གསར་འགོད་པར་ལྷ་ས་འགག་སྒོ་ལས་ཁུངས་ནས་ཤེས་རྟོགས་བྱུང་བར། 2025ལོར་བོད་ཀྱི་འགག་སྒོ་ཁག་བརྒྱུད་རྒྱལ་ཐོན་ནུས་གསར་རླངས་འཁོར་12938ཕྱིར་གཏོང་བྱས་པ་དེ་དུས་མཚུངས་ལས་6.8%འཕར་ཏེ། ལོ་རྒྱུས་ཀྱི་ཟིན་ཐོ་གསར་པ་བཏོད་ནས་བོད་ཀྱི་ཕྱི་ཕྱོགས་ཚོང་དོན་གྱི་ཕྱིར་གཏོང་གི་བཀྲག་མདངས་འཚེར་བའི་ཐོན་རྫས་ཤིག་ཏུ་གྱུར་ཡོད།

2025ལོའི་ཟླ་བ་གསུམ་པར་རྒྱལ་ཐོན་ནུས་གསར་རླངས་འཁོར་150བླུགས་པའི་ཨེ་ཤེ་ཡ་ལྷོ་མའི་དུས་གཏན་མེ་འཁོར་ཞིག་ཀྲེང་ཀྲོའུ་ནས་ཐོན་ཏེ་གཞིས་རྩེའི་རྒྱལ་སྤྱིའི་སྐམ་སའི་གྲུ་ཁར་འབྱོར་བ་དང་། ལྷ་ས་འགག་སྒོ་ལས་ཁུངས་ཀྱིས་བཏོན་པའི“སྐམ་སའི་གྲུ་ཁར་རེ་འདུན་ཞུ་བ་དང་། ཁོངས་གཏོགས་ཁུལ་གྱིས་ཞིབ་བཤེར་བྱེད་པ། འགག་སྒོ་ནས་ཐད་ཀར་གཏོང་བ”བཅས་ཀྱི་བྱེད་སྟངས་བརྒྱུད་ནེ་པ་ལར་ཕྱིར་གཏོང་བྱས་པ་དེ་ཐོག་ནས་བོད་ཀྱི་ནུས་གསར་རླངས་འཁོར་ཕྱིར་གཏོང་བྱེད་པ་དེ“དུས་གཏན་མེ་འཁོར་གྱི་དུས་རབས”སུ་སླེབས་པ་མཚོན་ཡོད། བྱེད་སྟངས་དེ་ལས་རྒྱལ་ཐོན་ནུས་གསར་རླངས་འཁོར་ཉིན་10ཡི་ནང་ཚུན་དུ་ཐོན་སྐྱེད་བྱེད་ས་ནས་ཐད་ཀར་ནེ་པ་ལར་སྐྱེལ་ཐུབ་ནས་རྒྱལ་མཚམས་སྒྲོལ་བའི་སྐྱེལ་འདྲེན་གྱི་ལས་ཕྱོད་ཆེ་རུ་ཤུགས་ཆེན་ཕྱིན་པ་མཚོན་ཡོད།

ཕྱིར་གཏོང་འགག་སྒོ་གཙོ་བོའི་གྲས་ཤིག་ཡིན་པའི་འགྲམ་འགག་སྒོས་ནུས་གསར་རླངས་འཁོར་ཕྱིར་གཏོང་ལ་སྐུལ་འདེད་གཏོང་བའི་ཐད་ནུས་པ་ཆེན་པོ་བཏོན་ཡོད། ནུས་གསར་རླངས་འཁོར་ཕྱིར་གཏོང་ལ་སྤུས་འབྲས་ལེགས་གཉེར་ཡོང་བར་རམ་འདེགས་བྱ་ཆེད། གཉའ་ནང་འགག་སྒོས“འགག་སྒོའི་ཀོན་ཀྲང་གིས་སྲིད་ཇུས་སྒོ་རྩར་དྲིལ་བསྒྲགས”དང“གཅིག་གཏད་གཅིག་གི་འགག་སྒོ་དང་ཁེ་ལས་འབྲེལ་གཏུག་བྱེད་པ”སོགས་ཀྱི་ལམ་སྲོལ་བརྒྱུད། ཁེ་ལས་ལ་ནུས་གསར་རླངས་འཁོར་གྱི་ལྷུ་ལག་ཕྱིར་གཏོང་གི་ལས་སྒོ་རྒྱ་ཆེར་གཏོང་བར་མཛུབ་ཁྲིད་ཧུར་ཐག་བྱས་པ་མ་ཟད། “སྔ་སྣུར་ནས་རེ་འདུན་ཞུ་བ་དང་། ལག་ཁྱེར་རྐྱང་པ་སྔོན་ཚུད་ནས་ཞིབ་བཤེར་བྱེད་པ། འབྱོར་འཕྲལ་ཞིབ་བཤེར་བྱེད་པ”སོགས་ཀྱི་སྟབས་བདེ་ཅན་གྱི་བྱེད་ཐབས་མཉམ་དུ་སྤེལ་ནས་འགག་སྒོ་སྒྲོལ་བའི་དུས་ཚོད་རྒྱུན་ཆད་མེད་པར་ཐུང་དུ་བཏང་ཡོད། 2025ལོར། འགྲམ་འགག་སྒོ་ནས་རྒྱལ་ཐོན་ནུས་གསར་རླངས་འཁོར་6048ཕྱིར་གཏོང་བྱས་པ་དེ་དུས་མཚུངས་ལས་33.36%འཕར་ཡོད་པ་རེད།