མཉམ་འབྲེལ་རྒྱལ་ཚོགས་སུ་རྒྱུན་སྡོད་ཀྲུང་གོའི་འཐུས་མི་ཧྥུའུ་ཚུང་གིས་བརྗོད་དོན།
ཨ་རི་དང་དབྱི་སི་རལ་གྱིས་དབྱི་རན་ལ་དམག་དོན་རྒོལ་རྡུང་བཏང་བར་ཀྲུང་གོ་ཕྱོགས་ཀྱིས་དོ་ཁུར་ཆེན་པོ་བྱས་པ།
ཤིན་ཧྭ་གསར་འགྱུར་ཁང་མཉམ་འབྲེལ་རྒྱལ་ཚོགས་ནས་གློག་འཕྲིན་འབྱོར་གསལ། ཟླ་2ཚེས་28ཉིན་མཉམ་འབྲེལ་རྒྱལ་ཚོགས་སུ་རྒྱུན་སྡོད་ཀྲུང་གོའི་འཐུས་མི་ཧྥུའུ་ཚུང་གིས་བདེ་འཇགས་ལས་འཛིན་ལྷན་ཚོགས་ཀྱི་དབུས་ཤར་དུས་བབ་སྐོར་གྱི་ཛ་དྲག་ཡོངས་བསྒྲགས་ཚོགས་འདུའི་ཐོག་གཏམ་བཤད་སྤེལ་སྐབས། ཨ་རི་དང་དབྱི་སི་རལ་གྱིས་ཉིན་དེར་མངོན་སུམ་འཛེམ་མེད་ངང་དབྱི་རན་མངའ་ཁོངས་སུ་དམག་དོན་རྒོལ་རྡུང་བཏང་བ་ལས། ས་ཁུལ་གྱི་དུས་བབ་གློ་བུར་དུ་ཛ་དྲག་ཏུ་སོང་བར་ཀྲུང་གོ་ཕྱོགས་ཀྱིས་དོ་ཁུར་ཆེན་པོ་བྱེད་ཀྱི་ཡོད། ཀྲུང་གོ་ཕྱོགས་ཀྱིས་ཐོག་མཐའ་བར་གསུམ་དུ་ཕྱོགས་སོ་སོས་མཉམ་འབྲེལ་རྒྱལ་ཚོགས་ཀྱི་རྩ་འཛིན་ནང་འཁོད་པའི་དམིགས་ཡུལ་དང་རྩ་དོན་ལ་བརྩི་སྲུང་ཞུས་ཏེ། རྒྱལ་སྤྱིའི་འབྲེལ་བའི་ཁྲོད་དུ་དྲག་ཤུགས་སྤྱོད་པའམ་ཡང་ན་སྤྱོད་རྒྱུའི་འཇིགས་སྣང་སྐུལ་བར་ངོ་རྒོལ་བྱེད་དགོས་པ་དང་འབྲེལ་རྒོལ་གཏམ་ཀྱང་གཏོང་དགོས་པའི་འདོད་ཚུལ་འཛིན་གྱི་ཡོད། ཀྲུང་གོས་དབྱི་རན་དང་དེ་བཞིན་ས་ཁུལ་གཞན་དག་གི་རྒྱལ་ཁབ་ཀྱི་བདག་དབང་དང་། བདེ་འཇགས། མངའ་ཁོངས་ཆ་ཚང་བཅས་ལ་ངེས་པར་དུ་བརྩི་འཇོག་ཐོབ་པར་བྱེད་དགོས་པའི་ནན་བཤད་བྱེད་ཀྱི་ཡོད་ཅེས་བརྗོད་པ་རེད།
ཧྥུའུ་ཚུང་གིས། གདོང་གཏུག་ལས་མི་སེར་མང་པོ་ཤི་རྨས་བྱུང་བར་ཀྲུང་གོ་ཕྱོགས་ལ་སེམས་སྡུག་ཆེན་པོ་བྱུང་། དུས་གང་ཞིག་ཏུ་ཡིན་ནའང་དྲག་པོའི་གདོང་གཏུག་ཁྲོད་མི་སེར་ལ་སྲུང་སྐྱོང་བྱ་རྒྱུའི་དམར་ཐིག་དེ་ལས་བརྒལ་ན་འགྲིག་ཐབས་མེད། ཁྱད་པར་མེད་པར་དྲག་ཤུགས་སྤྱོད་པའི་བྱེད་སྤྱོད་ཚང་མ་དང་ལེན་བྱེད་ཐབས་བྲལ་བ་ཞིག་རེད། ཀྲུང་གོ་ཕྱོགས་ཀྱིས་རྒྱལ་སྤྱིའི་མི་ཆོས་བཅའ་ཁྲིམས་ཀྱི་འོས་འགན་ཚུད་པའི་རྒྱལ་སྤྱིའི་བཅའ་ཁྲིམས་ལག་ལེན་བསྟར་ཏེ། མི་སེར་གྱི་བདེ་འཇགས་འགན་ལེན་ཏན་ཏིག་དང་དམངས་སྤྱོད་སྒྲིག་བཀོད་ལ་གཏོར་རྐྱོན་མི་གཏོང་བའི་རེ་འབོད་བྱ་རྒྱུ་ཡིན་ཞེས་བརྗོད་པ་རེད།
ཧྥུའུ་ཚུང་གིས། དྲག་ཤུགས་ནི་རྒྱལ་སྤྱིའི་རྩོད་གཞི་སེལ་བའི་བྱེད་ཐབས་ཡང་དག་ཅིག་མིན། དྲག་ཤུགས་སྤྱད་ན་འཁོན་འཛིན་དང་འགལ་ཟླ་དེ་བས་ཆེ་རུ་འགྲོ་རྒྱུ་ཉག་ཅིག་རེད། དབུས་ཤར་གྱི་དུས་བབ་ཛ་དྲག་ཏུ་དང་ཁྱབ་འགྱེད་སོང་ན་ཕྱོགས་གང་ཞིག་ཡིན་རུང་ཚང་མའི་ཁེ་ཕན་དང་མཐུན་གྱི་མེད། སྐད་ཆ་ཤོད་རེས་དང་གྲོས་མོལ་བྱས་ནས་འགལ་ཟླ་དང་མི་མཐུན་པའི་ཆ་སེལ་རྒྱུ་ནི་འགྲོ་ལམ་འབའ་ཞིག་དེ་རེད། ཀྲུང་གོ་ཕྱོགས་ཀྱིས་དམག་དོན་བྱ་སྤྱོད་སྤེལ་མཚམས་འཕྲལ་མར་བཞག་ནས་དུས་བབ་ཛ་དྲག་ཏུ་མི་འགྲོ་བ་བྱེད་དགོས་པའི་རེ་འབོད་བྱ་རྒྱུ་ཡིན། ཨ་རི་དང་དབྱི་རན་གྱིས་ཕྱི་འབྲེལ་གྲོས་མོལ་བྱེད་བཞིན་པའི་སྐབས་སུ་འབྲེལ་ཡོད་ཀྱི་དམག་དོན་རྒོལ་རྡུང་བཏང་བ་ནི་མི་རྣམས་ཧང་སངས་དགོས་པ་ཞིག་རེད། འབྲེལ་ཡོད་ཕྱོགས་ཁག་གིས་ཆབ་སྲིད་ཀྱི་ལྷག་བསམ་མཚོན་པར་བྱས་ནས་སྐད་ཆ་ཤོད་རེས་དང་གྲོས་མོལ་གང་མགྱོགས་སླར་གསོ་བྱས་ཏེ། ཆབ་སྲིད་ཀྱི་ཐོག་ནས་ཐག་གཅོད་བྱེད་པའི་ཡང་དག་པའི་བགྲོད་ལམ་དུ་སྐྱོད་དགོས། ཀྲུང་གོ་ཕྱོགས་ཀྱིས་རྒྱལ་སྤྱིའི་སྤྱི་ཚོགས་དང་མཉམ་དུ་ཞི་བདེར་སྐུལ་འདེད་ཀྱི་སྟོབས་ཤུགས་གཅིག་ཏུ་བསྒྲིལ་ཏེ། འཛམ་གླིང་དབུས་ཤར་ས་ཁུལ་སྔ་ཙམ་ཞི་བདེ་དང་བརྟན་བརླིང་སླར་གསོ་ཡོང་བར་སྐུལ་འདེད་གཏོང་འདོད་ཡོད་ཅེས་ནན་བཤད་བྱས་པ་རེད།
འབྲེལ་ཡོད་གསར་འགྱུར།