ཉིན་ཤས་གོང་། ཟི་ལིང་གྲོང་ཁྱེར་སྟོང་སྐོར་རྫོང་སྟོང་སྐོར་གནའ་གྲོང་མཛེས་ལྗོངས་ཁུལ་ནས་གསར་འགོད་པར་ཤེས་རྟོགས་བྱུང་བར། སྟོང་སྐོར་གནའ་གྲོང་གིས་རིམ་རྩིས་བརྒྱབ་ན་ཡུལ་སྐོར་བ་མི་ཐེངས་204833ལ་སྣེ་ལེན་ཞུས་ནས་དུས་མཚུངས་ལས་131%འཕར་ཞིང་། ཕྱོགས་བསྡུས་ཡུལ་སྐོར་ཡོང་འབབ་སྒོར་ཁྲི་614བྱུང་ནས་དུས་མཚུངས་ལས་127%འཕར་བ་དང་། དེའི་ནང་ཟླ་2ཚེས་19ནས་22ཉིན་བར་གྱི་ཉིན་4བསྟུད་མར་ཡུལ་སྐོར་བ་མི་ཐེངས་ཁྲི་3ལྷག་ཙམ་ཟིན་ཡོད་པ་རེད།

དཔྱིད་གསར་དུས་ཆེན་རིང་། མཚོ་སྔོན་སྟོང་སྐོར་གྱི་ཟི་ལིང་དང་ནན་ཅིང་གི་ཚོན་ལྒང་འགྲེམས་སྟོན་སྐབས་གསུམ་པ་འཚོགས་ཤིང་། མཚར་སྡུག་རྣམ་པར་བཀྲ་བའི་ཚོན་ཁྲ་ཅན་གྱི་ལྒང་ཞུ་དང་། འཕྲུལ་མིའི་འཁྲབ་སྟོན། གནའ་སྲོལ་སྐོར་ཞིབ་སོགས་དང་དེ་བཞིན་ཧུད་རིགས་ཀྱི་མཛའ་གཞས“ཧྭ་ཨེར”དང་སྐོར་བྲོ་སོགས་དམངས་སྲོལ་ལེ་ཚན་གྱིས་གནའ་གྲོང་དེར་ལོ་གསར་གྱི་རྣམ་པ་ཟབ་མོ་སྤྲས་ཡོད། ཡུལ་སྐོར་བ་ཚོས་གནའ་གྲོང་ལ་ལྟ་སྐོར་བྱེད་པ་དང་། དམངས་སྲོལ་ཉམས་སུ་མྱོང་བ། ཞིམ་ཟས་ལ་རོལ་བ་སོགས་བྱས་ནས་དཔྱིད་གསར་དུས་ཆེན་རིང་གི་གནའ་གྲོང་དེའི་ཐུན་མོང་མ་ཡིན་པའི་ཡིད་དབང་འཕྲོག་ཤུགས་ཁྱོན་ཡོངས་ནས་མྱོང་རོལ་བྱས་པ་རེད།

དཔྱིད་གསར་དུས་ཆེན་གྱི་གུང་གསེང་རིང་། མཛེས་ལྗོངས་ཁུལ་གྱི་ལས་དོན་མི་སྣ་ཚང་མས་ལས་གནས་བརྟན་སྲུང་དང་ལས་བགོས་རོགས་སྒྲུབ་ཀྱིས་གཙོ་གནད་ཁུལ་དུ་ལམ་སྟོན་ལས་གནས་མང་དུ་བཏང་ནས་འགྲུལ་རྒྱུན་དོ་དམ་ཚོད་འཛིན་བྱེད་ཤུགས་ཆེ་རུ་བཏང་བ་རེད། དེ་དང་ཆབས་ཅིག ལས་རེས་སྡོད་རེས་ཀྱི་ལམ་ལུགས་དོན་འཁྱོལ་ནན་པོ་དང་འཕྲལ་སྡོམ་ཐག་གཅོད་ཀྱི་མཉམ་འགུལ་ལམ་སྲོལ་འཐུས་སྒོ་ཚང་དུ་བཏང་ནས། ཡུལ་སྐོར་བ་ཚང་མ་སྤྲོ་པོ་ཡོང་བའི་འགན་ལེན་བྱས་ཡོད།