསམ་ལྷུག་གླེང་དང་མཉམ་དུ་འབྱུང་འགྱུར་གླེང་བའི་ཡངས་པའི་བར་མཐོངས་མཁོ་འདོན་བྱས་ཡོད། ལྷག་བསམ་ཟོལ་མེད་ཀྱི་སྤེལ་རེས་ཁྲོད། ཕྱོགས་གཉིས་པོའི་གཞོན་ནུ་ཕན་ཚུན་གྱི་བསམ་ཤེས་རྒྱུན་ཆད་མེད་པར་ཟབ་ཏུ་ཕྱིན་པ་དང་། ཨ་ཧྥེ་རི་ཁའི་གཞོན་ནུ་དེ་བས་མང་བས་ཀྲུང་གོར་ཡོང་ནས་སློབ་སྦྱོང་ཟབ་སྦྱོང་དང་འཇོན་ཐང་ཆེ་རུ་གཏོང་རྒྱུའི་གདམ་ག་བྱེད་པ་མ་ཟད། ཀྲུང་གོའི་གཞོན་ནུ་དེ་ལས་མང་པོས་ཨ་ཧྥེ་རི་ཁའི་སྐད་ཡིག་སྦྱོང་བ་དང་ཨ་ཧྥེ་རི་ཁའི་རིག་གནས་ལ་ཞིབ་འཇུག་བྱེད་བཞིན་ཡོད། ཁོང་ཚོ་ནི་ཤེས་བྱར་བརྩོན་པའི་ལམ་བུར་མཉམ་དུ་འབད་བརྩོན་བྱེད་མཁན་རེད་ལ། ལས་རིགས་ཁག་གི་སྣེ་ཁྲིད་ཤེས་ལྡན་པར་འཚར་ལོངས་འབྱུང་བཞིན་པའི་གཉིས་ཕན་གྱི་རོགས་ཟླ་ཡང་རེད། མཛའ་གྲོགས་འགྲོ་འོང་ཁྲོད་ཁོང་ཚོས་བསགས་པའི་ཉམས་མྱོང་དང་། བཙུགས་པའི་འབྲེལ་བ། ཆགས་པའི་མཛའ་གྲོགས་བཅས་ཀྱིས་འབྱུང་འགྱུར་ལོ་བཅུ་ཕྲག་ཁ་ཤས་ནང་ཨ་ཧྥེ་རི་ཁ་དང་ཀྲུང་གོའི་འབྲེལ་བའི་འཕེལ་ལམ་ལ་ཤུགས་རྐྱེན་གཏིང་ཟབ་ཐེབས་རྒྱུ་རེད།
མི་ཆོས་རིག་གནས་སྤེལ་རེས་ཀྱིས་ཤེས་དཔལ་ཕན་ཚུན་དཔྱད་གཞིར་འཛིན་པར་འབྲེལ་ཟམ་འཛུགས་པ་དང་ཨ་ཧྥེ་རི་ཁ་དང་ཀྲུང་གོས་ལག་གདང་སྦྲེལ་ནས་དེང་རབས་ཅན་མངོན་འགྱུར་བྱེད་པར་ཡུན་རིང་གི་གསོན་ཤུགས་སྣོན་རྒྱུར་ཕན་ཐོགས་ཡོད། མིག་སྔར། ཨ་ཧྥེ་རི་ཁ་དང་ཀྲུང་གོ་ཕྱོགས་གཉིས་པོ་དེང་རབས་ཅན་འཛུགས་སྐྲུན་ལ་སྐུལ་འདེད་གཏོང་བའི་འགག་རྩའི་དུས་མཚམས་སུ་གནས་ཡོད་པས། མཉམ་ལས་ཀྱི་གོ་སྐབས་ཆེན་པོ་ལྡན་ཡོད་ལ། ཐུན་མོང་གི་འགྲན་སློང་ཡང་མང་པོ་འཕྲད་པར་བརྟེན། ཕན་ཚུན་སློབ་སྦྱོང་དང་དཔྱད་གཞིར་འཛིན་པ་དང་ཤེས་བྱ་མཉམ་སྤྱོད་བྱས་ཏེ་འཕེལ་རྒྱས་ཀྱི་དཀའ་གནད་སེལ་བ་དང་འཕེལ་རྒྱས་ཀྱི་མཉམ་ཤུགས་གཅིག་སྒྲིལ་བྱེད་དགོས།
ད་ཆ་ཨ་ཧྥེ་རི་ཁ་དང་ཀྲུང་གོའི་དབར་གྱི་འབྲེལ་བ་དེ་རྒྱུན་ཆད་མེད་པར་སྣུར་སྲིང་ཐུབ་པའི་ལྕགས་ལམ་དང་རྒྱུན་མཐུད་ངང་འཕར་བའི་ཚོང་དོན་གྲངས་གཞིའི་ཐོག་ནས་མངོན་ཡོད་ལ། ཕྱོགས་གཉིས་ཀྱི་མི་དམངས་དབར་གྱི་བསམ་ཤེས་དང་། བརྩི་འཇོག མཛའ་གྲོགས་བཅས་ཀྱི་ཁྲོད་ནས་དེ་བས་མངོན་བཞིན་ཡོད། མི་ཆོས་རིག་གནས་ཀྱི་འབྲེལ་ཐག་དེ་དག་མཉམ་སྐྲུན་སློབ་ཁང་དང་། མཉམ་འབྲེལ་ཚོད་ལྟ་ཁང་། རིག་གནས་གར་སྟེགས་བཅས་ཀྱི་ཐོག་གཅིག་སྡུད་བྱས་ནས་གཞོམ་ཞིག་མེད་པའི་བརྩེ་སེམས་ཀྱི་འབྲེལ་ཐག་ཅིག་གྲུབ་སྟེ་ཨ་ཧྥེ་རི་ཁ་དང་ཀྲུང་གོའི་ཐུན་མོང་དར་རྒྱས་ཀྱི་མཛེས་སྡུག་ལྡན་པའི་འབྱུང་འགྱུར་ལ་འདེགས་སྐྱོར་བྱེད་བཞིན་ཡོད། དེར་བརྟེན། ཨ་ཧྥེ་རི་ཁ་དང་ཀྲུང་གོ་ཕྱོགས་གཉིས་པོས“ཨ་ཧྥེ་རི་ཁ་དང་ཀྲུང་གོའི་རིག་གནས་སྤེལ་རེས་ལོའི”འབྲེལ་ཡོད་བྱེད་སྒོ་ཡག་པོ་གཉེར་དགོས་ལ། ཨ་ཧྥེ་རི་ཁ་དང་ཀྲུང་གོའི་མི་ཆོས་རིག་གནས་སྤེལ་རེས་གཙོ་བོར་བྱེད་པའི་འབྲེལ་ཡོད་གླེང་མོལ་དེ་བས་ལམ་ལུགས་ཅན་དུ་འགྱུར་བ་བྱས་ཏེ་རི་ཀླུང་བརྒལ་བའི་མི་ཆོས་རིག་གནས་ཀྱི་འབྲེལ་ཐག་དུས་རབས་ནས་དུས་རབས་བར་རྒྱུན་མཐུད་ཐུབ་པར་བྱེད་དགོས།
(རྩོམ་པ་པོ་ནི་ཁེན་ནི་ཡའི་རྒྱལ་སྤྱིའི་གནད་དོན་གྱི་མཁས་དབང་ཡིན་པ)
འབྲེལ་ཡོད་གསར་འགྱུར།