ཉིང་ཁྲི་གྲོང་ཁྱེར་རྫ་ཡུལ་རྫོང་ཚ་བ་རོང་ཤང་སྲང་ཐ་གྲོང་ཚོར་ཤར་ཕྱོགས་རི་བོའི་རྩེ་ནས་ཞོགས་པའི་ཉི་གཞོན་དལ་གྱིས་འཕགས་ཤིང་། ཞོགས་པ་གྲང་ཟུག་ཅུང་ཆེ་ཡང་ལུས་ལ་མི་རིགས་ཀྱི་གྱོན་ཆས་བཀླུབས་པའི་ཡུལ་མི་ཚོས་གྲོང་ཚོའི་སྒོ་རའི་ནང་གྲ་སྒྲིག་བྱེད་འགོ་ཚུགས། དེའང་ཉིན་འགའི་སྔོན་ལ་ཁོང་ཚོས་ཚ་བ་རོང་མཐའ་མཚམས་མངགས་གཏོང་ཁང་གི་མི་དམངས་ཉེན་རྟོག་པ་ཆེད་མངགས་གདན་དྲངས་ནས་ཁོང་ཚོ་དང་མཉམ་དུ་ཇ་འཐུང་ཞོར་ཅི་འཕྲོས་མོལ་འཕྲོས་བྱ་རྒྱུའི་ཁ་ཆད་བྱས།

“བློ་མཐུན་ཉེན་རྟོག་པ་ལགས་མགྱོགས་པོ་བཞུགས་དང་། ང་ཚོས་བཟོས་པའི་གསོལ་ཇ་བསྲུབས་མ་ཚ་པོ་གང་མཆོད་དང”ཞེས་ཨ་ཅག་སྒྲོལ་མས་ཟངས་ཀྱི་ཇ་དམ་ཞིག་ཁྱེར་ནས་དེ་ལྟར་བཤད་པ་དང་། ཁོང་གི་བཅོས་མིན་གྱི་རྣམ་འགྱུར་ལས་ས་མཐོའི་ཉི་འོད་ལྟར་གྱི་དྲོ་སྐྱིད་ཅིག་ངང་གིས་ཚོར་འོང་། སྤང་གདན་འཇའ་རིས་ཤིག་ཤིག་བཏགས་པའི་བུ་མོ་འགའ་ཞིག་གིས་མི་དམངས་ཉེན་རྟོག་པར་དཀར་གཙང་ཁ་བཏགས་གཡོགས་པ་དང་། ལག་གཉིས་ཀྱིས་ཇ་བསྲུབས་མ་བཀྱགས།

མི་དམངས་ཉེན་རྟོག་པ་ཧུའུ་ཆོན་ཁྲུན་གྱིས་འཛུམ་དམུལ་དམུལ་ངང་ལམ་སེང་ཇ་ཕོར་ཚུར་བླངས་ནས་ཧུབ་གང་བཏུངས། སྒྲོལ་མས་ལག་ཏུ་སེ་འབྲུ་བླུགས་པའི་སྡེར་མ་ཞིག་ཁྱེར་ཏེ་ཧུའུ་ཆོན་ཁྲུན་གྱི་འགྲམ་དུ་བསྡད་ནས“ཁྱེད་ཀྱིས་ང་ཚོའི་དཀའ་ངལ་ཐག་གཅོད་མ་གནང་ཚེ་ཤིང་འབྲས་མང་པོ་ཞིག་ས་འོག་ཏུ་རུལ་རྒྱུ་རང་རེད། ང་ཚོས་སེམས་གཏིང་ནས་ཁྱེད་ལ་ཐུགས་རྗེ་ཆེ་ཞུ་གི་ཡིན”ཞེས་བཤད།

དེ་ནི་2022ལོར་བྱུང་བའི་ཉེན་རྟོག་པ་དང་ཡུལ་མིའི་དབར་གྱི་མི་སེམས་འགུལ་བའི་གཏམ་རྒྱུད་ཅིག་རེད།

སྲང་ཐ་གྲོང་ཚོ་ནི་བོད་དང་ཡུན་ནན་འབྲེལ་མཚམས་ཀྱི་རྒྱལ་མོ་རྔུལ་ཆུའི་ངོགས་སུ་གནས་པ་དང་། ཐན་ཤས་ཆེ་ལ་ཚ་ཤོད་ལུང་གཞུང་གི་གནམ་གཤིས་དེ་སེ་འབྲུ་སོགས་འབྲས་ཤིང་འདེབས་འཛུགས་ཐོན་ལས་འཕེལ་རྒྱས་གཏོང་བར་ཧ་ཅང་འཚམ་པོ་ཡོད། འོན་ཀྱང་ཆེད་ལས་ལག་རྩལ་དང་གཉེར་སྐྱོང་གི་ཉམས་མྱོང་ཞན་པའི་དབང་གིས་སེ་འབྲུའི་ཐོན་ལས་ཀྱི་གཞི་ཁྱོན་ཡུན་རིང་ཆགས་དཀའ་བ་དང་ཁྲོམ་རར་དེ་ཙམ་བྲིན་ཁ་རྒྱུག་པོ་མེད་པས། ཡུལ་མི་རྣམས་རེ་ཞིག་སེམས་ཁྲལ་གྱི་གནས་སུ་གྱུར། སྐབས་དེ་དུས་ཀྱི་མི་དམངས་ཉེན་རྟོག་པ་ཧུའུ་ཆོན་ཁྲུན་གྱིས་དུས་ཡུན་རིང་པོར་ཡུལ་མི་ཚོ་དང་འབྲེལ་གཏུག་གླེང་མོལ་བྱས་པས་མང་ཚོགས་ཀྱི་བསམ་ཚུལ་དང་དཀའ་གནད་ཡོད་དོ་ཅོག་ཁོང་གིས་གསལ་པོར་ཤེས་ཡོད། ཡུལ་མི་ཚོར་འཕེལ་རྒྱས་ཀྱི་དཀའ་གནད་ཐག་གཅོད་བྱེད་རོགས་བྱ་ཆེད། ཁོང་གིས་སེ་འབྲུ་འདེབས་འཛུགས་ལག་རྩལ་རང་སྦྱོང་བྱེད་འགོ་ཚུགས་ཤིང་། དཔྱད་གཞིའི་ཡིག་རིགས་ལྟ་ཀློག་དང་། ཚན་རིག་ཁྱབ་གདལ་གྱི་བརྙན་ཐུང་ལ་བལྟས་ནས་འདེབས་སྟངས་སྦྱོང་བ། འབྲས་ཤིང་ལག་རྩལ་པར་བློ་འདྲི་བཅས་བྱས་པས་འདེབས་འཛུགས་ཀྱི་གནད་འགག་རིམ་བཞིན་ཁོང་དུ་ཆུད་པ་མ་ཟད། གྲོང་ཚོ་དང་དུད་ཚང་ཁག་ཏུ་བསྐྱོད་དེ་ཡུལ་མི་ཚོར་འབྲས་ཤིང་འདེབས་སྟངས་བསླབས་ནས་སྲང་ཐ་གྲོང་ཚོའི་མུའུ་126གི་སེ་འབྲུའི་ལྡུམ་རར་ལོ་ལེགས་ཡོང་བར་རམ་འདེགས་བྱས་པ་རེད།

དེས་མ་ཚད། ཁོང་གིས་ད་དུང་རྒྱལ་ལམ་219ཡི་འགྲིམ་འགྲུལ་ལེགས་ཆར་བརྟེན་ནས་ཕར་རྒྱུག་ཚུར་རྒྱུག་བྱེད་ཞོར་ཡུལ་མི་ཚོར་ཤིང་ཏོག་འཚོང་རོགས་བྱས་མཐར་ཡོང་འབབ་སྒོར་ཁྲི་15རག་པ་རེད། དེ་ལྟར་བྱས་པ་དྲིན་དུ་གཟོ་བའི་ཡུལ་མི་ཚོས་སེམས་རྩ་འཁོལ་བའི་ཞབས་ཞུ་སྒྲུབ་མཁན་དང་དམངས་ལ་ཡོང་འབབ་འཕར་བར་བྱེད་མཁན་མི་དམངས་ཉེན་རྟོག་པ་འདི་སེམས་ལ་བརྟན་པོར་ངེས་ཡོད།

ཇའི་དྲི་ཞིམ་ལམ་ལམ་དུ་འཐུལ་བའི་ཁྲོད་དགོད་སྒྲ་རྒྱུན་ཆད་མེད་པར་གྲགས་ཤིང་། ཉེན་རྟོག་པས་ཡུལ་མི་ཚོ་དང་མཉམ་དུ་བསྡད་ནས་ཚགས་ཤ་སྐམ་པོ་དང་བག་ལེབ་ཟ་གྱིན་དུ་ཚང་མའི་སེམས་གཏིང་གི་སྐད་ཆ་ཉན་བཞིན་མཆིས།

“ཉེ་ཆར། གྲོང་ཚོར་ཕྱོགས་མི་ཁ་ཤས་ཡོང་ནས་སེ་འབྲུ་རིན་གོང་མཐོ་པོས་ཉོ་གི་ཡིན་ཞེས་བཤད་པར་ཚང་མ་ཧ་ཅང་དགའ་པོ་བྱེད་ཀྱི་ཡོད་མོད། འོན་ཀྱང་བློ་བདེ་པོ་མི་འདུག བློ་མཐུན་ཉེན་རྟོག་པ་ལགས། ངས་ཁྱེད་རྣམས་ལ་ཤོད་རྒྱུ་ཡིན་པས་ཁྱེད་ཚོས་ང་ཚོར་དབྱེ་ཞིབ་གནང་རོགས”ཞེས་ཡུལ་མི་བཀྲ་ཤིས་ཀྱིས་གནས་ཚུལ་གྱི་བརྒྱུད་རིམ་ལྷུག་པོར་བཤད། མི་དམངས་ཉེན་རྟོག་པ་ཕུའུ་ཝུན་ཁྲུན་གྱིས་ཞིབ་ཕྲ་ཉན་ཞོར་དུ་ཡུལ་མི་ཚོར་ཐབས་བཟང་བཏོན་པ་དང་། རྒྱུན་མཐོང་གི་མགོ་སྐོར་གཏོང་སྟངས་རྒྱས་བཤད་ཞིབ་ཕྲ་བྱས་ཏེ། ཚང་མས་དོགས་ཟོན་ཆེར་སྐྱེད་ཀྱིས་བཅའ་ཁྲིམས་ལ་བརྟེན་ནས་རང་ཉིད་ཀྱི་ཁེ་དབང་སྲུང་སྐྱོང་བྱེད་དགོས་ལུགས་བསླབས།

དྲོ་འཇམ་ཉི་འོད་རབ་ཏུ་འཕྲོས་པ་དང་བསྟུན་ནས་གཙང་འགྲམ་གྱི་མཉམ་འཛོམས་འདིས་ཉེན་རྟོག་པ་དང་མི་དམངས་ཀྱི་སེམས་པ་དྲོ་སོབ་སོབ་ཅིག་ཆགས། ཚ་བ་རོང་མཐའ་མཚམས་མངགས་གཏོང་ཁང་གི་མི་དམངས་ཉེན་རྟོག་པ་ཚང་མས་དུས་དང་རྣམ་པ་ཀུན་ཏུ་མང་ཚོགས་ཀྱི་དོན་དག་རང་ཉིད་ཀྱི་དོན་དག་ལ་བརྩི་བཞིན་ཡོད། ལོ་ཤས་བསྟུད་མར། མངགས་གཏོང་ཁང་དེས་རིམ་རྩིས་བརྒྱབ་ན་དཀའ་ངལ་ཡོད་པའི་མང་ཚོགས་མི་ཐེངས་4600ལ་རོགས་སྐྱོར་བྱས་ནས་མང་ཚོགས་ལ་དཔལ་འབྱོར་གྱི་གྱོང་གུན་སྒོར་ཁྲི་340ལྷག་ཙམ་མི་ཕོག་པ་བྱས་ཡོད།

“ཡུལ་མི་ཚོའི་དཀའ་ངལ་ང་ཚོས་རྟག་ཏུ་སེམས་ནང་འཇོག་གི་ཡོད་ལ། ཚང་མར་དངོས་དངོས་རྗེན་རྗེན་གྱི་དོན་དག་ཡག་པོ་སྒྲུབ་རོགས་བྱེད་ངེས་ཡིན”ཞེས་ཕུའུ་ཝུན་ཁྲུན་གྱིས་ཟོལ་མེད་ངང་བཤད་པར་ཚང་མའི་དགའ་བསུ་ཐོབ།