མིག་སྔར། གོ་ལ་ཧྲིལ་པོའི་བཅོས་སྐྱོང་ལས་དོན་དེ་ལམ་མདོ་གསར་པ་ཞིག་ཏུ་གནས་ཡོད་པ་དང་། རྒྱལ་སྤྱིའི་འགྲོ་བ་མིའི་ཐོབ་ཐང་བྱ་གཞག་ལ་འགྲན་སློང་དྲག་པོ་འཕྲད་བཞིན་ཡོད། ཆར་རླུང་ཇི་ཙམ་འཚུབ་ན་འཛམ་གླིང་ལ་དེ་ཙམ་གྱིས་དངོས་ཡོད་དང་། དྲང་གཞག ལུགས་མཐུན་བཅས་ཀྱི་སྐད་སྒྲ་སྒྲོག་དགོས། ད་ལྟ་ཚོགས་བཞིན་པའི་མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ལས་འཛིན་ལྷན་ཚོགས་སྐབས་རེ་གཅིག་པའི་ཚོགས་འདུའི་ཐོག་ཀྲུང་གོ་ཕྱོགས་ཀྱིས་གོ་ལ་ཧྲིལ་པོའི་བཅོས་སྐྱོང་གྲོས་འགོའི་འགྲོ་བ་མིའི་ཐོབ་ཐང་གི་ནང་དོན་ལ་རྒྱས་བཤད་གཏིང་ཟབ་བྱས་པ་དང་། ཕྱོགས་མང་རིང་ལུགས་ཀྱི་ཁས་ལེན་བརྟན་པོ་བསྐྱར་བསྒྲགས་བྱས་ཏེ། གོ་ལ་ཧྲིལ་པོའི་འགྲོ་བ་མིའི་ཐོབ་ཐང་གི་བཅོས་སྐྱོང་མ་ལག་སྒྱུར་བཅོས་དང་འཐུས་སྒོ་ཚང་དུ་གཏོང་བར་ཀྲུང་གོའི་ཇུས་གཞི་གསལ་པོ་མཁོ་འདོན་བྱས་ཡོད།

ད་ལོ་ནི་འགྲོ་བ་མིའི་ཐོབ་ཐང་ལས་འཛིན་ལྷན་ཚོགས་བཙུགས་ནས་ལོ་ངོ་20འཁོར་བའི་ལོ་ཞིག་ཡིན་ལ། 《འཕེལ་རྒྱས་ཀྱི་ཁེ་དབང་བསྒྲགས་གཏམ》ལ་གྲོས་འཆམ་བྱུང་ནས་ལོ་ངོ་40འཁོར་བའི་ལོ་ཞིག་ཀྱང་ཡིན། ཀྲུང་གོ་ཕྱོགས་ཀྱིས་བཏོན་པའི་གོ་ལ་ཧྲིལ་པོའི་བཅོས་སྐྱོང་གྲོས་འགོར་མི་ཆོས་རིག་གནས་ཀྱི་སེམས་ཁུར་ཟབ་མོ་དང་འགྲོ་བ་མིའི་ཐོབ་ཐང་གི་ནང་དོན་ཕུན་སུམ་ཚོགས་པོ་འདུས་ཡོད་པས་རྒྱལ་སྤྱིའི་འགྲོ་བ་མིའི་ཐོབ་ཐང་བྱ་གཞག་ལ་འཕྲད་པའི་དཀའ་ངལ་སེལ་རྒྱུར་དོན་སྙིང་གལ་ཆེན་ལྡན་ཡོད། གྲོས་འགོ་བཏོན་པ་ནས་བཟུང་རྒྱལ་ཁབ་དང་རྒྱལ་སྤྱིའི་རྩ་འཛུགས་150ལྷག་ཙམ་གྱི་རྒྱབ་སྐྱོར་ཐོབ་པ་དང་། “གོ་ལ་ཧྲིལ་པོའི་བཅོས་སྐྱོང་མཛའ་གྲོགས་ཚོགས་ཆུང”དངོས་སུ་བཙུགས་པ་དང་བསྟུན་ནས་གྲོས་འགོ་དོན་འཁྱོལ་བརྟན་པོ་ཐུབ་ཡོད། གོ་ལ་ཧྲིལ་པོའི་བཅོས་སྐྱོང་གྲོས་འགོ་དོན་འཁྱོལ་བྱ་རྒྱུ་གོ་སྐབས་སུ་བཟུང་ནས་གོ་ལ་ཧྲིལ་པོའི་བཅོས་སྐྱོང་མ་ལག་སྒྱུར་བཅོས་དང་འཛུགས་སྐྱོང་ལ་གྲུབ་འབྲས་གསར་པ་ཐོབ་པར་སྐུལ་འདེད་བཏང་ཚེ་གོ་ལ་ཧྲིལ་པོའི་འགྲོ་བ་མིའི་ཐོབ་ཐང་བཅོས་སྐྱོང་དེ་ཉིད་དེ་བས་དྲང་གཞག་དང་། ནུས་ལྡན། བསྟུན་མཁས་བཅས་ཀྱི་འབྱུང་འགྱུར་ཕྱོགས་སུ་སྐྱོད་པར་ཕན་ཐོགས་ཡོད།

རྒྱལ་སྤྱིའི་འགྲོ་བ་མིའི་ཐོབ་ཐང་བྱ་གཞག་འཕེལ་རྒྱས་ཡག་པོ་ཡོང་བར་སྐུལ་འདེད་གཏོང་བར་ཚན་རིག་དང་མཐུན་ཞིང་ཁ་གསལ་བའི་འདུ་ཤེས་ཀྱི་ཁྲིད་སྟོན་དང་ལག་ལེན་གྱི་འཆར་འགོད་འདིང་དགོས། སྐབས་འདིའི་ཚོགས་འདུའི་རིང་། ཀྲུང་གོ་ཕྱོགས་ཀྱིས་གོ་ལ་ཧྲིལ་པོའི་བཅོས་སྐྱོང་གྲོས་འགོའི་ལྟེ་བའི་འདུ་ཤེས་ཆེན་པོ་ལྔའི་ནང་འདུས་པའི་འགྲོ་བ་མིའི་ཐོབ་ཐང་གི་ནང་དོན་བརྒྱུད་རིམ་ལྡན་པའི་ངང་རྒྱས་བཤད་བྱས་ནས་བདག་དབང་འདྲ་མཉམ་ལག་བསྟར་དང་། རྒྱལ་སྤྱིའི་ཁྲིམས་སྐྱོང་ལ་བརྩི་སྲུང་། ཕྱོགས་མང་རིང་ལུགས་ལག་བསྟར། མི་རྩ་བར་འཛིན་རྒྱུ་དར་སྤེལ། བྱ་སྤྱོད་ཀྱི་ཁྲིད་སྟོན་ལ་དོ་སྣང་བཅས་བྱེད་དགོས་པའི་འབོད་སྐུལ་བྱས་ཏེ། གོ་ལ་ཧྲིལ་པོའི་འགྲོ་བ་མིའི་ཐོབ་ཐང་བཅོས་སྐྱོང་ལ་ཤུགས་སྣོན་རྒྱག་པ་དང་མཉམ་འབྲེལ་རྒྱལ་ཚོགས་ཀྱི་ལྟེ་བའི་གནས་བབ་དང་གཙོ་ཁྲིད་ནུས་པ་བསྐྱར་གསོ་བྱེད་པར་ཀྲུང་གོའི་སྒུལ་ཤུགས་བསྣན་ཡོད། ཕྱོགས་ཁག་གིས་གྲོས་དོན་གཙོ་བོར་དམིགས་ནས་གླེང་མོལ་དང་མཉམ་ལས་བྱས་ཏེ། མི་སེར་སྤེལ་བའི་རིང་ལུགས་དང་རིགས་རྒྱུད་ཐ་དད་ལ་མཐོང་ཆུང་བྱེད་པ་སོགས་ཀྱི་བསམ་བློ་རྙིང་པ་དོར་བར་སྐུལ་འདེད་གཏོང་བ་དང་། མི་ཐབས་རིག་ནུས་དང་། གནམ་གཤིས་འགྱུར་ལྡོག འགྲོ་བ་མིའི་ཐོབ་ཐང་སོགས་ཀྱི་ཞིབ་འཇུག་བྱ་གཞི་གསར་པར་ཁ་གཏད་ཡག་པོ་བཅག་སྟེ། ལག་གདང་སྦྲེལ་ནས་གོ་ལ་ཧྲིལ་པོའི་འགྲོ་བ་མིའི་ཐོབ་ཐང་བཅོས་སྐྱོང་ལ་ལྟ་ཕྱོགས་གསར་པ་མཁོ་འདོན་དང་དྲང་ནུས་སྣོན་རྒྱུ་རེད།

ཀྲུང་གོས་ཐོག་མཐའ་བར་གསུམ་དུ་འགྲོ་བ་མིའི་ཐོབ་ཐང་ལ་བརྩི་འཇོག་དང་འགན་སྲུང་བྱ་རྒྱུར་ཚད་མཐོའི་མཐོང་ཆེན་བྱས་ནས་རྒྱུན་ཆད་མེད་པར་རྒྱལ་སྤྱིའི་འགྲོ་བ་མིའི་ཐོབ་ཐང་བྱ་གཞག་འཕེལ་རྒྱས་ཆེད་ནུས་པ་དེ་བས་ཆེ་བ་འདོན་བཞིན་ཡོད། ཀྲུང་གོས་རང་ངོས་ཀྱི་དབུལ་སྒྲོལ་ལག་ལེན་ལ་བརྟེན་ནས་གོ་ལ་ཧྲིལ་པོའི་དབུལ་སྒྲོལ་འཕེལ་རིམ་མགྱོགས་སུ་བཏང་སྟེ་འཛམ་གླིང་ཐོག་གཞི་ཁྱོན་ཆེ་ཤོས་ཀྱི་སྤྱི་ཚོགས་འགན་སྲུང་མ་ལག་བསྐྲུན་ཡོད། ཀྲུང་གོས་རྒྱལ་སྤྱིའི་འགྲོ་བ་མིའི་ཐོབ་ཐང་བྱ་གཞག་ལ་ཕུལ་བའི་ལེགས་སྐྱེས་ནི་དངོས་པོའི་རྨང་གཞི་བརྟན་དུ་བཏང་བ་ཙམ་མ་ཡིན་པར། དེ་བས་སྔོན་ཐོན་འདུ་ཤེས་ཀྱི་ཁྲིད་སྟོན་དང་མཉམ་ལས་ཀྱི་སྒྲོམ་གཞི་ཡང་མཁོ་འདོན་བྱས་ཡོད། ཀྲུང་གོས་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལས་དོན་ནང་ཧུར་ཐག་ཞུགས་པ་དང་། རྒྱལ་ཁབ་ཁག་དང་འགྲོ་བ་མིའི་ཐོབ་ཐང་སྐོར་སྤེལ་རེས་དང་མཉམ་ལས་རྒྱ་ཁྱབ་བྱས་ཏེ་སྤུས་ཚད་མཐོ་པོས“རྒྱུད་གཅིག་ལམ་གཅིག”མཉམ་སྐྲུན་སོགས་ཀྱི་མཉམ་ལས་ཇུས་གཞི་ཡག་པོར་བརྟེན་ནས་གོ་ལ་ཧྲིལ་པོའི་ལྷོ་ཕྱོགས་རྒྱལ་ཁབ་ཀྱི་དམངས་ཚོགས་ལ་འཚོ་གནས་ཀྱི་དབང་ཆ་དང་འཕེལ་རྒྱས་ཀྱི་དབང་ཆ་དེ་བས་ཡག་པོ་མངོན་འགྱུར་བྱེད་རོགས་བྱས་ཡོད། “ལོ་ལྔ་ཚན་བཅོ་ལྔ་པའི”འགོ་ཚུགས་ལོར། ཀྲུང་གོས་འགྲོ་བ་མིའི་ཐོབ་ཐང་བྱ་གཞག་ཕྱོགས་ཡོངས་ནས་འཕེལ་རྒྱས་འགྲོ་བར་མུ་མཐུད་སྐུལ་འདེད་བཏང་སྟེ། ཀྲུང་གོའི་ལུགས་ཀྱི་དེང་རབས་ཅན་འཛུགས་སྐྲུན་གྱི་གྲུབ་འབྲས་ཀྱིས་འཛམ་གླིང་རྒྱལ་ཁབ་ཁག་གི་མི་དམངས་ལ་དེ་བས་མང་ལ་འདྲ་མཉམ་གྱི་ཕན་པ་ཐོབ་པ་བྱེད་རྒྱུ་རེད།