མཚོ་སྔོན་ཉིན་རེའི་ཚགས་པར་ཐོག་གནས་ཚུལ་སྤེལ་བར་གཞིགས་ན། གསར་འགོད་པར་མཚོ་སྔོན་ཞིང་ཆེན་འཕེལ་སྒྱུར་ཨུ་ལྷན་ནས་ཤེས་རྟོགས་བྱུང་གསལ། ཉེ་ཆར《འོད་དྲོད་གློག་གཏོང་གཞི་ཁྱོན་ཅན་གྱི་འཕེལ་རྒྱས་ལ་སྐུལ་འདེད་གཏོང་བའི་སྐོར་གྱི་མཚོ་སྔོན་ཞིང་ཆེན་གྱི་བྱེད་ཐབས་འགའ་ཞིག》བཀྲམ་ནས་འོད་དྲོད་གློག་གཏོང་ཐོན་ལས་དེ་དཔེ་སྟོན་སྣེ་ཁྲིད་ནས་གཞི་ཁྱོན་ཅན་དང་སྤུས་ཚད་མཐོ་བའི་འཕེལ་རྒྱས་སུ་བསྒྱུར་བར་སྐུལ་འདེད་ཧུར་ཐག་བཏང་བ་རེད།

མཚོ་སྔོན་ནི་རྒྱལ་ཡོངས་ཀྱི་འོད་དྲོད་ཐོན་ཁུངས་ཕུན་སུམ་ཚོགས་པའི་ས་ཁོངས་ཤིག་ཡིན་པ་དང་ལག་རྩལ་གསར་སྤེལ་ཆོག་ཚད་ཆན་ཝ་དུང་ཕྱུར་10ཙམ་ཟིན་པ་དང་། བེད་སྤྱོད་ཆོག་པའི“བྱེ་ཐང་དང་གྲམ་ཐང”གི་ས་ཁྱོན་སྤྱི་ལེ་ངོས་གྲུ་ཁྲི་10ཙམ་ཡོད་པས་ཕྱོགས་བསྡུས་གསར་སྤེལ་གྱི་ཆ་རྐྱེན་བཟང་པོ་འཛོམས་ཡོད། མིག་སྔའི་བར་མཚོ་སྔོན་དུ་འོད་དྲོད་གློག་གཏོང་འཕྲུལ་འཁོར་གྱི་གཞི་ཁྱོན་ཆན་ཝ་ཁྲི་71བསྐྲུན་ཟིན་པ་དང་ཆན་ཝ་ཁྲི་135སྐྲུན་བཞིན་ཡོད་པ་དེས་རྒྱལ་ཡོངས་ཀྱི་39%དང་53%སོ་སོར་བཟུང་སྟེ་དེ་གཉིས་ཀ་རྒྱལ་ཡོངས་ཀྱི་ཨང་དང་པོར་སླེབས་ནས་འོད་དྲོད་གློག་གཏོང་ཐོན་ལས་ལ་གཞི་ཁྱོན་ཆེ་བའི་འཕེལ་རྒྱས་ཀྱི་རྨང་གཞི་ཡག་པོ་ལྡན་ཡོད། མཚོ་སྔོན་ཞིང་ཆེན་འཕེལ་སྒྱུར་ཨུ་ལྷན་གྱི་འབྲེལ་ཡོད་འགན་འཁུར་བློ་མཐུན་གྱིས་ངོ་སྤྲོད་བྱས་པར་གཞིགས་ན། མཚོ་སྔོན་གྱིས་གློག་ཤུགས་མ་ལག་གསར་པ་འཛུགས་སྐྲུན་གྱི་དགོས་མཁོར་དམིགས་ནས། “ལོ་ལྔ་ཚན་བཅོ་ལྔ་པའི”རིང་གི་འོད་དྲོད་ཐོན་ལས་འཕེལ་རྒྱས་དམིགས་ཚད་ཚན་རིག་དང་མཐུན་པའི་སྒོ་ནས་གཏན་འབེབས་བྱས་ཏེ། 2030ལོར་སླེབས་སྐབས་ཞིང་ཆེན་ཡོངས་ཀྱི་གློག་འདོན་འཕྲུལ་འཁོར་གྱི་གཞི་ཁྱོན་ཆན་ཝ་ཁྲི་500ལྷག་ཙམ་ཟིན་པའི་བརྩོན་ལེན་བྱ་རྒྱུ་དང་སྐབས་དེར་སྔོན་དཔག་བྱས་ན་རྒྱལ་ཡོངས་ཀྱི་གློག་འདོན་འཕྲུལ་འཁོར་གྱི་གཞི་ཁྱོན་གྱི་གསུམ་ཆ་གཅིག་ཟིན་རྒྱུ་རེད།

《བྱེད་ཐབས་འགའ་ཞིག》ནང་མཚོ་སྔོན་གྱིས་འོད་དྲོད་གློག་གཏོང་འཛུགས་སྐྲུན་གྱི་མྱུར་ཚད་དང་གློག་རིན་ཐེག་ནུས་ལ་སྤྱི་འདོམས་བསམ་གཞིག་བྱས་ཏེ“ལོ་དང་ཁག་བགོས་ནས་བརྟན་ཞིང་གཟབ་ནན་ངང་སྐུལ་འདེད་གཏོང་བའི”རྩ་དོན་མཐའ་འཁྱོངས་བྱས་ཏེ་འོད་དྲོད་གློག་གཏོང་འཛུགས་སྐྲུན་རྣམ་གྲངས་གོ་རིམ་ལྡན་པའི་སྒོ་ནས་བཀོད་སྒྲིག་བྱས་ནས་ལས་རིགས་སྐྱོན་བྲལ་དང་རྒྱུན་མཐུད་འཕེལ་རྒྱས་ཡོང་བར་སྐུལ་འདེད་གཏོང་རྒྱུ་ཡིན་པ་བསྟན་ཡོད། ངོ་སྤྲོད་བྱས་པར་གཞིགས་ན། མཚོ་སྔོན་གྱིས་རྒྱལ་ཡོངས་ཀྱི་སྔོན་ལ་འོད་དྲོད་གློག་གཏོང་ཐོན་ལས་འཕེལ་རྒྱས་ལ་སྐུལ་འདེད་བཏང་སྟེ། དེ་སྙོམས་སྒྲིག་རང་བཞིན་དང་རྨང་གཞིའི་རང་བཞིན་གྱི་གློག་ཁུངས་གལ་ཆེན་ཞིག་ཏུ་གྱུར་ནས་བདེ་འཇགས་དང་བློས་འགེལ་ཆོག་པའི་སྒོ་ནས་ནུས་རྒྱུ་གསར་པས་སྲོལ་རྒྱུན་ནུས་རྒྱུའི་ཚབ་བྱེད་ཐུབ་རྒྱུ་དང་། གསར་གཏོད་ཐོན་ཁུངས་དེ་འོད་དྲོད་ཁེ་ལས་སུ་གཅིག་སྡུད་བྱེད་པར་ཁྲིད་སྟོན་ཧུར་ཐག་བྱས་ཐོག་འདྲ་བཟོས་དང་ཁྱབ་གདལ་གཏོང་ཆོག་པའི་གཙོ་གནད་སྒྲིག་ཆས་དང་། ལྟེ་བའི་ལག་རྩལ། ཤེས་བྱའི་བདག་དབང་། ཁེ་བེད་བདག་ཐོབ་བཅས་ཁག་གཅིག་ཆགས་ནས་ཐོན་ལས་ཀྱི་འགྲན་རྩོད་ནུས་པ་ཆེ་རུ་གཏོང་རྒྱུ་རེད། དེ་དང་ཆབས་ཅིག་ཁེ་ལས་ཀྱིས་མཚོ་སྔོན་གྱི་ལག་ལེན་ཉམས་མྱོང་ལ་བརྟེན་ནས་ཧུར་ཐག་ངང“ཕྱིར་བསྐྱོད”དེ་ཨེ་ཤེ་ཡ་དབུས་མ་དང་ཨེ་ཤེ་ཡ་ནུབ་མ་སོགས་ས་ཁུལ་དུ་འོད་དྲོད་གློག་གཏོང་གི“རྒྱུད་གཅིག་ལམ་གཅིག”རྣམ་གྲངས་གཙོ་བོ་འཚོལ་ཞིབ་བྱས་ནས་འོད་དྲོད་གློག་གཏོང་གི་རྒྱལ་སྤྱིའི་མཉམ་ལས་ཆུ་ཚད་མཐོ་རུ་གཏོང་བའི་ལྕག་སྐུལ་བྱ་རྒྱུ་ཡིན་པ་རེད།