ཤིན་ཧྭ་གསར་འགྱུར་ཁང་པེ་ཅིང་ནས་ཟླ་2ཚེས་28ཉིན་གློག་འཕྲིན་འབྱོར་གསལ། ཟླ་3ཚེས་1ཉིན་དཔེ་སྐྲུན་བྱས་པའི《བདེན་འཚོལ》དུས་དེབ་འདོན་ཐེངས་ལྔ་པའི་ཐོག ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི་དང་། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་ཨུད་ཀྱི་ཀྲུའུ་ཞི་བཅས་ཡིན་པའི་ཞི་ཅིན་ཕིང་གི་རྩོམ་ཡིག་གལ་ཆེན《འགན་འཁྲི་འཁུར་འདོད་པ་དང་། འགན་འཁྲི་འཁུར་ཕོད་པ། འགན་འཁྲི་འཁུར་མཁས་པ་བཅས་སྲོལ་བཟང་དུ་འགྱུར་བ་བྱེད་དགོས》ཞེས་པ་བཀོད་ཡོད་པ་རེད། དེ་ནི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་2012ལོའི་ཟླ་12པ་ནས་2025ལོའི་ཟླ་12པའི་བར་གྱི་འབྲེལ་ཡོད་རྣམ་བཤད་གལ་ཆེན་གྱི་གནས་བཏུས་ཤིག་རེད།

རྩོམ་ཡིག་ནང་ནན་བཤད་བྱས་དོན། དངོས་སྒྲུབ་ཀྱིས་རྒྱལ་ཁབ་དར། སྟོང་བཤད་ཀྱིས་རྒྱལ་དོན་འཕྱུགས། ཏང་གི་ཚོགས་ཆེན་ཉི་ཤུ་པའི་ཐོག་བཀོད་པའི་བརྗིད་ཆེའི་འཆར་གཞི་དེ་མཛེས་སྡུག་ལྡན་པའི་དོན་དངོས་སུ་འགྱུར་བར་རིམ་ཁག་འགོ་ཁྲིད་ལས་བྱེད་པས་རང་འགན་ཐེག་པ་ཁུར་ལེན་བྱེད་དགོས། རྒྱང་ལམ་གསར་པར་བདེ་ཞིང་སྙོམས་པའི་ལམ་ཆེན་ཤ་སྟག་ཡིན་མི་སྲིད། ང་ཚོར་འགྲན་སློང་གལ་ཆེན་དང་། ཉེན་ཁ་གལ་ཆེན། འགོག་རྐྱེན་གལ་ཆེན། འགལ་བ་གལ་ཆེན་བཅས་མང་པོ་འཕྲད་ངེས་པས། འགོ་ཁྲིད་ལས་བྱེད་པར་ངེས་པར་དུ་ཐེག་པ་ཁུར་ལེན་གྱི་སྙིང་སྟོབས་ཆེན་པོ་ལྡན་དགོས། རིམ་ཁག་འགོ་ཁྲིད་ལས་བྱེད་པས་ལུས་པོ་ཏང་ལ་འབུལ་བ་དང་ཉིན་མཚན་མེད་པར་སྤྱི་དོན་དུ་གཞོལ་ནས། དུས་དང་རྣམ་པ་ཀུན་ཏུ་སེམས་ཁྲལ་བྱེད་པའི་འགན་འཁྲིའི་སེམས་པ་དང་རང་འགན་ཐེག་པ་ཁུར་ལེན་ཧུར་ཐག་བྱེད་པའི་སྙིང་སྟོབས་ཀྱིས་ཏང་དང་མི་དམངས་ཀྱི་ཆེད་དུ་འགན་འཁྲི་གཙང་སྒྲུབ་དང་འགན་འཁྲི་ཡག་པོ་ཁུར་དགོས།

རྩོམ་ཡིག་ནང་བསྟན་དོན། ལས་བྱེད་པས་རང་འགན་ཐེག་པ་ཁུར་ལེན་བྱེད་ཕོད་པ་ནི་ཆབ་སྲིད་ཀྱི་གཤིས་རྒྱུད་རེད་ལ་སྲིད་སྐྱོང་གི་འགན་འཁྲི་ཞིག་ཀྱང་རེད། ཐེག་པ་ཁུར་ལེན་ཇི་ཙམ་ཆེ་ན་དེ་ཙམ་གྱིས་བྱ་གཞག་ཆེ་བ་སྒྲུབ་ཐུབ་པ་དང་། འགན་འཁྲི་ཇི་ཙམ་ཁུར་ན་དེ་ཙམ་གྱིས་གྲུབ་འབྲས་གཏོད་ཐུབ། དཔོན་པོ་ཁོ་ན་བྱེད་བསམ་པ་ལས་ལས་ཀ་བྱེད་མི་འདོད་པ་དང་། དབང་ཆ་ཁོ་ན་འཛིན་བསམ་པ་ལས་འགན་འཁྲི་འཁུར་མི་འདོད་པ། གཟི་བརྗིད་ཁོ་ན་བསམ་པ་ལས་ནུས་ཤུགས་འདོན་མི་འདོད་པ་བཅས་བྱེད་མི་རུང་། ཏང་ལ་ལྷག་བསམ་རྣམ་དག་དང་། ཏང་གི་སེམས་ཁྲལ་སེལ་བ། ཏང་གི་ཆེད་དུ་འགན་འཁྲི་སྒྲུབ་པ། དམངས་ལ་བདེ་སྐྱིད་སྐྲུན་པ་བཅས་ཀྱི་ཆབ་སྲིད་ཀྱི་ཐེག་པ་ཁུར་ལེན་དང་། ས་ཁོངས་སྲུང་བའི་འགན་འཁྲི་ཡོད་པ་དང་། ས་ཁོངས་སྲུང་བའི་འགན་འཁྲི་ཁུར་བ། ས་ཁོངས་སྲུང་བའི་འགན་འཁྲི་སྒྲུབ་པ་བཅས་ཀྱི་རང་འགན་ཐེག་པ་ཁུར་ལེན་ལ་བརྟེན་ནས། ཡིན་མིན་ཆེན་པོའི་མདུན་དུ་རལ་གྲི་འཕྱར་ཕོད་པ་དང་། འགལ་བའི་མདུན་དུ་དཀའ་བར་མི་འཛེམ་པར་མདུན་དུ་སྐྱོད་ཕོད་པ། ཉམས་ཉེན་གྱི་མདུན་དུ་འཛེམ་བག་མེད་པར་དོན་ཕོད་པ། ནོར་འཁྲུལ་གྱི་མདུན་དུ་འགན་འཁྲི་ཁུར་ཕོད་པ། ཚུལ་མིན་སྤྱོད་ཚུལ་གྱི་མདུན་དུ་འཐབ་རྩོད་མཐའ་གཅིག་ཏུ་བྱེད་ཕོད་པ་བཅས་བྱེད་དགོས། འགོ་ཁྲིད་ལས་བྱེད་པས་རང་འཁྲིའི་ལས་གནས་ཐོག་སྲིད་གཉེར་འགན་སྒྲུབ་བྱེད་པ་དང་། འགན་འཁྲིའི་ཁྱབ་ཁོངས་ནང་རང་འགུལ་ངང་འགན་ལྕི་ཁུར་ལེན་དང་དཀའ་ངལ་བཟོད་ཕོད་པ་བྱེད་དགོས། ཏང་གཤིས་ཀྱི་རྩ་དོན་མཐའ་འཁྱོངས་བྱས་ཏེ་བདེན་རྫུན་དབྱེ་འབྱེད་གསལ་པོ་དང་འཐབ་རྩོད་བྱེད་ཕོད་པ་བྱས་ནས། གནད་དོན་གལ་ཆེན་དང་རྩ་དོན་གྱི་གནད་དོན་ཐད་དར་ཆ་གསལ་སྟོན་བྱེད་དགོས།

རྩོམ་ཡིག་ནང་བསྟན་དོན། འགོ་ཁྲིད་ལས་བྱེད་པར་ཐེག་པ་ཁུར་ལེན་གྱི་ཕྲག་པ་བརྟནཔོ་ཞིག་དགོས་པ་མ་ཟད། ད་དུང་བྱ་བ་སྒྲུབ་ཐུབ་པའི་འཇོན་ཐང་ངོ་མ་ཡང་ཡོད་དགོས། བློ་ཁོག་ཆེན་པོས་ཆབ་སྲིད་ལ་སྣང་ཆེན་བྱེད་དགོས་ལ། ཆབ་སྲིད་ལ་སྣང་ཆེན་བྱེད་མཁས་པོ་ཡང་བྱེད་དགོས། འཕེལ་རྒྱས་ལ་བློ་བརྟན་འགྱུར་མེད་ཀྱིས་དམ་འཛིན་བྱེད་དགོས་ལ། འཕེལ་རྒྱས་ལ་དམ་འཛིན་བྱེད་མཁས་པོ་ཡང་བྱེད་དགོས། སྒྱུར་བཅོས་ལ་དམ་འཛིན་བྱེད་ཕོད་པ་བྱེད་དགོས་ལ། སྒྱུར་བཅོས་ལ་དམ་འཛིན་བྱེད་མཁས་པོ་ཡང་བྱེད་དགོས། འགལ་བ་དང་གནད་དོན་ལ་གདོང་གཏུག་ཕོད་པ་བྱེད་དགོས་ལ། འགལ་བ་དང་གནད་དོན་ཐག་གཅོད་བྱེད་མཁས་པོ་ཡང་བྱེད་དགོས། བྱ་བ་སྒྲུབ་བསམ་པ་དང་བྱ་བ་ངོ་མ་སྒྲུབ་པའི་རང་རྟོགས་ལྡན་དགོས་ལ། བྱ་བ་སྒྲུབ་ཤེས་པ་དང་བྱ་བ་སྒྲུབ་ཐུབ་པའི་འཇོན་ཐང་ཡང་ལྡན་དགོས། ཏང་གི་སྒྲིག་ཁྲིམས་དང་ལས་སྒྲུབ་ལས་གཏོད་ནི་ནང་གནས་གཅིག་གྱུར་ཞིག་ཡིན། སྒྲིག་སྲོལ་དང་སྒྲིག་ཁྲིམས་ལ་བརྩི་སྲུང་ཞུས་ཚེ་ལས་སྒྲུབ་ལས་གཏོད་ཀྱི་རང་དབང་གང་ལེགས་དང་བར་མཐོངས་ཡངས་པོ་ཐོབ་ཐུབ། སྤྱོད་གཙང་དང་ཐེག་པ་ཁུར་ལེན་དབར་གྱི་འབྲེལ་བ་ཐག་གཅོད་ཡང་དག་བྱས་ཏེ། སྤྱོད་གཙང་དང་ཐེག་ཁུར་དང་། སྲིད་ཞུ་དང་སྤྱོད་གཙང་གཅིག་གྱུར་བྱས་ནས་འགན་འཁྲི་ལྕི་པོ་ཁུར་ཕོད་པ་དང་། མཁྲེགས་སར་གཏུག་ཕོད་པ། རྙོག་འཛིང་ཆེ་བའི་གནད་དོན་ཐག་གཅོད་བྱེད་ཕོད་པ་བཅས་བྱེད་དགོས།

རྩོམ་ཡིག་ནང་བསྟན་དོན། ཕྱོགས་ཡོངས་ནས་ཏང་ནན་པོས་སྐྱོང་བ་དང་ཐེག་པ་ཁུར་ལེན་དང་བྱས་རྗེས་འཇོག་པར་སྐུལ་ལྕག་བྱེད་པ་ནི་ནང་གནས་གཅིག་གྱུར་ཡིན་པ་ལས་ཕན་ཚུན་ཁ་གཏད་གཏན་ནས་མིན། དོ་དམ་ནན་པོ་ཞེས་པ་ནི་ཚང་མར་དོ་དམ་ངན་རེངས་བྱས་ནས་མི་རྣམས་སྔ་བལྟས་ཕྱི་བསམ་དང་སྔ་སྐྲག་ཕྱི་སྐྲག་གིས་ཉབ་བེ་ཉོབ་བེ་དང་རེ་མེད་སྤོབས་མེད་ཀྱིས་གང་ཡང་བྱེད་མི་ཕོད་མཁན་དུ་འགྱུར་རྒྱུ་དེ་མ་ཡིན་པར། ཁ་ཕྱོགས་གསལ་སྟོན་དང་། སྒྲིག་ལམ་འཛུགས་པ། སྲོལ་བཟང་དར་སྤེལ། འགོག་སྲུང་གི་ནུས་པ་ཆེ་རུ་གཏོང་བ་བཅས་བརྒྱུད། སྲོལ་བཟང་སྤྱོད་བཟང་གི་ཏང་ནང་ཁུལ་གྱི་ཆབ་སྲིད་ཁོར་ཡུག་ཆགས་པར་བྱས་ནས་ལས་སྒྲུབ་ལས་གཏོད་ལ་ཕན་པའི་ཁོར་ཡུག་བཟང་པོ་ཞིག་བསྐྲུན་ཏེ། ཏང་ཡོངས་ཀྱི་ཧུར་བརྩོན་རང་བཞིན་དང་། རང་འགུལ་རང་བཞིན། གསར་གཏོད་རང་བཞིན་བཅས་སྔར་བས་སྐོང་འཐེན་བྱ་རྒྱུ་དེ་རེད། རྩ་འཛུཌ་ཀྱིས་འགན་འཁྲི་འཁུར་ཕོད་ན་ལས་བྱེད་པར་གཞི་ནས་གདེང་ཚོད་རྙེད་སྲིད། ཐེག་པ་ཁུར་ལེན་བྱེད་མཁན་ལ་འགན་ཁུར་ཕོད་པ་དང་། འགན་འཁྲི་འཁུར་མཁན་ལ་འགན་ཁུར་ཕོད་པ། ལས་ཀ་བྱེད་མཁན་ལ་རྒྱབ་སྐྱོར་བྱེད་ཕོད་པ་བཅས་བྱས་ནས་དོ་དམ་ནན་པོ་དང་གཅེས་སྐྱོང་ཟབ་མོ་ཟུང་འབྲེལ་བྱ་རྒྱུ་མཐའ་འཁྱོངས་དང“དབྱེ་བ་འབྱེད་དགོས་པ་གསུམ”དོན་འཁྱོལ་བྱས་ཏེ། ལས་བྱེད་པས་རང་འགན་ཐེག་པ་ཁུར་ལེན་བྱེད་པར་འགོག་རྐྱེན་བཟོ་བའི་རྒྱུ་རྐྱེན་སྣ་ཚོགས་ཧུར་ཐག་སེལ་དགོས། མི་སྣ་འདེམས་སྤྱོད་བྱེད་པའི་ཐད་ཐེག་ཁུར་ལ་སྣང་ཆེན་དང་མཐོང་ཆེན་བྱེད་པའི་སྟོན་ཕྱོགས་གསལ་པོ་མངོན་པར་བྱས་ནས་བྱ་བ་སྒྲུབ་ཕོད་མིན་དང་། བྱ་བ་སྒྲུབ་འདོད་མིན། བྱ་བ་སྒྲུབ་ཐུབ་མིན་བཅས་ལས་བྱེད་པ་གདམ་གསེས་དང་། བཟང་ངན་ཤན་འབྱེད། བྱ་དགའ་ཆད་གཅོད་དང་གོ་གནས་སྤོར་གཅོག་བཅས་ཀྱི་ཚད་གཞི་གལ་ཆེན་ལ་འཛིན་པ་དང་། ལས་བྱེད་པས་བྱ་བ་གང་ཞིག་བསྒྲུབས་པ་དང་། བྱ་བ་ག་ཚོད་བསྒྲུབས་པ། བསྒྲུབས་པའི་བྱ་བར་རྩ་འཛུགས་དང་མང་ཚོགས་ཀྱི་ཁས་ལེན་ཐོབ་མིན་བཅས་ལས་བྱེད་པ་གདམ་གསེས་བྱེད་པའི་རྩ་བའི་གཞི་འཛིན་སར་འཛིན་པ། འགན་འཁྲི་འཁུར་ཕོད་པ་དང་། ལས་དོན་སྒྲུབ་ཕོད་པ། བྱས་རྗེས་འཇོག་མཁས་པ། གྲུབ་འབྲས་མངོན་གསལ་དོད་པ་བཅས་ཀྱི་ལས་བྱེད་པ་གདམ་གསེས་དང་བསྐོ་སྤྱོད་བྱས་ཏེ་འགན་འཁྲི་འཁུར་འདོད་པ་དང་། འགན་འཁྲི་འཁུར་ཕོད་པ། འགན་འཁྲི་འཁུར་མཁས་པ་བཅས་སྲོལ་བཟང་དུ་འགྱུར་བ་བྱེད་དགོས།