འདི་ནི་མངའ་རིས་ཡན་ལག་དམག་ཁུལ་ཁང་གི་མཐའ་སྲུང་ཐོན་ཞིག་གི་དཔུང་དམག་ཚོས་སྐོར་གཡེང་བྱེད་བཞིན་པ།

དཔྱིད་གསར་དུས་ཆེན་དང་བོད་ཀྱི་ལོ་གསར་རིང་། ལྷོ་ཁ་གྲོང་ཁྱེར་ཡུལ་སྨད་ཤང་ཡུལ་སྨད་གྲོང་ཚོའི་ཕྱོགས་གང་སར་ལྒང་བཞུ་དང་ཚོན་དར་གྱིས་བརྒྱན་ནས་དུས་ཆེན་གྱི་རྣམ་པས་ཁེངས་བཞིན་མཆིས།

གྲོང་ཚོ་ཨུ་ལྷན་གྱི་ཀྲུའུ་རེན་ཟླ་བ་སྒྲོལ་མའི་ངོ་གདོང་ནས་དགའ་བའི་འཛུམ་མདངས་འཕྱུར་བཞིན་གསར་འགོད་པར་ད་ལོ་གྲོང་ཚོའི་ནང་གཏམ་བཟང་མང་བ་དང་ལྷག་པར་དུ་ན་ནིང་ལོ་མཇུག་ཏུ་བཏོན་པའི“མཐའ་སྟོབས”སྐོར་གྱི་ཁྲིམས་སྲོལ་ནི“ལོ་གསར་གྱི་ཕྱག་རྟགས་ཤིག་དང་འདྲ་བར་མཐའ་མཚམས་ཡུལ་མིའི་འབྱུང་འགྱུར་འཚོ་བར་རེ་བ་དཔག་མེད་སྦྱིན་ཡོད”ཅེས་བཤད།

2025ལོའི་ཟླ་11ཚེས་28ཉིན། 《རྒྱལ་ཁབ་ཀྱི་མཐའ་བརྟན་མཐའ་དར་དམངས་ཕྱུག་བཅས་ཀྱི་བྱ་སྤྱོད་དཔེ་སྟོན་ཁུལ་འཛུགས་གཏོད་ཀྱི་བོད་རང་སྐྱོང་ལྗོངས་ཀྱི་སྲོལ་ཡིག》(གཤམ་དུ《སྲོལ་ཡིག》ཅེས་བསྡུ་རྒྱུ)ལ་དངོས་སུ་གྲོས་འཆམ་བྱུང་ནས་བོད་ཀྱི“མཐའ་སྟོབས”དོན་ཆེན་ལ་ཞབས་འདེགས་ཞུ་བའི་ཁྲིམས་སྲོལ་གལ་ཆེན་ཞིག་ཏུ་གྱུར་ཡོད།

“མང་ཚོགས་ཚོས་རང་ཉིད་ཀྱི་འདུན་པ་བཅའ་ཁྲིམས་དོན་ཚན་དུ་གྱུར་པ་མཐོང་སྐབས་དགའ་ཚོར་ཆེན་པོ་བྱེད་ཀྱི་འདུག” དེ་ནི་སྤྱི་ཁྱབ་ཧྲུའུ་ཅིའི་འཕྲིན་ལན་གལ་ཆེན་གྱི་དགོངས་དོན་གྱི་ཁྲིད་སྟོན་འོག་བོད་ཀྱི་མི་རིགས་ཁག་གི་ལས་བྱེད་པ་དང་མང་ཚོགས་ཚོས་སེམས་ཤུགས་གཅིག་སྒྲིལ་དང་མཐུན་སྒྲིལ་འབད་འཐབ་བྱས་པའི་འབྲས་བུ་ཞིག་རེད་ཅེས་ཟླ་བ་སྒྲོལ་མས་བཤད།

2017ལོར་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་སྒྲོལ་དཀར་དང་གཡང་འཛོམས་གཅེན་གཅུང་གཉིས་ལ་འཕྲིན་ལན་སྤྲིངས་ནས“ཁྱེད་ཚོས་རྒྱལ་གཅེས་མཐའ་སྲུང་གི་སྙིང་སྟོབས་མུ་མཐུད་རྒྱུན་འཛིན་བྱས་ཏེ་འབྲོག་པ་མང་ཚོགས་དེ་བས་མང་བ་སྐལ་བཟང་མེ་ཏོག་ཇི་བཞིན་གངས་ལྗོངས་ཀྱི་མཐའ་མཚམས་སུ་རྩ་བ་ཚུགས་པར་སྣེ་ཁྲིད་བྱས་ཏེ་བླ་ན་མེད་པའི་རྒྱལ་ཁབ་ཀྱི་ས་ཆ་སྲུང་མཁན་དང་བདེ་སྐྱིད་ལྡན་པའི་ཁྱིམ་གཞིས་སྐྲུན་མཁན་ཞིག་བྱེད་རྒྱུའི་རེ་བ་ཡོད”ཅེས་གསུངས་ཡོད།

“རྒྱལ་ཁབ་སྐྱོང་བར་ངེས་པར་དུ་མཐའ་མཚམས་སྐྱོང་དགོས་པ་དང་མཐའ་མཚམས་སྐྱོང་བར་སྔོན་ལ་བོད་ལྗོངས་བརྟན་ལྷིང་ཡོང་བ་བྱེད་དགོས” 《སྲོལ་ཡིག》བཏོན་ནས་ལག་བསྟར་བྱས་པ་དེས་དུས་རབས་གསར་པའི་ཏང་གི་བོད་སྐྱོང་མཛད་ཇུས་ལག་བསྟར་དོན་འཁྱོལ་བྱ་རྒྱུར་ཁྲིམས་སྐྱོང་གི་འགན་སྲུང་བརྟན་པོ་མཁོ་འདོན་བྱས་ནས་མཐའ་མཚམས་མི་དམངས་འབྱོར་ཕྱུག་དང་། མཐའ་མཚམས་མཛེས་སྡུག་ལྡན་པ། མཐའ་མཚམས་བརྟན་ལྷིང་། མཐའ་སྲུང་སྲ་བརྟན་བཅས་ཀྱི་རྣམ་པ་གསར་རྐྱང་ཞིག་ཆགས་པར་གདོན་མི་ཟ།

བོད་ཀྱིས“མཐའ་སྟོབས”བརྗོད་དོན་གཙོ་བོར་བྱས་པའི་ཁྲིམས་སྲོལ་ཞིག་བཏོན་དགོས་དོན་གང་ཡིན་ནམ།

བོད་ནི་རང་རྒྱལ་གྱི་རྒྱལ་ཁབ་ཀྱི་བདེ་འཇགས་སྲུང་བཅད་གལ་ཆེན་ཞིག་ཡིན་པ་དང་མཐའ་མཚམས་ཀྱི་རིང་ཚད་ལ་སྤྱི་ལེ་4000ལྷག་ཙམ་ཡོད།

བོད་ལྗོངས་མི་རིགས་སློབ་ཆེན་ཨེ་ཤེ་ཡ་ལྷོ་མའི་ཞིབ་འཇུག་ཁང་གི་ལིའུ་ཤིང་ཅུན་གྱིས“ས་ཁམས་དང་ལོ་རྒྱུས་ཀྱི་རྒྱུ་རྐྱེན་དབང་གིས་སྲོལ་རྒྱུན་གྱི་བདེ་འཇགས་གནད་དོན་དང་སྲོལ་རྒྱུན་མིན་པའི་བདེ་འཇགས་གནད་དོན་ལྷོ་ནུབ་མཐའ་མཚམས་ས་ཁུལ་དུ་མཉམ་དུ་གནས་པར་བརྟེན། བོད་ཀྱི་སྤྱི་པའི་བདེ་འཇགས་ལ་འཕྲད་པའི་ཉེན་ཁ་དང་འགྲན་སློང་ཛ་དྲག་ལ་རྙོག་འཛིང་ཆེ་བས། མཐའ་མཚམས་འཛུགས་སྐྲུན་གྱི་ཞན་ཆ་དང་འཕེལ་རྒྱས་ཀྱི་ཞན་ཆ་སེལ་བ་དང་རྒྱལ་སྲུང་ནུས་པ་འཛུགས་སྐྱོང་ལ་ཤུགས་སྣོན་རྒྱག་རྒྱུ་ནི་ཁ་ཚ་དགོས་གཏུགས་ཀྱི་བྱ་བ་ཞིག་ཡིན”ཞེས་བཤད།

དུས་ཡུན་རིང་པོའི་ནང་བོད་ཀྱིས་དམག་དཔུང་འདུས་སྡོད་དང་མི་དམངས་བདེ་འཁོད་མཉམ་སྤེལ་དང་མཐའ་བརྟན་མཐའ་དར་གལ་ཆེ་མཉམ་དུ་འཛིན་རྒྱུ་མཐའ་འཁྱོངས་བྱས་ཏེ། མཐའ་བརྟན་མཐའ་དར་དམངས་ཕྱུག་བཅས་ཀྱི་བྱ་སྤྱོད་ལག་བསྟར་གཏིང་ཟབ་བྱས་པས་མཐའ་མཚམས་ས་ཁུལ་གྱི་རྨང་གཞིའི་སྒྲིག་བཀོད་འཛུགས་སྐྲུན་དང་། ཐོན་ལས་འཕེལ་རྒྱས། དམངས་ཕྱུག་བྱེད་ཐབས་བཅས་ལ་གྲུབ་འབྲས་མངོན་གསལ་དོད་པོ་ཐོབ་ཡོད།

མིག་སྔའི་བར། བོད་ཀྱི་མཐའ་མཚམས་འབྱོར་འབྲིང་གྲོང་ཚོ་624ཚང་མ་བསྐྲུན་ཟིན་པ་དང་། མཐའ་མཚམས་ཀྱི་ཤང་དང་གྲོང་རྡལ་དང་སྒྲིག་ཁོངས་གྲོང་ཚོ་ཚང་མར་གཞུང་ལམ་ཤར་གཏོང་ཐུབ་པ། གློག་དྲ་གཙོ་བོ་མཐའ་མཚམས་ཤང་དང་གྲོང་རྡལ་ཚང་མར་ཁྲིད་པ། དྲ་ཆེན་ཁྲིད་ཚད་དང་4Ｇབརྡ་རྟགས་ཁྱབ་ཚད་100%ཟིན་ཡོད་ལ། མཐའ་མཚམས་རྫོང་21གི་གྲོང་གསེབ་མི་འབོར་གྱི་འཐུང་ཆུའི་བདེ་འཇགས་འགན་ལེན་ཐུབ་ཡོད་ལ་མཐའ་མཚམས་ས་ཁུལ་གྱི་ཤང་དང་གྲོང་རྡལ་གྱི་འཕྲོད་བསྟེན་ཁང་ཚད་ལྡན་ཅན་དུ་བསྐྲུན་ཡོད།

“‘མཐའ་སྟོབས’ནི་དུས་རབས་གསར་པའི་ཏང་གི་བོད་སྐྱོང་མཛད་ཇུས་ཀྱི་ནང་དོན་གལ་ཆེན་ཞིག་ཡིན”རང་སྐྱོང་ལྗོངས་མི་དམངས་འཐུས་ཚོགས་ཁྲིམས་ལུགས་ཨུ་ལྷན་གྱི་ཀྲུའུ་རེན་ཨུ་ཡོན་གཡུང་བཀྲ་ཡིས། མཐའ་སྟོབས་ལས་དོན་ལ་གྲུབ་འབྲས་ཐོབ་པའི་ཉམས་མྱོང་དང་བྱེད་ཐབས་ལམ་ལུགས་སུ་འགྱུར་བ་བྱེད་པ་དང་འབྲེལ་ཡུན་རིང་ལག་བསྟར་བྱ་རྒྱུ་དེ་ནི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བོད་ལ་ཁ་གསལ་བཏོན་གནང་བའི“མཐའ་སྟོབས”ཀྱི་དོན་ཆེན་དེར་ཁྲིམས་སྐྱོང་གི་ཐོག་ནས་སྐུལ་འདེད་བཏང་བ་ཞིག་ཡིན་ལ། རང་སྐྱོང་ལྗོངས་ཏང་གི་འཐུས་མི་ཚོགས་ཆེན་ཐེངས་བཅུ་པ་འཚོགས་ཚུན་ལྗོངས་ཡོངས་ཀྱི་མཐའ་བརྟན་མཐའ་དར་དམངས་ཕྱུག་བཅས་བྱ་སྤྱོད་ཀྱི་གྲུབ་འབྲས་ལ་ཕྱོགས་སྡོམ་བྱས་པ་ཞིག་ཀྱང་རེད་ཅེས་བཤད།

རྒྱལ་ཁབ་ཀྱི་བདེ་འཇགས་སྲུང་བཅད་བརྟན་དུ་གཏོང་བའི་བཅའ་ཁྲིམས་དེ་ཇི་ལྟར་བྱས་ནས་བཟོས་པ་ཡིན་ནམ།

“གཞི་རིམ་མི་དམངས་འཐུས་ཚོགས་ཀྱི་འཐུས་མི་དང་མཐའ་མཚམས་རྫོང་གི་ལས་དོན་པ་ཞིག་ཡིན་པའི་ངས་ཁོངས་གཏོགས་ཁུལ་གྱི་མཐའ་མཚམས་མང་ཚོགས་ལ་བཅར་འདྲི་དང་མཐའ་མཚམས་གྲོང་ཚོར་བརྟག་ཞིབ་ཐེངས་མང་བྱེད་སྐབས་ཚང་མས་གླེང་མང་ཤོས་དང་ཁ་ཚ་དགོས་གཏུག་གི་གནད་དོན་གཙོ་བོ་གསུམ་ཡོད་པ་སྟེ། གཅིག་ནི་མཐའ་མཚམས་ཀྱི་རྨང་གཞིའི་སྒྲིག་བཀོད་སྔར་བས་འཐུས་སྒོ་ཚང་དུ་གཏོང་དགོས་པ་དང་། གཉིས་ནི་མཐའ་མཚམས་མང་ཚོགས་ཀྱི་ཁེ་དབང་འགན་སྲུང་བྱེད་ཤུགས་ཆེ་རུ་གཏོང་དགོས་པ། གསུམ་ནི་མཐའ་མཚམས་ཐོན་ལས་འཕེལ་རྒྱས་ལ་སྐུལ་འདེད་མགྱོགས་སུ་གཏོང་དགོས་པ་བཅས་ཡིན”ཞེས་རང་སྐྱོང་ལྗོངས་མི་དམངས་འཐུས་ཚོགས་ཀྱི་འཐུས་མི་ཏོའུ་སྒྲོལ་མས་བཤད།

2022ལོར་རང་སྐྱོང་ལྗོངས་ཀྱིས《རྒྱལ་ཁབ་ཀྱི་མཐའ་བརྟན་མཐའ་དར་དམངས་ཕྱུག་བཅས་ཀྱི་བྱ་སྤྱོད་དཔེ་སྟོན་ཁུལ་འཛུགས་གཏོད་ལ་ཤུགས་སྣོན་རྒྱག་རྒྱུའི་སྐོར་གྱི་ལག་བསྟར་བསམ་འཆར》བཏོན་ནས། “མཐའ་མཚམས་ས་ཁུལ་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་སྐུལ་འདེད་གཏོང་བ་དང་། མཐའ་སྟོབས་མཐའ་བརྟན། མཐའ་སྲུང་མཐའ་བརྟན། མཐའ་དར་དམངས་ཕྱུག་བཅས་ཀྱི་གཙོ་རྐང་དེར་དམ་པོར་དམིགས་པ་དང་། དམངས་འཚོ་ལེགས་གཏོང་དང་མི་སེམས་གཅིག་སྒྲིལ་བྱ་རྒྱུ་དེ་འགོ་འཛུགས་ས་དང་དོན་ལ་བབས་སར་བྱེད་པ། མཐའ་བརྟན་མཐའ་དར་དམངས་ཕྱུག་བཅས་ཀྱི་བྱ་སྤྱོད་ལ་སྐུལ་འདེད་གཏོང་བ་བཅས་བྱས་ཏེ་མཐའ་བརྟན་མཐའ་དར་དམངས་ཕྱུག་བཅས་ཀྱི་བྱ་སྤྱོད་རྒྱལ་ཡོངས་ཀྱི་མདུན་གྲལ་དུ་སླེབས་ཐུབ་པར་བྱེད་དགོས”ཞེས་བཏོན་ཡོད།

དུས་འགོའི་ལས་དོན་གྱི་རྨང་གཞིའི་ཐོག་2024ལོའི་ལོ་འགོར《སྲོལ་ཡིག》གི་ཁྲིམས་འཛུགས་ལས་དོན་སྤེལ་འགོ་ཚུགས་ཏེ། ཁྲིམས་འཛུགས་ལས་དོན་གྱི་འགོ་ཁྲིད་ཚོགས་ཆུང་བཙུགས་པ་དང་ལས་དོན་གྱི་ཆེད་བསྐོས་ཚན་ཁག་བཙུགས་ཡོད་ལ། ཆེད་དོན་ཚོགས་འདུ་ཐེངས་མང་འཚོགས་ནས་ཁྲིམས་འཛུགས་ཀྱི་བསམ་ཕྱོགས་དང་སྒྲོམ་གཞིའི་ཐད་བགྲོ་གླེང་བྱས་ཡོད། ས་ཁུལ་དང་གྲོང་ཁྱེར་བདུན་དང་ལྷག་པར་དུ་མཐའ་མཚམས་རྫོང་ཆུས་དང་གཞི་རིམ་ཁྲིམས་འཛུགས་འབྲེལ་གཏུག་ས་ཚིགས་བཅས་སུ་བསྐྱོད་དེ་ས་གནས་ས་ཐོག་ཏུ་བརྟག་ཞིབ་བྱས་ནས་བསམ་འཆར་བསྡུ་ལེན་རྒྱ་ཁྱབ་དང་འཐབ་ས་དང་པོའི་བསམ་འཆར་བསྡུ་རུབ་བྱས་ཡོད། སྤུན་ཟླའི་ཞིང་ཆེན་དང་གྲོང་ཁྱེར་དུ་སྤེལ་རེས་དང་རྟོག་ཞིབ་བྱེད་པར་བསྐྱོད་ནས་འབྲེལ་ཡོད་ཀྱི་ཉམས་མྱོང་དང་བྱེད་ཐབས་སློབ་སྦྱོང་བྱས་ཡོད།

《སྲོལ་ཡིག》མགྱོགས་མྱུར་འདོན་རྒྱུར་སྐུལ་འདེད་གཏོང་ཆེད། འབྲེལ་ཡོད་སྡེ་ཚན་གྱིས་བསམ་འཆར་བསྡུ་ལེན་གྱི་བཞུགས་མོལ་ཚོགས་འདུ་ཐེངས་20འཚོགས་པ་དང་། ཁྲིམས་འཛུགས་བརྟག་ཞིབ་ཐེངས་5བྱས་པ། ཆེད་དོན་བརྟག་ཞིབ་སྙན་ཞུ་5སྤེལ་བ། བསམ་འཆར་དང་གྲོས་འགོ་1181བསྡུ་རུབ་བྱས་པ་དང་འབྲེལ། སློབ་སྦྱོང་ནན་ཏན་དང་། ཞིབ་འཇུག་གཏིང་ཟབ། དང་ལེན་གང་ལེགས་བཅས་བྱས་ཏེ་བཅའ་ཁྲིམས་ཀྱི་དོན་ཚན་སྲིད་ཇུས་ཀྱི་བླང་བྱ་དང་བོད་ཀྱི་དོན་དངོས་དང་མཐུན་པའི་འགན་ལེན་བྱས་པ་རེད།

གང་འདྲ་བྱས་ཏེ་ཁྲིམས་བཟང་སྐྱོང་མཁས་བྱས་ནས་བོད་ཡུན་རིང་བདེ་འཁོད་ཡོང་བའི་རྨང་གཞི་བརྟན་དུ་གཏོང་དགོས་སམ།

《སྲོལ་ཡིག》བཏོན་པ་ཤེས་རྗེས། རང་སྐྱོང་ལྗོངས་མི་དམངས་འཐུས་ཚོགས་ཀྱི་འཐུས་མི་ལི་ཤིས་ཅུན་དགའ་ཚོར་ཆེན་པོ་བྱུང་ནས་འཕྲལ་མར་སློབ་སྦྱོང་བྱེད་འགོ་ཚུགས་པ་རེད།

གཞིས་རྩེ་གྲོང་ཁྱེར་གྲོ་མོ་རྫོང་ཤར་གསིང་མ་གྲོང་རྡལ་ཤར་གསིང་མ་སྡེ་ཁུལ་གྱི་ཕྱུག་འགྱུར་སྣེ་ཁྲིད་པ་ལི་ཤིས་ཅུན་གྱིས་ས་གནས་དེ་གའི་མང་ཚོགས་ཀྱི་སྣེ་ཁྲིད་དེ་ཡུལ་བབ་དང་བསྟུན་ནས་ཉ་གསོ་ཚགས་ཐོན་ལས་སོགས་མཉམ་སྡེབ་དཔལ་འབྱོར་འཕེལ་རྒྱས་བཏང་བས། རིམ་རྩིས་བརྒྱབ་ན་སྡེ་ཁུལ་ལ་འབབ་འཕར་སྒོར་ཁྲི་200ཟིན་རྒྱུར་སྐུལ་ཁྲིད་བྱས་ཡོད་པ་རེད།

ལི་ཤིན་ཅུན་གྱིས“《སྲོལ་ཡིག》གི་ལེའུ་བཞི་པའི་ནང‘དམངས་ཕན་དམངས་ཕྱུག’ལ་དམིགས་ནས་ལས་དོན་བཀོད་སྒྲིག་བྱས་པས་དེ་ནི་གོ་བདེ་ཞིང་ཤེས་སླ་བ་ཞིག་འདུག ལྷག་པར་དུ་དོན་ཚན་ཞེ་གཉིས་པའི་ནང་ཆ་རྐྱེན་འཛོམས་པའི་མཐའ་མཚམས་ས་ཁུལ་གྱིས་འདེབས་འཛུགས་ལས་རིགས་དང་། གསོ་ཚགས་ལས་རིགས། ནགས་གསེབ་དཔལ་འབྱོར། མི་རིགས་ལག་ཤེས་བཟོ་ལས་སོགས་ཁྱད་ལྡན་ཐོན་ལས་འཕེལ་རྒྱས་གཏོང་རྒྱུར་སྔོན་ལ་རྒྱབ་སྐྱོར་བྱས་ཏེ། མཐའ་མཚམས་མི་སེར་གྱི་འབབ་འཕར་ཐབས་ལམ་རྒྱ་ཆེར་བཏང་ནས་མཐའ་མཚམས་ས་ཁུལ་འཕེལ་རྒྱས་ཀྱི་ནང་གནས་སྒུལ་ཤུགས་འཕེལ་བ་བྱེད་དགོས་ཞེས་བཏོན་ཡོད། དེས་འཕེལ་རྒྱས་ཀྱི་གཏིང་ཤུགས་དང་གདེང་ཚོད་ཧ་ཅང་ཆེ་རུ་ཕྱིན་ཡོད”ཅེས་ངོ་སྤྲོད་བྱས་པ་རེད།

“སྤྱི་ཡོངས་ནས་བརྗོད་ན། 《སྲོལ་ཡིག》གི་ཁྲིམས་འཛུགས་དམིགས་ཡུལ་དང‘མཐའ་སྲུང་མཐའ་བརྟན’གྱི་བསམ་ཕྱོགས་ཁ་གསལ་བ་དང‘མཐའ་མཚམས་དར་རྒྱས’ཀྱི་འགན་འཁྲི་ཁ་གསལ་བ། ‘དམངས་ཕན་དམངས་ཕྱུག’གི་བྱེད་ཐབས་སྤྱོད་གོ་ཆོད་པ། ‘འགན་ལེན་ལྟ་སྐུལ’གྱི་བྱེད་ཐབས་གོ་ཆོད་པས། དེ་ནི་བོད་ཀྱི་ལྗོངས་བབ་དང་འཚམ་པའི་བཅའ་ཁྲིམས་ཡག་པོ་ཞིག་རེད”ཅེས་རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་ཁྲིམས་འཛུགས་བློ་འདྲིའི་རིགས་གཅིག་མཁས་ཅན་དང་བོད་ལྗོངས་མི་རིགས་སློབ་ཆེན་གྱི་དགེ་རྒན་ཆེ་མོ་བ་ཧུའུ་མིང་གིས་བརྗོད་པ་རེད།

དེར་བརྟེན《སྲོལ་ཡིག》ལག་བསྟར་དང་དོན་འཁྱོལ་བྱེད་སྐབས“མཐའ་བརྟན”དང་། “མཐའ་དར” “དམངས་ཕྱུག”བཅས་དབར་གྱི་འབྲེལ་བ་ཐག་གཅོད་ཡག་པོ་བྱེད་དགོས་པར། སྲིད་ཇུས་ལག་བསྟར་བྱ་རྒྱུར་སྐུལ་འདེད་ཏན་ཏིག་བཏང་ནས་རྒྱལ་ཁབ་ཀྱི་བདེ་འཇགས་སྲུང་བཅད་བརྟན་དུ་གཏོང་དགོས་ལ། མཐའ་མཚམས་མང་ཚོགས་ཀྱི་ཟས་གོས་སྡོད་གསུམ་ལ་དོ་ཁུར་བྱས་ཏེ་ཚང་མའི་ཡོང་འབབ་མང་དུ་གཏོང་བ་དང་འཚོ་བ་སྐྱིད་པོ་ཡོང་བའང་བྱེད་དགོས།