འདི་ནི་ལས་དོན་མི་སྣས་གསར་དུ་བཟོས་པའི་སྲན་ཞོར་དབྱེ་འབྱེད་བྱེད་བཞིན་པ།

འདི་ནི་ཝུའེ་ལི་ཡིས(གཡོན)མན་ཏི་སི་གྲོང་ཚོའི་སྲན་ཞོ་བཟོ་ཁང་ལ་ས་གནས་ས་ཐོག་ཏུ་མཛུབ་ཁྲིད་བྱེད་བཞིན་པ། (པར་འདི་གཉིས་ནི་ཏ་ཐང་ཅིན་ཀོང་གློག་ཤུགས་ཚད་ཡོད་ཀུང་སིས་མཁོ་འདོན་བྱས)

ཧིན་རྡུ་ཉི་ཞི་ཡའི་སུའུ་མོན་ཏ་ལ་ཞིང་ཆེན་ལྷོ་མའི་མན་ཏི་སི་གྲོང་ཚོའི་སྲན་ཞོ་བཟོ་ཁང་ཞིག་ཏུ་ཏ་ནན་གྱིས་སྦངས་ཟིན་པའི་སྲན་སེར་འཕྲུལ་ཆས་ནང་བླུགས་ནས་བཙིར་སྐབས་འོ་མ་དང་འདྲ་བའི་སྲན་ཁུ་སྦུ་གུ་ནས་དལ་པོར་དོན་འོངས། ཉེ་འགྲམ་གྱི་ཟོག་སྒྲོམ་སྟེང་དུ་སྲན་ཞོ་གྲལ་འགྲིག་པོར་བཞག་ཡོད་པས་ལྟ་དུས་འཇམ་ཤ་དོད་ལ་ཟ་སྙིང་འདོད་པ་ཞིག་ཡོད།

མན་ཏི་སི་གྲོང་ཚོ་ནི་ཏ་ཐང་ཅིན་ཀོང་གློག་ཤུགས་ཚད་ཡོད་ཀུང་སིའི་སུའུ་མུའུ་སའེ་གློག་ཁང་གི་ཉེ་འགྲམ་དུ་ཆགས་པ་དང་། གྲོང་ཚོའི་ནང་གི་ཁྱིམ་ཚང་མང་པོ་ཞིག་གིས་སྲན་ཞོ་བཟོ་ཁང་གཉེར་ནས་འཚོ་ཐབས་བྱེད་ཀྱི་ཡོད། སྔོན་ཆད་མ་དངུལ་མི་འདང་བ་དང་ལག་རྩལ་གྱི་ཆུ་ཚད་མཐོ་པོ་མེད་པའི་དབང་གིས་བཟོ་ཁང་དེ་དག་གི་ཐོན་རྫས་ཀྱི་སྤུས་ཚད་ལེགས་སུ་གཏོང་བ་དང་གཉེར་སྐྱོང་གཞི་ཁྱོན་རྒྱ་ཆེར་གཏོང་ཐབས་བྲལ། 2021ལོ་ནས་བཟུང་གློག་ཁང་གིས་རང་འགུལ་ངང་རོགས་སྐྱོར་རྣམ་གྲངས་སྤེལ་ནས་རྒྱུན་མཐུད་གློག་ཤུགས་བརྟན་པོ་མཁོ་འདོན་བྱས་པ་མ་ཟད། ད་དུང་མ་དངུལ་དང་། ལུགས་མཐུན་ཚད་ལྡན་གྱི་གཉེར་སྐྱོང་། ལག་རྩལ་གསོ་སྦྱོང་། ཁྲོམ་ར་སྦྲེལ་མཐུད་སོགས་ལ་ཕྱོགས་བསྡུས་རང་བཞིན་དང་ཁྱད་ཆོས་ལྡན་པའི་རོགས་སྐྱོར་བྱས་ཏེ། སྲན་ཞོ་བཟོ་ཁང་ཚུད་པའི་ས་གནས་དེ་གའི་ཕྲན་ཚེགས་ཁེ་ལས་ཀྱི་གཉེར་སྐྱོང་ཚད་ལྡན་དང་འགྲན་རྩོད་ནུས་པ་ཆེ་རུ་གཏོང་བར་རམ་འདེགས་བྱས་ཡོད་པ་རེད།

ཕྱོགས་མང་པོའི་རོགས་རམ་འོག ཏ་ནན་གྱི་སྲན་ཞོ་བཟོ་ཁང་གི་གཉེར་སྐྱོང་ཚད་ལྡན་ཅན་དང་བརྟན་བརླིང་ཅན་མངོན་འགྱུར་བྱུང་བ་དང་། ཐོན་རྫས་ཀྱི་སྤུས་ཚད་མངོན་གསལ་དོད་པོས་ལེགས་སུ་ཕྱིན་པ་མ་ཟད། ཕྱིར་ཚོང་བྱེད་སྟངས་ཀྱང་སྔོན་ཆད་ཀྱི་སིལ་ཚོང་རྣམ་པ་ནས་ཚོང་ཟོག་མཁོ་སྤྲོད་བརྟན་པོ་ཐུབ་པར་བསྒྱུར་ཏེ་གཏན་འཇགས་ཀྱི་ཚོང་ཤག་མང་པོ་ཡོད། “སྔོན་ཆད་དང་བསྡུར་ན་བཟོ་ཁང་གི་རྣམ་པ་གསར་རྐྱང་དུ་གྱུར་ཡོད་པ་དང་། སྔོན་ཆད་ཟླ་བ་གཅིག་ལ་ཡོང་འབབ་ཧིན་རྡུ་ཉི་ཤི་ཡའི་དངུལ་ལོར་སྒོར་ཁྲི་1200(མི་དམངས་ཤོག་སྒོར་4900ཙམ་དང་མཚུངས)ཙམ་ལས་ཡོང་གི་མེད། ད་ཆ་ཟླ་བ་གཅིག་ལ་ཧིན་རྡུ་ཉི་ཤི་ཡའི་དངུལ་ལོར་སྒོར་ཁྲི་3000ཡན་རག་གི་འདུག”ཅེས་ཏ་ནན་གྱིས་གདེང་ཚོད་ཆེན་པོས་བརྗོད་པ་དང་། ཁོང་གིས“སྲན་ཞོའི་བཟོ་ཁང་མུ་མཐུད་གཉེར་ཐུབ་པ་མ་ཟད། ད་དུང་དེ་བས་ལེགས་པ་གཉེར་ཐུབ་པའི་ཡིད་ཆེས་ཡོད”ཅེས་བརྗོད།