མཚོ་བོད་ལྕགས་ལམ་གོར་ལྷ་དུམ་བུའི་ཁུ་ནུ་རི་བོའི་ཕུག་ལམ་འགྲམ་དུ“རི་རྩེའི་སོ་ལྟ་ཁང”ཞེས་པའི་གློག་སྒྲོན་ཞིག་ལས་འོད་ལམ་ལམ་དུ་འཚེར་འོང་། སོ་ལྟ་ཁང་དེ་རི་སྐེད་དུ་ཆགས་ཡོད་པ་དང་། ཡར་འགྲོ་དགོས་ན་སྔོན་ལ་རྡོ་སྐས་110འཛེགས་དགོས་ཀྱི་ཡོད། གསར་འགོད་པས་ལག་གཡས་པས་ལག་འཇུ་བཟུང་བ་དང་ལག་གཡོན་མ་རྡོ་སྐས་ཐོག་བཞག་སྟེ་ས་བབ་སྨི་4868ཟིན་པའི་སོ་ལྟ་ཁང་དེར་སྐྱོད་སྐབས་རྡོ་སྐས་རེ་རེ་འཛེགས་པར་ཡང་དཀའ་ལས་ཤིན་ཏུ་ཆེ།

སོ་ལྟ་ཁང་དུ་སླེབས་སྐབས་ནམ་ལངས་འདུག མིག་གིས་ཆོད་སར་གངས་ཀྱིས་བཀླུབས་ནས་སྐྱ་ཆིལ་ལེར་གནས་པ་དང་། ལོ་འཁོར་མོར་གངས་བབས་པས་གྲང་ཤོས་སྐབས་སུ་དྲོད་ཚད་ཀླད་ཀོར་འོག་གི་ཧྲེ་ཧྲི་ཏུའུ་38ཟིན་གྱི་ཡོད་ཅེས་དྲག་ཆས་ཉེན་རྟོག་མཚོ་སྔོན་སྤྱི་ཁྱབ་རུ་ཁག་མཚོ་ནུབ་ཉིང་ལག་རུ་ཁག་ལས་སྒྲུབ་རུ་འབྲིང་བདུན་པའི་རུ་དཔོན་གཞོན་པ་ཁྲེན་ལུའོ་ཀྲེན་གྱིས་དེ་ལྟར་བཤད།

“ཁུ་ནུ་རི་བོའི་ཕུག་ལམ་ནི་མཚོ་བོད་ལྕགས་ལམ་ལམ་རྒྱུད་ཀྱི་ཚོད་འཛིན་ལས་གྲྭ་དང་པོ་དེ་ཡིན་པས་མཚོ་བོད་ལྕགས་ལམ་གྱི་འགག་གནད་ཅིག་རེད”“མཚོ་བོད་ལྕགས་ལམ་ཤར་གཏོང་ཐུབ་ནས་ལོ་20ཙམ་སོང་བ་དང་དཔོན་དམག་ཚོས་འདི་གར་བརྟན་སྲུང་བྱས་ནས་ལོ་20ཙམ་འགྲོ་ཡི་ཡོད”ཅེས་ཁྲེན་ལུའོ་ཀྲེན་གྱིས་རྒྱབ་ལ་མཛུབ་མོ་འཛུགས་བཞིན་དེ་ལྟར་བཤད།

“ལྕགས་ལམ་སྲུང་བ་ཕུད་ཁྱེད་ཚོས་ད་དུང་ལས་དོན་གང་དག་སྒྲུབ་དགོས་སམ”

“སོ་ལྟ་ཁང་གི་འོག་ཏུ་རྒྱལ་ལམ་109ཡོད་པ་དང་། གུག་ཆ་མང་ལ་གྱེན་ཐུར་གཟར་བས་འགྲིམ་འགྲུལ་ལས་འཛོལ་ཡང་སེ་ཐོན་གྱི་ཡོད། ང་ཚོས་སྤྱི་ལེ་100ལྷག་ཙམ་གྱི་ཉེན་ཆེའི་ལམ་དུམ་དུ་དྲག་ཆས་ཉེན་རྟོག་པའི་རོགས་སྐྱོབ་ས་ཚིགས་ཀྱི་སྟོན་རྟགས་བྱང་བུ་9བཙུགས་ཡོད་པ་དང་འབྲེལ་གཏུག་ཁ་པར་ཨང་གྲངས་ཡོངས་བསྒྲགས་བྱས་ཏེ་ཆུ་ཚོད་24ཁ་པར་ལེན་མཁན་ཡོད་པ་བྱས་ཡོད”“སོ་ལྟ་ཁང་གི་ལྷོ་ཕྱོགས་ནི་ཁུ་ཁུ་ཤིས་རིའི་མི་མེད་ཁུལ་ཡིན་པས་འབྲོང་དང་གཙོད་ལམ་ནོར་ཐེབས་ནས་ལྕགས་ལམ་ཐོག་ཡོང་གི་ཡོད། ཉིན་མ་ཁ་ཤས་སྔོན་ལ་ང་ཚོས་ད་དུང་འབྲོང་གིས་བརྡུངས་པའི་ལྕགས་ལམ་ལས་དོན་པ་ཞིག་རོགས་སྐྱོབ་བྱས་པ་ཡིན”ཞེས་ཁྲེན་ལུའོ་ཀྲེན་གྱིས་བཤད།

སོ་ལྟ་ཁང་དུ་སོ་དམག་ནི་གཟུགས་པོ་མདའ་ལྟར་འདྲོང་ཞིང་། ཞེང་ཆེ་བའི་སྒེའུ་ཁུང་ལས་ཕུག་ལམ་གྱི་དོན་སྒོར་ལྡིར་ནས་འདུག “མེ་འཁོར་འདི་གར་སླེབས་སྐབས་དུང་བརྡ་གཏོང་གི་ཡོད། འདི་ནི་གཅིག་སེམས་གཅིག་མཐུན་གྱི་གསང་བའི་ཁ་ཆད་ལྟ་བུ་ཞིག་རེད། འཐབ་འཛིང་པས་རྟག་ཏུ་མེ་འཁོར་གང་དུ་བསྐྱོད་མིན་ཚོད་དཔག་བྱེད་ཀྱི་ཡོད”ཅེས་མཛུབ་སྟོན་པ་ཅིང་ཧྲེང་ལིན་གྱིས་བཤད།

སོ་ལྟ་ཁང་གི་ཐོག་སོ་གཉིས་པར་ཤེལ་ཁང་ཞིག་ཡོད་ཅིང་། ཁྲེན་ལུའོ་ཀྲེན་གྱིས“དེ་སྔོན་འདི་གར་རྩི་ཤིང་སྐྱེ་ཐུབ་ཀྱི་མེད། ད་ཆ་དྲོད་ཁང་ཡོད་པས་རྩི་ཤིང་དང་། ཤིང་འབྲས། སྔོ་ཚལ་བཅས་ཧ་ཅང་ཡག་པོ་སྐྱེས་ཀྱི་འདུག”ཅེས་བཤད།

གསར་འགོད་པར་དྲོད་ཁང་ནང་དུ་05ནང་སྐྱེས་ཀྱི་དམག་གསར་ཕེང་ཝུན་མིང་འཕྲད་བྱུང་། ཕེང་ཝུན་མིང་གིས“བརྒྱ་ཤོག་ནང་སླེབས་མ་ཐག་པའི་ལོ་ཕྱེད་ཙམ་རིང་ང་དངོས་གནས་གོམས་མ་བྱུང་། ལ་དུག་ཕོག་པས་དགོང་མོ་མགོ་བོ་ན་ནས་གཉིད་ཀྱང་ཁུག་གི་མི་འདུག”ཅེས་ཕྱིར་དྲན་བྱེད་བཞིན་བཤད།

རུ་འབྲིང་གི་རུ་དཔོན་ལིའུ་ཧྲི་ཡུས་ཀྱིས“ཕྱོགས་གཅིག་ནས་གསོ་རླུང་རྔུབ་པ་དང་སྨན་བཏང་ནས་ལ་དུག་དྲག་ཐབས་བྱེད་པ་དང་། ཕྱོགས་གཞན་ཞིག་ནས་མཐོ་གྲང་གསོ་རླུང་མི་འདང་བའི་ཁོར་ཡུག་ལ་དམིགས་ཏེ་རུ་འབྲིང་གིས‘གསོ་རླུང་རྔུབ་པ་དང་། གསོ་རླུང་རྔུབ་ཚད་ཉུང་དུ་གཏོང་བ། གསོ་རླུང་མི་རྔུབ་པ’བཅས་གོམ་པ་རིམ་བགྲོད་ཀྱིས་ས་མཐོར་འཕྲོད་པའི་སྦྱོང་བརྡར་བྱ་ཐབས་འཚོལ་ཞིབ་བྱས་ཡོད། ཚན་རིག་དང་མཐུན་པའི་ངང་སྦྱོང་བརྡར་བྱས་པ་བརྒྱུད་དམག་གསར་རྣམས་སྤྱིར་ན་ཟླ་བ་3གྱི་ནང་གོམས་ཀྱི་ཡོད”ཅེས་ངོ་སྤྲོད་བྱས།

ལུས་ཁམས་ཀྱི་འགྲན་སློང་ཕུད་ད་དུང་སེམས་ཁམས་ལའང་ཉམས་སད་ཐེབས་ཤིང་། ཅིང་ཧྲེང་ལིན་གྱིས“ལ་དུག་ཕོག་པ་ནི་གནས་སྐབས་ཙམ་ཞིག་རེད། དངོས་གནས་ཀྱི་འགྲན་སློང་ནི་དུས་ཡུན་རིང་པོའི་ནང་འཚོ་བ་ཡུལ་པོ་སྐྱེལ་རྒྱུ་དེ་རེད། འཐབ་འཛིང་པ་ཚོའི་འཚོ་བ་ཕུན་སུམ་ཚོགས་སུ་གཏོང་ཆེད་ང་ཚོས་བྱེད་སྒོ་སྣ་ཚོགས་སྤེལ་གྱི་ཡོད། ད་ཆའི་00ནང་སྐྱེས་ཀྱི་འཐབ་འཛིང་པའི་རིག་པ་ཧ་ཅང་གྲུང་པོ་ཡོད་པས་ཚང་མས་རུ་འབྲིང་ཆེད་ལས་དོན་སྒྲུབ་འདོད་བྱེད་ཀྱི་འདུག”ཅེས་བཤད།

“ལོ་མང་བརྟན་སྲུང་བྱེད་པའི་དོན་སྙིང་གཙོ་བོ་གང་ཡིན”

ཅིང་ཧྲེང་ལིན་གྱིས“ང་ཚོ་ནི་གནམ་སྐས་ཀྱི་ལག་འཇུ་ལྟ་བུ་ཡིན། གལ་ཏེ་ལག་འཇུ་མེད་ཚེ་ཁྱེད་རང་ད་དུང་ཡར་ཡོང་ཕོད་དམ”ཞེས་བཤད།

ཁུ་ནུ་རི་བོའི་ཕུག་ལམ་གྱི་སྣེ་གཞན་ཞིག་སྟེ་ས་བབ་སྨི་4772ཟིན་པའི་སར་གནས་པའི་རུ་འབྲིང་བདུན་པའི་དམག་སྒར་སྒོ་འགྲམ་གྱི་རི་ལྡེབས་སུ་རྡོ་ཧྲུག་དམར་པོས་ཀྲུང་གོའི་ས་བཀྲའི་སྤྱི་ཁོག་དང“ཉིན་ལྟར་མཁའ་ལམ་སྲུང་། འགན་འཁྲི་ཕྲག་ཏུ་འཁུར”ཞེས་པའི་སྦྱར་ཡིག་བསྒྲིགས་ཡོད། “དམག་གསར་ཡོང་རིམ་བཞིན་ཚང་མས་སྦྱར་ཡིག་སྒྲིག་གི་ཡོད”ཅེས་ལིའུ་ཧྲི་ཡུས་ཀྱིས་བཤད།