མཚོ་སྔོན་ཉིན་རེའི་ཚགས་པར་ཐོག་གནས་ཚུལ་སྤེལ་བ་གཞིར་བཟུང་། སྤུས་ཚད་མཐོ་བའི་ལས་ཞུགས་གང་ལེགས་ཐུབ་པར་སྐུལ་འདེད་གཏོང་རྒྱུའི་སྐོར་གྱི་ཏང་ཀྲུང་དབྱང་དང་། རྒྱལ་སྲིད་སྤྱི་ཁྱབ་ཁང་། མཚོ་སྔོན་ཞིང་ཨུད་དང་ཞིང་ཆེན་སྲིད་གཞུང་བཅས་ཀྱི་ཐབས་ཇུས་བཀོད་སྒྲིག་ལག་བསྟར་གཏིང་ཟབ་དང་། ཞིང་ཆེན་ཡོངས་ཀྱི་དཔྱིད་གསར་ཚོགས་འདུ་ཐེངས་དང་པོའི་དགོངས་དོན་ཕྱོགས་ཡོངས་ནས་དོན་འཁྱོལ་བྱ་ཆེད། ཟླ་3ཚེས་1ཉིན། མཚོ་སྔོན་ཞིང་ཆེན་མི་སྤྱི་ཐིང་གིས་ཞིང་ཆེན་ཞིང་ལས་གྲོང་གསེབ་ཐིང་དང་། ཞིང་ཆེན་གྱི་དམག་ལོག་དམག་མིའི་ལས་དོན་ཐིང་། ཞིང་ཆེན་སྤྱི་ཁྱབ་བཟོ་ཚོགས་སོགས་སྡེ་ཚན་དང་མཉམ་དུ་ཟི་ལིང་གྲོང་ཁྱེར་དུ་2026ལོའི“དཔྱིད་རླུང་བྱ་སྤྱོད་དང་ལས་ཞུགས་རོགས་སྐྱོར་དུས་ཚིགས”ཀྱི་ཞིང་ཆེན་རིམ་པའི་ཆེད་དོན་ལས་བསྡུའི་འདུ་ཚོགས་འཚོགས་པ་རེད།

ད་ཐེངས་ཀྱི་བྱེད་སྒོས“དཔྱིད་རླུང་བྱ་སྤྱོད་ལ་བརྟེན་ནས་ལས་ཞུགས་ལ་སྐུལ་འདེད་གཏོང་། བརྩེ་སེམས་ཟབ་མོར་བརྟེན་ནས་དམངས་སེམས་དྲོ་བར་བྱེད”ཅེས་པ་བརྗོད་དོན་གཙོ་བོར་བྱེད་པ་དང་ཞིང་ཆེན་ཕྱི་ནང་གི་མི་སྤྱོད་ཚན་པ་800ལྷག་ཙམ་ཞུགས་རྒྱུའི་ཡིད་དབང་བཀུག་ནས་ལས་ཞུགས་ལས་གནས་ཁྲི་2.5མཁོ་འདོན་བྱས་པར་ལས་ཀ་འཚོལ་མཁན་ཁྲི་2.9ཙམ་ལས་ཞུགས་འདུ་ཚོགས་སུ་ཞུགས་པ་དང་ས་གནས་ས་ཐོག་ཏུ་ལས་ཞུགས་བྱེད་འདོད་ཡོད་པའི་མི་3800ལྷག་ཙམ་བྱུང་བ་རེད།

ཤེས་རྟོགས་བྱུང་བར་གཞིགས་ན། ད་ཐེངས་ཀྱི་ལས་བསྡུའི་འདུ་ཚོགས་ནི་ད་ལོ་མཚོ་སྔོན་ཞིང་ཆེན་གྱི“དཔྱིད་རླུང་བྱ་སྤྱོད་དང་ལས་ཞུགས་རོགས་སྐྱོར་དུས་ཚིགས”ཀྱི་རིམ་སྤེལ་བྱེད་སྒོའི་གཞི་ཁྱོན་ཆེ་ཤོས་ཀྱི་དྲ་ཕྱིའི་བྱེད་སྒོ་ཞིག་ཡིན་ཞིང་། “དཔྱིད་རླུང་བྱ་སྤྱོད་དང་ལས་ཞུགས་རོགས་སྐྱོར་དུས་ཚིགས”ཀྱི་ཆེད་དོན་བྱེད་སྒོ་སྤེལ་འགོ་ཚུགས་ཚུན། ཞིང་ཆེན་ཡོངས་ཀྱི་མི་སྤྱི་སྡེ་ཚན་གྱིས་ཞིང་འབྲོག་པ་དང་། མཐོ་སློབ་སློབ་ཐོན་སློབ་མ། ལས་ཞུགས་ལ་དཀའ་ངལ་ཡོད་པའི་མི་སྣ་སོགས་གཙོ་གནད་ཚོགས་སྤྱིར་དམིགས་ཏེ་ལས་ཞུགས་ཞབས་ཞུ་ཏན་ཏིག་བྱས་པ་རེད།