འདི་ནི་ཕེ་རུའི་ལཱ་སི་མངའ་སྡེའི་པ་སི་ཟངས་གཏེར་མཐའ་འཁོར་གྱི་སྡེ་ཁུལ་དུ་བཏབ་པའི་གསོམ་ཤིང་ཡིན་པ།

འདི་ནི་ཕེ་རུའི་ལཱ་སི་མངའ་སྡེའི་པ་སི་ཟངས་གཏེར་གྱིས་བསྐྲུན་པའི་ཕུའུ་ཨེ་ལཱ་པན་པ་སྡེ་ཁུལ་གསར་པའི་སློབ་གསོའི་ཕྱོགས་བསྡུས་སྒྲིག་གཞིའི་ས་གནས་དེ་གའི་སློབ་མ་ཡིན་པ། (པར་འདི་གཉིས་ནི་ཀྲུང་གོ་གཏེར་ལྔ་ཚོགས་པ་ཚད་ཡོད་ཀུང་སིས་མཁོ་འདོན་བྱས)

ཕེ་རུའི་ཨ་ཕོ་ལི་མ་ཁེ་ཁུལ་ཆེན་ཁོ་ཐ་པན་པ་སི་ཞིང་ཆེན་ཆི་ལ་སྡེ་ཁུལ་གྱི་སྡོང་ཕྲུག་ར་བར། སྡོང་ཕྲུག་ཁོག་མའི་ནང་གསོམ་ཤིང་གི་སྡོང་ཕྲུག་གྲལ་འགྲིག་པོར་བཏབ་ཡོད་ཅིང་། དོ་དམ་པ་ཨེར་ཁེ་སར་ཐ་ཞི་ཨོན·ཆུང་པེ་སི་ཡིས་སྒུར་སྒུར་བྱས་ནས་སྡོང་ཕྲུག་གི་རྩ་བ་ཡག་པོ་སྐྱེས་ཡོད་མེད་ལ་ལྟ་བཞིན་ཡོད།

“ཐོག་མར་འདི་གར་སླེབས་དུས་ངས་མྱུག་ས་དང་རྩ་རྒྱུ་ཟེར་བ་གང་ལ་ཟེར་མིན་མི་ཤེས་ལ། ད་དུང་ལྡུམ་རའི་ལག་རྩལ་སློབ་སྦྱོང་ཞིབ་ཚགས་པོ་བྱེད་རྒྱུ་ཡོང་གི་རེད་བསམ་བསམ་མ་བྱུང”ཞེས་ཆུང་པེ་སིས་བརྗོད་པ་དང་། ཀྲུང་གོ་གཏེར་ལྔ་ཚོགས་པ་ཚད་ཡོད་ཀུང་སི་ལཱ་སི་མངའ་སྡེའི་པ་སི་ཟངས་གཏེར་རྣམ་གྲངས་ཀྱི་གསོ་སྦྱོང་ཁྲོད། ཁོང་གིས་ཡི་གེ་འབྲི་ཀློག་དང་གློག་ཀླད་བེད་སྤྱོད་གཏོང་སྟངས་ཤེས་ཡོད་ལ། ད་དུང་སྡོང་ཕྲུག་ནགས་བཟོའི་ལག་རྩལ་ཡང་ཁོང་དུ་ཆུད་ཡོད། ཁོང་གིས“ད་ལྟ་ང་རང་ཆེད་ལས་མི་སྣར་གྱུར་ནས། རིགས་པའི་གཞུང་ལུགས་ཁོང་དུ་ཆུད་པ་མ་ཟད་ལག་ལེན་ཡང་བྱང་པོ་ཡོད་བསམ་གྱི་འདུག”ཅེས་བརྗོད། ད་ཆ་ཆུང་པེ་སིའི་སྣེ་ཁྲིད་འོག་གཏེར་ཁུལ་མཐའ་འཁོར་གྱི་སྡེ་ཁུལ་དང་གྲོང་ཚོ་33གྱི་སྐྱེ་ཁམས་བསྟུད་མར་སླར་གསོ་ཐུབ་ནས། དེ་སྔའི་སྐྱ་ཐེར་ཐེར་གྱི་རི་ལྡེབས་ད་ཆ་སྔོ་ཐིང་ངེར་གྱུར་ཡོད།

ལཱ་སི་མངའ་སྡེ་པ་སི་ཟངས་གཏེར་ཀུང་སི་གནས་སའི་ཁོ་ཐ་པན་པ་སི་ཞིང་ཆེན་ནི་དེ་སྔོན་ཕེ་རུའི་དབུལ་པོ་ཚབས་ཆེ་ཤོས་ཀྱི་ཞིང་ཆེན་གྱི་གྲས་ཤིག་རེད། 2014ལོ་ཚུན་དུ་ཀྲུང་གོའི་གཏེར་ལྔས“མཛེས་སྡུག་ལྡན་པའི་འབྱུང་འགྱུར་གཏོད་པའི”འདུ་ཤེས་བཟུང་ནས་ལཱ་སི་མངའ་སྡེའི་པ་སི་ཟངས་གཏེར་འབྱུང་འཕྲོད་དང་རྒྱུན་མཐུད་ཆོག་པའི་གསར་སྤེལ་ལ་སྐུལ་འདེད་བཏང་སྟེ། དང་བླངས་ཞབས་ཞུ་དང་ནུས་པ་འཛུགས་སྐྱོང་རྣམ་གྲངས་གཉེར་སྐྱོང་ཁྲོད་མཉམ་འདྲེས་བྱས་ནས། ཁེ་ལས་འཕེལ་རྒྱས་དང་སྡེ་ཁུལ་གྱི་དབུལ་པོ་ཉུང་གཏོང་ལ་མཐུན་སྦྱོར་སྐུལ་འདེད་གཏོང་བའི་ཐབས་ལམ་ཞིག་འཚོལ་ཞིབ་ཐུབ་ཡོད།

གཏེར་ཁུལ་གྱི་གཞོགས་གཞན་ཞིག་ཏུ། ཧྥུའུ་ལུའོ་ལེ་སི་མེ་ལཱ·སོ་ཐོ་མ་གཡོར་གྱིས་བྱང་ཆ་དོད་པོས་སྒྲིག་ཆས་ལྗིད་གྲས་བཀོལ་སྤྱོད་བྱེད་བཞིན་ཡོད། 2015ལོར་ལཱ་སི་མངའ་སྡེའི་པ་སི་ཟངས་གཏེར་འཛུགས་སྐྲུན་གྱི་དུས་མཚམས་སུ་གནས་སྐབས་ཁོ་མོས་རང་འགུལ་ངང་གཏེར་རིའི་ལས་དོན་ལ་ཞུགས་རྒྱུའི་མིང་ཐོ་བཀོད་ཡོད། 2017ལོར་ཁོང་གིས་གཉེར་སྐྱོང་པུའུ་ལ་བསྒྱུར་རྒྱུའི་རེ་ཞུ་ཕུལ་ནས་སྒྲིག་ཆས་ལྗིད་གྲས་བཀོལ་སྤྱོད་ཀྱི་གསོ་སྦྱོང་ནང་ཞུགས་ཡོད། “མི་མང་པོ་ཞིག་གིས་བུད་མེད་ཀྱིས་ལས་ཀ་དེ་འཇོན་གྱི་མ་རེད་ཅེས་ཤོད་མོད། འོན་ཀྱང་ང་ཚོད་ལྟ་ཞིག་བྱེད་འདོད་བྱུང” གསོ་སྦྱོང་མཇུག་འགྲིལ་རྗེས་སོ་ཐོ་མ་གཡོར་གཏེར་ཁུལ་གྱི་སྒྲིག་ཆས་བཀོལ་སྤྱོད་བྱེད་མཁན་བུད་མེད་ཁག་དང་པོའི་གྲས་སུ་གྱུར་ནས། རང་རྐྱ་འཕེར་པོས་ལྗིད་ཐེག་རླངས་འཁོར་དང་། ལམ་བཅག་འཕྲུལ་འཁོར། ཟམ་གཟུགས་ལྗིད་འདེགས་འཕྲུལ་འཁོར་བཅས་གཏོང་ཐུབ་ཀྱི་ཡོད། ཁོ་མོས“གཏེར་རིར་སླེབས་རྗེས་དེ་གར་ལས་ཀ་བྱེད་རྒྱུ་བྱུང་བ་མ་ཟད་གདེང་ཚོད་ཀྱང་ཆེ་རུ་ཕྱིན་སོང་། ད་དུང་རང་ཉིད་ཀྱི་བུ་མོར་རང་གི་ལག་གཉིས་ལ་བརྟེན་ནས་དཀའ་སྤྱད་འབད་བརྩོན་བྱས་ན་འཚོ་བར་འགྱུར་ལྡོག་གཏོང་ཐུབ་ངེས་ཡིན་པ་ཤེས་སུ་འཇུག་གི་ཡོད”ཅེས་བརྗོད།