2026ལོ་ནི“ལོ་ལྔ་ཚན་བཅོ་ལྔ་པའི”འཆར་འགོད་ཀྱི་འགོ་ཚུགས་ལོ་ཡིན་པས་ཀྲུང་གོ་མི་དམངས་དངུལ་ཁང་བོད་རང་སྐྱོང་ལྗོངས་ཉིང་ཁྲི་གྲོང་ཁྱེར་ཡན་ལག་དངུལ་ཁང་གིས་དངུལ་རྩའི་མ་དངུལ་གཏོང་ཤུགས་ལ་ཁྲིད་སྟོན་ཧུར་ཐག་བྱས་ནས་ལས་གྲྭ་གལ་ཆེན་དང་། ཐོན་ལས་སྐྱེད་སྲིང་། གྲོང་གསེབ་དར་རྒྱས། དམངས་འཚོ་ལེགས་གཏོང་བཅས་ཀྱི་ཐད་བཏང་ཡོད། ད་ལོའི་ཟླ་བ་དང་པོའི་ཟླ་མཇུག་བར། ཉིང་ཁྲི་གྲོང་ཁྱེར་གྱི་དངུལ་རྩའི་སྒྲིག་གཞིའི་རང་དངུལ་དང་ཕྱི་དངུལ་ཁག་གི་དངུལ་བུན་ལྷག་གྲངས་ཁག་སྒོར་དུང་ཕྱུར་700ལས་ཐོག་མར་བརྒལ་ནས་སྒོར་དུང་ཕྱུར་708.54ཟིན་ཏེ་དུས་མཚུངས་ལས་33.59%འཕར་ནས་ཉིང་ཁྲི་གྲོང་ཁྱེར་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་དངུལ་རྩའི་འདེགས་སྐྱོར་ཆེན་པོ་ཐུབ་ཡོད།

ནུས་རྒྱུ་གཙང་མ་སོགས་རྒྱལ་ཁབ་ཀྱི་འཐབ་ཇུས་གལ་ཆེའི་རྣམ་གྲངས་ལ་དམིགས་ནས། མི་དམངས་དངུལ་ཁང་ཉིང་ཁྲི་གྲོང་ཁྱེར་ཡན་ལག་དངུལ་ཁང་གིས་ཡིད་རྟོན་དངུལ་བུན་གྱི་ཐོན་ཁུངས་ཁྲིད་སྟོན་ཧུར་ཐག་བྱས་ནས་ཁེ་ལས་ཆེ་གྲས་དང་ཐོན་ལས་འཁོར་འབྲེལ་གྱི་ལྟེ་བའི་ལྷུ་ཚིགས་སུ་བཏང་སྟེ་རྣམ་གྲངས་འཛུགས་སྐྲུན་དང་ཐོན་ལས་སྔ་མ་དང་ཕྱི་མ་མཉམ་དུ་འཕེལ་རྒྱས་ལ་རྒྱབ་སྐྱོར་ནུས་ལྡན་བྱས་ཡོད། ཟླ་བ་དང་པོའི་ཟླ་མཇུག་བར། ཁེ་ལས་ཆེ་གྲས་ཀྱི་དངུལ་བུན་ལྷག་གྲངས་སྒོར་དུང་ཕྱུར་357.75ཟིན་ནས་དུས་མཚུངས་ལས་45.18%འཕར་ཏེ་ཉིང་ཁྲིས་རྒྱལ་ཁབ་ཀྱི་ནུས་རྒྱུ་གཙང་མའི་རྟེན་གཞི་གལ་ཆེན་དང་། ཚན་རྩལ་གསར་གཏོད་ཀྱི་མཐོ་ས། ཐོན་ལས་གསར་གཏོད་ཀྱི་མཐོ་ས་བཅས་མགྱོགས་མྱུར་བསྐྲུན་རྒྱུར་དངུལ་རྩའི་འདེགས་སྐྱོར་ནུས་ལྡན་བྱས་ཡོད།

དེ་དང་ཆབས་ཅིག ཟླ་བ་དང་པོའི་ཟླ་མཇུག་བར། ཉིང་ཁྲི་གྲོང་ཁྱེར་ཕྲན་ཚེགས་ཁེ་ལས་ཀྱི་དངུལ་བུན་ལྷག་གྲངས་སྒོར་དུང་ཕྱུར་140.79ཟིན་ནས་དུས་མཚུངས་ལས་35.62%འཕར་བ་དེ་དངུལ་བུན་ཁག་གི་ཆ་སྙོམས་འཕར་ཚད་ཀྱི་བརྒྱ་ཆའི་གྲངས་2.03ལས་མཐོ་བས་ཁྲོམ་རའི་གསོན་ཤུགས་ལ་སྐུལ་སྤེལ་ནུས་ལྡན་ཐུབ་ཡོད།

གྲོང་གསེབ་དར་རྒྱས་ཀྱི་འཐབ་ཇུས་ལ་སྐུལ་འདེད་གཏོང་བའི་ཐད་མི་དམངས་དངུལ་ཁང་ཉིང་ཁྲི་གྲོང་ཁྱེར་ཡན་ལག་དངུལ་ཁང་གིས་ཞིང་ལས་ཀྱི་ཁྱབ་ཁོངས་དང་འབྲེལ་བའི་ཡིད་རྟོན་དངུལ་བུན་གཏོང་ཤུགས་རྒྱུན་མཐུད་མཐོ་རུ་བཏང་ནས་ས་མཐོའི་ཁྱད་ལྡན་ཞིང་འབྲོག་ལས་དང་། ཞིང་འབྲོག་ཁུལ་གྱི་རྨང་གཞིའི་སྒྲིག་བཀོད་འཛུགས་སྐྲུན། ཞིང་འབྲོག་པའི་ཐོན་སྐྱེད་དང་འཚོ་བ་ལེགས་སུ་གཏོང་བ་བཅས་ལ་གཙོ་གནད་ཐོག་རྒྱབ་སྐྱོར་བྱས་ཡོད། ཟླ་བ་དང་པོའི་ཟླ་མཇུག་བར། གྲོང་ཁྱེར་ཡོངས་ཀྱི་ཞིང་ལས་དང་འབྲེལ་བའི་དངུལ་བུན་ལྷག་གྲངས་སྒོར་དུང་ཕྱུར་138.24ཟིན་ནས་དུས་མཚུངས་ལས་སྒོར་དུང་ཕྱུར་29.74འཕར་ཏེ་འཕར་ཚད་27.41%ཟིན་ཡོད། དངུལ་རྩའི་མ་དངུལ་གཏོང་ཤུགས་རྒྱུན་མཐུད་ཆེ་རུ་བཏང་བས་ཉིང་ཁྲི་གྲོང་ཁྱེར་གྱིས་གྲོང་ཁྱེར་དང་གྲོང་གསེབ་ཀྱི་མཉམ་འདྲེས་འཕེལ་རྒྱས་ལ་སྐུལ་འདེད་གཏོང་བ་དང་གནས་འཕྲོད་ལས་འཚམ་དང་མཛེས་མཐུན་གསུམ་ལྡན་གྱི་གྲོང་གསེབ་འཛུགས་སྐྲུན་བྱེད་པར་རྒྱུན་ཆད་མེད་པར་སྒུལ་ཤུགས་བསྣན་ཡོད།