ཧུའུ་ནན་དང་བོད་ཀྱི་སློབ་མས་ཆ་སྒྲིག་ཞིབ་སློབ་བྱས་ཏེ།
མི་རིགས་མཐུན་སྒྲིལ་གྱི“མཐུན་ཆ་ཆེ་ཤོས”མཉམ་དུ་བཏོད་པ།
བོད་ལྗོངས་ཉིན་རེའི་ཚགས་པར་ཐོག་གནས་ཚུལ་སྤེལ་བར་གཞིགས་ན། ཉེ་ཆར། ཧུའུ་ནན་ཞིང་ཆེན་ཧྲའོ་ཧྲན་གྲོང་ཁྱེར་མའོ་ཙེ་ཏུང་ཐང་ཆེན་དུ་བྱིས་པའི་གླུ་སྒྲ་ལྷང་ལྷང་དུ་གྲགས་ཤིང་། ལྷོ་ཁ་གྲོང་ཁྱེར་སློབ་ཆུང་གསུམ་པའི་སློབ་མ་58ཀྱིས་རུ་སྟར་བསྒྲིགས་ནས་མའོ་ཙེ་ཏུང་གི་ཟངས་སྐུར་མེ་ཏོག་སི་ར་དང་མཇལ་དར་སྒྲོན་པ་མ་ཟད། ལང་ཚོའི་དམ་བཅའ་ཡང་བཞག་པ་རེད། འདི་ནི“ཧུའུ་ནན་དང་ལྷོ་ཁར་སྐལ་བཟང་མེ་ཏོག་བཞད”ཅེས་པའི་2026ལོའི་ཧུའུ་ནན་དང་བོད་ཀྱི་གཞོན་ནུ་ལོ་ཆུང་གི་དགུན་སྒར་བྱེད་སྒོའི་མི་སེམས་འགུལ་བའི་རྣམ་པ་ཞིག་རེད།
གངས་ལྗོངས་ས་མཐོའི་སློབ་མ་ཚོས་བློ་མཐུན་མའོ་ཙེ་ཏུང་གི་བཞུགས་གནས་རྙིང་པ་དང་། བློ་མཐུན་མའོ་ཙེ་ཏུང་གི་དྲན་གསོ་ཁང་། ལིའུ་ཧྲའོ་ཆིའི་བཞུགས་གནས་རྙིང་པ། ཕེང་ཏེ་ཧོའེ་ཡི་དྲན་གསོ་ཁང་། ཁྲང་ཧྲ་གཡོད་ལུའུ་དཔེ་ཁང་། ཧུའུ་ནན་ཧྭ་དབྱིན་རྒྱལ་སྲུང་སློབ་གསོའི་རྟེན་གཞི་སོགས་སུ་བསྐྱོད་དེ་ས་གནས་ས་ཐོག་ཏུ་ཞིབ་སློབ་བྱས་པ་བརྒྱུད། ཕུགས་བསམ་དད་སེམས་དང་ཁྱིམ་ཞེན་རྒྱལ་གཅེས་ཀྱི་བརྩེ་སེམས་ཚོར་བ་བྱས་པ་རེད། “ངས་གསར་བརྗེའི་སྔོན་གཤེགས་དཔའ་བོའི་འབད་འཐབ་ཀྱི་བསམ་བློར་སློབ་སྦྱོང་བྱེད་པ་དང་འབྲེལ་གསར་བརྗེའི་སྙིང་སྟོབས་རླབས་པོ་ཆེ་དེ་རིགས་རྒྱུན་འཛིན་བྱས་ནས་ནར་སོན་རྗེས་རྒྱལ་ཁབ་དང་སྤྱི་ཚོགས་ལ་ལེགས་སྐྱེས་འབུལ་མཁན་ཞིག་བྱེད་ཀྱི་ཡིན”ཞེས་ལྷོ་ཁ་གྲོང་ཁྱེར་སློབ་ཆུང་གསུམ་པའི་ལོ་རིམ་དྲུག་པའི་སློབ་མ་བསྟན་འཛིན་ཟླ་གསལ་གྱིས་བཤད།
འབྲེལ་ཡོད་གསར་འགྱུར།