ཉེ་ཆར། གསར་འགོད་པར་རང་སྐྱོང་ལྗོངས་སྨན་རྫས་ལྟ་འདོམས་ཅུས་ནས་ཤེས་རྟོགས་བྱུང་བར། “ལོ་ལྔ་ཚན་བཅུ་བཞི་པའི”རིང་། རང་ལྗོངས་ཀྱི་སྨན་རྫས་ལྟ་འདོམས་ལས་དོན་ལ་གྲུབ་འབྲས་མངོན་གསལ་དོད་པོ་ཐོབ་ནས་བོད་སྨན་གྱི་རྒྱལ་ཁབ་ཀྱི་ཚད་གཞི་དང་། གསར་གཏོད་སྨན་རྫས། བོད་སྨན་གྱི་ཆ་བྱད། ཁྱད་ལྡན་མཛེས་རྫས་ཀྱི་རྒྱུ་ཆ་གསར་པ་སོགས་ཀྱི་ཐད་ཚད་བརྒལ་མང་པོ་བྱུང་སྟེ། མི་དམངས་མང་ཚོགས་ཀྱི་སྨན་སྤྱོད་བདེ་འཇགས་སྲུང་སྐྱོང་ནུས་ལྡན་ཐུབ་པ་དང་སྨན་རྫས་ཐོན་ལས་སྤུས་ཚད་མཐོ་བའི་འཕེལ་རྒྱས་ལ་སྐུལ་མ་ཐེབས་ཡོད།

ཤེས་རྟོགས་བྱུང་བར་གཞིགས་ན། “ལོ་ལྔ་ཚན་བཅུ་བཞི་པ”ཚུན་དུ་ལྗོངས་ཡོངས་ཀྱི་སྨན་རྫས་ལྟ་འདོམས་སྡེ་ཚན་གྱིས་སྨན་རྫས་བདེ་འཇགས་ཀྱི་ཏང་སྲིད་འགན་འཁྲི་གཅིག་མཚུངས་དང་། ཁེ་ལས་ཀྱི་འགན་འཁྲི་གཙོ་བོ་དང་ལྟ་འདོམས་འགན་འཁྲི་རྒྱུན་མཐུད་ནན་དུ་བཏང་ནས། འཁོར་འབྲེལ་ཧྲིལ་པོའི་སྤུས་ཚད་དོ་དམ་མ་ལག་འཐུས་སྒོ་ཚང་དུ་བཏང་བ་དང་ཁྱབ་ཁོངས་ཧྲིལ་པོའི་ལྟ་འདོམས་ལ་ཤུགས་སྣོན་བརྒྱབ་པ་རེད། ཉེན་ཁ་སྔོན་འགོག་དང་ཚོད་འཛིན་ཐད། ལྗོངས་ཡོངས་ཀྱི་སྨན་རྫས་བདེ་འཇགས་ཉེན་ཁའི་ཉེན་གཏོང་ཚོགས་འདུ་ཐེངས་ལྔ་པ་འཚོགས་ནས་ཉེན་ཁའི་བརྡ་རྟགས་37ཐག་གཅོད་བྱས་ཏེ་གདུབ་ཟུམ་དོ་དམ་མངོན་འགྱུར་བྱུང་ནས་བདེ་འཇགས་ཀྱི་མངོན་མེད་རྐྱེན་ངན་མེད་པར་གྱུར་ཡོད། ལོ་ཧྲིལ་པོར་སྨན་རྫས་གཉེར་སྐྱོང་བེད་སྤྱོད་ཚན་པ་ཐེངས་ཁྲི་1.3ལ་ཞིབ་བཤེར་བྱས་པ་དང་། གྱོད་གཞི་ཁག་99ཞིབ་བཤེར་ཐག་གཅོད་བྱས་པ། དངུལ་ཆད་དང་གཞུང་བཞེས་སྒོར་ཁྲི་410.8བཏང་བ་བཅས་ལས་སྨན་རྫས་ཁྲོམ་རའི་ཁོར་ཡུག་གཙང་དུ་ནུས་ལྡན་ཕྱིན་ཡོད་པ་རེད།

སྨན་རྫས་ཐོན་ལས་ཀྱི་སྤུས་འབྲས་ལེགས་གཉེར་ལ་སྐུལ་འདེད་གཏོང་བའི་ཐད། རང་ལྗོངས་ཀྱིས“བོད་སྨན་ཚད་གཞིའི་ལོ་གསུམ་བྱ་སྤྱོད་འཆར་གཞི་ཁག་གཉིས་པ”སྔ་སྣུར་དུ་ལེགས་གྲུབ་བྱུང་བ་དང་། བོད་སྨན་གྱི་སྨན་རྒྱུ་དང་བོད་སྨན་གྱི་སྨན་རྫས་ལས་སྣོན་ཚད་གཞི་97ཁྱབ་བསྒྲགས་ལག་བསྟར་བྱས་པ། བོད་སྨན་གྱི་སྨན་རྒྱུའི་དཔེ་བསྡུར་ཐོན་རྫས་4ཁྱབ་བསྒྲགས་བྱས་ཏེ་ཚད་ལྡན་འཛུགས་སྐྲུན་ལ་བརྟེན་ནས་ཐོན་ལས་འཕེལ་རྒྱས་ལ་སྣེ་ཁྲིད་བྱས་པ་རེད། བོད་སྨན་གྱི་སྨན་རྒྱུ་ཐོན་ཁུལ་ལ་ལས་སྣོན་གྱི་མཛུབ་ཁྲིད་བསམ་འཆར་བཏོན་ནས་བོད་སྨན་གྱི་སྨན་རྩ་འདེབས་འཛུགས་རྟེན་གཞི་ཚད་ལྡན་འཛུགས་སྐྲུན་དང་འདེབས་འཛུགས་དུད་ཚང་གི་ཡོང་འབབ་འཕར་བར་སྐུལ་ཁྲིད་བྱས་ནས་འཕེལ་རྒྱས་ཀྱི་གྲུབ་འབྲས་ཀྱིས་མང་ཚོགས་དེ་བས་མང་བར་ཕན་པ་ཐོབ་པར་བྱས་ཡོད།

ལྟ་འདོམས་ནུས་པ་རྒྱུན་མཐུད་ཆེ་རུ་ཕྱིན་པ་དང་བསྟུན་ནས་རང་ལྗོངས་ཀྱི་སྨན་རྫས་ཞིབ་བཤེར་དང་ཞིབ་དཔྱད་ཚད་ལེན་དང་རིག་ནུས་ལྟ་འདོམས་ཀྱི་རྨང་གཞི་རྒྱུན་ཆད་མེད་པར་སྲ་བརྟན་དུ་ཕྱིན་ཡོད། སྨན་རྫས་གྲངས་རིག་ལྟ་འདོམས་ལས་སྟེགས་བསྐྲུན་ནས་བཀོལ་སྤྱོད་བྱེད་འགོ་ཚུགས་ཏེ་གྲངས་གཞི་ཐག་གཅོད་བྱེད་ནུས་70%ཆེ་རུ་ཕྱིན་པ་དང་། ཆ་རྡུལ་སྐྱེ་དངོས་རིག་པའི་ཚོད་ལྟ་ཁང་འཁོར་སྐྱོད་བྱེད་འགོ་ཚུགས་པས“རྫས་གཉིས་འཕྲུལ་གཅིག”གི་ཞིབ་བཤེར་དགོས་མཁོ་གཞི་རྩའི་ཆ་ནས་སྐོང་ཐུབ་ཡོད། དབྱར་རྩྭ་དགུན་འབུའི་རིག་ནུས་མྱུར་ཞིབ་ཡོ་ཆས་ཞིབ་འཇུག་དང་གསར་བཟོ་ཐུབ་ནས་ཡང་དག་ཡོང་ཚད་95%ཡན་ཟིན་ཏེ་གནད་ལ་སྨིན་པ་དང་ལས་ཆོད་ཆེ་བའི་ལྟ་འདོམས་བྱེད་པར་ལག་རྩལ་གྱི་འདེགས་སྐྱོར་བརྟན་པོ་ཐུབ་ཡོད་པ་རེད།