“བསྐུར་གླ་མཐོ་བ”དང“བསྐུར་གླ་སྤྲོད་དགོས་པ”ནི་བོད་ཀྱི་ལས་བྱེད་པ་དང་མང་ཚོགས་ཀྱི་སེམས་ནད་ཅིག་རེད།

དམངས་ལ་རེ་འབོད་ཡོད་ཚེ་ང་ཡིས་བརྡ་ལན་ཞུ། 2025ལོའི་ཟླ་3པར་རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མི་དང་ཉིང་ཁྲི་གྲོང་ཁྱེར་མེ་ཏོག་རྫོང་མེ་ཏོག་གྲོང་རྡལ་མེ་ཏོག་གྲོང་ཚོ་ཨུ་ལྷན་གྱི་ཀྲུའུ་རེན་གཞོན་པ་ནོར་བུ་གཡང་འཛོམས་ཀྱིས“བོད་ཀྱི་དྲ་ཉོའི་བསྐུར་གླ་མཐོ་བའི་གནད་དོན་མཐུན་སྦྱོར་ཐག་གཅོད་བྱེད་པའི”གྲོས་འགོ་རྒྱལ་ཡོངས་ཚོགས་འདུ་གཉིས་ལ་བཏོན་པ་རེད།

བོད་ཀྱི་མང་ཚོགས་ཀྱི་བསམ་འདུན་མཚོན་པའི་གྲོས་འགོ་དེ་དམངས་གཙོའི་གོ་རིམ་ལྟར་ཐབས་ཇུས་འགོད་པའི་ཁོངས་སུ་ཚུད་ནས་འབྲེལ་ཡོད་སྲིད་ཇུས་རབ་དང་རིམ་པ་འདོན་པར་སྐུལ་མ་ཐེབས་ཏེ། “བོད་དུ་བསྐུར་གླ་སྤྲོད་མི་དགོས་པ”མངོན་འགྱུར་ཡོང་བཞིན་ཡོད་པ་ལས་བརྒྱུད་རིམ་ཧྲིལ་པོའི་མི་དམངས་དམངས་གཙོའི་གསོན་ཤུགས་ཆེན་པོ་ཚོར་ཐུབ།

མང་ཚོགས་ཀྱི་རེ་ཞུ་ནས་འཐུས་མིའི་གྲོས་འགོའི་བར།

2013ལོར་ཁྲབ་རྨོག་ནས་མེ་ཏོག་བར་གྱི་གཞུང་ལམ་བསྐྲུན་ནས་རླངས་འཁོར་ཤར་གཏོང་ཐུབ་པ་ལས་མེ་ཏོག་འདི་ཉིད་རྒྱལ་ཡོངས་ཀྱི་གཞུང་ལམ་ཤར་གཏོང་ཐུབ་པའི་རྫོང་གྲོང་མཇུག་ཤོས་དེར་གྱུར་ཡོད།

མེ་ཏོག་བས“ལམ”ལ་དམིགས་བསལ་གྱི་རེ་སྒུག་བྱེད་ཀྱི་ཡོད།

“ཞིང་འབྲོག་ཁུལ་དུ་སྦྲག་སྲིད་ཀྱི་བསྐུར་མ་ཁོ་ན་ལས་སྐྱེལ་ཐུབ་ཀྱི་མེད་པ་དང་མྱུར་སྐྱེལ་བསྐུར་མ་གཞན་དག་ཚང་མ་རྫོང་དུ་ལེན་པར་འགྲོ་དགོས་པས་ཧ་ཅང་སྟབས་བདེ་པོ་མེད་པ”དང་། “མྱུར་སྐྱེལ་བསྐུར་མ་སྐྱེལ་བའི་དུས་ཡུན་རིང་བ” “བསྐུར་གླ་སྒོར་བཅུ་ཕྲག་ཁ་ཤས་སྤྲོད་དགོས་པ་དང་ཐ་ན་ཚོང་ཟོག་ཁག་གཅིག་ལ་བསྐུར་གླ་སྒོར་999ཞེས་བྲིས་ཡོད་པ་དང་དོན་དངོས་ཐོག་ཚོང་ཟོག་དེ་རིགས་བོད་ལ་བསྐུར་གྱི་མེད”ཅེས་པ་ལ་སོགས་མེ་ཏོག་རྫོང་གི་ཤང་དང་གྲོང་ཚོ་ཁག་ཏུ་བཅར་འདྲི་དང་བརྟག་ཞིབ་བྱེད་པར་སྐྱོད་སྐབས་ནོར་བུ་གཡང་འཛོམས་ཀྱིས་གཞི་རིམ་གྱི་ཞིང་འབྲོག་མང་ཚོགས་ཀྱི་བསམ་འདུན་རེ་རེ་བཞིན་ཟིན་ཐོར་བཀོད་ཡོད་ལ་སེམས་ལའང་བརྟན་པོར་ངེས་ཡོད།

ཐག་རིང་ལུང་ཁུག་ཏུ་གནས་པ་དང་ས་རྒྱ་ཆེ་ལ་མི་འབོར་ཉུང་བ་སོགས་ཀྱི་རང་བྱུང་རྒྱུ་རྐྱེན་དང་' དཔལ་འབྱོར་འཕེལ་རྒྱས་ཀྱི་ཆུ་ཚད་བལྟོས་བཅས་ཀྱིས་རྗེས་སུ་ལུས་པ། ཟོག་འགྲུལ་སོགས་རྨང་གཞིའི་སྒྲིག་བཀོད་འཐུས་སྒོ་མི་ཚང་བ་སོགས་སྤྱི་ཚོགས་ཀྱི་རྒྱུ་རྐྱེན་ལས་དུས་ཡུན་རིང་པོའི་ནང་བོད་ཀྱི་ཟོག་འགྲུལ་བསྐུར་གླ་མཐོ་པོ་ཡོད། ཟོག་འགྲུལ་གྱི་རྨང་གཞིའི་སྒྲིག་བཀོད་གསར་བརྗེས་དང་ཟོག་འགྲུལ་གྱི་མ་གནས་དམའ་རུ་གཏོང་རྒྱུ་ནི་བོད་ཀྱི་མི་རིགས་ཁག་གི་མི་དམངས་ཀྱི་ཐུན་མོང་གི་བསམ་འདུན་ཡིན།

མི་དམངས་མང་ཚོགས་ཀྱི་ཟོལ་མེད་ཀྱི་འབོད་སྒྲ་མཚོན་པ་དང་བརྩེ་སེམས་ཟབ་མོས་མང་ཚོགས་ཀྱི་འཕྲལ་མཁོ་དང་། དཀའ་ངལ། སེམས་ཁྲལ། རེ་སྒུག་བཅས་ཐག་གཅོད་ཡག་པོ་བྱ་རྒྱུ་ནི་མི་དམངས་འཐུས་ཚོགས་ཀྱི་འཐུས་མིའི་འགན་འཁྲི་གལ་ཆེན་ཞིག་རེད། ནོར་བུ་གཡང་འཛོམས་ཀྱིས་བསྡུ་རུབ་བྱས་པའི་བསམ་འཆར་དག་མྱུར་སྐྱེལ་ཞབས་ཞུ་བོད་ཀྱི་ཐག་རིང་ལུང་ཁུག་གི་ཞིང་འབྲོག་ཁུལ་དུ་སྣུར་སྲིང་བྱེད་པར་སྐུལ་འདེད་གཏོང་བའི་གྲོས་འགོར་ལེགས་སྒྲིག་བྱས་པ་དང་། མཐའ་མཚམས་ས་ཁུལ་གྱི་གཞི་རིམ་མང་ཚོགས་ཀྱི་ཟོལ་མེད་ཀྱི་རེ་འདུན་དེ་རྒྱལ་ཡོངས་ཚོགས་འདུ་གཉིས་ལ་བཏོན་པ་རེད།

“ཤོག་ཐོག་གི་གྲོས་འགོ”ནས“མང་འདུས་སྲིད་ཇུས”བར།

གྲོས་འགོ་འབྱོར་རྗེས་རྒྱལ་ཡོངས་མི་དམངས་འཐུས་ཚོགས་རྒྱུན་ལས་ཨུ་ལྷན་གྱིས་ཞིབ་འཇུག་བྱས་པ་བརྒྱུད་རྒྱལ་ཁབ་སྦྲག་སྲིད་ཅུས་ལ་སྒྲུབ་རྒྱུར་བརྒྱུད་སྤྲོད་བྱས་པ་རེད།

འཐུས་མིའི་གྲོས་འགོ་སྒྲུབ་པ་ནི་གནད་དོན་ཐག་གཅོད་བྱེད་པ་དང་། ལས་དོན་ལེགས་སུ་གཏོང་བ། འཕེལ་རྒྱས་ལ་སྐུལ་འདེད་གཏོང་བ་བཅས་ཀྱི་བརྒྱུད་རིམ་ཞིག་ཡིན། རྒྱལ་ཁབ་སྦྲག་སྲིད་ཅུས་ཀྱིས“མྱུར་སྐྱེལ་ཆུང་ཆུང་གིས་དམངས་འཚོ་ཆེན་པོར་ཞབས་འདེགས་ཞུ་བའི”ནུས་པ་གལ་ཆེན་ལ་ཚད་མཐོའི་མཐོང་ཆེན་བྱས་ཏེ། འཐུས་མིའི་གྲོས་འགོར་དམིགས་ནས་བརྟག་དཔྱད་ཞིབ་འཇུག་རྒྱ་ཁྱབ་བྱས་པ་དང་འབྲེལ་ནོར་སྲིད་པུའུ་དང་། རྒྱལ་ཁབ་ཁྲལ་དོན་སྤྱི་ཁྱབ་ཅུས། ཚོང་དོན་པུའུ་བཅས་དང་མཉམ་དུ་གྲོས་བསྡུར་བྱས་ནས་སྒྲུབ་གཉེར་བསམ་འཆར་བཏོན་པ་རེད།

“ང་ལ་ལན་མགྱོགས་པོ་འབྱོར་བྱུང་ལ། འབྲེལ་ཡོད་སྡེ་ཚན་གྱིས་ཀྱང་མཉམ་དུ་བྱ་སྤྱོད་སྤེལ་ནས་བོད་ཀྱི་སྐུར་སྐྱེལ་ཟོག་འགྲེམས་ཐོན་ལས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་རྒྱུ་རེད”ཅེས་ནོར་བུ་གཡང་འཛོམས་ཀྱིས་གསར་འགོད་པར་གསུངས།

དོན་དངོས་ཀྱང་དེ་རང་ཡིན་ཞིང་། ན་ནིང་རྒྱལ་ཡོངས་ཀྱི་ཚོགས་འདུ་གཉིས་གྲོལ་ནས་ཟླ་བ་གསུམ་ལས་མ་སོང་ཡང་འབྲེལ་ཡོད་གནད་དོན་ཐག་གཅོད་བྱེད་པར་སྐུལ་འདེད་གཏོང་བའི་བྱ་སྤྱོད་དང་པོ་དེ་དངོས་སུ་ལག་ལེན་བསྟར་བ་རེད།

བོད་རང་སྐྱོང་ལྗོངས་མི་དམངས་སྲིད་གཞུང་གི་གསར་འགྱུར་གཞུང་ལས་ཁང་དུ་འཚོགས་པའི་ཡོངས་བསྒྲགས་ཚོགས་འདུ་ནས་ནོར་བུ་གཡང་འཛོམས་ལ་སླར་ཡང་གཏམ་བཟང་ཞིག་ཐོས་པ་སྟེ། 2025ལོའི་དམངས་འཚོའི་དོན་དངོས་28ཀྱི་རྨང་གཞིའི་ཐོག་ལོ་དེའི་ཟླ་8པ་ནས་བཟུང་དམངས་འཚོའི་དོན་དངོས་10རྗེས་སྣོན་ལག་ལེན་བསྟར་བ་དེའི་ནང་བསྐུར་གླའི་ཞིང་ཕན་ཁ་གསབ་ལམ་སྲོལ་བཙུགས་ནས། གཞི་རིམ་གྱི་སྐུར་སྐྱེལ་ཟོག་འགྲེམས་མ་ལག་འཛུགས་སྐྱོང་དང་རྒྱ་ཆེའི་ཞིང་འབྲོག་མང་ཚོགས་ཀྱི་བསྐུར་གླའི་ཁ་གསབ་སྤྲོད་རྒྱུ་ཚུད་ཡོད་པ་རེད།

2026ལོའི་ཟླ་2པར། བོད་རང་སྐྱོང་ལྗོངས་སྲིད་གཞུང་གི་ལས་དོན་སྙན་སྒྲོན་ནང“རྫོང་རིམ་པའི་སྐུར་སྐྱེལ་ཟོག་འགྲེམས་ལྟེ་གནས་60དང་གྲོང་ཚོ་རིམ་པའི་ཞབས་ཞུའི་ས་ཚིགས་4000རིམ་སྤོར་སྒྱུར་བཀོད་བྱས་ཏེ‘བོད་དུ་བསྐུར་གླ་སྤྲོད་མི་དགོས་པ’དེ་བས་ཁྱབ་ཆེ་རུ་གཏོང་དགོས་པ”ཁ་གསལ་བཏོན་ཡོད།

“ཤོག་ཐོག་གི་གྲོས་འགོ”ནས“མང་འདུས་སྲིད་ཇུས”བར་ནི་གངས་ལྗོངས་ས་མཐོར་བརྒྱུད་རིམ་ཧྲིལ་པོའི་མི་དམངས་དམངས་གཙོ་གསོན་ཉམས་དོད་པོས་ལག་ལེན་བསྟར་བ་ཞིག་ཡིན་ལ། དེ་ལས་བརྒྱུད་རིམ་ཧྲིལ་པོའི་མི་དམངས་དམངས་གཙོའི་གསོན་ཤུགས་ཆེན་པོ་དེ་བས་མངོན་ཡོད།

དམངས་གཙོ་ནི་གནད་དོན་ཐག་གཅོད་བྱེད་པར་སྤྱོད་རྒྱུ་ཡིན།

ཚོར་ཐུབ་པ་དང་ཕན་པ་ཐོབ་ཐུབ་པ་དེ་ཉིང་ཁྲིར་ལས་ཀ་བྱེད་མཁན་ཧོང་ཧའེ་ཧྥེན་གྱི་ལུས་ཐོག་ནས་མངོན་པ་སྟེ“ད་ཆ་ཚོང་ཟོག་མང་པོ་ཞིག་ལ་བསྐུར་གླ་སྤྲོད་དགོས་ཀྱི་མེད་ལ། གལ་ཏེ་སྤྲོད་དགོས་ཀྱང་མང་ཆེ་བ་སྒོར་ལྔ་དྲུག་ཙམ་རེད”ཅེས་བཤད།

གངས་ལྗོངས་ཀྱི་གྲོང་གསེབ་ཁུལ་དུ་འགྲོ་འོང་བྱེད་མཁན་གྱི་མྱུར་སྐྱེལ་རླངས་འཁོར་ནི་ཞིང་འབྲོག་པས་མཛེས་སྡུག་ལྡན་པའི་འཚོ་བར་བཅངས་པའི་རེ་སྒུག་ཅིག་ཡིན་ཞིང་། དེས་ཐག་རིང་གི་གྲོང་གསེབ་དང་ཕྱི་རོལ་དབར་གྱི་འབྲེལ་བ་དེ་བས་ཟབ་ཏུ་བཏང་ཡོད།

ཁང་པའི་ཐིགས་པ་སྡོད་མིས་ཤེས། སྲིད་ཀྱི་འཇིག་རྟེན་འབངས་ཀྱིས་ཤེས། མི་དམངས་འཐུས་ཚོགས་ཀྱི་འཐུས་མི་རྒྱལ་ཁབ་ཀྱི་ལས་དོན་དོ་དམ་ལ་ཞུགས་ནས་མི་དམངས་རང་ཁྱིམ་རང་བདག་ཡོང་བར་བློས་འགེལ་ཆོག་པའི་འགན་ལེན་མཁོ་འདོན་བྱེད་ཀྱི་ཡོད།

2025ལོའི་ལོ་མཇུག་བར། ལྗོངས་ཡོངས་སུ་རིམ་རྩིས་བརྒྱབ་ན་སྦྲག་སྲིད་མྱུར་སྐྱེལ་ས་ཚིགས་1324བསྐྲུན་པ་དང་། གྲོང་ཚོ་རིམ་པའི་སྐུར་སྐྱེལ་ཟོག་འགྲེམས་ཕྱོགས་བསྡུས་ཞབས་ཞུའི་ས་ཚིགས་2410ཕྱོགས་སྒྱུར་རིམ་སྤོར་བྱས་ཏེ་སྒྲིག་ཚུད་གྲོང་ཚོར་མྱུར་སྐྱེལ་ཞབས་ཞུ་ཤར་གཏོང་ཐུབ་ཚད་100%ཟིན་ཡོད་པ་རེད།

གྲོས་འགོ་ཕུལ་བ་དང་སྒྲུབ་གཉེར་ལ་སྐུལ་འདེད་བཏང་ནས། དཀའ་གནད་དང་འགག་གནད་རེ་རེ་བཞིན་ཐག་གཅོད་བྱས་ཏེ“སྦྲག་ཐོག་ལ་སྐྱེལ་བ”དང“སྦྲག་མྱུར”མཉམ་འདྲེས་མགྱོགས་སུ་བཏང་བས། གསོན་ཉམས་དོད་པའི་བརྒྱུད་རིམ་དེ་ལས་གནས་ལུགས་ཤིག་ར་སྤྲོད་ནུས་ལྡན་ཐུབ་པ་སྟེ། དམངས་གཙོ་ནི་གནད་དོན་ཐག་གཅོད་བྱེད་པར་སྤྱོད་དགོས་པ་དེ་རེད།

“ད་ལྟའི་འགྱུར་ལྡོག་ནི་མིག་མཐོང་ལག་ཟིན་ཐུབ་པ་ཞིག་རེད”ཅེས་ནོར་བུ་གཡང་འཛོམས་ཀྱིས་གསུངས་པ་དང་། ཁོང་གིས། མི་དམངས་ཀྱིས་ང་འཐུས་མིར་བདམས་ཡོད་པས། ངས་འཐུས་མི་ཞིག་བྱས་ཏེ་དམངས་ཆེད་ལས་དོན་སྒྲུབ་ཀྱི་ཡིན། སླད་ཕྱིན་ལས་འགན་སྒྲུབ་རིང་མང་ཚོགས་ཀྱི་བསམ་འདུན་མུ་མཐུད་ཉན་ནས་དམངས་འཚོའི་དཀའ་གནད་ཐག་གཅོད་བྱ་རྒྱུར་སྐུལ་འདེད་བཏང་སྟེ། ཏང་དང་སྲིད་གཞུང་དང་མང་ཚོགས་དབར་གྱི“སེམས་སྦྲེལ་ཟམ་པ”ཡག་པོ་ཞིག་བྱེད་ཀྱི་ཡིན་ཞེས་གསུངས་པ་རེད།